Gusto ni Jehova na Ika Magin “Ligtas Asin Nasa Marahay na Kamugtakan”

KUN mangyari na an pinakapeligrosong pangyayari sa kasaysayan, sisiertohon kan Makakamhan sa Gabos na Dios na an gabos na saiyang inooyonan “makakaligtas.” (Joel 2:32) Alagad, an totoo, pirmeng gusto ni Jehova na protehiran an mga tawo sa danyos. Huling “yaon sa [saiya] an burabod nin buhay,” an gabos na tawo ibinibilang niang mahalagang marhay, na maninigong protehiran.—Sal. 36:9.

An Dios asin an saiyang maimbod na mga lingkod kan suanoy magkapareho an pagmansay sa buhay. Oyon sa Genesis 33:18, nakaabot nin “ligtas asin nasa marahay na kamugtakan” si Jacob asin an saiyang pamilya pakatapos nin peligrosong pagbaklay. Naglaom si Jacob ki Jehova para sa proteksion, alagad naggibo man sia nin praktikal na mga lakdang tanganing protehiran an gabos niang kaiba sa pagbaklay. (Gen. 32:7, 8; 33:14, 15) Paagi sa pag-aplikar kan mga prinsipyo sa Biblia, magigin mas ligtas ka asin an iba. Helingon niato kun paano minaaplikar an katunayan na ini sa mga nagtatrabaho sa mga Kingdom Hall asin kaagid na mga proyekto, patin sa mga nagtatao nin ayuda sa panahon nin kalamidad.

Pagigin Ligtas sa Peligro Oyon sa Ley ni Moises

Sa ley ni Moises, an pagigin ligtas sa peligro ginibong opisyal na regulasyon kan banwaan nin Dios. Halimbawa, an sarong Israelita na nagtotogdok nin harong kaipuhan na magbugtak nin barandilya, na sarong hababang lanob o kudal na nakapalibot sa gilid kan bubongan. Huling an mga tawo parateng nasa planodong bubongan kan saindang harong, an mga barandilya nagigin olang tanganing dai sinda mahulog. (1 Sam. 9:26; Mat. 24:17) Kun may maaksidente huli sa dai pagsunod sa ley na ini dapit sa kaligtasan, papanimbagon ni Jehova an kagharong.—Deut. 22:8.

An mga penalidad kan Ley aplikado man kun an ataman na mga hayop makakolog nin tawo. Kun may tawong magadan huli sa panunuag nin toro, kaipuhan na gadanon kan kagsadiri an toro tanganing magin ligtas an ibang tawo. Huling dai nia puedeng kakanon an karne o ipabakal iyan bilang pagkakan, dakulang kapierdihan an paggadan sa siring na hayop. Alagad ipamugtak na pakatapos na makakolog nin tawo an toro, dai binantayan kan kagsadiri an hayop. Ano an mangyayari? Kun pakatapos kaiyan an iyo man sanang toro makagadan nin tawo, an toro asin an kagsadiri kaiyan gagadanon. Pinapag-isip-isip kan ley na iyan an siisay man na may tendensiang magin pabaya sa saiyang ataman na mga hayop.—Ex. 21:28, 29.

An ley nagdadagka man dapit sa tamang paggamit nin mga kasangkapan. Dakol na Israelita an naggagamit nin patok sa pagtiak nin panggatong. Kun sa dai tinutuyo an tarom nin patok tuminalsik saka may tinamaan na tawo kaya nagadan ini, an nagtitiak kaipuhan na dumulag pasiring sa sarong siudad na pailihan. Kaipuhan siang magdanay duman sagkod na magadan an halangkaw na saserdote, na nangangahulogan na an dai tinutuyong nakagadan haloy na mapaparayo sa saiyang pamilya asin harong. An areglong iyan nagtokdo sa nasyon na an buhay sagrado para ki Jehova. An saro na an pagmansay sa buhay kapareho kan sa Dios papagdadanayon na nasa marahay na kondisyon an saiyang mga kasangkapan asin gagamiton iyan nin ligtas.—Bil. 35:25; Deut. 19:4-6.

Paagi sa siring na mga ley, lininaw ni Jehova na gusto nia na an saiyang banwaan magin mapag-isip sa kaligtasan dapit sa saindang mga ginigibo sa laog o luwas kan harong. An mga nakagadan asin nakakolog nin tawo, dawa kun aksidente sana, kaipuhan na manimbag sa saiya. An pagmansay ni Jehova dapit sa pagigin ligtas dai nagliliwat. (Mal. 3:6) Boot pa man giraray nia na an saiyang mga lingkod maglikay na madanyaran an sadiri ninda asin an iba. Ini nangorognang totoo kun kita nagtotogdok asin nagmamantenir nin mga edipisyo na nakatagama sa tunay na pagsamba.

