Ginibo Ninda an Kabotan ni Jehova

Sarong Pagsongko na Binalosan nin Igo

AN BIAHE hale sa Seba pasiring sa Jerusalem seguradong biyong nakapapagal para sa reyna. Sia natood na mamuhay sa luho. Ngonyan, sia nagbabaklay sa rikas nin sarong kamelyo sa rayong 2,400 kilometros, na sa kadaklan mainit na desierto an inaagihan. Segun sa sarong kalkulo, mga 75 aldaw an kinaipuhan tanganing matapos an saiyang biahe, asin iyan paduman pa sana!a

Taano an mayaman na reyna na ini ta binayaan an saiyang maginhawang erokan sa Seba asin ginibo an masakit na biaheng iyan?

Sarong Nakapupukaw sa Interes na Bareta

An reyna nin Seba nagduman sa Jerusalem kan ‘madangog an bareta manongod ki Salomon mapadapit sa ngaran ni Jehova.’ (1 Hade 10:1) Dai sinabi kun ano an eksaktong nadangog kan reyna. Minsan siring, aram niato na binendisyonan ni Jehova si Salomon nin pambihirang kadonongan, kayamanan, asin onra. (2 Cronica 1:11, 12) Paano ini naaraman kan reyna? Mantang an Seba kaidto sentro nin negosyo, tibaad nadangog nia an kabantogan ni Salomon paagi sa mga komersiante na nagsongko sa saiyang nasyon. An nagkapira sa mga ini tibaad nakaabot na sa Ofir, sarong lugar na dian si Hadeng Salomon nagkaigwa nin awad-awad na pakipagtransaksion sa negosyo.—1 Hade 9:26-28.

Ano man an kamugtakan, an reyna nag-abot sa Jerusalem “na may nakagugulat na marhay na mga tawohan, mga kamelyo na may kargang lana nin balsamo asin dakolon na bulawan saka mahal na marhay na mga tampok.” (1 Hade 10:2a) May nagsasabi na kaiba sa “nakagugulat na marhay na mga tawohan” an armadong mga alalay. Natural sana ini kun iisipon na an reyna sarong makapangyarihan na dignitaryo asin nagbibiahe na may darang mga mamahalon na bagay na manampulong milyon na dolyar an kantidad.b

Minsan siring, mangnoha na nadangog kan reyna an kabantogan ni Salomon “mapadapit sa ngaran ni Jehova.” Kaya ini bako sanang biahe sa negosyo. Minalataw na sa pangenot nagsongko an reyna tanganing madangog an kadonongan ni Salomon—posibleng tanganing makanood pa ngani manongod sa Dios kaini, si Jehova. Mantang sia posibleng marhay na guminikan ki Sem o Cam, na mga nagsasamba ki Jehova, tibaad gusto niang makaaram dapit sa relihion kan saiyang mga apoon.

Nakariribong na mga Hapot, Nakakokontentong mga Simbag

Kan makanuparan si Salomon, an reyna nagpoon na baloon sia nin “nakariribong na mga hapot.” (1 Hade 10:1) An termino sa Hebreo na ginamit digdi puedeng tradusiron na “mga patood.” Alagad ini dai nangangahulogan na an reyna inagi si Salomon sa daing halagang mga kawat. Interesante nanggad, sa Salmo 49:4, an iyo man sanang termino sa Hebreo ginamit sa paglaladawan nin magabat na mga hapot mapadapit sa kasalan, kagadanan, asin pagkabalukat. Kun siring, posibleng marhay na an reyna nin Seba nakipag-olay ki Salomon dapit sa harararom na topiko na buminalo sa rarom kan saiyang kadonongan. Sinasabi kan Biblia na “pinonan [nia] na sabihon sa saiya an gabos na harani sa saiyang puso.” “Sinabi man ni Salomon sa saiya an gabos na bagay-bagay nia. Mayong bagay na natatago sa hade na dai nia sinabi sa saiya.”—1 Hade 10:2b, 3.

Nagulat na marhay an reyna nin Seba sa kadonongan ni Salomon asin sa prosperidad kan saiyang kahadean kaya “nawaran na sia nin espiritu.” (1 Hade 10:4, 5) An pagkasabot nin nagkapira sa kahulogan kan fraseng ini iyo na an reyna “dai na makahangos.” Isinusuherir pa ngani nin sarong intelektuwal na sia nadismayo! Ano man an nangyari, an reyna nagngalas sa saiyang naheling asin nadangog. Sinabi nia na maogma an mga lingkod ni Salomon huli ta nadadangog ninda an kadonongan kan hadeng ini, asin inomaw nia si Jehova huli sa pagbugtak ki Salomon sa trono. Dangan tinawan nia an hade nin mga regalo na halangkaw an presyo, na an bulawan sana minaabot, sa kantidad sa presenteng panahon, nin mga $40,000,000. Si Salomon nagregalo man, na itinatao sa reyna “an gabos niang ikinaoogmang marhay na hinagad nia.”c—1 Hade 10:6-13.

Leksion Para sa Sato

Ginamit ni Jesus an reyna nin Seba bilang praktikal na halimbawa para sa mga eskriba asin Fariseo. “An reyna kan timog bubuhayon sa paghokom kaibanan kan kapag-arakian na ini asin makondenar kaiyan,” sinabihan nia sinda, “huli ta sia naghale sa kaporoporohi kan daga tanganing dangogon an kadonongan ni Salomon, alagad, uya! an sarong labi pa ki Salomon yaon digdi.” (Mateo 12:42) Iyo, an reyna nin Seba nagpaheling nin dakulang pag-apresyar sa kadonongan na itinao nin Dios. Kun sia nagbiahe nin 2,400 kilometros tanganing maghinanyog ki Salomon, daing duwa-duwa na an mga eskriba asin Fariseo maninigo kutanang naghinanyog nin odok ki Jesus, na idtoon mismo sa atubangan ninda.

Kita ngonyan puedeng magpaheling nin hararom na pag-apresyar sa Salomon na Orog na Dakula, si Jesu-Cristo. Paano? An sarong paagi iyo an pagsunod sa saiyang direktiba na ‘gumibo nin mga disipulo sa mga tawo kan gabos na nasyon.’ (Mateo 28:19) An saro pang paagi iyo an maingat na pag-estudyar sa halimbawa ni Jesus asin sa saiyang kaisipan dangan arogon iyan.—Filipos 2:5; Hebreo 12:2, 3.

Totoo, an pagsunod sa halimbawa kan Salomon na Orog na Dakula mangangaipo nin paghihingoa sa kabtang niato. Pero, kita babalosan nin igo. Tunay nanggad, si Jehova nanunuga sa saiyang banwaan na kun ipinaheheling ninda an mapagsakripisyong espiritu, ‘bubukasan nia sa sainda an mga gaha kan kalangitan asin uulaan sinda nin bendisyon sagkod na mayo na nin kulang.’—Malaquias 3:10.

[Mga Nota sa Ibaba]