Si Jehova Tataong Magligtas kan Saiyang Banwaan

“Si Jehova tataong magligtas sa mga tawong may diosnon na debosyon hale sa pagbalo.” ​—2 PED. 2:​9, NW.

TAANO TA MAKAKAPAGTIWALA KITA NA:

Aram ni Jehova kun noarin mangyayari an mga bagay-bagay bilang pag-otob kan saiyang katuyohan?

Gagamiton ni Jehova an saiyang kapangyarihan tanganing mag-interbenir para sa saiyang banwaan?

Aram ni Jehova kun paano eksaktong mangyayari an mga bagay-bagay durante kan dakulang kahorasaan?

 1. Anong mga kamugtakan an kaiba kan “dakulang kahorasaan”?

AN PAGSAGIBO kan paghokom nin Dios sa kinaban ni Satanas mapoon nin biglang-bigla. (1 Tes. 5:​2, 3) Durante kan ‘dakulang aldaw ni Jehova,’ an sosyedad nin mga tawo sa daga magkakariribaraw. (Sof. 1:​14-17) Magkakaigwa nin grabeng kasakitan asin kakulangan. Magigin panahon iyan nin kasakitan ‘na dai pang kaagid na nangyari magpoon sa kapinonan nin kinaban sagkod ngonyan.’​—Basahon an Mateo 24:​21, 22.

2, 3. (a) Sa ano mapapaatubang an banwaan nin Dios durante kan “dakulang kahorasaan”? (b) Ano an makakapakosog sa sato para sa mga mangyayari pa?

² Mantang an “dakulang kahorasaan” pasiring sa kulminasyon kaiyan, an banwaan nin Dios an magigin punteriya nin determinadong pagsalakay ni ‘Gog kan daga nin Magog.’ Durante kan pagsalakay na ini, may dakulang ‘hukbong’ militar na maabot tumang sa banwaan nin Dios na “garo oranon [mga panganoron] na matahob kan daga.” (Ezeq. 38:​2, 14-16) Mayo nin ahensia nin tawo na madepensa sa banwaan ni Jehova. Sa Dios sana nakadepende an saindang kaligtasan. Ano an magigin reaksion ninda kun mapaatubang sa pagpoho?

³ Kun lingkod ka ni Jehova, igwa ka daw nin pagtubod na kaya ni Jehova asin iingatan niang buhay an saiyang banwaan sa dakulang kahorasaan? Si apostol Pedro nagsurat: “Si Jehova tataong magligtas sa mga tawong may diosnon na debosyon hale sa pagbalo, alagad tataong magtagama kan mga tawong bakong matanos para sa aldaw nin paghokom tanganing gadanon.” (2 Ped. 2:​9, NW) An paghorophorop sa nakaaging mga gibo nin pagliligtas ni Jehova makakapakosog sa sato para sa mga mangyayari pa. Pag-olayan niato an tolong halimbawa na matabang sa sato na magsarig sa kakayahan ni Jehova na iligtas an saiyang banwaan.

NAKALIGTAS SA SARONG DELUBYO NA LAKOP SA GLOBO

 4. May koneksion sa Baha, taano ta mahalagang mahaman an mga bagay-bagay sa tamang panahon?

⁴ Enot, estudyaran an pagkasaysay dapit sa Baha kan panahon ni Noe. Tanganing magibo an kabotan ni Jehova, mahalagang mahaman an mga bagay-bagay sa tamang panahon. An dakulaon na trabahong pagtogdok kan arka kaipuhan na matapos, asin an mga hayop kaipuhan na ligtas na ikalaog sa arka bago an Baha. Ihinahayag kan pagkasaysay sa Genesis na dai naghalat si Jehova na ikatogdok nguna an arka bago magdesisyon kun noarin papangyayarihon an Baha, na garo baga kaipuhan niang bagohon an iskedyul sa pagpaabot kan Baha enkaso maatraso an proyektong pagtogdok. Imbes, haloy pa bago sia magsabi nin ano man ki Noe manongod sa pagtogdok nin arka, itinalaan na nin Dios kun noarin mapoon an Baha. Paano niato naaraman iyan?

