Paano minansay nin Diyos an kahagadan ni Eliseo para sa duwang kabtang kan espiritu ni Elias? An pagkasaysay nagsasabi: ‘Asin nangyari na kan naglalakaw sindang nag-uulay-ulay, uya digdi, an sarong [karwahe] na kalayo sagkod mga kabayong kalayo suminuway saindang duwa; asin si Elias suminakat sa langit sa sarong ariporos. Asin nahiling idto ni Eliseo.’a Iyan an simbag ni Jehova sa kahagadan ni Eliseo. Nahiling ni Eliseo na kinukua sa saiya si Elias, tinawan siya nin dobleng kabtang kan espiritu ni Elias, asin nagin kasalihid siya kan propeta.—2 Ha. 2:11-14.

Mayong duda, dai nanggad malilingawan ni Eliseo an nahiling niyang pagsakat ni Elias sa ariporos. Bakong ordinaryo na makahiling an saro nin nagkakalayong karwaheng panggiyera asin nagkakalayong mga kabayo! An mga iyan pruweba kan positibong simbag ni Jehova sa kahagadan ni Eliseo. Kun sinisimbag ni Jehova an mga pamibi ta, mayo kitang nahihiling na bisyon nin nagkakalayong karwaheng panggiyera asin nagkakalayong mga kabayo. Pero mababatid ta na ginagamit nin Diyos an saiyang dakulang kapangyarihan tanganing masigurado na an saiyang kabutan mautob. Asin kun nahihiling ta na binebendisyunan ni Jehova an daganon na kabtang kan saiyang organisasyon, garo man sana ‘nahihiling’ tang naghihiro an saiyang langitnon na karwahe.—Ezeq. 10:9-13.