Nagtatao si Jehova nin Karangahan sa Gabos Niyatong Kasakitan

1, 2. Paano kita rinaranga ni Jehova sa satong mga kasakitan, asin ano an sinisigurado sa sato kan saiyang Tataramon?

SARONG hoben na soltero na aapudon tang Eduardo an nakipag-ulay ki Stephen, na sarong may edad nang elder na may agom. Pigpaparaisip kaya ni Eduardo an sinasabi kan 1 Corinto 7:28: “An mga nag-aagom magkakaigwa nin bagong mga kasakitan sa buhay.” An hapot niya, “Ano ining pigsasabi digdi na ‘bagong mga kasakitan,’ saka paano ko iyan aatubangon kun mag-agom na ako?” Bago simbagon an hapot, sinabi nguna ni Stephen ki Eduardo na pag-isipan an saro pang isinurat ni apostol Pablo, na si Jehova iyo “an Diyos nin gabos na karangahan, na nagraranga sa sato sa gabos tang kasakitan.”—2 Cor. 1:3, 4.

² Si Jehova talagang mamumuton na Ama, asin rinaranga niya kita sa panahon nin kasakitan. Tibaad naeksperyensiyahan mo na mismo kun paano ka tinabangan asin giniyahan nin Diyos, na sa parati paagi sa saiyang Tataramon. Makakasigurado kita na an pinakamarahay an gusto niya para sa sato, kapareho kan gusto niya para sa mga lingkod niya kaidto.—Basahon an Jeremias 29:11, 12.

 3. Anong mga hapot an sisimbagon niyato?

³ Siyempre, mas madali tang makakaya an mga problema o kasakitan kun aram ta an mga kawsa kaiyan. Totoo iyan pag-abot sa mga kasakitan may koneksiyon sa buhay may agom o may pamilya. Pero, ano daw talaga an “bagong mga kasakitan sa buhay” na sinambit ni Pablo? Anong mga halimbawa kan mga panahon kan Bibliya asin ngunyan an makakatabang sa sato na makua an karangahan na kaipuhan ta? Makakatabang an mga simbag diyan tanganing makayanan ta an satong mga kasakitan.

4, 5. Ano an nagkapirang kawsa kan ‘bagong kasakitan sa buhay’?

⁴ Ini an sinabi nin Diyos sa kapinunan kan kasaysayan nin tawo: ‘Babayaan nin lalaki an saiyang ama asin ina, asin masaro sa saiyang agom, asin magigin sinda saro sanang laman.’ (Gen. 2:24) Sinabi iyan ni Jehova kan ikinasal niya an inot na tawong si Adan asin Eva. Pero huling bako nang perpekto an mga tawo, puwedeng magkaproblema an mga nag-aagom asin nagpapamilya. (Roma 3:23) Halimbawa, bago ikasal an sarong babayi, an mga magurang niya an may awtoridad sa saiya. Pero pagkatapos niyang ikasal, an agom na lalaki na an tinawan nin Diyos nin awtoridad na magin payo niya. (1 Cor. 11:3) May mga bagong mag-agom na nasasakitan sa bagay na ini. Uyon sa Tataramon nin Diyos, maninigong akuon kan agom na babayi na an agom na niya an may awtoridad sa saiya, bako na an mga magurang niya. An bagong kasal tibaad magkaigwa nin problema sa relasyon ninda sa panugangan ninda asin puwede man ining magin kasakitan.

⁵ Sa parati, nagkakaigwa nin bagong mga kahaditan pakatapos na sabihon kan agom na babayi sa saiyang agom, “Magigin Tatay ka na.” Totoong maugmang bareta iyan pero kun minsan, nasasalakan iyan nin kapurisawan huli sa puwedeng magin mga problema sa pagbados kan ina o sa salud kan aki. Kaipuhan man nindang pag-isipan an gastos, durante kan pagbados asin pakapangaki. Dakul pang mga pagbabago an kaipuhan pag namundag na an umboy. Kadaklan kan panahon asin atensiyon kan ina tibaad yaon na sa pag-ataman sa aki. Tibaad mamatian nin agom na lalaki na naiitsa-puwera na siya huling sibot-sibot an saiyang agom sa pag-ataman sa aki ninda. An ama man may bagong mga responsabilidad na kaipuhan na isaabaga. Nadagdagan man an paninimbagan niya huling may bago nang miyembro nin pamilya na kaipuhan na atamanon asin sustentuhan.

