Inomaw ni Job an Ngaran ni Jehova

“Padagos logod na omawon an ngaran ni Jehova.”—JOB 1:21.

 1. Siisay an posibleng nagsurat kan libro nin Job, asin kasuarin?

SI Moises mga 40 anyos kan sia maghale sa Egipto tanganing makadulag sa grabeng kaanggotan ni Faraon asin mag-istar sa Midian. (Gibo 7:23) Durante kan pag-istar nia sa lugar na iyan, posibleng nabaretaan nia an mga pagbalo ki Job, na nag-iistar sa kaharaning lugar nin Uz. Pakalihis nin mga taon, kan si Moises asin an mga Israelita harani na sa Uz sa pagtatapos kan pagbaklay ninda sa kaawagan, posibleng naaraman ni Moises an manongod sa huring mga taon ni Job. Oyon sa Judiong tradisyon, isinurat ni Moises an libro nin Job kaidtong pagkagadan ni Job.

 2. Sa anong mga paagi na an libro nin Job nagpaparigon sa boot kan mga lingkod ni Jehova sa presenteng mga panahon?

² An libro nin Job nagpapakosog sa pagtubod kan mga lingkod nin Dios sa presenteng mga panahon. Sa anong mga paagi? Tinatabangan kita kan pagkasaysay na iyan na masabotan an mga nangyari sa langit na may dakulang kahulogan asin idinodoon kaiyan an pangenot na isyu dapit sa unibersal na soberaniya nin Dios. An pagkasaysay manongod ki Job nagpapararom man kan satong pakasabot sa kun ano an kalabot sa pagpadanay nin integridad asin nagtatabang sa sato na masabotan kun taano ta kun beses tinotogotan ni Jehova na magsakit an mga lingkod nia. Apuera kaini, ipinapamidbid kan libro nin Job si Satanas na Diablo bilang pangenot na Kaiwal ni Jehova asin nin katawohan. Ipinapaheling man kan librong iyan na an bakong sangkap na mga tawo arog ni Job puedeng magdanay na maimbod ki Jehova sa ibong nin grabeng pagbalo. Siyasaton niato an nagkapira sa mga pangyayari na isinaysay sa libro nin Job.

Binalo ni Satanas si Job

 3. Ano an aram niato manongod ki Job, asin taano ta sia nagin punteriya ni Satanas?

³ Si Job mayaman asin maimpluwensiang tawo, sarong patriarka na igwa nin marahay na moral na mga kualidad. Minalataw na sia sarong iginagalang na marhay na parakonseho asin katood kan mga daing sukat. An pinakamahalaga, si Job may pagkatakot sa Dios. Si Job ilinaladawan bilang sarong tawo na “daing katuyawan asin tanos, saka natatakot sa Dios asin naglilikay sa maraot.” An diosnon na debosyon ni Job—bakong an saiyang kayamanan asin impluwensia—an dahelan na sia nagin punteriya kan mga pagsalakay ni Satanas na Diablo.—Job 1:1; 29:7-16; 31:1.

 4. Ano an integridad?

⁴ An pambukas na pagkasaysay kan libro nin Job naglaladawan nin sarong pagtiripon sa langit kun saen an mga anghel nagtirindog sa atubangan ni Jehova. Yaon man si Satanas, asin nag-atubang sia nin mga sahot tumang ki Job. (Basahon an Job 1:6-11.) Minsan ngani nasambitan ni Satanas an mga rogaring ni Job, isinentro nia an saiyang atension sa pagkuestion sa integridad ni Job. An terminong “integridad” nangangahulogan nin pagigin tanos, daing katuyawan, matanos, asin daing sala. Siring kan pagkagamit sa Biblia, an integridad nin tawo nangangahulogan nin pagigin lubos kan debosyon nin puso ki Jehova.

