Arogon an Saindang Pagtubod

Ipinahayag Nia sa Pamibi sa Dios an Nasa Puso Nia

SIBOT-SIBOT si Ana sa pag-andam para sa biahe, na nagmamaigot na dai pag-isipon an saiyang mga problema. Idto maninigo kutanang maogmang panahon; kinaugalean na ni Elcana, an agom nia, na iiba an bilog na pamilya sa taonan na mga pagbiaheng ini tanganing sumamba sa tabernakulo sa Silo. Katuyohan ni Jehova na magin magayagaya an siring na mga okasyon. (Deuteronomio 16:15) Asin daing duda na naogmang marhay si Ana sa mga kapiestahan na idto poon kan sia aki pa. Alagad nagbago an mga kamugtakan nia sa nakaagi pa sanang mga taon.

Sia binendisyonan na magkaigwa nin agom na namomoot sa saiya. Minsan siring, si Elcana may saro pang agom. Penina an saiyang ngaran, asin sia garo baga desidido na gibohon na miserable an buhay ni Ana. Si Penina nakaisip nin paagi na gibohon dawa an taonan na mga okasyon na ini na magin dahelan nin grabeng kakologan nin boot para ki Ana. Paano? Asin mas importante, paano an pagtubod ni Ana ki Jehova nakatabang sa saiya na atubangon an situwasyon na sa parate garo baga imposibleng makayanan? Kun napapaatubang kamo sa mga kadepisilan na nakakahale kan saindong kagayagayahan sa buhay, an estorya ni Ana partikularmenteng makakapukaw sa boot nindo.

“Ano ta Nagmomondo an Saimong Puso?”

Ihinahayag kan Biblia an duwang dakulang problema sa buhay ni Ana. Haros mayo sia nin kontrol sa enot na problema asin mayo nanggad sa ikaduwa. An enot iyo na duwa sindang agom ni Elcana, asin an saiyang karibal na agom naoongis sa saiya. An ikaduwa iyo na sia baog. An kamugtakan na iyan depisil para sa siisay man na agom na babae na nagmamawot na magkaigwa nin mga aki; alagad kan panahon ni Ana asin sa kultura nia, iyan gikanan nin grabeng kamondoan. An lambang pamilya nag-aasa sa mga aki na iyo an magpapadagos kan ngaran kan pamilya. An pagkabaog garo baga grabeng katuyawan asin kasusupgan.

Tibaad nakayang tioson ni Ana an saiyang situwasyon kun bako kutanang huli ki Penina. An poligamiya nungkang nagbunga nin marahay na situwasyon. Parateng gayo na yaon an pagriribal, iriwal, asin kamondoan. Harayo iyan sa pamantayan na pinonan kaidto nin Dios sa hardin nin Eden, na dapat saro sana an agom.a (Genesis 2:24) Sa siring, bakong marahay an paglaladawan kan Biblia sa poligamiya, asin pinapatunayan iyan kan makamomondong mga pangyayari sa pamilya ni Elcana.

An totoo, si Ana an pinakanamomotan ni Elcana. Segun sa Judiong tradisyon, si Ana an enot niang nagin agom asin suminunod si Penina pakalihis nin pirang taon. Ano man an nangyari, grabe an pag-imon ni Penina ki Ana, asin nakakua ini nin dakol na paagi tanganing pasakitan an saiyang karibal. An dakulang bentaha ni Penina ki Ana iyo an pagigin mainaki kaini. Sunod-sunod an nagin aki ni Penina, asin nag-oorog an pakamate nia nin importansia sa sadiri kada magkaaki sia. Imbes na makisimpatiya ki Ana asin rangahon sia sa saiyang pagkadesganar, inaprobetsaran ni Penina an sensitibong situwasyon na iyan. Sinasabi kan Biblia na inuuyam nin makuri ni Penina si Ana “tanganing sia makonsumir.” (1 Samuel 1:6) Tinutuyo ni Penina an mga ginigibo nia. Gusto niang kolgan si Ana, asin nagin mapanggana sia.

