Mga Babae na Nagpagayagaya sa Puso ni Jehova

“Balosan logod ni Jehova an saimong ginigibo, asin magdatong logod saimo an sangkap na tangdan hale ki Jehova.”—RUT 2:12.

1, 2. Paano kita makikinabang paagi sa paghorophorop sa mga halimbawa sa Biblia nin mga babae na nagpagayagaya sa puso ni Jehova?

AN TAKOT sa Dios nagtulod sa duwang babae na makisuway sa sarong Faraon. An pagtubod nagpahiro sa sarong patotot na ibugtak sa peligro an saiyang buhay tanganing protehiran an duwang espiyang Israelita. An marahay na kaisipan asin kapakumbabaan sa sarong krisis nakatabang sa sarong babae na iligtas an dakol na buhay asin pogolan an linahidan ni Jehova na magkasala sa dugo. An pagtubod ki Jehova Dios na may kaibang espiritu nin pagkamapag-istimar nagpahiro sa sarong babaeng balo asin ina na itao an ultimo niang kakanon sa sarong propeta nin Dios. Nagkapira sana ini sa dakol na halimbawa sa Kasuratan nin mga babae na nagpagayagaya sa puso ni Jehova.

² An pagheling ni Jehova sa siring na mga babae asin an mga bendisyon na itinao nia sa sainda nagpapaheling na an ikinaoogma nia nin orog sa gabos iyo an espirituwal na mga kualidad, baga man lalaki o babae. Sa presenteng kinaban, na bangkag sa mga bagay na pisikal, an pagtao nin prioridad sa espirituwalidad sarong angat. Alagad kayang pangganahan an angat na iyan, siring kan ipinaheheling nin minilyon na babaeng matatakton sa Dios na sarong dakulang kabtang kan banwaan nin Dios ngonyan. Inaarog kan siring na mga Kristiana an pagtubod, diskresion, pagkamapag-istimar, asin iba pang marahayon na kualidad na ipinaheling nin matatakton sa Dios na mga babae na nasambitan sa Biblia. Siempre, boot man na arogon kan mga lalaking Kristiano an mga kualidad na ipinaheling kan arogan na mga babaeng idto kan suanoy na mga panahon. Tanganing maheling kun paano niato iyan mas lubos na magigibo, estudyaran niato nin mas detalyado an mga pagkasaysay sa Biblia manongod sa mga babae na nasambitan sa kapinonan.​—Roma 15:4; Santiago 4:8.

Mga Babae na Nakisuway sa Sarong Faraon

3, 4. (a) Taano ta dai sinunod ni Sifra asin Pua an Faraon kan ipagboot kaini na gadanon an lambang bagong mamundag na lalaking Israelita? (b) Paano binalosan ni Jehova an duwang partera huli sa saindang kosog nin boot asin diosnon na takot?

³ Sa mga pagbista sa Nuremberg, na ginibo sa Alemania pagkatapos kan Guerra Mundial II, an dakol na nasentensiahan sa kasalan na lagdoan na paggadan naghingoang ipangatanosan an nakomiter nindang mga krimen paagi sa argumento na nagsusunod sana sinda sa mga pagboot. Ngonyan ikomparar nindo an mga indibiduwal na ini sa duwang parterang Israelita, si Sifra asin Pua, na nag-erok sa suanoy na Egipto durante kan pagreynar nin sarong dai nginaranan alagad maringis na Faraon. Huling ikinatatakot an pagdakol kan Hebreong populasyon, pinagbotan kan Faraon an duwang partera na seguradohon na gadanon an lambang bagong mamundag na lalaking Hebreo. Ano an ginibo kan mga babae dapit sa makababaldeng pagboot na iyan? “Dai ninda ginibo an sinabi sa sainda kan hade nin Egipto, kundi pinapagdadanay nindang buhay an mga aking lalaki.” Taano ta dai nagpadaog sa pagkatakot sa tawo an mga babaeng ini? Huli ta sinda “natakot sa tunay na Dios.”​—Exodo 1:​15, 17; Genesis 9:6.

