Paano an Tawo Magigin Kaladawan nin Dios?

“LINALANG nin Dios an tawo siring sa saiyang ladawan, sa ladawan nin Dios linalang nia sia; linalang nia an lalaki asin babae.” Iyan an sabi kan ipinasabong na rekord, pero ano an boot sabihon kaiyan? Paano linalang an enot na lalaki asin babae sa ladawan nin Dios?​—Genesis 1:27.

Sinda daw siring sa Dios sa pisikal? Dai, imposible iyan. An tawo may hawak nin tawo, laman, dinisenyo tanganing mabuhay digdi sa daga. An Dios espiritu, na nabubuhay sa dai maimahinar na kamurawayan sa langit na mayo nganing tawo an makadodolok. (Exodo 33:​18-20; 1 Corinto 15:50) Kun siring, paano an tawo linalang sa ladawan nin Dios? Sa paagi na an tawo tinawan nin abilidad na gumibo kan pangenot na mga atributo nin Dios​—an pagkamoot, hustisya, kadonongan, asin kapangyarihan—​siring man an iba pang kuwalidad.

An mga Kuwalidad ni Jehova

An mga kuwalidad ni Jehova Dios naheheling sa gabos niang linalang, alagad an mga iyan dramatikong ipinaheling sa saiyang mga pakiibaiba sa enot na tawong mag-agom, si Adan asin Eva. (Roma 1:20) An saiyang pagkamoot naheling ta linalang nia an daga na tamang-tama sanang istaran nin tawo. Linalang ni Jehova para sa lalaki an sarong sangkap na babae na magin saiyang kaibaiba asin magin an ina kan saiyang mga aki. Ibinugtak nia sindang duwa sa sarong magayon na tatamnan asin abunda sindang tinawan kan gabos na bagay na kaipuhan tanganing padagos na mabuhay asin magin maogma. An pinakamakangangalas sa gabos, tinawan sinda nin Dios nin oportunidad na mabuhay sagkod lamang.​—Genesis 2:​7-9, 15-24.

An kadonongan nin Dios naheling sa saiyang pagbalo sa enot na tawong mag-agom. Kun boot nindang magdanay bilang mga miembro kan unibersal na pamilya ni Jehova asin kun boot nindang mabuhay sagkod lamang bilang mga magurang kan rasa nin tawo, kaipuhan nindang magin mga halimbawa sa kaimbodan asin tunay na pagsamba. Kaya itinao sainda ni Jehova an oportunidad na ipaheling an kamugtakan kan saindang puso sa irarom nin sarong angay na pagbalo​—dai sinda maninigong kumakan hale sa kahoy nin pakamidbid kan marahay asin maraot. Kanigoan kadonong sa kabtang ni Jehova na togotan an mga tawo na patunayan an saindang pagkuyog asin pagkamoot para sa saiya bago itao sainda an makangangalas na mga pribilehiyo na nasa isip nia!

An hustisya nin Dios naheling sa saiyang pagpaotob kan halangkaw na mga pamantayan sa saiyang mga linalang asin sa saiyang dai pakikikompromiso sa mga pamantayan na idto. Naheling iyan sa saiyang pagtao ki Adan asin Eva nin gabos na oportunidad na gibohon an tama. Asin kan masudya sindang gibohon an siring, an saiyang hustisya naheling sa saiyang pagsentensia sainda na mag-ako kan sinabing penalidad para sa pagrebelde.

An kapangyarihan ni Jehova naheling sa saiyang biyong pag-otob sa saiyang sentensia. Si Satanas, an dakulang rebelde, ipinasentido na si Jehova sarong putikon, asin iinalok ni Satanas an darakulang bagay ki Eva kun magmasumbikal sia sa Dios. (Genesis 3:​1-7) Alagad si Satanas dai nakahimong otobon an saiyang panuga. Dai nia kayang olangon si Jehova sa pagpalayas ki Adan asin Eva sa tatamnan nin Eden, asin dai nia nahimong olangon an kaotoban kan mga tataramon nin Dios ki Adan na: “Ika kabokabo asin sa kabokabo ka man mabalik.” (Genesis 3:19) Minsan siring, si Jehova dai tolos-tolos inotob an sentensiang kagadanan, asin paagi kaini orog pa niang ipinaheling an saiyang pagkamoot. Tinawan nia nin panahon si Adan asin Eva na magkaigwa nin mga aki na paagi kaiyan an saiyang orihinal na katuyohan para sa katawohan sa katapustapusi maootob.​—Genesis 1:28.