 5. Ano an ipinahayag ni Jehova sa mga tataramon sa Genesis 6:​3, asin kasuarin itinao an pagboot na ini?

⁵ Sinasabi sa sato kan Biblia na nagtao si Jehova nin pagboot sa langit. Oyon sa Genesis 6:​3, sinabi nia: ‘Sagkod noarin pa man an sakong espiritu dai makikipag-iwal sa tawo, huli ta sia laman. An saiyang mga aldaw magigin [siento beinteng] taon.’ Dai ini nanonongod sa lawig kan buhay nin tawo sa pangkagabsan. Saro iyan na hudisyal na pagboot na ipinahayag ni Jehova dapit sa kun noarin sia mahiro tanganing haleon sa daga an karatan.a Huling nagpoon an Baha kan 2370 B.C.E., masasabi niato na ipinahayag ini nin Dios kan 2490 B.C.E. Kan panahon na idto, si Noe 480 anyos. (Gen. 7:6) Pakalihis nin mga 20 taon, kan taon 2470 B.C.E., nagpoon na magkaigwa nin mga aki si Noe. (Gen. 5:32) Mga sanggatos na taon pa kaidto an natatada bago magpoon an Baha, alagad dai pa ihinahayag ni Jehova ki Noe an magigin espesyal na papel kaini tanganing mapagdanay an pamilya nin tawo. Gurano kalawig naghalat an Dios bago nia iyan sinabi ki Noe?

 6. Kasuarin pinagbotan ni Jehova si Noe na itogdok an arka?

⁶ Minalataw na naghalat nin mga dekada si Jehova bago ihinayag ki Noe an gigibohon Nia. Basado sa ano an kongklusyon tang ini? Ipinaparisa kan ipinasabong na rekord na an mga aki ni Noe darakula na asin may agom na kan pagbotan nin Dios si Noe na itogdok an arka. Si Jehova nagsabi sa saiya: ‘Ibubugtak ko an tipan ko saimo, asin ta malaog ka sa sakayan, asin an saimong mga aki asin an saimong agom, asin an mga agom kan saimong mga aking lalaki.’ (Gen. 6:​9-18) Kun siring, posible na kan akoon ni Noe an sugo na itogdok an arka, 40 o 50 taon na sana bago an Baha.

 7. (a) Paano nagpaheling nin pagtubod si Noe asin an saiyang pamilya? (b) Kasuarin sa katapustapusi sinabi nin Dios ki Noe kun noarin eksaktong mapoon an Baha?

⁷ Mantang nagpapadagos an pagtogdok kan arka, siertong nag-iisip si Noe asin an saiyang pamilya kun paano ootobon nin Dios an saiyang katuyohan asin kun noarin mapoon an Baha. Pero, an saindang kadaihan nin kaaraman sa mga detalyeng ini dai nagpaontok sa sainda na itogdok an arka. An Kasuratan nagsasabi: ‘Siring an ginibo ni Noe; ginibo siring sa ipinagboot gabos saiya nin Dios.’ (Gen. 6:22) Sa katapustapusi, pitong aldaw bago an Baha​—na igong panahon nanggad para ki Noe asin sa saiyang pamilya na ikalaog an mga hayop sa arka​—sinabi ni Jehova ki Noe kun noarin eksaktong mapoon an Baha. Huli kaini, kan an mga gaha kan kalangitan nagkaburukasan ‘kan ikaanom na gatos na taon kan buhay ni Noe, kan ikaduwang bulan, [ikadesisieteng] aldaw kan bulan,’ andam na an gabos.​—Gen. 7:​1-5, 11.

 8. Paano an pagkasaysay dapit sa Baha nakakatabang sa sato na magsarig na aram ni Jehova kun noarin ililigtas an saiyang banwaan?