⁴ Iyo, an mga partera nagpaili ki Jehova, asin sia man nagin “kalasag” para sa sainda, na prinotehiran sinda sa grabeng kaanggotan kan Faraon. (2 Samuel 22:31; Exodo 1:18-20) Alagad dai natapos dian an bendisyon ni Jehova. Binalosan nia si Sifra asin Pua nin sadiring pamilya ninda. Tinawan pa ngani nia nin onra an mga babaeng ini paagi sa pagpasurat kan saindang ngaran asin mga ginibo sa saiyang ipinasabong na Tataramon tanganing mabasa kan maabot na mga kapag-arakian, mantang an ngaran kan Faraon dai na nagirumdoman.​—Exodo 1:21; 1 Samuel 2:30b; Talinhaga 10:7.

 5. Paano ipinaheheling nin dakol na Kristiana ngonyan an aktitud na kapareho kan ki Sifra asin Pua, asin paano sinda babalosan ni Jehova?

⁵ Igwa daw nin mga babae na arog ki Sifra asin Pua ngonyan? Igwa nanggad! Kada taon, rinibo sa siring na mga babae an daing takot na naghuhulit kan nagliligtas-buhay na mensahe kan Biblia sa mga kadagaan na ipinagbabawal iyan kan “pagboot kan hade,” na sa siring isinasapeligro an saindang katalingkasan o an saindang buhay pa ngani. (Hebreo 11:23; Gibo 5:​28, 29) Itinutulod nin pagkamoot sa Dios asin kapwa, dai tinotogotan kan pusoan na mga babaeng iyan na pogolan sinda nin siisay man sa pagpaabot sa iba kan maogmang bareta kan Kahadean nin Dios. Bilang resulta, dakol na Kristiana an napapaatubang sa pagtumang asin paglamag. (Marcos 12:​30, 31; 13:9-13) Siring ki Sifra asin Pua, aram nin lubos ni Jehova an mga gibo kan siring na marahayon asin makosog an boot na mga babae, asin ipaheheling nia an saiyang pagkamoot sa sainda paagi sa pag-iingat kan saindang ngaran sa saiyang “libro nin buhay,” basta fiel sindang magtagal sagkod sa katapusan.​—Filipos 4:3; Mateo 24:13.

An Sarong Dating Patotot Nagtao nin Kagayagayahan sa Puso ni Jehova

6, 7. (a) Ano an aram ni Rahab manongod ki Jehova asin sa saiyang banwaan, asin ano an nagin epekto sa saiya kan kaaraman na ini? (b) Paano tinatawan nin onra kan Tataramon nin Dios si Rahab?

⁶ Kan taon 1473 B.C.E., an sarong patotot na an ngaran Rahab nag-eerok sa Cananeong siudad nin Jerico. Minalataw na si Rahab sarong babae na dakol an aram. Kan an duwang espiyang Israelita magtago sa saiyang harong, ikinaestorya nia sa sainda an espesipikong mga detalye manongod sa milagrosong Lagdoan na Pagharale kan Israel sa Egipto, minsan ngani nangyari iyan 40 taon na an nakaagi! Pamilyar man sia sa mas dai pa sana nahahaloy na mga kapangganahan kan Israel laban sa Amorreong mga Hade na si Sihon asin Og. Mangnoha kun ano an nagin epekto sa saiya kan kaaraman na iyan. Sa mga espiya, sia nagsabi: “Naaaraman ko na itatao nanggad sa saindo ni Jehova an daga, . . . huli ta si Jehova na saindong Dios Dios sa kalangitan sa itaas asin sa daga sa ibaba.” (Josue 2:​1, 9-11) Iyo, an naaraman ni Rahab manongod ki Jehova asin sa saiyang mga ginibo para sa Israel nakatudok sa saiyang puso asin nagpahiro sa saiya na magtubod sa saiya.​—Roma 10:10.

