Paghimati sa mga Tanog kan Trumpeta Ngunyan

GABOS kita naniniwala na si Jehova an nagdidirehir sa saiyang banwaan asin nagsusustenir kan espirituwal na mga pangangaipo ninda sa “huring mga aldaw” na ini. (2 Tim. 3:1) Pero kaipuhan niyato gabos na magin makinuyog ki Jehova. Puwede tang ikumparar an satong sitwasyon sa sitwasyon kaidto kan mga Israelita sa kaawagan. Kaipuhan nindang maghimati sa mga tanog kan trumpeta.

Pinagibo ni Jehova si Moises nin duwang trumpeta na gibo sa pinulpog na plata “para tiripunon an katiripunan asin para magtaong senyal na mabalyo na nin kampo.” (Bil. 10:2, NWT) Papatanugon kan mga saserdote an trumpeta sa manlain-lain na paagi tanganing ipasabot sa banwaan kun ano an kaipuhan nindang gibuhon. (Bil. 10:3-8) Sa panahon niyato, nakakaresibi an banwaan nin Diyos nin mga instruksiyon sa nagkapirang paagi. Pag-isipan an tulo sa mga paaging ini na nagpapagirumdom sa sato kan mga tanog nin trumpeta kan suanoy na panahon. Iniimbitaran an banwaan nin Diyos ngunyan sa darakulang pagtiripon, tinatawan nin pagsasanay an ninombrahan na mga paraataman, asin may ginigibong mga pagbabago sa teokratikong mga areglo sa gabos na kongregasyon.

Pag gusto ni Jehova na magtiripon an “bilog na katiripunan” sa may entrada sa sirangan na parte kan tabernakulo, pinapatanog kan mga saserdote an duwang trumpeta. (Bil. 10:3, NWT) An partikular na tanog na iyan nadadangog kan gabos na tribo na nagkakampo sa palibot kan tabernakulo sa apat na grupo. An mga nagkakampo harani sa entrada posibleng marhay na makaabot sa tiripunan sa laog sana nin pirang minuto. An iba man huruharayo kaya tibaad mangaipo sinda nin mas dakul na panahon asin paghihinguwa bago makaabot. Sain man sinda nagkakampo, gusto ni Jehova na magtiripon an gabos asin makinabang.

Ngunyan, dai na man kita nagtitiripon sa sarong tabernakulo, pero iniimbitaran kita sa mga pagtiripon kan banwaan nin Diyos. Kaiba sa mga pagtiripon na iyan an pangrehiyon na mga kumbensiyon asin iba pang espesyal na mga okasyon na diyan nag-aako kita nin mahalagang marhay na impormasyon asin instruksiyon. Sa mga kadagaan sa bilog na kinaban, parehong programa an inaako kan mga lingkod ni Jehova. Huli kaiyan, an mga nag-aako kan imbitasyon asin nag-aatender sa mga pagtiripon na ini nagigin parte nin sarong dakula asin maugmang grupo. May mga kaipuhan na magbiyahe nin mas harayo kisa sa iba. Dawa arog kaiyan, sinasabi kan mga nag-ako kan imbitasyon na sulit nanggad an saindang paghihinguwa.

Paano man idtong napapasuway na mga grupo na harayuon sa darakulang pagtiripon? Huli sa modernong teknolohiya, dakul sainda an nakikinabang sa parehong programa asin nakakamati na parte sinda kan darakulang pagtiripon. Halimbawa kan magbisita sa Benin an sarong representante kan headquarters, pig-transmit kan sangang opisina an sarong programa pasiring sa Arlit, Niger, sarong banwaan na may minahan sa Sahara Desert. Beynte uno katawo na kompuwesto nin mga Saksi asin mga interesado an nagtiripon. Dawa ngani harayo sinda, namatian ninda na kasaro sinda kan dakulang katiripunan nin 44,131 nag-atender sa programa. Sarong brother an nagsurat: “Udok sa puso kaming nagpapasalamat sa pag-transmit nindo kan programa kan okasyon na ini. Naipahiling giraray kaini sa samo na namumutan nindo kaming marhay.”

Pag saro sanang trumpeta an pinatanog kan Israelitang mga saserdote, “an mga pamayo sana, na iyo an mga namamayo sa manangribo,” an kaipuhan na magduman sa tolda nin pakipagtagbuan. (Bil. 10:4, NWT) Maako sinda diyan nin impormasyon asin pagsasanay hali ki Moises. Makakatabang iyan sa sainda na magibo an saindang mga paninimbagan sa saindang tribo. Kun saro ka sa mga pamayong idto, bako daw na gigibuhon mo an gabos tanganing makaatender diyan asin makinabang?