Sa kahurihurihi, an hustisya, pagkamoot, kapangyarihan, asin kadonongan ni Jehova Dios naheling sa saiyang panuga na magtao nin sarong banhi na malaglag sa mga gibo ni Satanas asin mahale kan mamondong mga resulta kan enot na pagrebeldeng idto tumang sa soberaniya nin Dios. (Genesis 3:15) Kanigoan kamakangangalas kan satong Kaglalang!

Mga Paghihingoa na Arogon an Dios

Dawa ngani bako nang sangkap, makapaheheling pa man giraray an tawo kan mga kuwalidad nin Dios. Kaya pinakosog ni Pablo an mga Kristiano kan saiyang kaaldawan: “Magin kamong mga paraarog sa Dios, bilang namomotan na mga aki.” (Efeso 5:1) Alagad, sa bilog na historya, an kadaklan nagpaheling nin grabeng pagbasangbasang sa mga kuwalidad nin Dios. Kan umabot an panahon ni Noe, nagin grabe na karaot an mga tawo kaya dineterminaran ni Jehova na laglagon an gabos na katawohan apuwera ki Noe asin sa saiyang pamilya. Si Noe “matanos [makatanosan] na tawo. Pinatunayan nia an saiyang sadiri na daing kasalan sa tahaw kan saiyang mga kapanahon,” asin ipinaheling nia an saiyang pagkamoot sa Dios paagi sa pag-otob kan mga kapagbootan nin Dios.a “Ginibo ni Noe an sono sa gabos na ipinagboot sa saiya nin Dios. Siring nanggad kaiyan an saiyang ginibo.” (Genesis 6:​9, 22) Ipinaheling ni Noe an pagkamoot para sa saiyang kapwa asin an saiyang pagkadayupot sa hustisya paagi sa pagigin “parahulit nin katanosan.” (2 Pedro 2:5) Ipinaheling nia an kadonongan asin ginamit nin tama an saiyang pisikal na kapangyarihan paagi sa pagsunod sa pagboot nin Dios na gumibo nin sarong dakulang dahong, magsaray nin pagkakan dian, magtipon nin mga hayop, asin lumaog sa dahong sa pagboot ni Jehova. Ipinaheling man nia an saiyang pagkamoot sa katanosan paagi sa dai pagtogot sa saiyang maraot na mga kataed na raoton sia.

Nagsasabi an Biblia nin dakol pa na sa kaagid na paagi nagpaheling nin diosnon na mga kuwalidad. An pangenot iyo si Jesu-Cristo, na sangkap na kaladawan nin Dios asin kun siring nakasabi: “An nakaheling sa sako nakaheling man sa Ama.” (Juan 14:9) Kabilang sa mga kuwalidad na ipinaheling ni Jesus, nangongorog an saiyang pagkamoot. An pagkamoot sa saiyang Ama asin sa katawohan nagpahiro saiya na bayaan an saiyang erokan sa langit asin mabuhay bilang tawo digdi sa daga. Pinahiro sia kaiyan na pamurawayon an saiyang Ama paagi sa saiyang matanos na paggawe asin na ihulit sa katawohan an maogmang bareta nin kaligtasan. (Mateo 4:23; Juan 13:31) Dangan, an pagkamoot nagpahiro ki Jesus na iatang an saiyang sangkap na buhay para sa kaligtasan nin katawohan asin, mas importante, para sa pagpakangbanal kan ngaran nin Dios. (Juan 13:1) Sa pagmamaigot na arogon an Dios, igwa daw nin mas marahay na halimbawa na maninigong arogon kisa ki Jesu-Cristo?​—1 Pedro 2:21.

