Kun Mameligro an Pagigin Mag-amigo

MAHALAGANG marhay an tunay na mga amigo, asin bakong madali na magkaigwa nin amigo na pang-habambuhay. Kun namemeligro an pagigin mag-amigo, ano an makakatabang para maisalbar iyan? Dakul kitang manunudan sa mga istorya sa Bibliya nin mga mag-amigong nameligro an pagigin mag-amigo.

An pastor asin hadi na si David nagkaigwa nanggad nin tunay na mga amigo. Tibaad maisip mo tulos diyan si Jonathan. (1 Sam. 18:1) Pero, igwa pa nin ibang amigo si David, arog kan propetang si Natan. Dai sinabi kan Bibliya kun kasuarin sinda nagin mag-amigo. Pero igwang pagkakataon kaidto na may sinabi si David ki Natan na sasabihon lang nin sarong indibidwal sa amigo niya. Gusto niya na magtugdok nin harong para ki Jehova. Siguradong pinahalagahan na marhay ni David an opinyon ni Natan bilang sarong amigo asin saro na igwa kan espiritu ni Jehova.—2 Sam. 7:2, 3.

Pero may nangyari na nagsapeligro kan saindang pagigin mag-amigo. Nakakomiter nin pagsambay si Hading David ki Bat-seba, asin pagkatapos kaiyan, ipinagadan niya an agom kaini na si Urias. (2 Sam. 11:2-21) Dakul na taon na nagin maimbod si David ki Jehova asin sinuportaran niya an hustisya. Pero nagibo niya an grabe kaseryosong kasalan na ini! Ano an nangyari sa marahay na hading iyan? Dai niya daw naisip kun gurano kaseryoso kan ginibo niya? Paghuna niya daw maitatago niya iyan sa Diyos?

Ano daw an gigibuhon ni Natan? Hahalaton niya daw na iba na sana an makipag-ulay sa hadi dapit sa bagay na ini? Tutal, aram man kan iba kun paano minaniobra ni David an mga bagay-bagay para magadan si Urias. Kaya taano ta makikiaram pa si Natan? Puwede kaiyan maraot an saindang haloy nang pagigin mag-amigo. Saka tibaad mameligro pa an buhay niya kun mataram siya. Ipinagadan ngani ni David an inosenteng si Urias.

Pero tagapagtaram nin Diyos si Natan. Aram kan propeta na kun dai siya magirong, dai na maibabalik sa dati an pagigin mag-amigo ninda ni David saka makokonsiyensiya siya. Napasala nin dalan an amigo niyang si David kaya naraot an relasyon kaini ki Jehova. Kaipuhan nanggad kan hadi nin tabang para makabalik sa tamang direksiyon. Iyo, kaipuhan ni David nin tunay na amigo—si Natan iyan. Kinaulay niya si David asin pinunan niya iyan paagi sa paggamit nin sarong ilustrasyon na makakapahiro sa puso kan dating pastor. Dai sana basta ipinaabot ni Natan an mensahe nin Diyos. Hininguwa niyang matabangan si David na marealisar kaini kun gurano kagabat kan nagin pagkakasala kaini asin mapahiro ining magsulsol.—2 Sam. 12:1-14.

Ano an gigibuhon mo kun may amigo kang nakagibo nin magabat na sala o nakakomiter nin seryosong kasalan? Tibaad maisip mo na kun sasabihon mo saiya an nagibo niyang sala, posibleng maraot an saindong pagigin mag-amigo. O tibaad maisip mo na tinatraydor mo siya kun itutuga mo sa mga elder an nagibo niyang kasalan para matabangan siya sa espirituwal. Ano an gigibuhon mo?

Nagirumduman ni Gianni, na nasambitan kasubago: “Narisa kong may nagbago ki Maurizio. Dai na siya gayong nakikipag-ulay sako arog kan dati. Naisip kong kaulayon siya maski ngani masakiton iyan para sako. Pero sa buot-buot ko: ‘Ano pa man daw an puwede kong sabihon saiya na dai niya pa aram? ‘Baad maanggot siya!’ Pero nagirumduman ko an mga pinag-adalan mi, kaya nagkaigwa ako nin kusog nin buot na kaulayon siya. Iyan man an ginibo sako ni Maurizio kan kaipuhan ko kaidto nin tabang. Habo kong mawara an pagigin mag-amigo mi, pero nagmamakulog ako saiya kaya gusto ko siyang tabangan.”

Sinabi man ni Maurizio: “Sinsero si Gianni—saka tama siya. Aram ko na an mga nangyari sako bako niyang kasalan o ni Jehova kundi huli iyan sa mga nagibo kong sala. Kaya inako ko an disiplina. Pag-abot nin panahon kuminusog giraray ako sa espirituwal.”

May iba pang mga kaiba-iba si David na dai siya binayaan dawa sa masakit na sitwasyon. Saro sainda si Husai, na sinambit kan Bibliya na ‘katuod ni David.’ (2 Sam. 16:16; 1 Cron. 27:33) Posibleng saro siya sa mga opisyal kan palasyo na haraning amigo asin kaiba-iba kan hadi. Siya man kun minsan an sinusugo kan hadi sa pribadong mga misyon.

Kan agawon kan aki ni David na si Absalom an trono kan hadi, dakul na Israelita an nagkampi ki Absalom, pero dai nag-iba sainda si Husai. Kan nagdudulag si David, dinumanan siya ni Husai. Nakulgan na marhay si David huling trinaydor siya kan saiya mismong aki asin kan iba pa na pinagtitiwalaan niya. Pero nagdanay na maimbod saiya si Husai. Andam ngani siyang isapeligro an buhay niya tanganing gibuhon an misyon na maulang sa mga pakana laban ki David. Dai ini ginibo ni Husai huli sana sa obligasyon niya bilang opisyal kan palasyo. Pinatunayan niyang saro siyang maimbod na amigo.—2 Sam. 15:13-17, 32-37; 16:15–17:16.

