“Makikatood Kamo Paagi sa Maraot na mga Kayamanan”

“Makikatood kamo paagi sa maraot na mga kayamanan . . . An maimbod sa kadikit maimbod man sa dakol.”​—LUCAS 16:​9, 10.

1. Paano si Jehova inomaw ni Moises asin kan mga aki ni Israel pakadulag ninda sa Egipto?

ILINIGTAS nin sarong milagro​—kanigoan kanakapakokosog sa pagtubod na eksperyensia! An pagluwas kan Israel sa Egipto dai ikaaatribuwir sa siisay man apuwera ki Jehova, an Makakamhan sa gabos. Bakong makangangalas na si Moises asin an mga Israelita nag-arawit: “An sakuyang kosog asin an sakuyang kapangyarihan iyo si Jah, ta sia an nagin sakuyang kaligtasan. Iyo ini an sakuyang Dios, asin papakadakulaon ko sia; Dios kan sakuyang ama, asin papamurawayon ko sia.”​—Exodo 15:​1, 2; Deuteronomio 29:2.

2. Ano an dinara kan banwaan ni Jehova paghale ninda sa Egipto?

² Laen nanggad an bagong makamtan na katalingkasan kan Israel sa saindang situwasyon sa Egipto! Ngonyan puwede na nindang sambahon si Jehova na mayo nin kaolangan. Asin dai sinda naghale sa Egipto na mayong dara. Si Moises nagsaysay: ‘An mga aki ni Israel naghagad sa mga Egipcio nin mga bagay na pirak asin mga bagay na bulawan asin mga gubing. Asin tinawan ni Jehova nin biyaya an banwaan sa mga mata kan mga Egipcio, kaya itinao kan mga ini an mga hinagad; asin hinaklasan ninda an mga Egipcio.’ (Exodo 12:​35, 36) Alagad paano ninda ginamit an mga kayamanan na ini nin Egipto? Nagbunga daw iyan nin ‘pagpamuraway ki Jehova’? Ano an satong manonodan sa saindang halimbawa?​—Ikomparar an 1 Corinto 10:11.

“Kontribusyon ki Jehova”

3. An paggamit kan Israel nin bulawan sa falsong pagsamba nagin dahelan nin anong reaksion ni Jehova?

³ Durante kan 40 aldaw na lawig nin pagbaklay ni Moises sa Bukid nin Sinai tanganing akoon an mga instruksion nin Dios sa Israel, an mga tawong naghahalat sa ibaba dai mapamugtak. Tinarangkas an saindang mga bulawan na hikaw, pinagbotan ninda si Aaron na gumibo nin sarong imahen tanganing sambahon ninda. Itinogdok man sinda ni Aaron nin altar, asin amay kan suminunod na aldaw, sinda nagdorolot duman nin mga atang. An paggamit daw na ini kan saindang bulawan nagpangyari na mamotan sinda kan saindang Paraligtas? Dai nanggad! “Ngonyan pabayae nindo ako,” an ipinahayag ni Jehova ki Moises, “tanganing maglaad an sakong kaanggotan tumang sa sainda asin mapoho ko sinda.” Sa pakiolay sana ni Moises na dai linaglag ni Jehova an nasyon, minsan ngani an rebelyosong mga kagmukna ginadan nin damat gikan sa Dios.​—Exodo 32:​1-6, 10-14, 30-35.

4. Ano an “kontribusyon ki Jehova,” asin siisay an nagdolot kaiyan?

⁴ Kan huri, an Israel nagkaigwa kan oportunidad na gamiton an sadiri nindang mga kayamanan sa sarong paagi na talagang nakapaogma ki Jehova. Nagdara sinda nin “kontribusyon ki Jehova.”a Bulawan, pirak, tanso, asul na torsido, manlaenlaen na kinoloran na materyales, mga anit nin karnero, mga anit nin poka, asin kahoy na akasya an kabale sa mga donasyon para sa pagtogdok asin paggibo kan mga kasangkapan sa tabernakulo. An tala dinadara an satong atension sa kaisipan kan mga nagkontribuwir. “An lambang may dusay na puso magdara kaiyan bilang kontribusyon ki Jehova.” (Exodo 35:​5-9) Kadakoldakol an simbag kan Israel. Kaya, an tabernakulo sarong estruktura na may “kagayonan asin dakulang kamurawayan,” bilang pagkotar sa mga tataramon nin sarong iskolar.

