Igwa daw Kamo nin Inmortal na Espiritu?

“AN GABOS na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan,” an isinurat ni apostol Pablo. (2 Timoteo 3:16) Iyo, an Biblia sarong libro nin katotoohan na hale sa tunay na Dios, si Jehova.​—Salmo 83:18.

Mantang si Jehova an Kaglalang kan gabos na bagay, kaiba an mga tawo, aram niang marhay kun ano an nangyayari sa sato pagnagadan kita. (Hebreo 3:4; Kapahayagan 4:11) Asin sa saiyang ipinasabong na Tataramon, an Biblia, itinao nia an sadiosan asin nakakokontentong mga simbag sa mga hapot manongod sa buhay pagkagadan.

Ano an Espiritu?

Sa Biblia, an mga termino na trinadusir na “espiritu” sa pundamental nangangahulogan “hinangos.” Alagad labi pa nanggad sa paghangos sana an ipinapakahulogan kaini. Halimbawa, an kagsurat sa Biblia na si Santiago nagsasabi: “An hawak na daing espiritu gadan.” (Santiago 2:26) Huli kaini, an espiritu iyo an nagtataong buhay sa hawak.

An puersang ini na nagtataong buhay dai puedeng an hinangos sana, o aire, na nag-aagi sa pulmon. Taano ta dai? Huli ta pakatapos na magpondo an paghangos, may buhay pa sa mga selula nin hawak sa halipot na panahon​—“sa laog nin nagkapirang minuto,” segun sa The World Book Encyclopedia. Sa rason na ini, puedeng magin mapanggana an mga paghihingoa sa resusitasyon. Alagad oras na maparong an silyab nin buhay sa mga selula kan hawak, an ano man na mga paghihingoa na ibalik an buhay basang sana. Dawa an gabos na hinangos, o aire, sa kinaban dai kayang ibalik an buhay maski nin sarong selula. Kun siring, an espiritu iyo an dai naheheling na puersa nin buhay​—an silyab nin buhay na pinagdadanay na buhay an mga selula asin an tawo. An puersa nin buhay na ini sinususteniran nin paghangos.​—Job 34:​14, 15.

Sa tawo sana daw aktibo an espiritung iyan? Tinatabangan kita kan Biblia na makaabot sa tamang konklusyon sa bagay na ini. Rinekonoser kan madonong na si Hadeng Salomon na an mga tawo asin hayop “gabos sasaro sana an espiritu,” asin sia naghapot: “Siisay an nakaaaram kan espiritu kan mga aki nin katawohan, kun baga iyan minasakat paitaas; asin kan espiritu kan hayop, kun baga iyan minahilig pababa sa daga?” (Eclesiastes 3:19-21) Kaya an mga hayop siring man an mga tawo sinasabi na igwa nin espiritu. Paano mangyayari iyan?

An espiritu, o puersa nin buhay, ikakokomparar sa koryente na nagdadalagan sa sarong makina o kasangkapan. An dai naheheling na elektrisidad puedeng makagibo nin laen-laen na trabaho, depende sa klase nin kasangkapan na pinaaandar kaiyan. Halimbawa, an de-koryenteng kalan puedeng painiton, an komputer magproseso nin impormasyon, asin an telebisyon magpaluwas nin mga retrato asin tanog. Pero, an koryente nungkang nagkakaigwa kan mga karakteristiko kan kasangkapan na pinaaandar kaiyan. Iyan nagdadanay na saro sanang puersa. Kaagid kaiyan, an puersa nin buhay dai nagkakaigwa kan arin man sa mga karakteristiko kan mga linalang na tinatawan nin buhay kaiyan. Iyan mayo nin personalidad asin mayo nin kakayahan sa pag-iisip. An mga tawo asin hayop “sasaro sana an espiritu.” (Eclesiastes 3:19) Kun siring, kun an tawo magadan, an saiyang espiritu dai nagpapadagos na mag-eksister sa ibang rona bilang espiritung linalang.

Kun siring, ano an kamugtakan kan mga gadan? Asin ano an nangyayari sa espiritu kun an sarong tawo magadan?

