Dai Mag-ontok sa Paggibo nin Karahayan

“Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.”​—GALACIA 6:9.

1, 2. (a) Taano ta kaipuhan an pakatagal tanganing makapaglingkod sa Dios? (b) Paano ipinaheling ni Abraham an pakatagal, asin ano an nakatabang sa saiya na gibohon iyan?

BILANG Mga Saksi ni Jehova, ikinaoogma tang marhay an paggibo kan kabotan nin Dios. Nakanonompong man kita nin karepreskohan sa pag-ako kan “sakal” nin pagkadisipulo. (Mateo 11:29) Minsan siring, an paglilingkod ki Jehova kaiba ni Cristo bako pirmeng madali. Lininaw ini ni apostol Pablo kan sinadol nia an mga kapwa Kristiano: “Kaipuhan nindo an pakatagal, tanganing, pakatapos na magibo nindo an kabotan nin Dios, akoon nindo an kaotoban kan panuga.” (Hebreo 10:36) Kaipuhan an pakatagal huli ta an paglilingkod sa Dios puedeng magin masakit.

² An buhay ni Abraham sarong patotoo nanggad sa bagay na iyan. Dakol na beses siang napaatubang sa depisil na mga pagpili asin nagtatao nin tension na mga kamugtakan. An pagbotan sia na bayaan an maginhawang buhay sa Ur kapinonan sana. Dai nahaloy napaatubang sia sa gutom, oposisyon kan saiyang mga kataed, an dikit pang pagkawara kan saiyang agom, pagkaanggot kan nagkapirang paryente, asin an kabangisan nin guerra. Nasa ngapit pa kaidto an mas darakulang pagbalo. Alagad nungkang uminontok si Abraham sa paggibo nin marahay. Pambihira ini kun iisipon nindo na mayo sia kan kompletong Tataramon nin Dios, arog niato ngonyan. Minsan siring, daing duwa-duwa na aram nia an enot na hula, na dian an Dios nagsabi: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi.” (Genesis 3:15) Bilang an saro na paagi sa saiya maluwas an Banhi, si Abraham naturalmenteng magigin punteriya kan satanikong pakikienemigo. An pakasabot kan bagay na ini daing duwa-duwa na nakatabang ki Abraham na magayagayang tagalan an pagbalo sa saiya.

 3. (a) Taano ta maninigong asahan kan banwaan ni Jehova ngonyan an mga kahorasaan? (b) Anong pamparigon sa boot an itinatao sato kan Galacia 6:9?

³ Maninigo man na asahan kan banwaan ni Jehova ngonyan an mga kahorasaan. (1 Pedro 1:​6, 7) Total, an Kapahayagan 12:17 nagpapatanid sato na si Satanas ‘nakikilaban’ sa linahidan na natatada. Huli sa saindang dayupot na pakikiasosyar sa linahidan, an “ibang karnero” punteriya man kan grabeng kaanggotan ni Satanas. (Juan 10:16) Apuera sa pagtumang na tibaad atubangon kan mga Kristiano sa saindang ministeryo sa publiko, tibaad maeksperyensiahan man ninda an mapagbalong sakit sa saindang personal na buhay. Sinasadol kita ni Pablo: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.” (Galacia 6:9) Iyo, minsan ngani desididong marhay si Satanas na raoton an satong pagtubod, dapat kitang manindogan tumang sa saiya, na marigon sa pagtubod. (1 Pedro 5:​8, 9) Ano an puedeng ibunga kan satong fiel na pamumuhay? Ipinaliliwanag kan Santiago 1:​2, 3: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal.”

Direktang Pagsalakay

 4. Paano ginamit ni Satanas an direktang pagsalakay sa pagprobar na raoton an integridad kan banwaan nin Dios?

⁴ An buhay ni Abraham naglaladawan nanggad kan “manlaenlaen na pagbalo” na tibaad atubangon nin sarong Kristiano ngonyan. Halimbawa, kaipuhan niang humiro tumang sa pag-atake kan mga nanalakay hale sa Sinar. (Genesis 14:11-​16) Bakong makangangalas, si Satanas padagos na ginagamit an direktang mga pagsalakay paagi sa paglamag. Poon kan matapos an Guerra Mundial II, kadakol na nasyon an nag-imponer kan mga pagprohibir nin gobyerno sa Kristianong gibong pagtotokdo kan Mga Saksi ni Jehova. An 2001 Yearbook of Jehovah’s Witnesses nagbabareta kan mga kadahasan na kinaipuhan na tagalan kan mga Kristiano sa Angola sa kamot kan mga kaiwal. Nagsasarig ki Jehova, an satong mga tugang sa siring na mga nasyon marigon na nagsayumang pumondo! Sinda naghiro, bakong paagi sa paggamit nin kadahasan o pagrebelde, kundi paagi sa may diskresion na pagprosegir sa paghuhulit.​—Mateo 24:14.

