Mga Hapot Hale sa mga Parabasa

Taano ta naghapot si Hadeng Saul ki David, “Nonoy, kiisay kang aki?” pakatapos na gadanon ni David si Goliat, minsan ngani bago kaidto ipinaapod ni Saul si David na magin saiyang lingkod?—1 Samuel 16:22; 17:58.

An sarong simpleng posibilidad iyo na nalingawan ni Saul kun siisay si David huli ta madali sana an saindang enot na pagkanuparan. Minsan siring, imposible ini huli ta an pagkasaysay sa 1 Samuel 16:18-23 nagpapaheling na espesipikong ipinaapod ni Hadeng Saul si David asin namotan nia ining marhay patin ginibo nia ini na magin paradara kan saiyang pangalasag. Siertong midbid na marhay ni Saul si David.

An nagkapirang nag-espesyalisar sa Biblia ibinibilang an 1 Samuel 17:12-31 asin 17:55–18:5 na idinagdag kan huri huli ta an mga bersikulong ini dai manonompongan sa nagkapirang kopya kan Griegong Septuagint, na sarong traduksion kan Hebreong Kasuratan na natapos kan ikaduwang siglo B.C.E. Minsan siring, bakong madonong na magkaigwa nin siring na konklusyon na basado sana sa mga kopyang ini kan Septuagint, huli ta an mga tekstong ini minalataw sa iba pang masasarigan na manuskrito kan Hebreong Kasuratan.a

Minalataw na paagi sa paghapot nguna ki Abner dangan ki David mismo, si Saul bako sanang interesado na maaraman an ngaran kan ama ni David. Pakatapos na maheling an saro pang aspekto kan personalidad ni David, huli ta sia sarong tawo na may dakulang pagtubod asin kosog nin boot na duminaog pa sana ki Goliat, gustong maaraman ni Saul kun anong klaseng lalaki an nagpadakula sa siring na aki. Tibaad inisip ni Saul na iiba sa hukbo an ama ni David na si Jese o an iba pang miembro kan saiyang pamilya, huli ta tibaad yaon man sa sainda an kosog nin boot asin pagkapusoan na naheling nia ki David.

Minsan ngani an sinambit sana sa 1 Samuel 17:58 iyo an halipot na simbag ni David na “an aki kan saimong lingkod na si Jese na Betlehemita,” an sunod na nangyari nagsusuherir na posibleng nagkaigwa pa sinda nin mas halawig na pag-oolay. Mapadapit digdi, mangnohon an komento kan mga nag-espesyalisar sa Biblia na si C. F. Keil asin F. Delitzsch: “Risang-risang marhay sa pananaram sa [1 Samuel 18:1], ‘kan matapos na siang magtaram ki Saul,’ na si Saul nagpadagos pang makipag-olay sa saiya manongod sa gibo-gibo kan saiyang pamilya, huli ta an pananaram mismong iyan nagpaparisa nin naglawig na pag-oolay.”

Sa gabos na ini, makakapagkonklusyon kita na paagi sa saiyang hapot na “Nonoy, kiisay kang aki?” an gustong maaraman ni Saul bakong an midbidan ni David, na dati na niang aram, kundi an pinaghalean ni David.

[Nota sa Ibaba]

[Ritrato sa pahina 31]

Taano ta hinapot ni Saul si David kun kiisay siang aki?