Ginibo Ninda an Kabotan ni Jehova

Paghanap nin Agom na Babae Para ki Isaac

PAGAL-PAGAL na an gurang na lalaki na nagtutukaw sa may bobon. Sia asin an saiyang mga katabang kaiba an saindang sampulong kamelyo nagbaklay hale pa sa lugar nin Beer-seba pasiring sa amihanan na Mesopotamia​—na an distansia labing 800 kilometros.a Ngonyan na nakaabot na sinda sa saindang padudumanan, an nagbabaklay na ini na nanluluya nagpondo nin kadikit tanganing horophoropon an saiyang masakit na misyon. Siisay an lalaking ini, asin taano ta ginibo nia an mapagal na pagbaklay na ini?

An lalaki iyo an surogoon ni Abraham, “an pinakamatua sa kairiba nia sa harong.” (Genesis 24:2) Minsan ngani dai nginaranan sa rekord na iyan, minalataw na si Eliezer ini, na sarong beses inapod ni Abraham na ‘sarong aking lalaki kan kairiba nia sa harong’ asin nasambitan nia na nakalinyang ‘sumalihid sa saiya bilang paramana.’ (Genesis 15:​2, 3) Siempre, idto kan panahon na si Abraham asin Sara mayo nin aki. Ngonyan an saindang aki, si Isaac, 40 anyos na, asin minsan ngani bako nang si Eliezer an pangenot na paramana ni Abraham, sia surogoon pa man giraray nia. Kaya nagsunod sia kan itao ni Abraham an depisil na pakiolay. Ano daw idto?

Sarong Depisil na Misyon

Kan kaaldawan ni Abraham bako sanang an pamilya an apektado kan pag-agom kundi pati an bilog na tribo, o komunidad nin patriarka. Kun siring nakaugalean nang an mga magurang an pumili nin aagomon kan saindang mga aki. Minsan siring, sa paghanap nin agom para sa saiyang aking si Isaac, si Abraham napaatubang sa sarong problema. Huli sa maraot na mga dalan kan lokal na mga Cananeo nagin imposible an pag-agom sa saro sa sainda. (Deuteronomio 18:​9-​12) Asin minsan ngani nakaugalean nang an sarong lalaki mag-agom nin katribo nia, an mga paryente ni Abraham ginatos na kilometro an rayo sa amihanan na Mesopotamia. Dai nia nanggad puedeng paistaron duman si Isaac, huli ta pinanugaan ni Jehova si Abraham: “Sa saimong banhi itatao ko an dagang ini,” an daga nin Canaan. (Genesis 24:7) Huli kaini, si Abraham nagsabi ki Eliezer: ‘Magduman ka sa sakuyang nasyon asin sa sakuyang mga paryente, asin makua ka nanggad nin agom na babae para sa sakuyang aking lalaki, para ki Isaac.’​—Genesis 24:4.

Kan matapos an halawig na pagbaklay, si Eliezer nagpahingalo sa may bobon mantang hinohorophorop nia an saiyang misyon. Aram nia na sa dai mahahaloy an mga babae maduman sa bobon tanganing sumakdo nin tubig na gagamiton sa banggi. Kaya nakimaherak sia ki Jehova: “An hoben na babae na sabihan ko, ‘Ibaba mo, tabi, an saimong dulay tangani na makainom ako,’ asin masabi nanggad, ‘Inom, asin paiinomon ko man an saimong mga kamelyo,’ ini an dapat na itao mo sa saimong lingkod, ki Isaac; asin paagi kaini paaraman sa sako na guminibo ka nin maimbod na pagkamoot sa sakuyang kagurangnan.”​—Genesis 24:14.

Mantang sia namimibi pa, sarong magayon na hoben na babae na an ngaran Rebeca an nagdangadang. “Tawe ako, tabi, nin kadikit na tubig hale sa saimong dulay,” an sabi sa saiya ni Eliezer. Ginibo iyan ni Rebeca, dangan sia nagsabi: “Masakdo man ako nin tubig para sa saimong mga kamelyo sagkod na matapos sinda sa pag-inom.” Ini bakong basta-basta alok, huling an sarong pahang kamelyo kayang uminom nin sagkod sa 95 litro nin tubig sa laog sana nin sampulong minuto! Baga man an mga kamelyo ni Eliezer siring kaiyan kapaha o bako, seguradong aram ni Rebeca na mapagal an paglilingkod na iinalok nia. Iyo nanggad, “ipinalis nia tolos an saiyang dulay sa raraan asin paorootrong duminalagan pasiring sa bobon sa pagsakdo, asin padagos na nagsakdo para sa gabos niang kamelyo.”​—Genesis 24:​15-20.

Naririsa an pagdirehir ni Jehova, tinawan ni Eliezer si Rebeca nin bulawan na singsing sa dongo asin duwang bulawan na pulseras, na sa ngonyan nagkakantidad nin mga $1,400. Kan sabihon sa saiya ni Rebeca na sia an makoapo ni Nacor, na tugang ni Abraham, si Eliezer namibi tanganing magpasalamat sa Dios. “Giniyahan ako ni Jehova pasiring sa harong kan mga tugang kan sakong kagurangnan,” an sabi nia. (Genesis 24:​22-27) Si Eliezer dinara sa pamilya ni Rebeca. Pag-abot nin panahon, si Rebeca naagom ni Isaac, asin nagkapribilehio sia na magin apoon kan Mesiyas, si Jesus.

Mga Leksion Para sa Sato

Binendisyonan ni Jehova an mapagngayongayong paghihingoa ni Eliezer na ihanap si Isaac nin agom na matatakton sa Dios. Pero, girumdoma na an pag-agom ni Isaac direktang may koneksion sa katuyohan nin Dios na magpaluwas nin sarong banhi paagi ki Abraham. Kaya an kasaysayan na ini dai maninigong gumiya sa sato na magkonklusyon na an gabos na namimibi na logod magkaigwa nin agom tatawan sa milagrosong paagi. Pero, kun kinukuyog ta an mga prinsipyo ni Jehova, tatawan nia kita nin kosog tanganing tagalan an mga kasakitan na kadungan nin arin man na kamugtakan sa buhay​—pagigin may agom o daing agom.​—1 Corinto 7:​8, 9, 28; ikomparar an Filipos 4:​11-​13.

Kinaipuhan ni Eliezer na maghingoang marhay na gibohon an mga bagay sono sa paagi ni Jehova. Tibaad manompongan ta man na an pagsunod sa mga pamantayan ni Jehova bakong perming pasil. Halimbawa, tibaad depisil humanap nin trabaho na dai nakaoolang sa teokratikong aktibidad, nin agom na matatakton sa Dios, kairiba na nakapakokosog, aling-alingan na dai nakararaot. (Mateo 6:​33; 1 Corinto 7:​39; 15:33; Efeso 4:​17-​19) Pero, kayang pangatamanan ni Jehova an mga habong ikompromiso an mga prinsipyo sa Biblia. An Biblia nanunuga: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia an saimong mga dana.”​—Talinhaga 3:​5, 6.

[Nota sa Ibaba]