⁸ Pinatunayan kan pagkasaysay dapit sa Baha an abilidad ni Jehova bako sana bilang Paratalaan nin Panahon kundi bilang Paraligtas man. Mantang nagrarani na kita sa katapusan kan presenteng sistema nin mga bagay, makakasierto kita na an gabos na katuyohan ni Jehova mangyayari sa saiyang itinalaan na panahon, sa mismong ‘aldaw asin oras.’​—Mat. 24:36; basahon an Habacuc 2:3.

ILINIGTAS SA DAGAT NA PULA

9, 10. Paano ginamit ni Jehova an saiyang banwaan tanganing siodon an mga hukbong militar nin Egipto?

⁹ Sagkod sa puntong ini, naheling niato na lubos na kontrolado ni Jehova kun noarin mangyayari an mga bagay-bagay bilang pag-otob kan saiyang katuyohan. An ikaduwang halimbawa na pag-oolayan niato nagtatampok nin saro pang dahelan na puede kitang magtiwala na ililigtas ni Jehova an saiyang banwaan: Gagamiton nia an daing sagkod na kapangyarihan, sa ano man na oras na gusto nia, tanganing siertohon na mangyari an saiyang kabotan. May kakayahan nanggad si Jehova na iligtas an saiyang mga lingkod, na kun beses ginagamit pa ngani nia sinda tanganing siodon an saiyang mga kaiwal. Iyan an nangyari kan an mga Israelita patalingkason nia sa pagkaoripon sa Egipto.

¹⁰ An mga Israelita na naghale sa Egipto tibaad mga tolong milyon. Ginamit ni Jehova si Moises tanganing giyahan an banwaan sa paagi na iisipon ni Faraon na nagkakaralagalag sinda. (Basahon an Exodo 14:​1-4.) Huli sa paon, pinangenotan ni Faraon an saiyang mga hukbong militar tanganing lapagon an dati niang mga oripon, kaya nalaom an mga Israelita pag-abot ninda sa Dagat na Pula. Garo baga dai na sinda makakadulag. (Ex. 14:​5-10) Pero, an totoo, dai napapaatubang sa ano man na peligro an mga Israelita. Taano? Huling mainterbenir na si Jehova para sa sainda.

11, 12. (a) Paano nag-interbenir si Jehova para sa saiyang banwaan? (b) Ano an nagin resulta kan pag-interbenir nin Dios, asin ano an itinotokdo sa sato kan pagkasaysay na ini manongod ki Jehova?

¹¹ An hariging panganoron na naggigiya sa mga Israelita naghiro pasiring sa likodan ninda, kaya dai nakarani an hukbo ni Faraon asin nagdiklom sa namumugtakan kan mga ini. Minsan siring, milagrosong iniilawan kaiyan kun banggi an mga Israelita. (Basahon an Exodo 14:​19, 20.) Dangan binanga ni Jehova an dagat paagi sa makosog na doros hale sa sirangan, kaya ‘namara an dagat.’ Daing duda, nangaipo ini nin harohalawig na panahon, huli ta an pagkasaysay nagsasabi: ‘Dangan [“sa katapustapusi,” NW] an mga aki ni Israel uminaragi sa tahaw kaidtong dagat alagad sa marang daga.’ Kun ikokomparar sa mga hukbong militar ni Faraon na nasa mga karuwaheng panggiera, maluwayon an paghiro kan mga Israelita. Pero, imposibleng maabotan sinda kan mga Egipcio, huling nakikipaglaban si Jehova para sa Israel. ‘Rinibok nia an katiriponan kan mga taga Egipto. Asin ta hinalean nin mga rueda an saindang mga lunadan.’ Kaya nadepisilan sindang padalaganon iyan.​—Ex. 14:​21-25.

