An Banhi kan Halas—Paano Ibinuyagyag?

“Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi.”​—GENESIS 3:15.

 1. (a) Taano ta si Jehova an maogmang Dios? (b) Ano an ginibo nia tanganing mapangyari kitang makihiras sa saiyang kagayagayahan?

SI Jehova iyo an maogmang Dios asin may marahay na dahelan. Sia an kadarudakulai asin nangongorog na Paratao nin mga bagay na marahay, asin mayo nin ano man na makaoolang sa kaotoban kan saiyang mga katuyohan. (Isaias 55:​10, 11; 1 Timoteo 1:​11; Santiago 1:17) Boot nia na an saiyang mga lingkod makihiras sa saiyang kagayagayahan, asin sia nagtatao nin balidong mga dahelan na magibo ninda iyan. Sa siring, sa saro sa pinakamakamomondong panahon sa kasaysayan nin tawo​—an pagrebelde sa Eden—​itinao nia an basihan na kita makatanaw sa ngapit na may paglaom.​—Roma 8:​19-21.

 2. Kan ipinahahayag an paghokom sa mga rebelde sa Eden, paano si Jehova nagtao nin basihan nin paglaom para sa mga gikan ni Adan asin Eva?

² An saro sa espiritung mga aki ni Jehova, paagi sa pagtumang asin pagbalobagi sa Dios, ginibo pa sana an saiyang sadiri na magin Satanas na Diablo. An enot na mga tawo, si Eva dangan si Adan, napairarom sa saiyang impluwensia asin naglapas sa ley ni Jehova na malinaw na isinabi. Sinda tama sanang sinentensiahan na magadan. (Genesis 3:​1-24) Pero, kan ipinahahayag an paghokom sa mga rebeldeng ini, si Jehova nagtao nin basihan nin paglaom para sa mga gikan ni Adan asin Eva. Sa anong paagi? Arog kan nasusurat sa Genesis 3:​15, si Jehova nagsabi: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” An hulang iyan makatatabang sa pagsabot sa bilog na Biblia saka sa nakaagi asin presenteng mga pangyayari na kalabot kapwa an kinaban asin an mga lingkod ni Jehova.

An Kahulogan kan Hula

 3. Arog kan nasasambitan sa Genesis 3:​15, isabi kun siisay (a) an Halas, (b) an “babae,” (c) an “banhi” kan Halas, (d) an “banhi” kan babae.

³ Tanganing masabotan an kahulogan kaiyan, horophoropa an laen-laen na elemento kan hula mismo. An kaolay sa Genesis 3:​15 iyo an Halas​—bakong an hamak na halas kundi an guminamit dian. (Kapahayagan 12:9) An “babae” bakong si Eva kundi an langitnon na organisasyon ni Jehova, an ina kan saiyang linahidan nin espiritung mga lingkod digdi sa daga. (Galacia 4:26) An “banhi” kan Halas iyo an banhi ni Satanas, an saiyang mga gikan​—mga demonyo asin tawo saka organisasyon nin mga tawo na nagpapaheling kan mga ugale ni Satanas asin nin pakikienemigo sa “banhi” kan babae. (Juan 15:​19; 17:15) An “banhi” kan babae sa pangenot iyo si Jesu-Cristo, na linahidan kan banal na espiritu kan 29 C.E. An 144,000, na “namundag giraray . . . gikan sa tubig asin espiritu” asin mga paramana kan langitnon na Kahadean kaiba ni Cristo, subsidiaryong kabtang kan banhing panuga na iyan. An mga ini nagpoon na idagdag sa banhi kan babae poon kan Pentecostes 33 C.E. padagos.​—Juan 3:​3, 5; Galacia 3:​16, 29.

 4. Paano konektado an Genesis 3:​15 sa pagigin paraiso kan daga, na pano nin mga tawo na mayo nin kasalan asin kagadanan?

⁴ An literal na halas sa Eden ginamit bilang parataram kan saro na an pandadaya nagbunga kan pagkawara sa katawohan kan Paraiso. An Genesis 3:​15 nagtotokdo sa panahon na roronoton an saro na nagkontrol sa halas na iyan. Dangan mabubukasan na naman an dalan na an mga lingkod na tawo nin Dios mag-erok sa Paraiso, na mayo nin kasalan asin kagadanan. Iyan magigin magayagaya nanggad na panahon!​—Kapahayagan 20:​1-3; 21:​1-5.