Nakakaugmang mahiling na an mga tugang ngunyan nagkakasararo bako lang huli sa asignasyon o pribilehiyo sa kongregasyon. Paagi sa gibo, garo man sana ninda sinasabi, “Amigo mo ako, bako dahil iyan an dapat, kundi dahil mahalaga ka sakuya.”

Iyan an naeksperyensiyahan kan sarong tugang na an ngaran Federico. Sa tabang kan padangat niyang amigo na si Antonio, nakayanan niya an masakit na sitwasyon sa saiyang buhay. Sinabi ni Federico: “Kan maglipat sa kongregasyon mi si Antonio, nagin mag-amigo tulos kami. Pareho kaming ministeryal na lingkod, saka maugma kaming naglilingkod na magkaibanan. Dai nahaloy, nanombrahan siya bilang elder. Apuwera sa pagigin amigo, siya man an arugan ko sa espirituwal na mga bagay.” Dangan, may nagibong sala si Federico. Nagpatabang tulos siya sa mga elder, pero dai na siya nagin kuwalipikado na magin payunir saka ministeryal na lingkod. Ano an ginibo ni Antonio?

Sinabi ni Federico: “Nahiling kong naiintindihan talaga ni Antonio an namamatian ko. Ginibo niya an gabos para pakusugon ako. Nagmamalasakit siyang marhay sa espirituwalidad ko saka dai niya ako binayaan. Dinagka niya ako na pakusugon giraray an espirituwalidad ko saka dai magsuko.” Isinaysay ni Antonio: “Nagtao ako nin mas dakul na panahon para makaibanan si Federico. Gusto kong mamati niya na puwede niyang sabihon sako maski ano, pati an mga namamatian niya.” Marahay na sana ta pag-abot nin panahon, naibalik sa dati an espirituwalidad ni Federico, asin kan huri, nanombrahan giraray bilang payunir asin ministeryal na lingkod. Sinabi ni Antonio: “Ngunyan bako na kaming magkakongregasyon, pero mas lalo pa kaming nagin harani sa kada saro.”

Ano an mamamati mo kun pinabayaan ka kan padangat mong amigo sa panahon na pinakakaipuhan mo siya? Talagang makulugon iyan. Mapapatawad mo pa daw siya? Maibabalik pa daw sa dati an saindong pag-ibanan?

Isipa an nangyari ki Jesus kan huring mga aldaw niya sa daga. Nagtao siya nin dakul na panahon para sa maimbod niyang mga apostol, asin nagin haraning marhay sinda sa lambang saro. Kaya inapod sinda ni Jesus na saiyang mga amigo. (Juan 15:15) Pero, ano an nangyari kan arestaron si Jesus? Nagdurulag an mga apostol. Kasasabi pa sana ni Pedro na nungka niyang babayaan an saiyang Kagurangnan, pero kan mismong bangging idto, ninigaran ni Pedro na bisto niya si Jesus!—Mat. 26:31-33, 56, 69-75.

Aram ni Jesus na solo niyang aatubangon an huring pagbalo sa saiya. Pero may dahilan pa man giraray siya na madisganar o magraot an buot. Minsan siring, mayo kitang maririsa ni kadikit na pagkadisganar, hinanakit, o pagbasol sa pakikipag-ulay niya sa mga disipulo mga pirang aldaw pagkatapos siyang buhayon liwat. Dai na sinaro-saro pa ni Jesus an mga pagkukulang kan saiyang mga disipulo, pati su ginibo ninda kan bangging arestaron siya.

Sa kabaliktaran, pinakusog ni Jesus si Pedro asin an iba pang mga apostol. Ipinamati niya na nagtitiwala pa man giraray siya sa sainda paagi sa pagtao sa sainda nin mga instruksiyon dapit sa pinakamahalagang pagtutukdo kasuarin man sa kasaysayan. Para ki Jesus, amigo pa man giraray niya sinda. Dakulaon an epekto sa mga apostol kan pagkamuot na ipinahiling ni Jesus. Kaya, hininguwa nindang marhay na dai na makagibo nin ano man na puwedeng makapadisganar sa saindang Kagurangnan. Sa katunayan, nautob ninda an sugong itinao sainda ni Jesus bilang saiyang mga parasunod.—Gibo 1:8; Col. 1:23.

Tandang-tanda pa kan sister na an ngaran Elvira kan magkaigwa sinda nin dai pagkasinabutan kan amiga niyang si Giuliana: “Kan sinabi niya sako na nakulgan siyang maray dahil sa ginibo ko, supugon akong maray saiya. May rason siya na maanggot. Pero hanga talaga ako saiya ta an kapakanan ko an mas inisip niya saka an puwedeng magin resulta kan ginibo ko. Ipinagpapasalamat ko pirmi na dai siya nagpokus sa sala na nagibo ko saiya kundi sa maraot na puwedeng magin epekto kaiyan sako. Nagpapasalamat man ako ki Jehova ta igwa akong amiga na mas iniisip an kapakanan ko kisa sa namamati niya.”

Kaya ano an gigibuhon kan sarong tunay na amigo kun namemeligro an saindang pagigin mag-amigo? Magigin andam siyang kaulayon an amigo niya sa mabuot asin prangkang paagi kun kinakaipuhan. An amigong iyan magigin arog ni Natan asin Husai, na nagdanay na maimbod sa saindang amigo dawa sa masakit na mga sitwasyon, asin arog ni Jesus, andam na magpatawad. Arog ka man daw kaiyan na amigo?