⁷ An pagtubod ni Rahab an nagpahiro sa saiya. Inako nia an mga espiyang Israelita “sa toninong na paagi,” asin kinuyog nia an saindang nagliligtas-buhay na mga instruksion kan salakayon kan Israel an Jerico. (Hebreo 11:31; Josue 2:18-21) Daing duda na an mga gibo nin pagtubod ni Rahab nagtao nin kagayagayahan sa puso ni Jehova, huli ta pinasabngan nia an Kristianong disipulo na si Santiago na isurat an ngaran nia kaiba kan ngaran ni Abraham, na katood nin Dios, bilang halimbawa tanganing arogon kan mga Kristiano. Si Santiago nagsurat: “Sa iyo man na paagi bakong si Rahab man na patotot ipinahayag na matanos paagi sa mga gibo, matapos na saiyang istimaron an mga mensahero asin pinalakaw nia sinda sa ibang dalan?”​—Santiago 2:25.

 8. Paano binendisyonan ni Jehova si Rahab huli sa saiyang pagtubod asin pagkuyog?

⁸ Binalosan ni Jehova si Rahab sa dakol na paagi. Enot, milagroso niang ilinigtas an buhay kaini asin an buhay kan gabos na nagpaili sa saiyang harong​—iyo na ngani, “an kasararo sa harong kan saiyang ama asin an gabos na saiya.” Dangan tinogotan nia an mga ini na mag-erok “sa tahaw kan Israel,” kun saen tatrataron sinda bilang propiong mga taga duman. (Josue 2:13; 6:22-25; Levitico 19:​33, 34) Alagad bako sana iyan. Tinawan man ni Jehova si Rahab kan onra na magin apoon ni Jesu-Cristo. Kanigoan kadakulang pagpaheling nin mamomoton na kabootan sa sarong babae na dati sarong Cananeo na nagsasamba sa idolo!a​—Salmo 130:​3, 4.

 9. Paano puedeng makaparigon sa boot nin nagkapirang babae ngonyan an pagheling ni Jehova ki Rahab asin sa nagkapirang Kristiana kan enot na siglo?

⁹ Arog ki Rahab, may nagkapirang Kristiana, poon kan enot na siglo sagkod ngonyan, na binayaan an inmoral na pamumuhay tanganing paogmahon an Dios. (1 Corinto 6:9-11) Daing duda na an nagkapira sa sainda nagdakula sa mga kamugtakan na kaagid kan sa suanoy na Canaan, kun saen lakop an inmoralidad asin ibinibilang pa ngani na normal. Pero, nagbakle sinda, na itinulod nin pagtubod basado sa tamang kaaraman sa Kasuratan. (Roma 10:17) Huli kaini, masasabi man dapit sa siring na mga babae na “dai sinda ikinasusupog nin Dios, na apodon bilang saindang Dios.” (Hebreo 11:16) Kanigoan na onra!

Binendisyonan Huli sa Saiyang Marahay na Kaisipan

10, 11. Anong mga kamugtakan may labot ki Nabal asin David an nagpahiro ki Abigail?

¹⁰ An dakol na fiel na babae kan suanoy ipinaheling sa pambihirang paagi an kualidad na pagkaigwa nin marahay na kaisipan, kaya sinda nagin mahalagang marhay para sa banwaan ni Jehova. An saro sa siring na babae iyo si Abigail, agom kan mayaman na Israelitang kagsadiri nin daga na si Nabal. An marahay na kaisipan ni Abigail nagresulta sa pagkaligtas nin mga buhay asin pakapogol ki David, an magigin hade sa Israel, na magkasala sa dugo. Mababasa niato an manongod ki Abigail sa pagkasaysay na nakasurat sa 1 Samuel kapitulo 25.