Mga Kontribusyon Para sa Templo

5, 6. Manongod sa templo, paano ginamit ni David an saiyang mga kayamanan, asin paano naghimate an iba?

⁵ Minsan ngani si Hadeng Salomon nin Israel an nagboot kan pagtogdok nin sarong permanenteng harong para sa pagsamba ki Jehova, si David, an saiyang ama, an naggibo kan dakolon na pag-andam para kaiyan. Nagkolekta si David nin dakolon na bulawan, pirak, tanso, batbat, pasagi, asin magagayon na gapo. “Huling nawiwili ako sa harong kan sakong Dios,” an sabi ni David sa saiyang banwaan, “igwa pa ako nin espesyal na rogaring, bulawan asin pirak; itinatao ko nanggad iyan sa harong kan sakong Dios asin orog sa gabos na nag-andam ako para sa banal na harong: tolong ribong talentong bulawan . . . asin pitong ribong talentong dinalisay na pirak, para sa pagtahob sa mga lanob kan mga harong.” Dinagka ni David an iba na magin matinao man. Labi-labi an simbag: dakol na bulawan, pirak, tanso, batbat, asin magagayon na gapo. “Sa bilog na puso,” an banwaan naggibo nin “gikan sa boot na mga dolot ki Jehova.”​—1 Cronica 22:5; 29:​1-9.

⁶ Paagi sa gikan sa boot na mga kontribusyon na ini, an mga Israelita nagpahayag nin hararom na pagpahalaga sa pagsamba ki Jehova. Si David mapakumbabang namibi: “Siisay ako asin siisay an sakong banwaan, na kami magkaigwa nin kakayahan na magtao nin gikan sa boot na mga dolot na arog kaini?” Taano? “Huli ta an gabos hale sa saimo, asin hale sa saimong sadiring kamot kami nagtao sa saimo. . . . Ako, sa sakong kabtang, sa katanosan kan sakong puso gikan sa boot na idinolot an gabos na bagay na ini.”​—1 Cronica 29:​14, 17.

7. Anong nagpapatanid na leksion an satong manonodan sa kaaldawan ni Amos?

⁷ Alagad, an mga tribo nin Israel nasudyang papagdanayon na pangenot sa saindang isip asin puso an pagsamba ki Jehova. Kan ikasiyam na siglo B.C.E., sarong nababangang Israel an nagkasala nin espirituwal na kapabayaan. Mapadapit sa sampulong tribong kahadean nin Israel sa amihanan, si Jehova nagpahayag paagi ki Amos: “Herak man kan mga daing pakilabot sa Sion asin kan mga nananarig sa bukid nin Samaria!” Ilinadawan nia sinda bilang mga tawong “naghihirigda sa mga katreng marfil . . . nakatirihaya sa saindang mga sopa, . . . nagkakarakan kan mga lalaking karnero gikan sa aripompon asin kan mga ogbon na baka gikan sa pinatabang mga baka; . . . nag-iirinom sa mga mangko nin arak.” Alagad an saindang kayamanan dai nagin proteksion. An Dios nagpatanid: “Sinda maduman sa pagkadistiyero sa enotan kan mga maduman sa pagkadistiyero, asin an pag-orogma kan mga nakatirihaya mawawara.” Kan 740 B.C.E., an Israel nagsakit sa mga kamot kan Asiria. (Amos 6:​1, 4, 6, 7) Asin pag-abot nin panahon an kahadean nin Juda sa timog nagin biktima man nin materyalismo.​—Jeremias 5:​26-29.