Garo baga an paboritong oportunidad ni Penina iyo an panahon kan taonan na pagduman sa Silo tanganing sumamba. An kada saro sa dakol na aki ni Penina—‘an gabos niang aking lalaki asin babae’—tinawan ni Elcana nin kahirasan kan mga atang na idinodolot ki Jehova. Pero, si Ana na mayong aki nakaresibi sana kan sadiri niang kahirasan. Dangan dinaog-daog ni Penina si Ana asin ipinagirumdom sa saiya an pagkabaog nia kaya an kaherakherak na si Ana nagparahibi asin nawaran pa ngani nin ganang kumakan. Narisa ni Elcana na an saiyang namomotan na agom napupurisaw na gayo asin dai nagkakakan, kaya prinobaran niang rangahon sia. Si Elcana naghapot, “Ana, ano ta naghihibi ka, asin ano ta dai ka minakakan, asin ano ta nagmomondo an saimong puso? Bako daw akong orog karahay sa saimo kisa sampulong aking lalaki?”—1 Samuel 1:4-8.

Marahay na sana ta narisa ni Elcana na an pagkabaog ni Ana an dahelan kan pagkapurisaw kaini. Asin siertong pinahalagahan ni Ana an maboot na pag-asegurar ni Elcana na namomotan sia kaini.b Alagad dai sinambit ni Elcana an dapit sa maraot na intension ni Penina, ni ipinaparisa man kan rekord na isinabi ini ni Ana sa agom nia. Narealisar gayod ni Ana na magrabe sana an saiyang situwasyon kun isusumbong nia si Penina. Talaga daw na mababago ni Elcana an situwasyon? Bako daw na tibaad lalo sanang maoongis si Penina ki Ana, asin pati na man an mga aki saka katabang kan babaeng iyan na maraoton an ugale? Lalo sanang mamamatean ni Ana na garo baga sia ipinupuera sa sadiri niang harong.

Aram man o dai ni Elcana an gabos dapit sa maraot na ugale ni Penina, naheling iyan gabos ni Jehova. Ihinahayag kan saiyang Tataramon an bilog na pangyayari, asin sa siring nagtatao nin seryosong patanid sa siisay man na naggigibo nin garo baga saradit na akto nin pag-imon asin pagkaongis. Sa ibong na lado, mararanga an mga mayong sala asin mapagpatoninong, arog ni Ana, na maaraman na itinatanos kan Dios nin hustisya an gabos na bagay sa sadiri niang panahon asin sa sadiri niang paagi. (Deuteronomio 32:4) Aram na aram gayod iyan ni Ana, huling ki Jehova sia duminolok para sa tabang.

“Bako Nang Hadit sa Saiyang Sadiring Kamugtakan”

Amay pa sibot-sibot na an pamilya. An gabos nag-aandam para sa biahe, pati an mga aki. Tanganing makaabot sa Silo, babagtason kan dakulang pamilya an labi sa 30 kilometros kan mabolod na rehion nin Efraim.c Kun lalakawon, aaboton sinda nin saro o duwang aldaw. Aram ni Ana kun paano magawe an saiyang karibal na agom. Minsan siring, dai nagpawalat si Ana sa harong. Sa siring, sia nagtatao nin marahayon na halimbawa para sa mga nagsasamba sa Dios sagkod ngonyan. Bako nanggad madonong na togotan an salang gibo nin iba na makaolang sa pagsamba niato sa Dios. Huling kun totogotan niato iyan, dai niato maaako an mismong mga bendisyon na makakapakosog sa sato na magtagal.

Pagkatapos nin bilog na aldaw sa pasikosikong mga tinampo sa kabukidan, an dakulang pamilya sa katapustapusi harani na sa Silo. Yaon iyan sa sarong bulod na haros napapalibotan nin mas haralangkaw na bulod. Mantang sinda nagdadangadang, posibleng marhay na pinag-isipan nanggad ni Ana kun ano an sasabihon nia ki Jehova sa pamibi. Pag-abot ninda sa Silo, an pamilya nagkarakan. Pagkakakan, tolos-tolos na suminuhay si Ana sa grupo asin nagduman sa tabernakulo ni Jehova. Yaon duman an Halangkaw na Saserdoteng si Eli, na nakatukaw harani sa harigi kan pinto kan templo. Alagad nakakonsentrar an isip ni Ana sa saiyang Dios. Digdi sa tabernakulo, sia may kompiansa na sia dadangogon. Kun mayo nin ibang makakasabot nin lubos sa mamondo niang kamugtakan, masasabotan sia kan saiyang Ama sa langit. Garo maputok na an saiyang daghan sa karaotan nin boot, asin sia nagpoon na maghibi.