¹² Kan an bilog na Israel ligtas nang nakabalyo sa ibong na baybayon, sinabihan ni Jehova si Moises: ‘Unata an saimong kamot sa dagat, tanganing an tubig bumalik sa mga taga Egipto, sa saindang mga lunadan, asin sa saindang kabalyeriya.’ Kan pinoprobaran kan mga soldados na dumulag sa nagraragasang tubig, ‘tinunaw ni Jehova an mga taga Egipto sa tahaw kan dagat.’ Mayo na nin dudulagan. “Dai sainda nin natada minsan saro.” (Ex. 14:​26-28) Sa siring, ipinaheling ni Jehova na igwa sia nin kapangyarihan na iligtas an saiyang banwaan sa ano man na situwasyon.

NAKALIGTAS SA PAGKALAGLAG KAN JERUSALEM

13. Anong mga instruksion an itinao ni Jesus, asin ano an puedeng inisip-isip kan mga parasunod nia?

¹³ Aram ni Jehova nin eksakto kun paano mangyayari an mga bagay-bagay tanganing maotob an saiyang katuyohan. An importansia kaini itinatampok sa ikatolong halimbawa na pag-oolayan niato: an pagsalikop sa Jerusalem kan enot na siglo. Paagi sa saiyang Aki, nagtao si Jehova nin mga instruksion para sa kaligtasan kan mga Kristianong nag-iistar sa Jerusalem asin Judea bago laglagon an siudad kan 70 C.E. Si Jesus nagsabi: “Kun maheling na nindo an makababaldeng bagay na nagpapangyari nin kagabaan, siring sa itinaram paagi ki Daniel na propeta, na nagtitindog sa sarong banal na lugar, . . . dangan an mga nasa Judea magpoon nang dumulag pasiring sa kabukidan.” (Mat. 24:​15, 16, NW) Alagad paano maririsa kan mga parasunod ni Jesus kun an hulang ini naootob na?

14. Sa paglihis nin panahon, paano nagin malinaw an kahulogan kan mga instruksion ni Jesus?

¹⁴ Sa paglihis nin panahon, nagin malinaw an kahulogan kan mga tataramon ni Jesus. Kan 66 C.E., nag-abot sa Jerusalem an mga hukbo nin Roma sa pangengenot ni Cestio Gallo tanganing papondohon an pagrebelde kan mga Judio. Kan an mga rebeldeng Judio, na midbid bilang mga Zealot, nagpaili sa laog kan templo, pinonan na laboton nin Romanong mga soldados an lanob kan templo. Para sa mapagbantay na mga Kristiano, risang-risa an kahulogan kaiyan: Sarong hukbong pagano na may idolatrosong mga bandera (“an makababaldeng bagay”) an nakaabot sagkod sa lanob kan templo (“banal na lugar”). Para sa mga parasunod ni Jesus, panahon iyan na “magpoon nang dumulag pasiring sa kabukidan.” Alagad paano sinda makakaluwas sa siudad na nasasalikopan? May dai linalaoman na pagbabago na madali nang mangyari.

15, 16. (a) Anong espesipikong instruksion an itinao ni Jesus, asin taano ta mahalagang marhay na sunodon iyan kan saiyang mga parasunod? (b) Sa ano madepende an satong kaligtasan?

¹⁵ Sa dai maaraman na dahelan, si Cestio Gallo asin an saiyang mga soldados naghale sa Jerusalem asin nagpoon na sumibog. Linapag sinda kan mga Zealot. Kan mayo na an duwang lado na naggigiera, biglang nagkaoportunidad an mga parasunod ni Jesus na dumulag. Espesipikong pinagbotan sinda ni Jesus na bayaan an saindang materyal na mga rogaring asin tolos-tolos na humale. (Basahon an Mateo 24:​17, 18.) Kaipuhan daw talaga an tolos-tolos na paghiro? Dai naghaloy nagin malinaw an simbag. Sa laog nin pira sanang aldaw, nagbuelta an mga Zealot asin nagpoon na puersahon an mga nag-eerok sa Jerusalem asin Judea na umayon sa rebelyon. Naggrabe tolos an mga kamugtakan sa laog kan siudad mantang an Judiong mga paksion nag-aaragawan sa kapangyarihan. Padepisil nang padepisil an pagdulag. Kan nagbuelta an mga Romano kan 70 C.E., imposible na an pagdulag. (Luc. 19:43) Nalaom an siisay man na nag-atraso! Para sa mga Kristianong nagdulag pasiring sa kabukidan, an paghimate sa mga instruksion ni Jesus nagresulta sa kaligtasan ninda. Naheling mismo ninda na si Jehova tataong magligtas kan saiyang banwaan. Anong leksion an manonodan niato sa pagkasaysay na ini?

