“Siisay an Kag-aki sa mga Tagdo kan Ambon?”

ILINADAWAN nin sarong peryodista kan ika-19 siglo an mga tagdo kan ambon bilang “likidong mga mutya kan daga, na pinorma kan doros.” Hinapot kan satong Kaglalang an suanoy na patriarkang si Job: “Siisay an kag-aki sa mga tagdo kan ambon?” (Job 38:28) Ipinagigirumdom nin Dios ki Job na hale sa Dios an mahal na marhay na ambon.

Apuera sa naglilinanglinang, garo mutya na kagayonan kaiyan, sa Biblia an ambon may koneksion sa bendisyon, balunbon, abundansia, asin pagpreserbar sa buhay. (Genesis 27:28; Deuteronomio 33:​13, 28; Zacarias 8:​12) Durante kan mainit, daing oran na kapanahonan sa Israel, an “ambon nin Hermon” pinepreserbar an mga pananom kan daga, asin kun siring an mga nag-eerok dian. An kadlagan asin maniebeng kalangkawan kan Bukid nin Hermon nagpapaluwas pa nin alumuom kun banggi na nakokondensar sa pagporma nin abundang ambon. An salmistang si David ikinomparar an kapreskohan na ibinubunga kan ambon na ini sa nakaoogmang eksperyensia na mag-ontok na kasaro nin mga kapwa parasamba ki Jehova.​—Salmo 133:3.

An mga instruksion ni propeta Moises sa Israel suabe asin nakakapapresko, na garo mga tagdo kan ambon. Sinabi nia: “An sakong tataramon madalihig siring sa ambon, siring sa maluyang oran sa kadootan asin siring sa ragiri sa ibabaw nin mga pananom.” (Deuteronomio 32:2) Ngonyan, an Mga Saksi ni Jehova nagpapahayag kan nagtatao nin buhay na maogmang bareta manongod sa Kahadean nin Dios sagkod sa kaporoporohi kan daga. (Mateo 24:14) Ipinapaabot nin Dios an pangagda: “‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Minilyon na tawo hale sa gabos na nasyon an nag-aako kan alok na ini na espirituwal na kapreskohan hale sa Dios, na kayang susteniran nin daing sagkod an buhay.