 5. Ano an sinabi ni Satanas manongod ki Job?

⁵ Sinabi ni Satanas na si Job nagsasamba sa Dios huli sa kaimotan, bakong sa integridad. An sahot ni Satanas iyo na si Job magigin maimbod sana ki Jehova sagkod na sia padagos na tinatawan nin balos asin pinoprotehiran nin Dios. Tanganing masimbag an sahot ni Satanas, tinogotan ni Jehova si Satanas na salakayon an maimbod na tawong iyan. Bilang resulta, sa laog nin saro sanang aldaw, naaraman ni Job na hinabon o ginadan an saiyang ataman na mga hayop, ginadan an kadaklan sa mga katabang nia, asin nagadan an sampulong aki nia. (Job 1:13-19) Naraot daw an integridad ni Job huli sa pagsalakay ni Satanas? An ipinasabong na rekord nagsasaysay kan reaksion ni Job sa remalasong nangyari sa saiya: “Si Jehova an nagtao, asin si Jehova an buminawe. Padagos logod na omawon an ngaran ni Jehova.”—Job 1:21.

 6. (a) Ano an nangyari durante nin saro pang pagtiripon sa langit? (b) Siisay an nasa isip ni Satanas kan kuestionon nia an integridad ni Job ki Jehova?

⁶ Kan huri, nagkaigwa nin saro pang pagtiripon sa langit. Sa giraray nag-atubang si Satanas nin mga sahot tumang ki Job, na nagsasabi: “Kublit para sa kublit, asin an gabos na sadiri nin tawo itatao nia para sa saiyang kalag. Alagad ta unata tabi an saimong kamot asin dotdota sagkod an saiyang tolang asin an saiyang laman patin helinga kun baga dai ka nia sumpaon nin atubangan.” Mangnohon na may idinamay pa si Satanas sa saiyang mga sahot. Paagi sa pagsabing, “An gabos na sadiri nin tawo itatao nia para sa saiyang kalag,” kinuestion kan Diablo an integridad bako sanang ni Job kundi nin siisay man na “tawo” na nagsasamba ki Jehova. Pagkatapos kaiyan, itinogot nin Dios na pasakitan ni Satanas si Job nin makologon na helang. (Job 2:1-8) Alagad dai pa natapos dian an mga pagbalo ki Job.

Kun Anong Leksion an Manonodan Niato sa Paninindogan ni Job

 7. Sa anong mga paagi ginipit si Job kan saiyang agom asin mga bisita?

⁷ Sa kapinonan kan mga pagbalo ki Job, an agom nia nagsakit man kapareho nia. Sierto na biyong pinanluyahan nin boot an agom ni Job kan magadan an mga aki nia asin mawara an kayamanan kan pamilya. Siertong nakolgan siang maheling an agom nia na nagsasakit nin makologon na helang. Sia nagtaram nin makosog ki Job: “Nangangapot ka pa giraray nin higot sa saimong integridad? Sumpaa an Dios asin magadan ka!” Dangan, nag-abot an tolong lalaki—si Elifaz, Bildad, asin Zofar—na garo baga tanganing rangahon si Job. Imbes, sinda naggamit nin mapandayang pangangatanosan asin nagin “mga pararangang nakakaparibok.” Halimbawa, sinabi ni Bildad na an mga aki ni Job naggibo nin maraot kaya tama sana an nangyari sa sainda. Sinabi ni Elifaz na an pagsakit ni Job padusa sa nakaaging mga kasalan. Kinuestion pa ngani nia kun baga igwa nin ano man na halaga sa Dios an mga nagpapadanay nin integridad! (Job 2:9, 11; 4:8; 8:4; 16:2; 22:2, 3) Sa siring kagrabeng panggigipit, pinagdanay ni Job an integridad nia. Totoo, sala sia kan ‘ipahayag nia na an saiyang sadiring kalag matanos imbes na an Dios.’ (Job 32:2) Pero, nagdanay siang maimbod sa gabos na nangyaring iyan.