¹⁶ Durante kan dakulang kahorasaan, kaipuhan na maghimate an mga Kristiano sa mga instruksion hale sa Tataramon asin organisasyon nin Dios. Halimbawa, an pagboot ni Jesus na “magpoon nang dumulag pasiring sa kabukidan” igwa nin aplikasyon sa presenteng panahon. Dai pa niato aram kun paano man nanggad kita madulag.b Minsan siring, makakasierto kita na lilinawon ni Jehova an kahulogan kan mga instruksion na iyan kun panahon nang sunodon niato iyan. Huling an satong kaligtasan madepende sa pagkuyog, marahay na ihapot niato sa satong sadiri: ‘Paano ako naghihimate sa itinatao ni Jehova na mga instruksion sa saiyang banwaan ngonyan? Tolos daw akong naghihimate, o nag-aalangan daw akong sumunod?’​—Sant. 3:​17, NW.

NAPAPAKOSOG PARA SA MGA MANGYAYARI PA

17. Ano an ihinahayag kan hula ni Habacuc manongod sa nagdadangadang na pagsalakay sa banwaan nin Dios?

¹⁷ Pag-olayan giraray niato ngonyan an determinadong pagsalakay ni Gog na nasambitan sa kapinonan. Sa konektadong hula, si Habacuc nagsabi: ‘Nakadangog ako, asin pinagtakigan an sakuyang tulak; sa tingog kuminibigkibig si sakuyang mga ngabil; an pagkalapa an luminaog sa sakuyang mga tolang, asin duman sa sakuyang tukawan pinagtakigan ako; matoninong akong mamumugtak sa aldaw nin kahorasaan, kun sumakat sa banwaan [nakakatakot na mga hukbo] an saro [Dios] na masalakat kaiyan.’ (Hab. 3:16) Sa pakadangog pa sana kan bareta dapit sa nagdadangadang na pagsalakay sa banwaan nin Dios, nagtakig na an tulak kan propeta, nagkibigkibig na an saiyang ngabil, asin nangruluya na sia. Ipinaparisa kan reaksion ni Habacuc kun gurano kadepisil kan magigin kamugtakan niato kun salakayon na kita kan mga hukbo ni Gog. Pero, andam an propeta na toninong na maghalat sa dakulang aldaw ni Jehova, na nagtitiwala na ililigtas ni Jehova an saiyang banwaan. Puede man kitang magkaigwa nin siring na kompiansa.​—Hab. 3:​18, 19.

18. (a) Taano ta may dahelan kitang dai matakot sa nagdadangadang na pagsalakay? (b) Ano an sunod na pag-oolayan niato?

¹⁸ Daing dudang pinapatunayan kan tolong halimbawa na napag-olayan niato na si Jehova tataong magligtas kan saiyang banwaan. Imposibleng dai mangyari an saiyang katuyohan; sierto an kapangganahan. Minsan siring, tanganing magin kabtang kan mamuraway na kapangganahan na iyan, kaipuhan kitang magmaimbod sagkod sa katapusan. Paano kita tinatabangan ni Jehova na mapagdanay an satong integridad ngonyan? Iyan an tema kan sunod na artikulo.

[Mga Nota sa Ibaba]

[Kahon sa pahina 24]

An mga Israelita daw nameligro man lamang sa hukbo ni Faraon?