Mantang nagkikibigkibig an hawak ni Ana huli sa grabeng paghibi, sia nakipag-olay nin silensio ki Jehova. Nagkikibigkibig an saiyang ngabil mantang binibilog nia sa isip an sasabihon tanganing ipahayag an saiyang kakologan nin boot. Asin namibi sia nin halawig, na biyong ipinapahayag sa saiyang Ama an nasa puso nia. Pero, bako sanang hinagad nia sa Dios na itao an saiyang grabeng pagmawot na magkaaki. Gustong-gusto ni Ana na bako sanang mag-ako nin mga bendisyon hale sa Dios kundi magtao man sa Saiya kan makakaya nia. Kaya nagpromesa sia, na nagsasabi na kun magkakaaki sia nin lalaki, idudusay nia an aki na maglingkod ki Jehova sa bilog kaining buhay.—1 Samuel 1:9-11.

Sa siring, nagpaheling si Ana nin halimbawa para sa gabos na lingkod nin Dios kun dapit sa pamibi. Maboot na inaagda ni Jehova an mga lingkod nia na makipag-olay sa saiya na mayong pag-alangan asin mayong pagduwaduwa, na biyong ipinapahayag sa saiya an saindang mga ikinakahadit siring sa sarong nagtitiwalang aki kun nakikipag-olay sa mamomoton na magurang. (Salmo 62:8; 1 Tesalonica 5:17) Pinasabngan si apostol Pedro na isurat an nakakarangang mga tataramon na ini manongod sa pagpamibi ki Jehova: ‘Ipasa nindo an gabos nindong kahaditan sa saiya, huli ta sia may pagmakolog sa saindo.’—1 Pedro 5:7.

Minsan siring, an mga tawo bakong arog ni Jehova kamapagsabot asin kamaduminamay. Mantang si Ana naghihibi asin namimibi, nabigla sia sa sarong boses. Si Eli idto, an halangkaw na saserdote, na nagmamasid sa saiya. Sia nagsabi: “Sagkod noarin ka magaweng burat? Halea an arak sa saimo.” Nariparo ni Eli an nagkikibigkibig na ngabil ni Ana, an saiyang paghibi, asin an maemosyon na paghiro nia. Imbes na maghapot kun ano an problema, nagkongklusyon tolos sia na burat si Ana.—1 Samuel 1:12-14.

Makologon nanggad para ki Ana, sa oras na idto nin labi-labing kamondoan, na sia mapaatubang sa siring na akusasyon na mayong basehan—asin gikan pa sa saro na may kagalanggalang na posisyon! Alagad ta sa giraray sia nagpaheling nin marahayon na halimbawa nin pagtubod. Dai nia tinogotan an mga pagkabakong sangkap nin tawo na makaolang sa pagsamba nia ki Jehova. Magalang siang nakipag-olay ki Eli asin ipinaliwanag an saiyang situwasyon. Suminimbag si Eli, tibaad sa mas maluway asin mas maboot na boses: “Lakaw sa katoninongan, asin itao logod kan Dios nin Israel an hinagad mo sa saiya.”—1 Samuel 1:15-17.

Ano an nagin epekto ki Ana kan ipahayag nia ki Jehova an laog kan saiyang puso asin sambahon Sia duman sa tabernakulo Nia? An pagkasaysay nagsasabi: “An babae nagpadagos sa saiyang paglakaw asin nagkakan, asin an saiyang lalawgon bako nang hadit sa saiyang sadiring kamugtakan.” (1 Samuel 1:18) An Magna Banal na Kasuratan nagsasabi: “Bako nang mondo an saiyang lalauogon.” Naginhawahan si Ana. Garo man sana ipinapasan nia an saiyang magabat na emosyonal na pasan sa saro na an abaga mas dakula asin mas makosog kisa sa saiya, an saiyang Ama sa langit. (Salmo 55:22) Igwa daw nin ano man na problema na magabaton para sa Dios? Mayo—kaidto, ngonyan, asin noarin man!