 8. Anong marahay na halimbawa an itinao ni Eliu para sa mga nagtatao nin hatol ngonyan?

⁸ Sunod, mababasa niato an manongod ki Eliu, na nag-abot man tanganing magbisita ki Job. Naghinanyog nguna si Eliu sa mga argumento ni Job asin kan tolong kairiba nia. Minsan ngani si Eliu mas hoben sa apat na lalaki, sia nagpaheling nin orog na kadonongan. Kinaolay nia si Job sa makonsiderasyon na paagi, na sinasambit an personal na ngaran ni Job. Tinawan nin komendasyon ni Eliu si Job huli sa pagigin tanos nia. Alagad sinabi man nia na nakasentrong marhay an isip ni Job sa pagmamaigot na patunayan na sia daing sala. Dangan sinierto ni Eliu ki Job na an maimbod na paglilingkod sa Dios pirmeng kapakipakinabang. (Basahon an Job 36:1, 11.) Marahayon nanggad na halimbawa sa mga kaipuhan na magtao nin hatol ngonyan! Si Eliu nagpaheling nin pasensia, naghinanyog nin maingat, nagtao nin komendasyon kun posible, asin nagtao nin nakakaparigon na hatol.—Job 32:6; 33:32.

 9. Paano tinabangan ni Jehova si Job?

⁹ Sa katapustapusi, nagkaigwa si Job nin sarong bisita na totoong nakakapukaw nin may pagkangirhat na paggalang! An rekord nagsasabi: “Sinimbag ni Jehova si Job hale sa bagyo nin doros.” Paagi sa paggamit ni Jehova nin sunod-sunod na hapot, maboot alagad marigon na tinabangan nia si Job na itanos an saiyang kaisipan. Gikan sa boot na inako ni Job an pagsagwe, na sinasabi: “Ako nagin daing halaga . . . Ako nagsosolsol nanggad sa kabokabo asin abo.” Pagkatapos na makipag-olay si Jehova ki Job, ipinahayag Nia an Saiyang kaanggotan sa tolong kairiba huli ta dai sinda nagtaram “nin totoo.” Kaipuhan na ipamibi sinda ni Job. Dangan “binaliktad ni Jehova mismo an bihag na kamugtakan ni Job kan sia mamibi para sa saiyang kairiba, asin bilang dagdag itinao nin doble ni Jehova an gabos na rogaring kaidto ni Job.”—Job 38:1; 40:4; 42:6-10.

Gurano Kararom an Pagkamoot Niato ki Jehova?

10. Taano ta dai binaliwala o ginadan ni Jehova si Satanas?

¹⁰ Si Jehova an Kaglalang kan uniberso, an Soberano kan gabos na linalang. Taano ta dai nia binaliwala an sahot kan Diablo? Aram nin Dios na an pagbaliwala o paggadan ki Satanas dai makakaresolber sa pinalataw na isyu. Sinabi kan Diablo na si Job, sarong marahayon na lingkod ni Jehova, dai magdadanay na maimbod kun mawara an kayamanan nia. Si Job nagdanay na maimbod sa ibong nin pagbalo. Dangan sinabi ni Satanas na an siisay man na tawo matalikod sa Dios kun sia magsakit sa pisikal. Si Job nagsakit, alagad dai naraot an integridad nia. Huli kaini, napatunayan na putikon si Satanas kun dapit sa nangyari sa tawong iyan na maimbod minsan ngani bakong sangkap. Kumusta an iba pang nagsasamba sa Dios?

11. Paano si Jesus nagtao nin kompletong simbag sa sahot ni Satanas?

¹¹ Sa katunayan, an kada lingkod nin Dios na nagdadanay na may integridad sa ibong kan ano man na iatubang ni Satanas tumang sa saiya nagpapatunay na sa saiya mismong kamugtakan, putik an mga sahot kan daing pagsolsol na kaiwal na iyan. Si Jesus nagdigdi sa daga asin nagtao nin kompletong simbag sa sahot ni Satanas. Si Jesus sarong sangkap na tawo, arog kan satong enot na ama, si Adan. An kaimbodan ni Jesus sagkod sa kagadanan talagang nagpatunay na putikon si Satanas asin na putik an mga sahot nia.—Kap. 12:10.