6-8. Paano puwedeng magresulta sa kamunduan an dai pagkaigwa nin aki kan mga mag-agom na gustong-gustong magkaaki?

⁶ May ibang klase man nin kasakitan na inaatubang an nagkapirang mag-agom. Gustong-gusto nindang magkaaki pero dai sinda nagkakaaki. Kun dai nagbabados an agom na babayi, tibaad ikamundo niyang marhay iyan. Totoo, nagkakaigwa nin kasakitan an mga nag-aagom o nag-aaki, pero maibibilang man na ‘bagong kasakitan sa buhay’ an dai pagkaigwa nin aki kan mga mag-agom na gustong-gustong magkaaki. (Tal. 13:12) Sa mga panahon kan Bibliya, sa parati ibinibilang na kasusupgan an pagigin baog. Makulugon an buot ni Raquel, na agom ni Jacob, kan mahiling niyang may mga aki an tugang niya mantang siya mayo. (Gen. 30:1, 2) Sa mga kadagaan na uso an darakulang pamilya, parating hinahapot an mga misyonero kun taano ta mayo sindang aki. Dawa anong ingat asin rahay kan paliwanag ninda, tibaad ini pa man giraray an reaksiyon kan iba, “Ay iyo? Sige ipapamibi mi na sana kamo!”

⁷ Isipa man an sarong sister sa Inglatera na talagang gustong-gustong magkaaki pero dai iyan nagkatotoo. Dangan nag-abot siya sa edad na dai na siya puwedeng magkaaki. Sinabi niyang grabe an kamunduan niya, huling narealisar niyang dai na mangyayari sa sistemang ini nin mga bagay an pangarap niya. Nagdesisyon sindang mag-agom na mag-ampon. Pero, sinabi niya: “Nakamati pa man giraray ako nin kamunduan. Aram kong iba pa man giraray an may sadiring aki kisa mag-ampon.”

⁸ Totoo, sinasabi kan Bibliya na an mga Kristiyana “mapoprotektaran kun sinda magigin ina.” (1 Tim. 2:15) Dai man buot sabihon kaini na pag nangaki sinda o nagkaigwa na nin mga aki, magkakamit na sinda nin buhay na daing sagkod. Imbes, sinasabi kaini na kun an sarong babayi may aki nang kaipuhan na atamanon, apuwera pa sa iba niyang responsabilidad sa pamilya, puwede siyang mailikay kaini sa pagtsitsismis asin pakikiaram sa buhay nin iba. (1 Tim. 5:13) Pero, puwede pa man giraray siyang mapaatubang sa mga kasakitan na konektado sa buhay may agom asin pagpamilya.

 9. Taano ta sarong masakiton na pangyayari an magadanan nin agom?

⁹ Pag pinag-uulayan an mga kasakitan na konektado sa buhay may agom, may saro na tibaad dai tulos maglaog sa satong isip. An pagkagadan kan mahal sa buhay. Iyo, an pagkagadan nin agom sarong masakiton na pangyayari na naeeksperyensiyahan nin dakul. Sarong pagbalo ini na tibaad dai linalauman kan nagadanan nin agom na mangyayari sa saiya sa sistemang ini nin mga bagay. Pero, makusog an pagtubod kan mga Kristiyano sa panuga ni Jesus dapit sa maabot na pagkabuhay liwat. (Juan 5:28, 29) Ano an epekto kan paglaom na iyan sa nabálong agom? Nakakarangang marhay iyan. Saro pa ining paagi na sinusuportaran asin rinaranga kan satong mamumuton na Ama, paagi sa saiyang Tataramon, an mga nakakaeksperyensiya nin kasakitan. Pag-ulayan ta kun paano namatian kan ibang mga lingkod nin Diyos an pagranga ni Jehova asin kun paano iyan nakatabang sa sainda.