Pagigin Ligtas Kun Nasa mga Proyekto nin Pagtogdok

Minamansay niato na sarong dakulang pribilehio an pagtogdok asin pagmantenir nin mga Kingdom Hall, Assembly Hall, asin mga pasilidad sa sangang opisina. Totoo man iyan sa trabahong ginigibo niato sa pag-ayuda sa panahon nin kalamidad. Sa gabos na panahon, boot niatong gibohon an satong trabaho nin may pagkaeksperto, ta kun dai, dawa an simpleng mga ginigibo puedeng makadanyar sa sato asin sa iba. (Ecl. 10:9) Tunay nanggad, kun uugaleon niatong magtrabaho nin maingat, makakalikay kita sa mga pisikal na danyos.

An Biblia nagsasabi: “An kagayonan nin hoben na mga lalaki iyo an saindang kakosogan, asin an kamurawayan nin gurang na mga lalaki iyo an saindang pagkaigwa nin uban.” (Tal. 20:29) An kosog nin hoben kaipuhan sa magagabat na trabaho. Alagad an may uban na mga trabahador—an mga eksperyensiado na sa pagtogdok—naggigibo kan madetalyeng mga aspekto kan trabaho paagi sa saindang mga kamot asin kasangkapan. Dati, ginamit kan mga may edad na ngonyan an kosog kan saindang pagkahoben sa magagabat na trabaho. Kun ika bagohan na boluntaryo, pagmasdan kun paano nagtatrabaho an mga eksperyensiado na, asin sunodon an saindang mga instruksion. Kun boot mong makanood, dakol an ikakatokdo sa saimo kan mga tugang na eksperyensiado na sa pagtogdok. Kaiba digdi an ligtas na paggamit nin peligrosong materyales asin an pag-alsa nin magagabat na karga. Sa siring, makakapagtrabaho ka nin areglado, ligtas, asin maogma.

An mga trabahador kaipuhan na pirmeng alerto kun nasa lugar nin konstruksion. Madali sanang magbago an mga kamugtakan. An dating solidong daga tibaad may kalot na ngonyan. An ibang trabahador tibaad binago an namumugtakan nin sarong ladder, tabla, o balde nin pintura. Kun ika dai nakapokus sa trabaho, madali ka sanang maaksidente. An mga regulasyon sa pagigin ligtas sa parate may kahagadan na an mga trabahador magsulot nin kagamitan para sa personal na proteksion. An safety glasses, hard hat, asin angay na sapatos makakaprotehir sa saimo sa dakol na peligro sa lugar nin konstruksion. Alagad mapoprotehiran ka sana kun pinapagdadanay mong nasa marahay na kondisyon an siring na kagamitan asin kun isinusulot mo iyan.

Minsan ngani dakol na kasangkapan an garo baga simpleng gamiton, an ligtas asin ekspertong paggamit kaiyan nangangaipo nin pagsasanay asin praktis. Kun mayo ka nin eksperyensia sa sarong kasangkapan na kaipuhan mo, sabihon iyan sa tugang na namamahala. Iaareglo nia na magkaigwa ka nin tamang pagsasanay. An kababaan nin boot, o an pakaaram sa saimong mga limitasyon, sarong marahayon na kualidad. Sa katunayan, iyan kahagadan tanganing malikayan mo na madanyaran an saimong sadiri asin an iba sa lugar nin konstruksion.—Tal. 11:2.

An pagkahulog sarong mayor na dahelan nin pagkalugad sa lugar nin konstruksion. Bago magsakat sa ladder o magtungtong sa scaffolding, seguradohon na iyan igwa kan gabos na kaipuhan para sa kaligtasan asin nasa marahay na kondisyon. Kun ika matrabaho sa scaffolding o sa atop, an mga regulasyon tibaad may kahagadan na magsulot ka nin safety harness o na magbugtak nin balagbag na pansagang. Kun may mga hapot ka manongod sa pagtrabaho sa haralangkaw na lokasyon, ikonsulta iyan sa nagdidirehir kan trabaho.a

Mantang nagdadakula an bilang kan mga naglilingkod ki Jehova sa bilog na kinaban, siring man an pangangaipo sa pagtogdok nin mga Kingdom Hall asin iba pang pasilidad na ginagamit sa pagpalakop nin tunay na pagsamba. An mga nagdidirehir kan trabaho sa mga lugar nin konstruksion nin Kingdom Hall asin kaagid na mga proyekto may paninimbagan na protehiran an mahalagang marhay na mga karnero ni Jehova na nagtatrabaho sa pagdirehir ninda. (Isa. 32:1, 2) Kun ika may pribilehio na magdirehir sa saimong mga tugang sa sarong proyekto nin pagtogdok, nungkang lingawan an halaga kan pagigin ligtas. Seguradohon na an lugar malinig asin mayong nakawarak na mga bagay. Maboot alagad marigon na ipaliwanag sa mga nangangaipo nin pagirumdom kun paano matrabaho nin ligtas. Dai pagtogotan an hoben o mayong eksperyensia na mga trabahador na maglaog sa peligrosong gayo na mga lugar. Antisiparon an mga peligro na mapapaatubang sa mga trabahador, asin andamon sinda na magtrabaho nin ligtas. Girumdomon na an satong pasohan iyo na matapos an proyekto na mayong nakokologan.