 5. Paano puedeng magin biktima nin paglamag sa eskuelahan an mga hoben na Kristiano?

⁵ Minsan siring, an paglamag bako man pirmeng may kalabot na kadahasan. Pag-abot nin panahon si Abraham binendisyonan nin duwang aking lalaki​—si Ismael asin Isaac. Sinasabi sa sato sa Genesis 21:8-12 na sarong beses si Ismael “nanunugot” ki Isaac. Sa saiyang surat sa mga taga Galacia, ipinaheheling ni Pablo na ini labi kisa kawat-kawat sana nin aki, huli ta sinabi nia na linalamag ni Ismael si Isaac! (Galacia 4:29) Sa siring an pag-olog-olog kan mga kaeskuela asin berbal na pag-atake kan mga paratumang puedeng tamang apodon na paglamag. Nagigirumdoman nin sarong hoben na Kristiano na an ngaran Ryan an pasakit na inagihan nia sa kamot nin mga kaklase: “An 15 minutos na paglunad sa auto pasiring asin hale sa eskuelahan nagin siring sa dakol na oras na ako berbal na iniinsulto. Pinapaso ninda ako nin sipit sa papel na pinainit ninda paagi sa lighter nin sigarilyo.” An dahelan kan daing herak na pagtratong ini? “An teokratikong pagsasanay sa sako ginibo akong napapalaen sa ibang mga hoben sa eskuelahan.” Minsan siring, sa tabang kan saiyang mga magurang, si Ryan fiel na nakatagal. Mga hoben, an mga pagduhagi daw kan saindong mga kaedad nagpapangyari na kamo panluyahan nin boot? Bueno, dai mag-ontok! Paagi sa fiel na pagtagal, maeeksperyensiahan nindo an kaotoban kan mga tataramon ni Jesus: “Maogma kamo kun an mga tawo pinakakaraot kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako.”​—Mateo 5:11.

Mga Kahaditan sa Aroaldaw

 6. Anong mga bagay an puedeng makadanyar sa mga relasyon sa tahaw kan mga kapwa Kristiano ngonyan?

⁶ An kadaklan sa pagbalo na inaatubang ta ngonyan kalabot an normal na mga kahaditan sa aroaldaw. Si Abraham mismo nangaipong atubangon an nagin tension sa pag-oltanan kan saiyang mga paraataman nin hayop asin kan sa sobrino niang si Lot. (Genesis 13:5-7) Kaagid kaiyan ngonyan, an mga pagkakalaen nin personalidad asin saradit na pag-imon puedeng makadanyar sa mga relasyon asin isapeligro pa ngani an katoninongan kan kongregasyon. “Kun saen an pag-imon asin pagigin parapakisuhay, yaon an karibokan asin gabos na bagay na marigsok.” (Santiago 3:16) Mahalaga nanggad na dai kita mag-ontok kundi ipaorog an katoninongan sa kapalangkawan, siring kan ginibo ni Abraham, asin hanapon an kapakanan kan iba!​—1 Corinto 13:5; Santiago 3:17.

 7. (a) Ano an maninigong gibohon nin saro kun nakolgan nin sarong kapwa Kristiano an saiyang boot? (b) Paano si Abraham nagtao nin marahay na halimbawa sa pagpapadanay nin marahay na relasyon sa iba?

⁷ An pagigin toninong puedeng magin depisil kun sa pagmate niato kita trinatar nin bakong makatanosan nin sarong kapagtubod. An Talinhaga 12:18 nagsasabi: “Igwa nin nagtataram na dai iniisip arog kan mga bono nin espada.” An dai inisip na mga tataramon, dawa kun itinaram na daing motibo, puedeng ikakolog na marhay nin boot. An kolog nin boot mas grabe pa ngani kun sa pagmate niato kita binalobagi o nagin biktima nin daing herak na tsismis. (Salmo 6:​6, 7) Alagad dai maninigong togotan nin sarong Kristiano na dahelan sa nakolgan na boot umontok na sia! Kun kamo nasa siring na kamugtakan, kamo na an umenot na itanos an mga bagay-bagay paagi sa pakikipag-olay sa maboot na paagi sa nakagibo nin sala. (Mateo 5:​23, 24; Efeso 4:26) Magin andam na patawadon an tawong iyan. (Colosas 3:13) Paagi sa paghale sa hinanakit, pinagigin posible niato na maomayan an satong emosyon sagkod an satong relasyon sa satong tugang. Si Abraham dai nagtanom nin hinanakit na tibaad namatean nia ki Lot. Tara, si Abraham nagdalidali na idepensa si Lot asin an pamilya kaini!​—Genesis 14:12-16.