12. Ano an oportunidad asin paninimbagan kan lambang lingkod ni Jehova?

¹² Minsan siring, padagos na binabalo ni Satanas an mga nagsasamba ki Jehova. An lambang saro sa sato may oportunidad asin paninimbagan na patunayan paagi sa personal na integridad niato na naglilingkod kita ki Jehova huli ta sia namomotan niato—bakong huli sa kaimotan. Paano niato minamansay an paninimbagan na iyan? Ibinibilang niatong pribilehio na magin maimbod ki Jehova. Nakakaranga man na maaraman niato na si Jehova nagtatao sa sato nin kosog tanganing makatagal asin, siring sa kamugtakan ni Job, nagbubugtak Sia nin mga limitasyon sa mga pagbalo na napapaatubang sa sato.—1 Cor. 10:13.

Si Satanas—Sarong Mapang-angat na Kaiwal Asin Apostata

13. Anong mga detalye an ihinahayag kan libro nin Job manongod ki Satanas?

¹³ An Hebreong Kasuratan nagtatao nin mga detalye manongod sa makasusupog na papel ni Satanas sa pagsahot ki Jehova asin paglagalag sa katawohan. Sa Kristianong Griegong Kasuratan, makakakua kita nin dugang pang impormasyon manongod sa pagtumang ni Satanas ki Jehova, asin sa libro nin Kapahayagan, manonodan niato an manongod sa pagbindikar sa soberaniya ni Jehova asin paglaglag ki Satanas sa katapustapusi. An libro nin Job nagtatao sa sato nin kaaraman manongod sa pagigin rebelde ni Satanas. Kan si Satanas presente sa mga pagtiripon sa langit, nag-atender sia na mayo nin intension na omawon si Jehova. An Diablo igwa nin maraot na saboot asin katuyohan. Pagkatapos niang sahotan si Job asin makua an permisong baloon ini, “si Satanas huminale sa atubangan ni Jehova.”—Job 1:12; 2:7.

14. Anong saboot an ipinaheling ni Satanas ki Job?

¹⁴ Huli kaini, ipinapamidbid si Satanas kan libro nin Job bilang daing herak na kaiwal nin katawohan. Sa pag-oltanan kan pagtiripon sa langit na nasambitan sa Job 1:6 asin kan pagtiripon na ilinadawan sa Job 2:1, nagkaigwa nin dai masabing lawig nin panahon, na durante kaiyan si Job maringis na binalo. Huli sa kaimbodan ni Job, nasabi ni Jehova ki Satanas: “Nangangapot pa giraray [si Job] nin higot sa saiyang integridad, minsan ngani sinusutsutan mo ako tumang sa saiya na paraon sia na mayo nin dahelan.” Alagad dai inako ni Satanas na putik an mga sinabi nia. Sa kabaliktaran, hinagad nia na si Job baloon giraray nin grabe. Sa siring, binalo kan Diablo si Job kan sia mayaman pa sagkod kan sia dukhang-dukha na. Malinaw nanggad, si Satanas mayong pagmalasakit sa mga daing sukat o sa mga biktima nin kalamidad. Naoongis sia sa mga tawo na may integridad. (Job 2:3-5) Minsan siring, an kaimbodan ni Job nagpaheling na si Satanas putikon.

15. Sa ano nagkakapareho si Satanas asin an mga apostata sa presenteng panahon?

¹⁵ Si Satanas an enot na linalang na nagin apostata. An mga apostata sa presenteng panahon nagpapaheling nin mga karakteristiko na kapareho kan sa Diablo. An saindang isip tibaad nahilo kan pagigin mapagkritika sa mga indibiduwal sa kongregasyon, Kristianong kamagurangan, o Namamahalang Grupo. May mga apostata na kinokontra an paggamit kan ngaran nin Dios, an Jehova. Dai sinda interesado na makanood manongod ki Jehova o maglingkod sa saiya. Kapareho kan saindang ama, si Satanas, pinupunteriya kan mga apostata an mga tawong may integridad. (Juan 8:44) Bakong makangangalas na linilikayan kan mga lingkod ni Jehova an gabos na pakikikomunikar sa sainda!—2 Juan 10, 11.