Tamang Paggamit sa mga Kayamanan kan mga Panahon Kristiano

8. Anong marahay na halimbawa an itinao ni Jose asin Maria kun manongod sa paggamit sa mga kayamanan?

⁸ Sa kabaliktaran, an dukhang gayong kamugtakan kan mga lingkod nin Dios kan huring mga panahon dai nakaolang sa sainda sa pagpaheling nin kaigotan para sa tunay na pagsamba. Horophoropa si Maria asin Jose. Bilang pagkuyog sa pagboot ni Cesar Augosto, sinda nagbaklay pasiring sa sadiring banwaan kan saindang pamilya, an Betlehem. (Lucas 2:​4, 5) Duman namundag si Jesus. Pakalihis nin 40 aldaw, si Jose asin Maria nagsongko sa templo sa kataed na Jerusalem tanganing iatubang an hinahagad na dolot sa paglinig. Nagpaparisa kan saindang dukhang kamugtakan, si Maria nagdolot nin duwang sadit na gamgam. Dai ipinanarahotan ni Maria asin ni Jose an saindang kadukhaan. Imbes, makinuyog nindang ginamit an saindang limitadong kayamanan.​—Levitico 12:8; Lucas 2:​22-24.

9-11. (a) An mga tataramon ni Jesus sa Mateo 22:21 nagtatao nin anong giya sa kun paano niato ginagamit an kuwarta? (b) Taano an sadit na kontribusyon kan balo ta dai idinolot na daing kamanungdanan?

⁹ Kan huri, an mga Fariseo asin partido kan mga parasunod ni Herodes nagprobar na sugotan si Jesus, na nagsasabing: “Kaya, sabihi kami, Ano sa paghona mo? Sono daw sa katogonan na magbayad nin buhis ki Cesar o bako?” An simbag ni Jesus naghayag kan saiyang pagmansay. Pinanonongdan an sinsilyo na itinao ninda saiya, si Jesus naghapot: “Kiisay na ladawan asin inskripsion ini?” Sinda nagsimbag: “Ki Cesar.” Madonong na nagkonklusyon sia: “Kaya itao ki Cesar an mga bagay na ki Cesar, alagad sa Dios an mga bagay na sa Dios.” (Mateo 22:​17-21) Aram ni Jesus na an autoridad na nagpapaluwas kan sinsilyo naghahagad na bayadan an mga buhis. Pero tinabangan nia duman an saiyang mga parasunod asin siring man kaiwal na makarealisar na an sarong tunay na Kristiano naghihingoa man na itao “an mga bagay na sa Dios.” Kabale digdi an tamang paggamit kan materyal na mga kayamanan nin saro.

¹⁰ An sarong pangyayari na naheling ni Jesus sa templo nag-iilustrar kaini. Kakokondenar pa sana nia kan hanab na mga eskriba na ‘nagsamsam sa harong kan mga balo.’ “Kan sia mangalagkalag naheling nia an mayayaman na naghoholog kan saindang mga balaog sa mga kaha nin kayamanan,” an ibinareta ni Lucas. “Dangan naheling [ni Jesus] an sarong dukhang balo na nagholog duman nin duwang saradit na sinsilyo na kadikiton an halaga, asin sia nagsabi: ‘Sa katotoohan sinasabi ko sa saindo, An balong ini, minsan ngani dukha, nagbugtak nin labi kisa sa sainda gabos. Huli ta sinda gabos nagbugtak nin mga dolot gikan sa saindang kalabihan, alagad an babaeng ini nagbugtak gikan sa saiyang kadaihan kan gabos niang pagbuhay.’” (Lucas 20:​46, 47; 21:​1-4) Nasambitan kan ibang tawo na an templo nasasamnohan nin magagayon na gapo. Si Jesus nasimbag: “Kun manongod sa mga bagay na ini na saindong naheheling, maabot an mga aldaw na mayo nin gapo sa ibabaw nin gapo na matatada digdi asin dai gagabaon.” (Lucas 21:​5, 6) Nagin daw daing kamanungdanan an sadit na kontribusyon na idto kan balo? Siertong dai. Sinuportaran nia an areglo na inestablisar ni Jehova kan panahon na idto.