Mga Pagbalo na Kagigibohan Ta Man Sana

 8. (a) Paano puedeng ‘saksakon nin [mga Kristiano] an bilog nindang sadiri nin dakol na kakologan’? (b) Taano ta nahimo ni Abraham na magkaigwa nin timbang na pagmansay sa materyal na mga bagay?

⁸ Totoo, an nagkapirang pagbalo kagigibohan ta man sana. Halimbawa, pinagbotan ni Jesus an saiyang mga parasunod: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon.” (Mateo 6:19) Pero, an nagkapirang tugang ‘sinasaksak an bilog nindang sadiri nin dakol na kakologan’ paagi sa pagpaorog sa materyal na intereses kisa intereses kan Kahadean. (1 Timoteo 6:​9, 10) Si Abraham andam na isakripisyo an materyal na kaginhawahan tanganing paogmahon an Dios. “Huli sa pagtubod sia nag-erok bilang dayo sa daga kan panuga siring sa nasa ibang daga, asin nag-erok sa mga tolda kaiba si Isaac asin si Jacob, an mga kapwa nia paramana sa iyo man sanang panuga. Huli ta hinahalat nia an siudad na may tunay na mga pundasyon, na an paratogdok asin kaggibo kan siudad na iyan iyo an Dios.” (Hebreo 11:​9, 10) An pagtubod ni Abraham sa sarong maabot pang “siudad,” o gobyerno nin Dios, nakatabang sa saiya na dai magsarig sa kayamanan. Bako daw na madonong kita kun gibohon man niato iyan?

9, 10. (a) Paano puedeng magin pagbalo an pagmawot na magin prominente? (b) Paano puedeng gumawe an sarong tugang ngonyan bilang “mas hababa”?

⁹ Estudyare an saro pang aspekto. Itinatao kan Biblia an mapuersang instruksion na ini: “Kun an siisay man nag-iisip na sia may halaga mantang sia daing halaga, dinadaya nia an saiyang sadiring isip.” (Galacia 6:3) Dugang pa, sinasadol kita na ‘dai maggibo nin ano man huli sa iriwal o huli sa egotismo, kundi sa kababaan nin pag-isip.’ (Filipos 2:3) An nagkapira nagtatao nin pagbalo sa saindang sadiri paagi sa dai pag-aplikar kan hatol na ini. Minomotibar kan pagmawot na magin prominente imbes na kan pagmawot na ‘gumibo nin marahay,’ nadedesganar asin nagraraot an saindang boot kun dai sinda nakakaako nin mga pribilehio sa kongregasyon.​—1 Timoteo 3:1.

¹⁰ Si Abraham nagtao nin marahay na halimbawa sa ‘dai pag-isip dapit sa sadiri nin orog kisa maninigong isipon.’ (Roma 12:3) Kan matuparan nia si Melquisedec, si Abraham dai naggawe na garo baga sia nakalalabi huli kan saiyang may pabor na kamugtakan sa Dios. Al kontraryo, rinekonoser nia an nakalalabing kamugtakan ni Melquisedec bilang saserdote paagi sa pagtao sa saiya nin tinagba. (Hebreo 7:4-7) An mga Kristiano ngonyan maninigo man na magin andam na gumawe na “mas hababa” asin dai maghagad na magin sentro nin atension. (Lucas 9:48) Kun an mga nangengenot sa kongregasyon garo baga isinasayuma sa saindo an nagkapirang pribilehio, gumibo nin sadiosan na pagsiyasat sa saindong sadiri tanganing aramon kun anong mga pagpaoswag an magigibo nindo sa saindong personalidad o sa paagi nindo nin pag-asikaso sa mga bagay-bagay. Imbes na magpait an boot nindo huli sa mga pribilehio na mayo sa saindo, aprobetsaran nin lubos an pribilehio na yaon sa saindo​—an pribilehio na tabangan an iba na mamidbid si Jehova. Iyo, “magpakumbaba kamo sa irarom kan poderosong kamot nin Dios, tanganing ilangkaw nia kamo sa itinalaan na panahon.”​—1 Pedro 5:6.