10. Paano si Hana nakanumpong nin kaginhawahan sa ibong nin kasakitan? (Hilingon an ritrato sa kapinunan kan artikulo.)

¹⁰ Si Hana, an namumutan na agom ni Elkana, napaatubang man sa sarong kasakitan. Baog siya mantang an saro pang agom ni Elkana na si Penina may mga aki. (Basahon an 1 Samuel 1:4-7.) Huli kaiyan, pigparatuya-tuya ni Penina si Hana ‘sa kada taon.’ Kaya, grabe an kamunduan asin pagsakit ni Hana. Pero, ipinamibi niya iyan ki Jehova kaya naginhawahan siya. Sa katunayan, ‘namibi [siya nin halawig] sa atubangan ni Jehova.’ Inisip daw niyang itatao ni Jehova an hinahagad niya? Siguradong iyan talaga an linauman niya. Pakapamibi ni Hana, ‘bako nang mamundo an saiyang lalawgon.’ (1 Sam. 1:12, 17, 18) Nagtiwala siya na puwede siyang tawan ni Jehova nin aki o rangahon sa ibang paagi.

11. Paano nakakaranga sa sato an pagpamibi?

¹¹ Huling bako kitang perpekto asin nabubuhay sa sistemang ini na kontrolado ni Satanas, padagos kitang mapapaatubang sa mga pagbalo asin kasakitan. (1 Juan 5:19) Pero, nakakaugmang maaraman na si Jehova iyo “an Diyos nin gabos na karangahan”! An sarong paagi na makakatabang sa sato na maatubang an mga pagbalo o mga kasakitan iyo an pagpamibi. Sinabi ni Hana ki Jehova an gabos na nasa puso niya. Pag napapaatubang man kita sa kasakitan, bako sanang basta pagsabi ki Jehova kan mga namamatian ta an kaipuhan niyatong gibuhon. Kaipuhan niyatong magngayo-ngayo sa saiya. Iyo, sabihon ta sa saiya an satong mga namamatian paagi sa udok na pagpamibi.—Fil. 4:6, 7.

12. Ano an nakatabang sa balong si Ana na magin maugma?

¹² Dawa kun nakakamati kita nin grabeng kamunduan huli sa dai pagkaigwa nin aki o pagkagadan nin mahal sa buhay, makakanumpong pa man giraray kita nin karangahan. Kan panahon ni Jesus, nagadan an agom kan propetisang si Ana pagkatapos sana nin pitong taon na pag-ibanan ninda kan agom niya. Mayong sinasabi an Bibliya na nagkaaki sinda. Ano an padagos na ginigibo ni Ana dawa kan 84 anyos na siya? Ini an sinasabi kan Lucas 2:37: “Dai siya nagpapalta sa templo, na naglilingkod sa Diyos aldaw-banggi na may kasabay na pag-ayuno asin mga pagngayo-ngayo.” Iyo, nakamati si Ana nin karangahan asin kaugmahan sa pagsamba ki Jehova.

13. Paano makakaranga sa sato an tunay na mga amigo kun makagibo nin sarong bagay na nakakapamundo an mga kapamilya niyato?

¹³ Kun parati kitang nakikiasosyar sa satong mga kapagtubod, nakakahanap kita nin tunay na mga amigo. (Tal. 18:24) Nagigirumduman ni Paula na kan singko anyos pa sana siya, talagang namundo siya kan magpundo an saiyang ina sa paglilingkod ki Jehova. Dipisil atubangon an pagbalong ini. Pero talagang napakusog siya kan an sarong payunir na sister sa saindang kongregasyon, si Ann, magpahiling nin personal na interes sa saiyang espirituwalidad. Sinabi ni Paula: “Dawa dai kami magkaano-ano, nakatabang na marhay sa sako an mamumuton niyang pagmalasakit. Nakatabang iyan tanganing padagos akong maglingkod ki Jehova.” Maimbod na naglilingkod si Paula sagkod ngunyan. Ugmahon man siya huling kaibanan na niya giraray sa kongregasyon an saiyang ina. Maugma man si Ann huling nagin garo siya ina ni Paula sa espirituwal.

14. Anong mga bendisyon an puwedeng makamtan kan mga nagraranga sa iba?

¹⁴ Kun sibot kita sa pagpahiling nin mamumuton na personal na interes sa iba, sa parati nalilingawan ta an sato mismong mga problema. Halimbawa, aram kan mga sister—may agom man o mayo—na talagang maugma an magin kapwa trabahador nin Diyos sa paghuhulit kan maugmang bareta. Gusto nindang tawan nin onra an Diyos paagi sa paggibo kan kabutan niya. Para ngani sa iba, garo terapi an pakikikabtang sa ministeryo. Sa katunayan, gabos kita puwedeng makatabang na magin mas nagkakasararo an kongregasyon kun nagpapahiling kita nin pagmakulog sa iba, sa teritoryo man o sa kongregasyon. (Fil. 2:4) Marahayon na halimbawa kaini si apostol Pablo. Siya nagin garo “sarong nagpapasusong ina” sa mga nasa kongregasyon sa Tesalonica asin garo man siya ama ninda sa espirituwal.—Basahon an 1 Tesalonica 2:7, 11, 12.