¹¹ Sa pagpoon kan estorya, si David asin an mga parasunod nia nagkakampo harani sa mga aripompon ni Nabal, na prinotehiran ninda na daing bayad aldaw asin banggi bilang kabootan sa Israelitang tugang ninda na si Nabal. Kan dikit na sana an suplay na kakanon ni David, nagsugo sia nin sampulong hoben na lalaki ki Nabal tanganing humagad nin kakanon. May oportunidad ngonyan si Nabal na ipaheling an saiyang pagpasalamat ki David asin tumao sa saiya nin onra bilang linahidan ni Jehova. Alagad kabaliktaran an ginibo ni Nabal. Nagpuputok sa grabeng kaanggotan, ininsulto nia si David asin pinahale an hoben na mga lalaki na mayong dara. Kan mabaretaan ini ni David, nagtipon sia nin 400 na armadong kalalakihan asin nag-andam tanganing bumalos. Nabaretaan ni Abigail an maringis na ginibo kan saiyang agom asin sia naghidali patin naghiro na may marahay na paghusgar tanganing sirosiroon si David paagi sa pagpadara nin dakol na suplay na kakanon. Dangan duminuman sia mismo ki David.​—Bersikulo 2-​20.

12, 13. (a) Paano si Abigail nagin marahay an kaisipan saka maimbod ki Jehova asin sa linahidan nia? (b) Ano an ginibo ni Abigail kan magpuli sia, asin ano na an nangyari sa saiya?

¹² Kan manuparan ni Abigail si David, an saiyang mapakumbabang pakimaherak naghayag kan saiyang hararom na paggalang sa linahidan ni Jehova. “Si Jehova totoo nanggad na magibo para sa sakuyang kagurangnan nin nagdadanay na harong, huli ta mga guerra ni Jehova an ipinakikilaban kan sakuyang kagurangnan,” an sabi nia, na nagsabi pa na nonombrahan ni Jehova si David bilang namomoon sa Israel. (Bersikulo 28-30) Kadungan kaiyan, si Abigail nagpaheling nin dakulang kosog nin boot paagi sa pagsabi ki David na an saiyang paghihingoang bumalos, kun dai popogolan, maresulta sa pagkakasala sa dugo. (Bersikulo 26, 31) Nakapag-isip-isip si David huli sa kapakumbabaan, hararom na paggalang, asin malinaw na pag-iisip ni Abigail. Nagsimbag sia: “Pag-omawon logod si Jehova na Dios nin Israel, na nagsugo saimo sa aldaw na ini na sabaton ako! Asin pag-omawon an saimong marahay na kaisipan, asin pag-omawon ka na suminagang sa sako sa aldaw na ini na dai magkasala sa dugo.”​—Bersikulo 32, 33.

¹³ Pagkapuli, pusoan na hiningoa ni Abigail na sabihon sa saiyang agom an dapit sa saiyang regalo ki David. Minsan siring, kan makua nia sia, sia “burat nang marhay.” Kaya naghalat sia sagkod na ini bako nang burat dangan sia nagsabi sa saiya. Ano an reaksion ni Nabal? Namungnan siang marhay kaya sia inatake nin tibaad sarong klase nin paralisis. Pakalihis nin sampulong aldaw nagadan sia sa kamot nin Dios. Kan mabaretaan ni David an pagkagadan ni Nabal, inalok niang pakasalan si Abigail, na malinaw na saiyang hinangaan asin iginalang nin hararom. Inakseptar ni Abigail an alok ni David.​—Bersikulo 34-42.

Puede daw Kamong Magin Arog ki Abigail?