¹¹ Sinabihan ni Jesus an saiyang tunay na mga parasunod: “Mayong surogoon sa harong na puwedeng magin oripon sa duwang kagurangnan; huli ta, magsalang ikakaongis nia an saro asin mamomotan an ikaduwa o magdadanay sia sa saro asin isisikwal an ikaduwa. Dai kamo puwedeng magin mga oripon nin Dios asin nin mga kayamanan.” (Lucas 16:13) Kun siring, paano niato ikakapaheling an tamang pagigin timbang sa paggamit kan satong pinansial na mga kayamanan?

Maimbod na mga Pinaniwalaan

12-14. (a) An mga Kristiano pinaniwalaan nin anong mga kayamanan? (b) Sa anong ekselenteng mga paagi maimbod na inootob kan banwaan ni Jehova ngonyan an saindang pagigin pinaniwalaan? (c) Saen naghahale an kuwarta na pansuportar sa gibohon nin Dios ngonyan?

¹² Kan idinudusay ta an satong buhay ki Jehova, garo man sana sinasabi niato na an gabos na yaon sa sato, an gabos niatong kayamanan, sadiri nia. Paano, kun siring, maninigo tang gamiton an yaon sa sato? Sa pagpaliwanag kan Kristianong paglilingkod sa kongregasyon, si Tugang na C. T. Russell, an enot na presidente kan Watch Tower Society, nagsurat: “An lambang saro dapat na ibilang an saiyang sadiri na ninombrahan kan Kagurangnan na magin pinaniwalaan kan saiya mismong panahon, impluwensia, kuwarta, abp., asin an kada saro dapat na maghingoang gamiton an mga talentong ini sa saiyang pinakamakakaya, sa ikamumuraway kan Kagurangnan.”​—The New Creation, pahina 345.

¹³ “An hinahanap sa mga pinaniwalaan iyo na an tawo makuang maimbod,” an sabi kan 1 Corinto 4:2. Bilang internasyonal na organisasyon, an mga Saksi ni Jehova nagmamaigot na gumaweng kaoyon kan paglaladawan na iyan, na naggagamit nin dakol na panahon sagkod sa saindang makakaya sa Kristianong ministeryo, na maingat na pinatatalubo an saindang abilidad sa pagtotokdo. Saro pa, an mga grupo nin mga boluntaryo sa irarom kan pagdirehir kan Rehiyonal na mga Komite sa Pagtogdok boluntad na nagtatao kan saindang panahon, kosog, asin abilidad sa paggibo nin magagayon na mapagtitiriponan para sa pagsamba. Sa gabos na ini, naoogmang marhay si Jehova.

¹⁴ Saen naghahale an kuwarta na pansuportar sa mahiwas na kampanyang ini nin pagtotokdo asin pagtogdok? Sa mga may dusay na puso, siring man sana kan mga aldaw kan pagtogdok kan tabernakulo. Bilang indibiduwal, kita daw nakikikabtang? An paagi daw kan satong paggamit sa satong pinansial na mga kayamanan nagpapaheling na an paglilingkod ki Jehova pinakamahalaga sa sato? Sa mga bagay na kalabot an kuwarta, magin kitang maimbod na mga pinaniwalaan.

Sarong Arogan sa Pagkamatinao

15, 16. (a) Paano an mga Kristiano kan kaaldawan ni Pablo nagpaheling nin pagigin bukas-palad? (b) Paano niato maninigong mansayon an satong pag-orolay ngonyan?

¹⁵ Si apostol Pablo nagsurat manongod sa espiritu nin pagkamatinao kan mga Kristiano sa Macedonia asin Acaya. (Roma 15:26) Minsan ngani sinda mismo nagtitios, andam sindang nagkontribuwir tanganing tabangan an saindang mga tugang. Siring man dinagka ni Pablo an mga Kristiano sa Corinto na bukas-palad na magtao, na idinodonar an saindang mga sobra tanganing mahipnoan an pagkatikapo nin iba. Mayo ni saro na tamang masasahotan si Pablo nin pangingikil. Sia nagsurat: “An nagtatanom nin kadikit mag-aani man nin kadikit; asin an nagtatanom nin abunda mag-aani man nin abunda. Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.”​—2 Corinto 8:​1-3, 14; 9:​5-7, 13.