15. Siisay an may panginot na paninimbagan na magtukdo kan katotoohan sa mga aki?

¹⁵ Paano man niyato mararanga an mga pamilya sa laog kan kongregasyon? Kun minsan, nakikiulay an mga baguhan sa maygurang na mga parahayag na tabangan sinda sa pagtukdo sa mga aki ninda kan katotoohan, o nakikiulay pa ngani na tukduan nin Bibliya an saindang mga aki. Sigun sa Kasuratan, an mga magurang an may panginot na responsabilidad na magtukdo asin magsanay sa saindang mga aki. (Tal. 23:22; Efe. 6:1-4) May mga sitwasyon na kaipuhan asin pinapahalagahan na marhay an tabang kan iba. Pero, dai man kaiyan hinahali an responsabilidad kan mga magurang. Kaipuhan na marhay sa pamilya an regular na komunikasyon.

16. Ano an dapat tandaan pag nagtatabang sa mga aki?

¹⁶ Kun magdesisyon an sarong magurang na iba an magtukdo nin Bibliya sa aki niya, dai dapat agawon kan nagtutukdo an papel kan magurang. Kun minsan, may mga Saksing pinapakiulayan na mag-Bible study sa mga aki na an mga magurang mayong interes sa katotoohan. Pero, dapat tandaan kan Saksing nagtutukdo na dai man buot sabihon na miling siya an nagtatao nin espirituwal na tabang sa aki, siya na an nagigin magurang kaini. Kun nagkokondukta nin pag-adal sa aki, madunong na gibuhon iyan magsalang sa harong kan aki kaiba kan mga magurang kaini o kan ibang maygurang na Saksi o sa angay na pampublikong lugar. Paagi kaiyan, dai kita makakatao nin salang impresyon sa iba. Asin sa paglihis nin panahon, tibaad magibo na kan mga magurang an itinao sa sainda nin Diyos na responsabilidad na tukduan an saindang mga aki manungod ki Jehova.

17. Paano an mga aki puwedeng makatao nin karangahan sa pamilya?

¹⁷ An mga aking namumutan an Diyos asin nagsusunod sa saiyang paggiya puwedeng makatao nin karangahan sa pamilya. Magigibo ninda iyan paagi sa pagpahiling nin paggalang sa saindang mga magurang asin pagtabang sa materyal na pangangaipo kan pamilya. Puwede man sindang makatabang na mapakusog an espirituwalidad kan pamilya. Bago an Baha, nagin parasamba ni Jehova an gikan ni Set na si Lamec. Sinabi ni Lamec dapit sa aki niyang si Noe: ‘Hali sa dagang isinumpa nin Kagurangnan, siya madara sato nin kaginhawahan sa gabos niyatong kapagalan.’ Nautob an hulang iyan kan halion na ni Jehova an sumpa sa daga. (Gen. 5:29; 8:21, An Marahay na Bareta Biblia) Sa ngunyan, an mga aking nagdadanay na maimbod ki Jehova puwede man na makatao nin karangahan sa saindang pamilya. Puwede nindang matabangan an gabos nindang kapamilya na matagalan an mga pagbalo ngunyan asin makaligtas sa sarong maabot na pangyayari na mas grabe pa sa Baha.

18. Ano an makakatabang sa sato na kusog-buot na tagalan an ano man na kasakitan o pagbalo?

¹⁸ Paagi sa pagpamibi, paghurop-hurop sa mga halimbawa sa Bibliya, asin sa parating pakikiasosyar sa mga lingkod ni Jehova, minilyon ngunyan an nakakakua nin karangahan sa ibong kan gabos nindang kasakitan. (Basahon an Salmo 145:18, 19.) Huling aram niyatong si Jehova an Gikanan kan nagdadanay na karangahan, siguradong makakatabang iyan sa sato na kusog-buot na tagalan an ano man na kasakitan—ngunyan asin sa maabot.