Pagtubod sa mga Bagay na Dai Naheheling

11, 12. (a) Taano ta puedeng an nagkapira sa kongregasyon mawaran kan saindang pagkaapurado? (b) Paano si Abraham nagtao nin marahay na halimbawa sa pagsentro kan saiyang buhay sa pagtubod sa mga panuga nin Dios?

¹¹ An saro pang pagbalo puedeng kalabot an garo baga pagkaatraso kan katapusan kan maraot na sistemang ini nin mga bagay. Segun sa 2 Pedro 3:​12, an mga Kristiano dapat na “hinahalat asin pinapagdadanay na harani sa isip an presensia kan aldaw ni Jehova.” Minsan siring, dakol an naghalat sa “aldaw” na ini sa dakol na taon, an nagkapira sa laog nin dakol na dekada. Bilang resulta, an nagkapira tibaad manluya an boot asin mawara an saindang pagkaapurado.

¹² Sa giraray, estudyare an halimbawa ni Abraham. Isinentro nia an saiyang bilog na buhay sa pagtubod sa mga panuga nin Dios, minsan ngani mayo nin posibilidad na gabos iyan maootob sa panahon na sia nabubuhay. Totoo, nabuhay sia nin igong lawig tanganing maheling an pagdakula kan saiyang aki na si Isaac. Alagad maagi an mga siglo bago ikakokomparar an banhi ni Abraham sa “mga bitoon sa kalangitan” o sa “mga baybay sa baybayon.” (Genesis 22:17) Minsan siring, dai nagpait o nanluya an boot ni Abraham. Sa siring sinabi ni apostol Pablo manongod ki Abraham asin iba pang patriarka: “Sa pagtubod ini gabos nagkagaradan, minsan ngani dai ninda nakamtan an kaotoban kan mga panuga, alagad an mga iyan natanaw ninda sa harayo asin galagang inako an mga iyan patin ipinahayag sa publiko na sinda mga nakihihimanwa asin nakiiistar nin temporaryo sa daga.”​—Hebreo 11:13.

13. (a) Paanong an mga Kristiano ngonyan garo “nakiiistar nin temporaryo”? (b) Taano ta pangyayarihon ni Jehova an katapusan kan sistemang ini nin mga bagay?

¹³ Kun napagdanay ni Abraham na nakasentro an saiyang buhay sa mga panuga na an kaotoban “harayo” pa, nangorognang maninigo na kita iyo man ngonyan, na an kaotoban kan mga bagay na ini haranihon na! Arog ni Abraham, dapat tang mansayon an satong sadiri bilang “nakiiistar nin temporaryo” sa sistema ni Satanas, na nagsasayumang magdanay sa mapagpanigo sa sadiri na estilo nin pamumuhay. Naturalmente, mas gusto niato na an “katapusan kan gabos na bagay” mangyari na tolos, bako sanang harani na. (1 Pedro 4:7) Igwa gayod kita nin grabeng problema sa salud. O tibaad nagagabatan kita sa sakit nin pagbuhay. Pero, dapat niatong girumdomon na pangyayarihon ni Jehova an katapusan bako sanang tanganing isalbar kita sa makamomondong mga kamugtakan kundi tanganing santipikaron an saiyang ngaran. (Ezequiel 36:23; Mateo 6:​9, 10) An katapusan maabot, dai man kaipuhan na sa panahon na kombenyente sa sato, kundi sa panahon na pinakaangay sa mga katuyohan ni Jehova.

14. Paano nakikinabang sa pasensia nin Dios an mga Kristiano ngonyan?

¹⁴ Girumdomon man na “si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:9) Mangnoha na an Dios “mapasensia sa saindo”​—mga miembro kan Kristianong kongregasyon. Malinaw na an nagkapira sa sato nangangaipo nin orog pang panahon na gibohon an mga pagbabago asin pagliliwat tanganing “sa katapustapusi makua niang daing digta asin dai nin kanawayan patin nasa katoninongan.” (2 Pedro 3:14) Kun siring, bako daw na kita maninigong magin mapagpasalamat na ipinaheling nin Dios an siring na pasensia?

Pakanompong nin Kagayagayahan sa Ibong nin mga Balakid

15. Paano napagdanay ni Jesus an saiyang kagayagayahan sa atubangan nin mga pagbalo, asin paano nakikinabang an mga Kristiano ngonyan sa pag-arog sa saiya?