An Papel kan Pagkamoot

Sa pagtogdok nin mga Kingdom Hall asin iba pang edipisyo na ginagamit sa tunay na pagsamba, kalabot an trabaho na puedeng magin peligroso. Kun siring, an mga nakikikabtang sa siring na mga proyekto dapat na magin maingat. Paagi sa paggalang sa mga prinsipyo sa Biblia, pagkuyog sa mga regulasyon na inestablisar para sa trabaho, asin marahay na paghusgar, makakalikay ka sa peligro asin mapoprotehiran mo man an saimong mga kapwa trabahador.

Ano an pangenot na motibo niato sa satong dakulang pagpapahalaga sa pagigin ligtas? Pagkamoot. Iyo, pagkamoot ki Jehova an nagpapahiro sa sato na arogon an pagpapahalaga nia sa buhay. Asin huli sa pagkamoot sa mga tawo, malilikayan niato an daing ingat na paggibo nin ano man na makakadanyar sa sainda. (Mat. 22:37-39) Kun siring, gibohon niato an satong pinakamakakaya tanganing an mga nasa proyekto nin pagtogdok magdanay na “ligtas asin nasa marahay na kamugtakan.”

[Nota sa Ibaba]

[Kahon/Ritrato sa pahina 30]

Kun Paano an Ligtas na Pagtrabaho sa mga Ladder

Dai pa nahahaloy, irineport na sa laog nin sarong taon labing 160,000 na trabahador sa Estados Unidos an nalugadan sa pagkahulog sa ladder. Dugang pa, mga 150 an nagadan sa siring na pagkahulog. Saen ka man nag-iistar asin nagtatrabaho, an minasunod nagkapirang regulasyon na makakatabang sa saimo na malikayan an pagkahulog sa ladder.

◇ Dai maggamit nin ladder na nagyuyugoyugo o may diperensia, asin dai paghirahayon an siring na ladder. Ibasura na iyan.

◇ An gabos na ladder may limite an kayang gabat. Siertohon na an gabat mo, kaiba an gabat kan saimong mga kasangkapan asin materyales, dai masobra sa limite kan ladder.

◇ Ibugtak an ladder sa pantay asin solidong lugar. Dai iyan ipagbugtak sa bakong masarig na patugmadan, arog nin scaffolding o sa ibabaw nin mga balde o kahon.

◇ Dapat na pirme kang nakaatubang sa ladder kun minasakat o minababa dian.

◇ Dai magtindog o magtukaw sa duwang pinakahalangkaw na tangga nin ladder.

◇ Kun gagamiton an ladder tanganing makasakat o makababa sa sarong atop o tungtongan, an mag-ibong na kapotan kan ladder maninigong dai mababa sa sarong metro poon sa atop o tungtongan na nasasandigan kaiyan. Seguradohon na dai mahihiro an mga bitis kan ladder paagi sa paggakod kaiyan o pagpako nin tabla sa natitindogan kaiyan. Kun bakong posible iyan, makiolay sa iba na kapotan na marhay an ladder mantang nakatindog ka dian. Igakod nin higot an pinakaitaas kan ladder tanganing dai iyan magtagilid.

◇ Dai paggamiton an mga tangga kan ladder bilang suporta sa nakabalagbag na tabla na titindogan mo.

◇ Kun iinuunat mo an saimong kamot asin bitis mantang nagtatrabaho sa itaas, tibaad magyugoyugo an ladder. Likayan an siring na peligrosong hiro. Kun kaipuhan, parateng iisog an ladder tanganing pirme iyan na harani sa tinatrabaho mo.

◇ Kun kaipuhan mong magtindog sa ladder sa atubangan nin seradong pinto, magbugtak nin nagpapatanid na tanda sa pinto asin baratan iyan. Kun bakong posible na baratan an pinto, pabantayan iyan tanganing mapatanidan an mga maagi dian.

◇ Saro sana an dapat magtrabaho sa ladder apuera sana kun iyan dinisenyo para sa duwang tawo.b

[Nota sa Ibaba]

[Ritrato sa pahina 29]

Kahagadan sa Ley ni Moises na an planodong mga bubongan palibotan nin barandilya