“Sa Kabokabo Ka Man Mabalik”

Kan an enot na tawo, si Adan, tuyong sinuway an pagboot nin Dios, Sia nagsabi sa saiya: “Sa ganot kan saimong lalauogon makakan ka nin tinapay sagkod na ika bumalik sa daga, huli ta dian ka kinua. Huli ta ika kabokabo asin sa kabokabo ka man mabalik.” (Genesis 3:19) Haen si Adan bago sia lalangon ni Jehova hale sa kabokabo? Tara, mayo sia dawa saen! Dai talaga sia nag-eeksister. Kaya kan sabihon ni Jehova Dios na si Adan ‘mabalik sa daga,’ an boot niang sabihon si Adan magagadan asin mabalik sa mga elemento sa daga. Si Adan dai mabalyo sa rona nin mga espiritu. Sa pagkagadan si Adan sa giraray dai na maeksister. An padusa sa saiya kagadanan​—kadaihan nin buhay​—bakong pagbalyo sa ibang rona.​—Roma 6:23.

Kumusta man an ibang nagadan na? An kamugtakan kan mga gadan linilinaw sa Eclesiastes 9:​5, 10, na dian mababasa niato: “An mga gadan daing aram . . . Mayo nin okupasyon, mayo nin plano, mayo nin kaaraman o intelihensia, sa laog kan lolobngan.” (Moffatt) Kun siring, an kagadanan sarong kamugtakan nin dai pag-eksister. An salmista nagsurat na kun an sarong tawo magadan, “an saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.”​—Salmo 146:4.

Malinaw nanggad, an mga gadan dai nag-eeksister. Dai sinda puedeng makaaram nin ano man. Dai ninda kamo naheheling, nadadangog, o makakaolay. Dai ninda kamo matatabangan ni makokolgan man kamo. Dai nanggad nindo dapat katakotan an mga gadan. Alagad paanong an espiritu “minaluwas” sa sarong tawo pagnagadan sia?

An Espiritu “Minabalik sa Tunay na Dios”

An Biblia nagsasabi na pagnagadan an sarong tawo, “an espiritu mismo minabalik sa tunay na Dios na nagtao kaiyan.” (Eclesiastes 12:7) Nangangahulogan daw ini na an sarong bagay na espiritu literal na nagbibiahe sa espasyo pasiring sa presensia nin Dios? Dai man! An paagi kan paggamit kan Biblia sa terminong “minabalik” dai man naghahagad nin aktuwal na paghiro hale sa sarong lugar pasiring sa ibang lugar. Halimbawa, an bakong fiel na mga Israelita sinabihan: “‘Pagbalik kamo sa sako, asin ako mabalik sa saindo,’ an sabi ni Jehova kan mga hukbo.” (Malaquias 3:7) An ‘pagbalik’ kan Israel ki Jehova nangahulogan nin pagbakle hale sa salang dalan asin pagkomporme giraray sa matanos na dalan nin Dios. Asin an ‘pagbalik’ ni Jehova sa Israel nangahulogan nin pagtao giraray nia nin paborableng atension sa saiyang banwaan. Sa duwang kamugtakan kalabot sa ‘pagbalik’ an aktitud, bakong an literal na pagbalyo nin geograpikong lugar.

Kaagid kaiyan, sa pagkagadan mayo nin aktuwal na nangyayaring pagbalyo hale sa daga pasiring sa langitnon na rona kun an espiritu “minabalik” sa Dios. Oras na mawara an puersa nin buhay sa sarong tawo, an Dios sana an may kakayahan na ibalik iyan sa saiya. Kaya an espiritu “minabalik sa tunay na Dios” sa sentido na an ano man na paglaom nin buhay sa ngapit para sa tawong iyan biyo nang nakadepende ngonyan sa Dios.

Halimbawa, estudyare an sinasabi kan Kasuratan manongod sa kagadanan ni Jesu-Cristo. An kagsurat nin Ebanghelyo na si Lucas nagsasaysay: “Si Jesus nag-apod sa makosog na tingog asin nagsabi: ‘Ama, sa saimong mga kamot ipinagkakatiwala ko an sakong espiritu.’ Kan nasabi na nia ini, nagadan sia.” (Lucas 23:46) Mantang minaluwas an espiritu ni Jesus sa saiya, bakong literal na sia pasiring sa langit. Si Jesus dai binuhay liwat hale sa mga gadan sagkod sa ikatolong aldaw, asin pakalihis nin 40 aldaw na sia suminakat sa langit. (Gibo 1:​3, 9) Minsan siring, kan panahon na sia magadan, may kompiansang ipinaniwala ni Jesus an saiyang espiritu sa kamot kan saiyang Ama, na biyong nagtitiwala sa kakayahan ni Jehova na ibalik an saiyang buhay.