¹⁵ An buhay ni Abraham kadakol na leksion an itinotokdo sa mga Kristiano ngonyan. Ipinaheling nia bako sanang an pagtubod kundi pasensia, pagkaalisto nin isip, kosog nin boot, asin daing kaimotan na pagkamoot. Ipinaorog nia sa saiyang buhay an pagsamba ki Jehova. Pero, dapat girumdomon na an daing kabaing na halimbawa na dapat niatong arogon iyo an itinao ni Jesu-Cristo. Sia napaatubang man sa balakid na pagbalo, alagad sa gabos na iyan, nungka siang nawaran kan saiyang kagayagayahan. Taano? Huli ta pinagdanay niang nakatorohok an saiyang isip sa paglaom sa enotan. (Hebreo 12:​2, 3) Sa siring si Pablo namibi: “Ngonyan itogot logod sa saindo kan Dios na nagtatao nin pakatagal asin karangahan na magkaigwa dian sa tahaw nindo kan kaparehong nasa isip na aktitud na yaon ki Cristo Jesus.” (Roma 15:5) Igwa kan tamang nasa isip na aktitud, makanonompong kita nin kagayagayahan sa ibong nin mga balakid na puedeng ibugtak ni Satanas sa satong dalan.

16. Ano an puede tang gibohon kun garo baga dakulaon an satong mga problema?

¹⁶ Kun an mga problema garo baga dakulaon, girumdomon na kun paanong namotan nia si Abraham, namomotan man kamo ni Jehova. Boot nia na kamo mapakarhay. (Filipos 1:6) Manarig kamo nin lubos ki Jehova, na kompiadong “dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” (1 Corinto 10:13) Pataluboon an ugale na pagbasa kan Tataramon nin Dios aroaldaw. (Salmo 1:2) Magmaigot kamo sa pamimibi, na inaarang na tabangan kamo ni Jehova na makatagal. (Filipos 4:6) Sia ‘matao nin banal na espiritu sa mga naghahagad sa saiya.’ (Lucas 11:13) Aprobetsaran an mga probisyon na ginibo ni Jehova tanganing susteniran kamo sa espirituwal, siring kan satong mga publikasyon na basado sa Biblia. Siring man, hanapon an suporta kan kasararoan nin magturugang. (1 Pedro 2:17) Fiel na atenderan an Kristianong mga pagtiripon, ta dian nindo aakoon an pamparigon sa boot na kaipuhan nindo tanganing makatagal. (Hebreo 10:​24, 25) Maggayagaya sa kombiksion na an saindong pakatagal nagbubunga nin aprobadong kamugtakan sa pagheling nin Dios asin na an saindong pagigin fiel pinagagayagaya an saiyang puso!​—Talinhaga 27:11; Roma 5:3-5.

17. Taano an mga Kristiano ta dai nagpapadaog sa pagkadesesperar?

¹⁷ Si Abraham namotan nin Dios bilang saiyang “katood.” (Santiago 2:23) Dawa siring, an buhay ni Abraham pano nin sunod-sunod na nagtatao nin tension na mga pagbalo asin kahorasaan. Kun siring iyan man an maaasahan kan mga Kristiano durante kaining maraot na “huring mga aldaw.” Sa katunayan, an Biblia nagpapatanid sa sato na “an mga maraot asin nandadaya orog na magraraot.” (2 Timoteo 3:​1, 13) Imbes na padaog sa pagkadesesperar, saboton nindo na an mga sakit na inaatubang niato nagtatao nin ebidensia na an katapusan kan maraot na sistema ni Satanas harani na. Alagad ipinagigirumdom sa sato ni Jesus na “an nakatagal sagkod sa katapusan iyo an maliligtas.” (Mateo 24:13) Kaya, ‘dai kamo mag-ontok sa paggibo nin karahayan!’ Arogon si Abraham, asin mapabilang sa mga “nagmamana sa mga panuga paagi sa pagtubod asin pasensia.”​—Hebreo 6:12.

Nasabotan daw Nindo?

• Taano ta maninigong asahan kan banwaan ni Jehova ngonyan an mga pagbalo asin kahorasaan?

• Sa anong mga paagi puedeng gamiton ni Satanas an direktang pagsalakay?

• Paano mareresolberan an personal na mga iriwal sa tahaw kan mga Kristiano?

• Paano puedeng magin mga pagbalo an kapalangkawan asin egotismo?

• Sa anong paagi si Abraham nagtao nin marahay na halimbawa sa paghalat na maotob an mga panuga nin Dios?

[Ritrato sa pahina 26]

An dakol na hoben na Kristiano linalamag, na dinuduhagi kan mga kaedad

[Ritrato sa pahina 29]

Kan kaaldawan ni Abraham an kaotoban kan mga panuga nin Dios “harayo” pa, pero isinentro nia dian an saiyang buhay