14. Anong mga kualidad ni Abigail an tibaad gusto niatong kultibaron nin orog pa?

¹⁴ Kamong mga lalaki saka babae, may naheheling daw kamong nagkapirang kualidad ki Abigail na gusto nindong kultibaron nin orog pa? Tibaad mawot nindo na humirong may mas marahay na paghusgar asin marahay na kaisipan kun minaabot an mga problema. O tibaad gusto nindong magtaram sa kalmado asin rasonableng paagi kun nagigin emosyonal nang marhay an ibang tawong kairiba nindo. Kun iyo, taano ta dai iyan ipamibi ki Jehova? Nanunuga sia na tatawan nin kadonongan, pakamansay, asin kakayahan sa pag-iisip an gabos na ‘padagos na naghahagad sa pagtubod.’​—Santiago 1:​5, 6; Talinhaga 2:1-6, 10, 11.

15. Sa anong mga kamugtakan nangorognang mahalaga na ipaheling nin mga Kristiana an mga kualidad na ipinaheling ni Abigail?

¹⁵ An siring na marahayon na mga kualidad nangorognang mahalaga sa sarong babae na may daing pagtubod na agom na lalaki na daing gayo o dai naghihimate sa mga prinsipyo kan Biblia. Tibaad sobra siang uminom. Logod pa man na magbago an siring na mga lalaki. Dakol an nagbago​—sa parate huli sa mahoyong ugale, hararom na paggalang, asin mabining paggawe kan saindang agom na babae.​—1 Pedro 3:​1, 2, 4.

16. Ano man an situwasyon nia sa harong, paano ipaheheling nin tugang na Kristiana na pinahahalagahan nia an saiyang relasyon ki Jehova nin orog sa gabos?

¹⁶ Ano man na mga problema an tibaad kaipuhan nindong tioson sa harong, girumdomon na si Jehova pirmeng yaon tanganing suportaran kamo. (1 Pedro 3:12) Kaya pagmaigotan na pasarigon sa espirituwal an saindong sadiri. Mamibi na logod tawan kamo nin kadonongan asin kalmadong puso. Iyo, orog na rumani ki Jehova paagi sa regular na pag-adal sa Biblia, pamibi, paghorophorop, asin pakikiibaiba sa mga kapwa Kristiano. An pagkamoot ni Abigail sa Dios asin an saiyang aktitud sa linahidan na lingkod nia dai naapektaran kan bakong espirituwal na pananaw kan saiyang agom. Sia naghiro basado sa matanos na mga prinsipyo. Dawa sa sarong pamilya na an agom na lalaki sarong arogan na lingkod nin Dios, an Kristianang agom nakakaaram na kaipuhan niang padagos na maghingoa na pakosogon asin papagdanayon an saiyang sadiring espirituwalidad. Totoo, an saiyang agom na lalaki igwa nin obligasyon sono sa Kasuratan na asikasohon sa espirituwal asin materyal an saiyang agom, alagad sa katapustapusi, an agom na babae dapat na maghingoa na makamtan an saiyang “[sadiring] kaligtasan na may takot asin pagtakig.”​—Filipos 2:12; 1 Timoteo 5:8.

Nag-ako Sia nin “Balos nin Propeta”

17, 18. (a) An babaeng balo sa Sarepta napaatubang sa anong pambihirang pagbalo sa pagtubod? (b) Ano an ginibo kan babaeng balo dapit sa kahagadan ni Elias, asin paano sia binalosan ni Jehova huli kaini?

¹⁷ An paagi nin pag-asikaso ni Jehova sa sarong dukhang babaeng balo kan panahon ni propeta Elias nagpapaheling na hararom an pagpahalaga nia sa mga nagsusuportar sa tunay na pagsamba paagi sa pagsakripisyo kan saindang sadiri asin paggamit kan saindang rekurso. Huli sa halawig na tigmara kan kaaldawan ni Elias, dakol an naapektaran nin makuring gutom, kabale an sarong babaeng balo asin an saiyang hoben na aking lalaki na nag-eerok sa Sarepta. Kan an yaon na sana sa sainda iyo an ultimo nindang pagkakan, may nag-abot na bisita​—an propetang si Elias. Pambihirang gayo an saiyang kahagadan. Minsan ngani aram an kamugtakan kan babae, nagpagibo sia sa saiya nin “sadit na tinapay na bilog,” na gagamiton an ultimo kaining lana asin harina. Alagad sinabi pa nia: “Huli ta ini an sinabi ni Jehova na Dios kan Israel, ‘An dakulang dulay nin harina dai mauubosan, asin an sadit na dulay nin lana dai kukulangon sagkod sa aldaw nin pagtao ni Jehova nin oran sa ibabaw kan daga.’”​—1 Hade 17:8-14.