Paano Kita Magigin Orog na Arog sa Dios Ngonyan?

Ngonyan, paano kita makapaheheling kan mga kuwalidad nin Dios asin kun siring humiro oyon sa ladawan nin Dios? Bueno, konsiderara nguna an kuwalidad nin pagkamoot. Nagsabi si Jesus: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” Paano niato ipinaheheling an pagkamoot sa Dios? Nagsimbag si apostol Juan: “Ini iyo an boot sabihon kan pagkamoot sa Dios, na kuyogon niato an saiyang mga kapagbootan; pero an saiyang mga kapagbootan bakong magabat.”​—Mateo 22:37; 1 Juan 5:3.

Siyempre, tanganing makuyog an mga kapagbootan ni Jehova, kaipuhan tang maaraman an mga iyan. Kalabot dian an pagbasa, pag-adal, asin paghorophorop sa Tataramon nin Dios, an Biblia, asin sa literatura sa Biblia. Arog kan salmista, maninigo kitang makapagsabi: “Kanigoan an sakong pagkamoot sa saimong pagboot! Sa bilog na aldaw iyan sakong pinaghohorophorop.” (Salmo 119:97) Mantang orog na pinarararom niato an pakasabot sa Tataramon nin Dios, nagigin kitang pano-pano kan paagi nin pag-isip nin Dios. Namomotan ta an katanosan asin ikinaoongis an katampalasanan. (Salmo 45:7) Dian nasala si Adan. Aram nia an pagboot ni Jehova, pero dai nia biyong namotan iyan tangani siang makapagdanay na maimbod dian. Kun nagbabasa kan Tataramon nin Dios, permi tang hapoton an satong sadiri, ‘Paano ini aplikado sa sako? Ano an magigibo ko tanganing orog na ikaoyon an sakong paggawe sa mga kuwalidad nin Dios?’

Sinabi man ni Jesus: “Kamotan mo an saimong kataed nin siring sa saimo man sana.” (Mateo 22:39) An lambang toltol na indibiduwal namomotan an saiyang sadiri asin gusto an pinakamarahay para sa saiyang sadiri. Bako iyan maraot. Pero ipinaheheling ta daw an kaparehong pagkamoot sa satong kataed? Sinusunod ta daw an pagboot sa Biblia na: “Dai ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan”?​—Talinhaga 3:27; Galacia 6:10.

Kumusta man an kuwalidad nin kadonongan? An satong paghihingoa na ipaheling an kuwalidad na ini naggigiya sa sato na pag-adalan an Biblia huli ta iyan an deposito kan kadonongan nin Dios. Mababasa sa Salmo 119:​98-100: “Ginigibo akong orog na madonong sa sakong mga kaiwal kan saimong pagboot, huli ta sagkod sa panahon na daing katapusan iyan sakuya. Nagkamit ako nin orog na pakamansay kisa gabos kong mga paratokdo, huli ta an saimong mga pagirumdom sakong pinaghohorophorop. Ako minagawe na igwa nin orog na pakasabot kisa kamagurangan na lalaki, huli ta inotob ko an saimong mga togon.” Sa Talinhaga 3:​18, an kadonongan ilinaladawan bilang “kahoy nin buhay.” Kun magkakamit kita nin kadonongan asin gigibohon iyan, mag-aako kita kan pag-oyon nin Dios asin kan balos na buhay na daing katapusan.​—Eclesiastes 7:12.

Kumusta man an hustisya? Sa maraot na kinaban na ini, an hustisya sarong mahalagang kuwalidad para sa mga paoogmahon an Dios. Namotan ni Jesus an katanosan (hustisya) asin ikinaongis an katampalasanan. (Hebreo 1:9) An mga Kristiano ngonyan naggigibo man nin siring. An hustisya nagpapahiro sainda na apresyaron an tamang mga kuwalidad. Linilikayan ninda an maraot na mga dalan kan kinaban na ini asin ginigibo an pag-otob kan kabotan nin Dios na pinakaimportanteng bagay sa saindang buhay.​—1 Juan 2:​15-17.