Ngunyan, an mga elder sa kongregasyon bakong “mga pamayo”; dai man ninda dinodominar an aripumpon nin Diyos na nasa pangangataman ninda. (1 Ped. 5:1-3) Pero ginigibo nanggad ninda an saindang pinakamakakaya para pasturan an aripumpon. Kaya inaako tulos ninda an imbitasyon para sa dagdag na pagsasanay, arog baga kan Pang-Kahadian na Paadalan sa Pagmiministro. Sa mga paadalan na iyan, nanunudan kan mga elder kun paano magigin mas epektibo sa pag-asikaso sa mga paninimbagan sa kongregasyon. Huli kaini, mas nag-uuswag sa espirituwal an gabos sa kongregasyon. Dawa pa kun dai ka nakaatender sa arog kaiyan na mga paadalan, posibleng marhay na nakikinabang ka sa mga nanudan kan mga nakaatender diyan.

May beses na nagpapatanog an Israelitang mga saserdote nin paburubagong tanog nin trumpeta. Ipinapaisi kaini na gusto ni Jehova na magbalyo sa ibang lugar an bilog na kampo. (Bil. 10:5, 6) Mahihiling sa pagbalyo nin kampo an pambihirang pagkaorganisar kan mga Israelita, pero mapagal man iyan para sa gabos. May mga Israelita na tibaad nag-aalangan kun minsan na magbalyo. Taano?

Tibaad iniisip kan iba na parati na sana sindang nagbabalyo tapos biglaan pa. “Kun minsan, magdamlag sanang nagdadanay an panganuron.” May mga pagkakataon man na “duwang aldaw . . . , sarong bulan, o mas halawig pa” bago sinda magbalyo giraray. (Bil. 9:21, 22, NWT) Asin pirang beses na nagbalyo an kampo? Sa Bilang kapitulo 33 sinambit an mga 40 lugar kun sain nagkampo an mga Israelita.

Kun minsan, tibaad may mga nakapagkampo sa malimpoy na lugar. Marahay nanggad na kamugtakan iyan sa “mahiwas asin makatatakot na kaawagan.” (Deut. 1:19, NWT) Kaya, posibleng maisip ninda na bako nang arog kaiyan karahay an magigin kamugtakan sa sunod na babalyuhan ninda.

Pag nagpuon nang maghali an mga tribo, tibaad masakit sa iba na maghalat kan turno ninda. Nadangog kan gabos an paburubagong tanog nin trumpeta, pero bako gabos sabay-sabay na makakahali. An paburubagong tanog nin trumpeta senyal na dapat nang maghali an mga tribong nagkakampo sa parteng sirangan—an Juda, Isacar, asin Zebulon. (Bil. 2:3-7; 10:5, 6) Pagkahali ninda, an mga saserdote mapatanog sa ikaduwang beses nin paburubagong tanog nin trumpeta na senyal na turno na kan tulong tribo na nagkakampo sa parteng timog. Uutruhon ini kan mga saserdote sagkod na makahali na an bilog na kampo.

Tibaad nasakitan ka man na mag-adjust sa nagkapirang pagbabago sa organisasyon. Tibaad inisip mo na dakulon man nin dai inaasahan na pagbabago. O tibaad natuod ka na sa partikular na mga areglo asin iniisip mong mas marahay kutana kun dai na binago an mga iyan. Ano man an dahilan, tibaad nasakitan kang magin mapasensiya mantang nag-a-adjust, asin kinaipuhan mo nin panahon. Dawa siring, kun hihinguwahon niyatong mag-adjust kauyon kan mga pagbabago, posibleng marhay na mahihiling niyato na binebendisyunan kita nin Diyos.

Kan panahon ni Moises, giniyahan ni Jehova sa kaawagan an milyon-milyon na lalaki, babayi, asin mga aki. Kun mayo an saiyang pag-ataman asin paggiya, dai kutana sinda magdadanay na buhay. Ngunyan, nagdadanay kitang buhay sa espirituwal huli sa paggiya ni Jehova. Tinatabangan niya kitang magin dayupot saiya asin mapagdanay na makusog an satong pagtubod. Kun siring, lugod na arugon niyato gabos an pagigin makinuyog kan maimbod na mga Israelita asin magin determinado na maghimati sa manlain-lain na tanog kan mga trumpeta!