¹⁸ Ano daw kutana an gigibohon nindo dapit sa pambihirang kahagadan na iyan? An babaeng balo sa Sarepta, na minalataw na rinekonoser si Elias na propeta ni Jehova, “ginibo an sono sa isinabi ni Elias.” Ano an ginibo ni Jehova dapit sa saiyang gibo nin pag-istimar? Sia milagrosong nagtao nin kakanon sa babae, sa saiyang aki, asin ki Elias durante kan tigmara. (1 Hade 17:​15, 16) Iyo, tinawan ni Jehova nin “balos nin propeta” an babaeng balo sa Sarepta, minsan ngani bako siang Israelita. (Mateo 10:41) Tinawan man nin onra kan Aki nin Dios an babaeng balong ini kan omawon nia sia bilang halimbawa sa atubangan kan daing pagtubod na mga tawo sa saiyang sadiring banwaan, an Nazaret.​—Lucas 4:24-26.

19. Sa anong mga paagi ipinaheheling nin dakol na Kristiana ngonyan an espiritu kan babaeng balo sa Sarepta, asin ano an saboot ni Jehova manongod sa mga ini?

¹⁹ Ngonyan, dakol na Kristiana an nagpapaheling kan espiritu kan babaeng balo sa Sarepta. Halimbawa, kada semana, an daing kaimotan na mga tugang na Kristiana​—na an dakol dukha asin igwa nin pamilyang inaasikaso​—nag-iistimar sa nagbibiaheng mga paraataman asin agom ninda. An iba naghihiras nin kakanon sa bilog na panahon na mga ministro sa lokal, nagtatabang sa mga daing sukat, o sa ibang paagi nagtatao kan saindang panahon asin kosog saka mga rekurso ninda tanganing suportaran an gibohon na pan-Kahadean. (Lucas 21:4) Tinatawan daw nin atension ni Jehova an siring na mga pagsasakripisyo? Iyo nanggad! “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”​—Hebreo 6:10.

20. Ano an totokaron sa minasunod na artikulo?

²⁰ Kan enot na siglo, an nagkapirang babaeng matatakton sa Dios nagkapribilehiong paglingkodan si Jesus asin an saiyang mga apostol. Sa sunod na artikulo, totokaron niato kun paano an mga babaeng ini nagtao nin kagayagayahan sa puso ni Jehova, asin pag-oolayan niato an halimbawa nin mga babae sa presenteng aldaw na naglilingkod ki Jehova nin bilog na puso, dawa sa masakit na mga kamugtakan.

[Nota sa Ibaba]

Bilang Pagrepaso

• Paano pinagayagaya kan minasunod na mga babae an puso ni Jehova?

• Si Sifra asin Pua

• Si Rahab

• Si Abigail

• An babaeng balo sa Sarepta

• Paano personal na makatatabang sa sato an paghorophorop sa halimbawang ipinaheling kan mga babaeng ini? Iilustrar.

[Mga Ritrato sa pahina 9]

Dakol na fiel na babae an naglingkod sa Dios sa ibong kan “pagboot kan hade”

[Ritrato sa pahina 10]

Taano si Rahab ta sarong marahayon na halimbawa nin saro na igwa nin pagtubod?

[Ritrato sa pahina 10]

Anong mga kualidad na ipinaheling ni Abigail an gusto nindong arogon?

[Ritrato sa pahina 12]

Dakol na Kristiana ngonyan an nagpapaheling kan espiritu kan babaeng balo sa Sarepta