Iyo, kayang ibalik nin Dios an buhay nin sarong tawo. (Salmo 104:30) Kanigoan kamuraway na oportunidad an binubuksan kaini!

Sarong Siertong Paglaom

An Biblia nagsasabi: “An oras maabot na an gabos na nasa mga lolobngan na girumdoman makadadangog kan . . . tingog [ni Jesus] asin maruluwas.” (Juan 5:​28, 29) Iyo, si Jesu-Cristo nanuga na an gabos na nasa girumdoman ni Jehova bubuhayon liwat, o ibabalik sa buhay. Magigin kabilang nanggad sa sainda an mga nagsunod sa matanos na dalan bilang mga lingkod ni Jehova. Alagad minilyon na iba pa an nagadan na dai nakapaheling kun baga sinda masunod sa matanos na mga pamantayan nin Dios. Magsalang dai ninda naaraman an manongod sa mga kahagadan ni Jehova o mayo sinda nin igong panahon tanganing gibohon an kaipuhan na mga pagbabago. An mga indibiduwal na siring kaini nasa girumdoman man nin Dios asin bubuhayon liwat, huli ta an Biblia nagsasabi: “Magkakaigwa nin pagkabuhay liwat an mga matanos sagkod an mga bakong matanos.”​—Gibo 24:15.

Ngonyan, an daga pano nin pagkaongis asin iriwal, kadahasan asin pagpabolos nin dugo, polusyon asin helang. Kun an mga gadan mabuhay na giraray sa siring kaiyan na daga, segurado na an ano man na resultang kaogmahan magigin temporaryo sana. Alagad an Kaglalang nanuga na tataposon nia sa dai na mahahaloy an presenteng sosyedad nin kinaban na nasa kontrol ni Satanas na Diablo. (Talinhaga 2:​21, 22; Daniel 2:​44; 1 Juan 5:19) Dangan magigin sarong makangangalas na katunayan an sarong matanos na sosyedad nin tawo​—“sarong bagong daga.”​—2 Pedro 3:13.

Sa panahon na iyan “mayo nin nag-eerok na masabi: ‘Naghehelang ako.’” (Isaias 33:24) Pati an labi-labing kamondoan huli sa kagadanan hahaleon na, huli ta “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:4) Kanigoan na oportunidad ini para sa mga “nasa mga lolobngan na girumdoman”!

Kun paraon na ni Jehova an karatan sa daga, dai nia lalaglagon an mga matanos kaiba kan mga maraot. (Salmo 37:​10, 11; 145:20) Sa katunayan, “sarong dakulang kadaklan” nin mga tawo “hale sa gabos na nasyon asin tribo asin banwaan patin tataramon” an maliligtas “sa dakulang kahorasaan,” na malaglag sa presenteng maraot na kinaban. (Kapahayagan 7:9-14) Huli kaini, sarong dakulang kaburunyogan an yaon sa pag-ako liwat sa mga gadan.

Hinihimuyawot daw nindong maheling giraray an saindong mga namomotan? Mawot daw nindong mabuhay sagkod lamang sa Paraiso digdi sa daga? Kun siring dapat nindong ilaog sa isip an tamang kaaraman mapadapit sa kabotan asin mga katuyohan nin Dios. (Juan 17:3) Kabotan ni Jehova na “an gabos na klase nin tawo makaligtas asin makaabot sa tamang kaaraman sa katotoohan.”​—1 Timoteo 2:​3, 4.

[Ritrato sa pahina 4]

“Ika kabokabo asin sa kabokabo ka man mabalik”

[Ritrato sa pahina 5]

An espiritu ikakokomparar sa elektrisidad

[Ritrato sa pahina 7]

An pagkabuhay liwat magbubunga nin nagdadanay na kagayagayahan