Mga Hapot Hale sa mga Parabasa

Taano ta sinasabi kan New World Translation sa Deuteronomio 31:2 na si Moises ‘dai na totogotan na lumuwas asin lumaog’ bilang lider kan Israel, mantang an ibang traduksion nagpaparisa na dai na nia kayang gibohon iyan?

Minsan ngani an Hebreong tataramon na pinag-oolayan puedeng tradusiron sa arin man kaiyan na paagi, an pagkatradusir sa nagkapirang traduksion kan Biblia sa Ingles nagsusuherir na sa paghinanapos kan saiyang buhay, maluya na an hawak ni Moises, na dai na kaya kan saiyang hawak na gibohon an mga paninimbagan nin pamomoon. Halimbawa, kinotar kan An Banal na Biblia si Moises na nagsasabi: “Sanggatos may duwang pulong taon na ako ngunyan, dai na ako nakakapaghiro-hiro susog sa gusto ko.” Kaagid kaiyan, An Marahay na Bareta Biblia nagsasabi: “Dai ko na kaya an magin lider nindo.”

Minsan siring, ipinapaheling kan Deuteronomio 34:7 na minsan ngani si Moises gurang na, bakong maluya an hawak nia. Iyan nagsasabi: “Si Moises siento beinte anyos kan sia magadan. An saiyang mata dai duminiklom, asin dai nawara an saiyang kosog nin buhay.” Sa siring, kaya pa kan hawak ni Moises na pangenotan an nasyon, alagad bako nang kabotan ni Jehova para sa saiya na padagos niang gibohon iyan. Ini risang-risa sa sinabi ni Moises bilang pagpapadagos: “Sinabi sa sako ni Jehova, ‘Dai ka mabalyo sa Jordan na ini.’” Minalataw na inootro ni Jehova an saiyang ipinagboot duman sa may tubig nin Meriba.—Bilang 20:9-12.

Si Moises nagkaigwa nin halawig asin pambihirang buhay, na puedeng bangaon sa tolong peryodo. Sa laog nin 40 taon sia nag-istar sa Egipto, na dian sia “tinokdoan kan gabos na kadonongan nin mga Egipcio” asin sia “makapangyarihan sa saiyang mga tataramon asin gibo.” (Gibo 7:20-22) Sa laog kan suminunod na 40 taon, sia nag-erok sa Midian. Duman nia kinultibar an espirituwal na mga kualidad na kaipuhan tanganing pangenotan an banwaan ni Jehova. Ultimo, sa laog nin 40 taon giniyahan asin dinirehiran ni Moises an mga Israelita. Pero, si Jehova nagdesisyon na si Josue na, bako nang si Moises, an magiya sa nasyon pabalyo sa Salog nin Jordan pasiring sa Dagang Panuga.—Deuteronomio 31:3.

Sa siring, irinerepresentar kan New World Translation an tamang kahulogan kan Deuteronomio 31:2. Si Moises dai na magpapadagos bilang lider kan Israel, bakong huli sa kadaihan nin pisikal na mga kakayahan, kundi huling dai na sia tinogotan ni Jehova na gibohon iyan.