Kun kita pinagagabatan, pinangingibabawan, o nadadaog nin kamondoan, marahay na sunodon niato an halimbawa ni Ana asin makipag-olay nin daing pag-alangan sa Saro na inaapod kan Biblia na “Paradangog nin pamibi.” (Salmo 65:2) Kun gigibohon niato iyan na may pagtubod, maheheling man niato na an satong kamondoan masasalidahan nin “katoninongan nin Dios na labi sa gabos na kaisipan.”—Filipos 4:6, 7.

“Mayo nin Dakulang Gapo na Arog kan Satong Dios”

Kan suminunod na aga, nagbalik si Ana sa tabernakulo kaiba ni Elcana. Posibleng marhay na sinabi ni Ana sa agom nia an dapit sa saiyang hinagad asin ipinanuga sa Dios, huling sinasabi kan Ley ni Moises na may deretso an agom na lalaki na gibohon na imbalido an promesa kan saiyang agom kun iyan dai nia inooyonan. (Bilang 30:10-15) Alagad dai iyan ginibo kan maimbod na lalaking idto. Imbes, magkaibanan sinda ni Ana na nagsamba ki Jehova sa tabernakulo bago nagpuli.

Kasuarin man nanggad narealisar ni Penina na dai na nia kayang pakologon an boot ni Ana? Dai sinasabi kan pagkasaysay, alagad an pananaram na “bako nang hadit sa saiyang sadiring kamugtakan,” nagpaparisa na si Ana maogma na poon kan panahon na iyan. Ano man an totoo, dai nahaloy nadiskobre ni Penina na mayo nang epekto an saiyang maraoton na ginigibo. Dai na noarin man sinambit giraray kan Biblia an saiyang ngaran.

Sa paglihis nin mga bulan, an matoninong na isip ni Ana nagin dai mapugolan na kaogmahan. Bados na sia! Dawa naggagayagaya, nungkang liningawan ni Ana kun saen gikan an bendisyon na ini. Kan mamundag an aki, pinili ni Ana an ngaran na Samuel, na nangangahulogan “Ngaran nin Dios” asin malinaw na nanonongod sa pag-apod sa ngaran nin Dios, siring kan ginibo ni Ana. Kan taon na iyan, dai sia uminiba ki Elcana asin sa pamilya sa pagbaklay pasiring sa Silo. Nagdanay sia sa harong kaiba kan aki sa laog nin tolong taon, sagkod na ini butason. Dangan nagtipon sia nin kosog para sa aldaw na kaipuhan na nindang magsuwayan kan namomotan niang aki.

Bako nanggad madali an saindang pagsuwayan. Siempre, aram ni Ana na aasikasohon na marhay si Samuel sa Silo, tibaad kan nagkapirang babae na naglilingkod sa tabernakulo. Pero, akion pa si Samuel, asin siisay na ina an dai mapupungaw sa saiyang aki? Minsan siring, dai napipiritan kundi may pagpasalamat na dinara ni Ana asin Elcana an aki. Nagdolot sinda nin mga atang sa harong nin Dios, asin iprinesentar ninda si Samuel ki Eli, na ipinapagirumdom sa saiya an iprinomesa ni Ana tolong taon na an nakaagi.

Dangan namibi si Ana, asin an saiyang pamibi ibinilang nin Dios na angay na iiba sa saiyang ipinasabong na Tataramon. Mantang binabasa nindo an saiyang mga tataramon sa 1 Samuel 2:1-10, maheheling nindo an rarom kan saiyang pagtubod na ipinapahayag sa lambang linya. Inomaw nia si Jehova huli sa makangangalas na paggamit Nia nin kapangyarihan—sa Saiyang dai mapantayan na abilidad na ibaba an maabhaw, bendisyonan an mga inaapi, asin taposon an buhay o iligtas pa ngani iyan sa kagadanan. Inomaw nia an saiyang Ama huli sa saiyang daing kaagid na kabanalan, hustisya, asin kaimbodan. May marahay na dahelan na masasabi ni Ana: “Mayo nin dakulang gapo na arog kan satong Dios.” Si Jehova lubos na masasarigan, dai nagbabago, asin sarong pailihan para sa gabos na inaapi na minahagad sa saiya nin tabang.