¹⁶ An bukas-palad na mga kontribusyon na ginigibo kan satong mga tugang asin interesadong tawo para sa pambilog na kinaban na pan-Kahadean na gibohon ngonyan nagtatao nin ebidensia sa kun gurano ninda pinahahalagahan na marhay an pribilehiyong ini. Alagad, siring kan ipinagirumdom ni Pablo sa mga taga-Corinto, marahay na horophoropon niato an pag-orolay na ini bilang sarong pagirumdom.

17. Anong arogan sa pagtao an idinagka ni Pablo, asin ikakaaplikar daw ini ngonyan?

¹⁷ Sinadol ni Pablo an mga tugang na sunodon an sarong arogan sa saindang pagtao. “Sa kada enot na aldaw nin semana,” an sabi nia, “an lambang saro sa saindo sa saiyang sadiring harong magtagama na sono sa saiyang nakukua.” (1 Corinto 16:​1, 2) Iyan puwedeng magserbing halimbawa para sa sato asin para sa mga aki ta sa satong pagtao nin kontribusyon, baga man ginigibo ta iyan paagi sa kongregasyon o direkta sa pinakaharaning sangang opisina kan Watch Tower Society. Sarong mag-agom na misyonero na iinasignar na maghulit sa sarong banwaan sa Sirangan na Aprika an nag-imbitar sa mga interesado na umiba sa sainda sa sarong pag-adal sa Biblia. Pakatapos kan enot na pagtiripon na ini, an mga misyonero maingat na nagholog nin nagkapirang sinsilyo sa sarong kahon na may nakasurat na “Mga Kontribusyon para sa pan-Kahadean na gibohon.” Siring man kaiyan an ginibo kan ibang nag-atender. Kan huri, pakatapos na an mga bagohan na ini maorganisar na magin sarong Kristianong kongregasyon, an paraataman sa sirkito nagsongko asin nagkomento dapit sa pagigin regular kan saindang mga kontribusyon.​—Salmo 50:​10, 14, 23.

18. Paano ta puwedeng tabangan an satong mga tugang na nasa kagipitan?

¹⁸ Igwa man kita nin pribilehiyo na gamiton an satong mga kayamanan na tabangan an mga biktima nin natural na mga kalamidad asin idtong mga nag-iistar sa mga lugar na igwang guerra. Naogma nanggad kitang mabasa an dapit sa mga ayudang ipinadara sa Sirangan na Europa mientras na inaagihan nin kariribokan sa ekonomiya asin politika an parteng iyan kan kinaban! An mga kontribusyon na kapwa materyal asin kuwarta nagpaheling kan pagkamatinao asin pagkasararo kan satong mga tugang sa kaibanan kan daing sukat na mga Kristiano.b​—2 Corinto 8:​13, 14.

19. Anong praktikal na mga bagay an puwede niatong gibohon sa pagtabang sa mga nasa pambilog na panahon na paglilingkod?

¹⁹ Pinahahalagahan niatong marhay an gibohon kan satong mga tugang na nasa pambilog na panahon na paglilingkod bilang mga payunir, nagbibiyaheng paraataman, misyonero, asin boluntaryo sa Bethel, bako daw? Mantang itinotogot kan satong mga kamugtakan, puwede kitang direktang magtao sainda nin materyal na tabang. Halimbawa, kun an paraataman nin sirkito nagsosongko sa saindong kongregasyon, puwede kamong magtagama sa saiya nin dadagusan, pagkakan, o tabang para sa saiyang mga pamasahe. An siring na pagkamatinao naririsa kan satong langitnon na Ama, na boot na an saiyang mga lingkod naaataman. (Salmo 37:25) Nagkapirang taon na an nakaagi an sarong tugang na lalaki na nakapagpamerienda sana inimbitaran an nagbibiyaheng paraataman asin an agom kaini sa saiyang harong. Paghale kan mag-agom para sa pambangging paglilingkod sa langtad, inabotan nin sobre kan tugang an saiyang mga bisita. Nasa laog an sarong bank note (katimbang nin sarong dolyar sa E.U.) kaiba an isinurat nin kamot na mensaheng ini: “Para sa sarong tasang kape o sarong galon na gasolina.” Kanigoan kagayon na pag-apresyar an ipinahayag sa mapakumbabang paaging ini!