 5. Anong mga ugale an nagpapamidbid sa espirituwal na mga gikan kan Diablo?

⁵ Pagkatapos kan pagrebelde sa Eden, nagpoon na lumataw an mga indibiduwal asin organisasyon na nagpaheling nin mga ugaleng kapareho kan ki Satanas na Diablo​—pagrebelde, pagputik, pagbalobagi, asin paggadan, kaiba an pagtumang sa kabotan ni Jehova asin sa mga nagsasamba ki Jehova. An mga ugaleng iyan nagpamidbid kan mga gikan, kan espirituwal na mga aki, kan Diablo. Kabilang sa mga ini si Cain, na ginadan si Abel kan paboran ni Jehova an pagsamba ni Abel imbes na an ki Cain. (1 Juan 3:​10-12) Si Nimrod saro na an mismong ngaran nagpamidbid sa saiya bilang rebelde asin nagin makosog na paraayam asin namamahala na tumang ki Jehova. (Genesis 10:9) Dugang pa, nagkaigwa nin sunod-sunod na suanoy na mga kahadean, kaiba an Babilonya, na an suportado kan estadong mga relihion napapasikad sa kaputikan, asin an mga ini maringis na inapi an mga nagsasamba ki Jehova.​—Jeremias 50:29.

“Pakikienemigo sa Pag-oltanan Mo Asin kan Babae”

 6. Sa anong mga paagi na si Satanas nagpaheling nin pakikienemigo sa babae ni Jehova?

⁶ Sa laog kan bilog na panahon na ini, may pakikienemigo sa pag-oltanan kan Halas asin kan babae ni Jehova, sa pag-oltanan ni Satanas na Diablo asin kan langitnon na organisasyon ni Jehova na kompuesto nin maimbod na espiritung mga linalang. Ipinaheling an pakikienemigo ni Satanas mantang saiyang dinuduhagi si Jehova asin hinihingoa na ribokon an langitnon na organisasyon ni Jehova, na sinusutsutan an mga anghel na bayaan an saindang tamang erokan. (Talinhaga 27:​11; Judas 6) Ipinaheling iyan kan gamiton ni Satanas an saiyang mga demonyo na hingoahon na olangon an mga mensaherong anghel na isinugo ni Jehova. (Daniel 10:​13, 14, 20, 21) Iyan risang marhay sa ika-20 siglong ini kan pagmaigotan ni Satanas na laglagon an Mesiyanikong Kahadean kan iyan mamundag.​—Kapahayagan 12:​1-4.

 7. Taano an maimbod na mga anghel ni Jehova ta nakamate nin pakikienemigo sa simbolikong Halas, pero anong pagpopogol an ipinaheheling ninda?

⁷ May pakikienemigo man an babae ni Jehova, an grupo nin maimbod na mga anghel, sa simbolikong Halas. Binalobagi ni Satanas an marahay na ngaran nin Dios; kinustion man nia an integridad kan kada saro sa intelihenteng mga linalang nin Dios, kaiba an gabos na anghel, asin sia aktibong naghihingoa na raoton an saindang kaimbodan sa Dios. (Kapahayagan 12:​4a) An maimbod na mga anghel, kerubin, asin serafin talagang makamamate nin pagkabalde sa saro na guminibo sa saiyang sadiri na Diablo asin Satanas. Pero, hinahalat ninda si Jehova na iyo an mag-asikaso sa mga bagay sa saiyang sadiring panahon asin paagi.​—Ikomparar an Judas 9.

Pakikilaban sa Banhi kan Babae nin Dios

 8. Siisay an binabantayan ni Satanas?

⁸ Mientras tanto, binabantayan ni Satanas an ihinulang Banhi kan babae, an saro na sinabi ni Jehova na malugad sa Halas sa payo. Kan ipaisi kan anghel hale sa langit na si Jesus, na namundag sa Betlehem, iyo an “Paraligtas, na iyo si Cristo na Kagurangnan,” ini makosog na patunay na sia magigin an ihinulang Banhi kan babae.​—Lucas 2:​10, 11.