Kun dapit sa kapangyarihan, kita gabos igwa kaini. Natural na igwa kita nin pisikal asin intelektuwal na kapangyarihan, asin mantang kita nagtatalubo bilang mga Kristiano, napatatalubo niato an kapangyarihan sa espirituwal na sentido. Dinudugangan ni Jehova an satong kapangyarihan kan saiyang banal na espiritu sagkod na kita, dawa ngani garo maluya, nakagigibo na kan kabotan ni Jehova. Nagsabi si Pablo: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Filipos 4:13) An iyo man sanang kosog makukua niato kun mamimibi kita para sa espiritu ni Jehova.

Paghuhulit kan Maogmang Bareta

An satong pagpapaheling kan apat na pangenot na atributo nin Dios maheheling na marhay sa satong pagkuyog sa pagboot na: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:19, 20) An siring na edukasyonal na gibohon nagtatao nin buhay sa mga naghihimate. Kanigoan karahay na pagpaheling nin pagkamoot para sa mga, sa kadaklan, nagpoon paagi sa pagigin biyong mga estranyo sa sato!

Saro pa, an siring na pagtotokdo dalan nin kadonongan. Nagdadara iyan nin mga bunga na nagtatagal. Sa ano pang ibang trabaho na masasabing: “Sa paggibo mo kaini ililigtas mo an saimo man sana asin idtong naghihinanyog sa saimo”? (1 Timoteo 4:16) Mayo nin nadadaog sa paggibo nin mga disipulo. Kapwa an mga naghihinanyog asin an mga nagtotokdo nagkakamit nin daing katapusan na mga bendisyon.

Kun manongod sa hustisya, nagtotokdo an mga Kristiano nin makatanosan asin matanos na mga prinsipyo sa saindang mga inaadalan sa Biblia. Tinatabangan niato sinda na maglingkod ki Jehova, “an Dios nin hustisya.” (Malaquias 2:17) An mga nagdusay ngonyan kan saindang buhay sa paglingkod ki Jehova asin biyong nagsusunod sa kaimbodan ipinahahayag na matanos, pinakangmatanos, na magiya sa saindang pagkaligtas sa Armagedon.​—Roma 3:24; Santiago 2:​24-26.

Kanigoan na kapahayagan nin kapangyarihan an paghuhulit asin pagtotokdo kan maogmang bareta sa bilog na kinaban! (Mateo 24:14) Kinakaipuhan an pakatagal sa padagos na paghulit sa mga teritoryo na an mayoriya habong magdangog. Alagad si Jehova, paagi sa saiyang espiritu, nagtatao kan kosog na kaipuhan sa pagtagal sagkod sa katapusan.​—Isaias 40:​30, 31; Mateo 24:13; Lucas 11:13.

Totoo, bilang bakong sangkap na mga aki ni Adan, dai kita makagigibo nin sangkap kan marahay na mga kuwalidad na ini. Pero, girumdomon, an tawo linalang sa ladawan nin Dios, asin kun pagmamaigotan tang orog na magin arog sa Dios, kun siring sa sarong kabtang kita nag-ootob sa dahelan kan satong pag-eksister. (Eclesiastes 12:13) Kun maghihingoa kita na gibohon an pinakamakakaya niato asin humagad nin kapatawadan kun kita nagkakasala, dangan makalalaom kita na makaligtas pasiring sa matanos na bagong kinaban nin Dios, kun saen sa katapustapusi kita makaaabot sa pagkasangkap. Dangan, mamumugtak kita sa sarong paraisong daga na iniistaran nin sangkap na mga tawo, na gabos biyong nagpapaheling kan mga kuwalidad ni Jehova Dios. Kanigoan na kagayagayahan! Sa kahurihurihi, sa pinakalubos na sentido kan mga tataramon, an mga tawo magigin kaladawan nin Dios.

[Nota sa Ibaba]

[Ritrato sa pahina 25]

Ipinaheling ni Jesus sa sato kun paano patataluboon an banal na mga kuwalidad ni Jehova

[Ritrato sa pahina 26]

Sa kahurihurihi, an mga tawo sa pinakalubos na sentido magigin kaladawan nin Dios