Inomaw ni Job an Ngaran ni Jehova

16. Anong kaisipan an ipinaheling ni Job ki Jehova?

¹⁶ Ginamit asin inomaw ni Job an ngaran ni Jehova. Dawa kan biyong pinanluyahan kan mabaretaan an pagkagadan kan mga aki nia, si Job dai nagsahot nin ano man na sala sa Dios. Minsan ngani nasala si Job sa paghona nia na an Dios an dahelan kan mga nawara sa saiya, inomaw pa man giraray nia an ngaran ni Jehova. Sa saro kan huri niang matalinhagang mga kasabihan, sinabi ni Job: “Uya! An pagkatakot ki Jehova—iyan an kadonongan, asin pakasabot an pagtalikod sa karatan.”—Job 28:28.

17. Ano an nakatabang ki Job na mapagdanay an integridad nia?

¹⁷ Ano an nakatabang ki Job na mapagdanay an integridad nia? Malinaw nanggad, bago umabot an mga kalamidad, napatalubo na nia an dayupot na relasyon ki Jehova. Minsan ngani mayo kita nin prueba na aram nia na kinuestion ni Satanas si Jehova, determinado si Job na magdanay na maimbod. Sia nagsabi: “Sagkod na ako magadan dai ko hahaleon sa sakuyang sadiri an sakuyang integridad!” (Job 27:5) Paano napatalubo ni Job an dayupot na relasyon na ini? Daing duda, pinahalagahan nia an nadangog nia manongod sa pagtratar nin Dios ki Abraham, Isaac, asin Jacob, na harayo niang mga paryente. Asin paagi sa pag-obserbar sa mga linalang, naheheling ni Job an dakol sa mga kualidad ni Jehova.—Basahon an Job 12:7-9, 13, 16.

18. (a) Paano ipinaheling ni Job an saiyang debosyon ki Jehova? (b) Sa anong mga paagi niato inaarog an marahayon na halimbawa ni Job?

¹⁸ Huli sa nanodan ni Job, nagkaigwa sia nin pagmawot na paogmahon si Jehova. Kun halimbawa man na an mga miembro kan saiyang pamilya nakagibo nin bagay na ikinakaanggot nin Dios o “isinumpa an Dios sa saindang puso,” sia regular na nagdolot nin mga atang. (Job 1:5) Dawa kan si Job binabalo nin grabe, positibong mga bagay pa man giraray an sinabi nia manongod ki Jehova. (Job 10:12) Kanigoan karahay na halimbawa! Dapat man niatong regular na ilaog sa isip an tamang kaaraman dapit ki Jehova asin sa mga katuyohan nia. Pinapagdanay niato an marahay na rutina sa espirituwal na mga aktibidad na arog kan pag-adal, pag-atender sa mga pagtiripon, pagpamibi, asin paghuhulit kan maogmang bareta. Dugang pa, ginigibo niato an gabos na makakaya niato na ipamidbid an ngaran ni Jehova. Asin kun paanong an integridad ni Job nakapaogma ki Jehova, an integridad man kan mga lingkod nin Dios ngonyan nagpapagayagaya sa puso ni Jehova. Pag-oolayan an temang ini sa sunod na artikulo.

Nagigirumdoman daw Nindo?

• Taano ta si Job an binalingan kan atension ni Satanas na Diablo?

• Anong mga pagbalo an tinagalan ni Job, asin ano an nagin reaksion nia?

• Ano an matabang sa sato na mapagdanay an satong integridad arog ni Job?

• Ano an manonodan niato sa libro nin Job manongod ki Satanas?

[Ritrato sa pahina 4]

Sinasabi sa sato kan pagkasaysay sa libro nin Job an pangenot na isyu dapit sa unibersal na soberaniya nin Dios

[Ritrato sa pahina 6]

Sa anong mga kamugtakan puedeng mabalo an integridad nindo?