 9. Pagkamundag ni Jesus, paano nagpaheling nin maringis na pakikienemigo si Satanas?

⁹ An maringis na pakikienemigo ni Satanas dai nahaloy ipinaheling kan akiton nia an mga astrologong pagano sa sarong misyon na nagdara sa sainda enot ki Hadeng Herodes sa Jerusalem dangan sa harong sa Betlehem na duman nanompongan ninda an aking si Jesus asin an saiyang ina, si Maria. Dai nahaloy pakalihis kaiyan ipinagboot ni Hadeng Herodes an paggadan sa gabos na aking lalaki poon sa dos anyos pababa, sa laog asin palibot nin Betlehem. Digdi, si Herodes nagpaheling nin satanikong pagkaongis sa Banhi. Malinaw na aram na marhay ni Herodes na hinihingoa niang gadanon an saro na iyo an magigin Mesiyas. (Mateo 2:​1-6, 16) Pinatutunayan nin kasaysayan na si Hadeng Herodes daing konsensia, tuso, asin paragadan​—talagang saro sa banhi kan Halas.

10. (a) Pakatapos kan bautismo ni Jesus, paano si Satanas personal na naghingoa na olangon an katuyohan ni Jehova mapadapit sa ipinanugang Banhi? (b) Paano ginamit ni Satanas an Judiong mga namomoon sa relihion sa paghihingoang maotob an saiyang mga katuyohan?

¹⁰ Pakatapos na si Jesus lahidan nin banal na espiritu kan 29 C.E. asin si Jehova magtaram hale sa langit na minimidbid si Jesus bilang saiyang Aki, si Satanas paorootrong naghingoa na sugotan si Jesus, sa siring nagmamaigot na olangon an katuyohan ni Jehova mapadapit sa saiyang Aki. (Mateo 4:​1-10) Kan masudya sa bagay na iyan, guminamit na naman sia nin mga ahenteng tawo tanganing maotob an saiyang mga katuyohan. Kabilang sa mga ginamit sa pagprobar na si Jesus halean nin marahay na dangog iyo an parasaginsagin na mga namomoon sa relihion. Naggamit sinda nin mga kaputikan asin pagbalobagi, an klase nin mga pakana na ginagamit mismo ni Satanas. Kan sabihan ni Jesus an sarong paralitiko, “Magmapuso ka, . . . an saimong mga kasalan pinatawad na,” an mga eskriba hinokoman si Jesus na paralanghad, na dai hinalat na maheling kun baga talagang naomayan an tawo. (Mateo 9:2-7) Kan si Jesus magpaomay sa mga tawo sa aldaw nin Sabbath, an mga Fariseo pinagdenunsiar sia bilang paralapas kan ley sa Sabbath asin nagpaharatolhatol na gadanon sia. (Mateo 12:​9-14; Juan 5:​1-18) Kan si Jesus magpaluwas nin mga demonyo, an mga Fariseo nagsahot na sia kaiba ni “Beelzebub, an namamahala sa mga demonyo.” (Mateo 12:​22-24) Pakatapos na si Lazaro binuhay hale sa mga gadan, dakol na tawo an nagtubod ki Jesus, alagad an mga poon na saserdote asin Fariseo nagpaharatolhatol na naman na gadanon sia.​—Juan 11:​47-53.

11. Tolong aldaw bago nagadan si Jesus, siisay an ipinamidbid nia na kabtang kan banhi kan Halas, asin taano?

¹¹ Kan Nisan 11, 33 C.E., si Jesus, minsan ngani aram na gayo an saindang pakana, daing takot na naglaog mismo sa templo sa Jerusalem asin duman ipinahayag sa publiko an paghokom sa sainda. Bilang sarong grupo, an mga eskriba asin Fariseo daing pagliwatliwat na ipinaheling kun anong klase sindang mga tawo; kaya si Jesus nagsabi: “Herak man sa saindo, mga eskriba asin mga Fariseo, mga parasaginsagin! huli ta pinipintoan nindo an kahadean kan kalangitan sa mga tawo; huli ta kamo mismo dai minalaog, ni tinotogotan nindo an mga minalaog na makalaog.” Diretsahan na sinabi ni Jesus na sinda kabtang kan banhi kan Halas, na sinasabi: “Mga halas, aki nin mga rimoranon, paano kamo makadudulag sa silot nin Gehenna?” (Mateo 23:​13, 33) An saiyang pananaram nagpapagirumdom kan hula sa Genesis 3:15.