Mapalad nanggad an aking si Samuel na nagkaigwa nin ina na lubos an pagtubod ki Jehova. Minsan ngani siertong napupungaw sa saiyang ina mantang sia nagdadakula, dai nia noarin man namatean na sia nalingawan. Taon-taon, si Ana minabalik sa Silo, na may darang sadit na gubing na daing manggas para sa paglilingkod ni Samuel sa tabernakulo. An lambang tahi kaiyan ebidensia kan pagkamoot asin pagmakolog ni Ana sa saiyang aki. (1 Samuel 2:19) Maiimahinar nanggad niato na isinusulot ni Ana an bagong gubing sa aki, pinapakarhay iyan, asin maogmang pinagmamasdan an aki mantang nagtataram nin maboot asin nakakaparigon na mga tataramon. Biniyayaan si Samuel na magkaigwa nin siring na ina, asin sia nagdakula bilang sarong bendisyon sa mga magurang nia asin sa bilog na Israel.

Kun dapit ki Ana, dai man sia nalingawan. Binendisyonan sia ni Jehova nin pagigin mainaki, asin sia nagkaaki ki Elcana nin lima pa. (1 Samuel 2:21). Pero, an pinakadakula gayod na bendisyon ki Ana iyo an relasyon nia sa saiyang Ama, si Jehova, na orog pa nganing kuminosog sa pag-agi nin mga taon. Mangyari man logod iyan sa saindo, mantang inaarog nindo an pagtubod ni Ana.

[Mga Nota sa Ibaba]

[Kahon sa pahina 17]

Duwang Pambihirang Pamibi

An duwang pamibi ni Ana, na yaon sa 1 Samuel 1:11 asin 2:1-10, igwa nin nagkapirang lataw na aspekto. Helingon niato an pira sana:

◼ Sa enot na pamibi, si Ana namibi ki “Jehova nin mga hukbo.” Sia an enot na tawong sinambit sa Biblia na naggamit kan titulong iyan. Iyan minalataw nin 285 beses sa Biblia asin nanonongod sa autoridad nin Dios sa kadakoldakol niang espiritung aki.

◼ Mangnohon na ipinahayag ni Ana an ikaduwang pamibi, bakong kan mamundag an saiyang aki, kundi kan ini ipresentar ninda ni Elcana para sa paglilingkod sa Dios sa Silo. Kaya dakula an kagayagayahan ni Ana, bakong huli ta napasilensio nia an saiyang karibal na si Penina, kundi huli sa bendisyon sa saiya ni Jehova.

◼ Kan sabihon ni Ana, “An sakong sungay ilinalangkaw nanggad ki Jehova,” tibaad nasa isip nia an baka, sarong makosog na hayop na pantrabaho na may mapuersang mga sungay. Garo man sana sinasabi ni Ana: ‘Jehova, pinapakosog mo ako.’—1 Samuel 2:1.

◼ An mga tataramon ni Ana manongod sa “linahidan” nin Dios ibinibilang na hula. An tataramon na ini kapareho kan terminong trinadusir na “mesiyas,” asin si Ana an enot na tawo sa Biblia na naggamit kaiyan na nanonongod sa sarong linahidan na hade sa maabot na panahon.—1 Samuel 2:10.

◼ Pakalihis nin mga 1,000 taon, inotro kan ina ni Jesus na si Maria sa sadiri niang mga tataramon nin pag-omaw ki Jehova an nagkapira sa mga ekspresyon ni Ana.—Lucas 1:46-55.

[Ritrato sa pahina 16]

Napurisaw na gayo si Ana sa pagigin baog nia, asin ginibo ni Penina an gabos tanganing orog pang grumabe an kolog nin boot ni Ana

[Ritrato sa pahina 16, 17]

Puede daw nindong arogon an halimbawa ni Ana na pagpamibi gikan sa puso?

[Ritrato sa pahina 17]

Minsan ngani napasala si Eli sa paghusgar ki Ana, dai nagsentir si Ana