20. Anong pribilehiyo asin responsibilidad an habo niatong pabayaan?

²⁰ Sa espirituwal na paagi, binibendisyonan an banwaan ni Jehova! Nagkakamit kita nin espirituwal na mga bangkete sa satong mga asamblea asin kombension, kun saen kita nag-aako nin bagong mga publikasyon, marahay na pagtotokdo, asin praktikal na sadol. Paagi sa pusong pano nin pag-apresyar sa satong espirituwal na mga bendisyon, dai niato linilingawan an satong pribilehiyo asin responsibilidad na magkontribuwir nin mga pondo na magagamit sa pagpaoswag kan intereses kan Kahadean nin Dios sa bilog na kinaban.

“Makikatood Kamo Paagi sa Maraot na mga Kayamanan”

21, 22. Ano an mangyayari dai mahaloy sa “maraot na mga kayamanan,” na naghahagad sa sato na gibohon an ano ngonyan mismo?

²¹ Tunay nanggad, igwang abundang paagi na ikakapaheling niato na an pagsamba ki Jehova pangenot sa satong buhay, na an nangongorog kaimportanteng paagi kalabot an satong paghimate sa sadol ni Jesus: “Makikatood kamo paagi sa maraot na mga kayamanan, tanganing, kun iyan masudya na, kamo akoon ninda sa daing sagkod na mga erokan.”​—Lucas 16:9.

²² Mangnoha na si Jesus nagtaram manongod sa pagkasudya kan maraot na mga kayamanan. Iyo, an aldaw madatong na an kuwarta kan palakaw na ini magigin daing halaga. “Sa mga lansangan iaapon ninda an sainda mismong pirak, asin an saindang sadiring bulawan magigin makababaldeng bagay,” an ihinula ni Ezequiel. “An saindang pirak ni an saindang bulawan dai makapagliligtas sa sainda sa aldaw kan kabangisan ni Jehova.” (Ezequiel 7:19) Sagkod na mangyari ini, dapat kitang magmadonong asin magmansay sa paagi kan satong paggamit sa satong materyal na mga kayamanan. Sa siring dai kita masalingoy na may pagbasol huli sa dai niato pakahimate sa patanid ni Jesus: “Kun dai nindo napatunayan na kamo maimbod mapadapit sa maraot na mga kayamanan, siisay an magtitiwala saindo kan tunay? . . . Dai kamo puwedeng magin mga oripon nin Dios asin nin mga kayamanan.”​—Lucas 16:​11-13.

23. Ano an maninigo niatong madonong na gamiton, asin ano an satong magigin balos?

²³ Kun siring, maimbod niato gabos na himateon an mga pagirumdom na ini na enoton sa satong buhay an pagsamba ki Jehova asin madonong na gamiton an gabos niatong kayamanan. Sa siring puwede niatong papagdanayon an satong pakikikatood ki Jehova asin ki Jesus, na nanunuga na kun masudya na an kuwarta aakoon ninda kita sa “daing sagkod na mga erokan,” na igwa kan paglaom na buhay na daing sagkod magsalang sa langitnon na Kahadean o sa sarong paraisong daga.​—Lucas 16:​9.

[Mga Nota sa Ibaba]

Nagigirumdoman daw Nindo?

◻ Ano an simbag kan Israel sa pangagda ni Jehova na magkontribuwir sa pagtogdok kan tabernakulo?

◻ Taano ta bakong daing kamanungdanan an kontribusyon kan balo?

◻ Anong responsibilidad an isinasaabaga kan mga Kristiano sa paagi kan saindang paggamit sa saindang mga kayamanan?

◻ Paano ta malilikayan an mga pagbasol sa satong paggamit nin kuwarta?

[Ritrato sa pahina 15]

An kontribusyon kan balo, minsan ngani sadit, bakong daing kamanungdanan

[Mga ritrato sa pahina 16, 17]

An satong mga kontribusyon nagsusuportar sa pan-Kahadean na gibohon sa bilog na kinaban