12, 13. (a) Paano nagtao nin dugang na ebidensia an mga poon na saserdote asin an mga eskriba sa kun siisay an saindang espirituwal na ama? (b) Siisay an uminiba sa sainda? (c) Bilang kaotoban kan Genesis 3:​15, paano linugad sa bool an Banhi kan babae?

¹² Kan madangog an mga tataramon ni Jesus, nataros daw an saindang puso, kaya sinda nag-arang nin pagkaherak sa Dios? Pinagsolsolan daw ninda an saindang karatan? Dai! An Marcos 14:​1 nagbabareta na kan mismong sumunod na aldaw, sa sarong miting sa patyo kan halangkaw na saserdote, “an mga poon na saserdote asin an mga eskriba naghahanap nin paagi na [si Jesus] dakopon paagi sa tusong pakana asin gadanon sia.” Padagos sindang nagpaheling kan mapangadan na espiritu ni Satanas, na bago kaini inapod na ni Jesus na paragadan. (Juan 8:44) Dai nahaloy uminiba sa sainda si Judas Iscariote, na tinentaran ni Satanas na magin apostata. Tinalikdan ni Judas an daing kanawayan na Banhi kan babae nin Dios asin inibanan an banhi kan Halas.

¹³ Kan amay na aga nin Nisan 14, an mga miembro kan relihiosong hokoman nin mga Judio dinara si Jesus bilang bilanggo sa Romanong gobernador. Digdi an mga poon na saserdote an nangenot sa pagkurahaw na sia ipako. Kan ihapot ni Pilato, “Ipapako ko an saindong hade?” an mga poon na saserdote an nagsimbag, “Mayo kaming hade kundi si Cesar.” (Juan 19:​6, 15) Tunay nanggad, pinatunayan ninda sa gabos na paagi na sinda kabtang kan banhi kan Halas. Alagad ta dai nanggad sinda nasosolo. An ipinasabong na tala sa Mateo 27:​24, 25 nagtatao kan baretang ini: “Si Pilato nagkua nin tubig asin naghanaw kan saiyang mga kamot sa atubangan kan kadaklan.” Dangan an bilog na banwaan nagsabi: “An saiyang dugo mapasamuya asin sa samong mga aki.” Sa siring an dakol na Judio kan kapag-arakian na idto ipinamidbid an sadiri na kabtang kan banhi kan Halas. Bago natapos an aldaw na idto, gadan na si Jesus. Paagi sa paggamit kan saiyang naheheling na banhi, linugad ni Satanas sa bool an Banhi kan babae nin Dios.

14. Taano an paglugad sa bool kan Banhi kan babae ta dai nangahulogan nin kapangganahan para ki Satanas?

¹⁴ Nanggana daw si Satanas? Dai nanggad! Si Jesu-Cristo nanggana sa kinaban asin dinaog an namamahala dian. (Juan 14:​30, 31; 16:33) Napagdanay nia an saiyang kaimbodan ki Jehova sagkod sa kagadanan. An saiyang kagadanan bilang sangkap na tawo nagtao kan halagang pantubos na kaipuhan tanganing mabalukat an diretso sa buhay na iwinara ni Adan. Kaya binukasan nia an dalan pasiring sa buhay na daing sagkod para sa mga magibo nin pagtubod sa probisyon na iyan asin makuyog sa mga togon nin Dios. (Mateo 20:​28; Juan 3:16) Binuhay ni Jehova si Jesus hale sa mga gadan pasiring sa inmortal na buhay sa langit. Sa itinalaan na panahon ni Jehova, roronoton ni Jesus si Satanas sagkod na mapara. Sa Genesis 22:​16-18, ihinula na pahehelingan ni Jehova nin pabor an gabos na pamilya sa daga na naggigibo kan kinakaipuhan na aksion na bendisyonan an saindang sadiri paagi sa maimbod na Banhing iyan.

15. (a) Pagkagadan ni Jesus, paano ipinadagos kan saiyang mga apostol an pagbuyagyag kan banhi kan Halas? (b) Ano pang dugang na pakikilaban an ipinahayag kan banhi kan Halas sagkod sa satong kaaldawan?

¹⁵ Pagkagadan ni Jesus, ipinadagos kan linahidan nin espiritung mga Kristiano na ibuyagyag an banhi kan Halas, arog kan ginibo kan saindang Kagurangnan. Pinahiro kan banal na espiritu, si apostol Pablo nagpatanid tumang sa “tawo nin katampalasanan” na an presensia “sono sa paghiro ni Satanas.” (2 Tesalonica 2:​3-10) An “tawong” ini na sarong grupo nin mga indibiduwal napatunayan na iyo an klero nin Kakristianohan. An banhi kan Halas maisog man na pinaglamag an mga parasunod ni Jesu-Cristo. Sa hula na nasusurat sa Kapahayagan 12:​17, ihinula ni apostol Juan na si Satanas padagos na makikilaban tumang sa natatada kan banhi kan babae nin Dios sagkod sa satong kaaldawan. Iyan an eksaktong nangyari. Sa kadakol na kadagaan, an Mga Saksi ni Jehova pinangaladan, pinagsururogan, ibinilanggo, o ibinugtak sa mga kampo de konsentrasyon huli sa saindang marigon na paninindogan para sa Kahadean nin Dios asin sa saiyang matanos na mga dalan.

Pagbuyagyag sa Modernong Aldaw kan Banhi kan Halas

16. Sa modernong mga panahon, sairisay an ibinuyagyag na kabtang kan banhi kan Halas, asin paano?

¹⁶ Sa pag-arog ki Jesu-Cristo, an tunay na mga Kristiano dai nag-ontok sa saindang daing takot na pagbuyagyag kan Halas asin kan saiyang banhi. Kan 1917 ipinublikar kan Mga Estudyante sa Biblia, na apod kaidto sa Mga Saksi ni Jehova, an librong The Finished Mystery, na dian ibinuyagyag ninda an pagsaginsagin kan klero nin Kakristianohan. Sinundan ini, kan 1924, nin inimprentang resolusyon na may titulong Ecclesiastics Indicted. An 50 milyones na kopya iwinaras nin internasyonal. Kan 1937, si J. F. Rutherford, an presidente kaidto kan Watch Tower Society, nagpahayag nin mapuersang mga pagbuyagyag kan banhi ni Satanas sa mga diskurso na may titulong “Ibinuyagyag” saka “Relihion Asin Kristianismo.” Kan sumunod na taon, mantang naghihinanyog an 50 grupo nin mga kombensionista sa laen-laen na kadagaan, itinao nia an diskursong “Atubangon an mga Katunayan” paagi sa radyotelepono hale sa Londres, Inglaterra. Pakalihis nin sarong bulan, an mahiwas na pagkakakonektar nin radyo sa Estados Unidos nagbrodkast kan pahayag na “Fascismo o Katalingkasan.” Dinagdagan ini nin mapuersang mga pagbuyagyag sa mga libro na arog kan Enemies asin Religion saka sa pulyetong Uncovered. Kaoyon sa ipinublikar poon kan mga taon nin 1920, an librong Revelation​—Its Grand Climax At Hand!,a na ngonyan naimprenta na sa 65 lenguahe, ipinamimidbid an maraot na politikal na mga namamahala asin an mahanab, daing prinsipyong mga negosyante bilang kabilang sa pangenot na mga miembro kan naheheling na banhi kan Halas. Kun an politikal na mga namomoon ginigibong ugale an pagputik sa paglagalag kan saindang mga nasasakopan, an dai paggalang sa kabanalan nin dugo, asin an pan-aapi sa mga lingkod ni Jehova (sa siring nagpapaheling nin pagkaongis sa banhi kan babae nin Dios), tunay na ipinamimidbid ninda an saindang sadiri bilang kabtang kan banhi kan Halas. Totoo man iyan sa mga negosyante na, dai man lamang nakokonsensia, nagpuputik para sa pinansial na ganansia asin nagmamanupaktura o nagpapabakal nin mga produkto na aram na ginigikanan nin helang.

17. Anong oportunidad an bukas pa para sa prominenteng mga indibiduwal na tibaad lumuwas sa palakaw kan kinaban?

¹⁷ Bakong gabos na indibiduwal na nadigtaan nin kinabanon na relihion, politika, o negosyo sa katapustapusi ibibilang na kabtang kan banhi kan Halas. An iba sa mga lalaki asin babaeng ini hanga sa Mga Saksi ni Jehova. Ginagamit ninda an saindang impluwensia sa pagtabang sa sainda asin pag-abot nin panahon sinda naggigibo kan tunay na pagsamba. (Ikomparar an Gibo 13:​7, 12; 17:​32-​34.) Para sa gabos na siring, ipinaaabot an pakiolay na ini: “Ngonyan, O mga hade, maggibo kamo nin pakarorop; pabayae nindo na kamo itanos, O mga hokom kan daga. Maglingkod ki Jehova na may pagkatakot asin maggayagaya na may pagtakig. Humadok sa aki, tanganing Sia dai maanggot asin dai kamo mapara, huli ta an saiyang kaanggotan madaling lumaad. Maogma an gabos na minapaili sa saiya.” (Salmo 2:​10-12) Tunay nanggad na mahalagang marhay para sa gabos na nagmamawot kan pabor ni Jehova na humiro na ngonyan, bago pintoan kan langitnon na Hokom an tata nin oportunidad!

18. Minsan ngani bakong kabtang kan banhi kan babae, sairisay an mga nagsasamba pa man giraray ki Jehova?

¹⁸ Solamente idtong mga makompuesto sa langitnon na Kahadean an kabtang kan banhi kan babae. An mga ini pira sana an kabilangan. (Kapahayagan 7:​4, 9) Pero, igwa nin dakulang kadaklan nin iba pa, iyo, minilyon, na bilang mga nagsasamba ki Jehova naglalaom sa buhay na daing sagkod sa sarong paraisong daga. Kapwa paagi sa tataramon asin sa gibo, sinasabi ninda sa mga linahidan ni Jehova: “Maiba kami sa saindo, huli ta nabaretaan niamo na an Dios yaon dian sa saindo.”​—Zacarias 8:23.

19. (a) Anong pagpili an dapat na gibohon nin gabos na tawo? (b) Sairisay partikularmente an odok na pinakikiolayan na humiro nin madonong mantang igwa pa nin oportunidad?

¹⁹ Ngonyan na an panahon na an bilog na katawohan dapat na pumili. Boot daw ninda na sumamba ki Jehova asin sumuportar sa saiyang soberaniya, o itotogot daw ninda na si Satanas an mamahala sa sainda paagi sa paggibo kan mga bagay na ikinaoogma nia? An mga limang milyon katawo hale sa gabos na nasyon nanindogan sa lado ni Jehova kaiba kan mga natatada kan banhi kan babae, an mga paramana kan Kahadean. Otso milyones pa an nagpaheling nin interes sa pag-adal kan Biblia kaiba ninda o sa pag-atender sa saindang mga pagtiripon. An Mga Saksi ni Jehova nagsasabi sa gabos na ini: Bukas pa an tata nin oportunidad. Manindogan kamo na dai mapagdududahan sa lado ni Jehova. Midbidon si Cristo Jesus bilang an ipinanugang Banhi. Magayagayang makiasosyar sa naheheling na organisasyon ni Jehova. Makapakikabtang logod kamo sa gabos na bendisyon na itatao Nia paagi sa pamamahala kan Hade, si Cristo Jesus.

[Nota sa ibaba]

Nagigirumdoman daw Nindo?

◻ Siisay an Halas na nasambitan sa Genesis 3:​15? Asin siisay an babae?

◻ Anong mga ugale an nagpapamidbid sa banhi kan Halas?

◻ Paano ibinuyagyag ni Jesus an banhi kan Halas?

◻ Sairisay an ibinuyagyag bilang kabtang kan banhi kan Halas sa modernong mga panahon?

◻ Anong apretadong paghiro an hinahagad tanganing makalikay na ikabilang sa banhi kan Halas?

[Retrato sa pahina 10]

Ibinuyagyag ni Jesus an parasaginsagin na mga namomoon sa relihion bilang kabtang kan banhi kan Halas