Si Jehova, an Dios nin Katotoohan

“Tinubos mo ako, O Jehova na Dios nin katotoohan.”​—SALMO 31:5.

 1. Ano an mga kamugtakan sa langit asin sa daga kan mayo nin kaputikan?

MAY panahon kaidto na mayo nin kaputikan. An nag-eerok sa dai naheheling na kalangitan mga sangkap na espiritung linalang, na naglilingkod sa Kaglalang sa sainda, “an Dios nin katotoohan.” (Salmo 31:5) Mayo nin pagigin bakong totoo, mayo nin pandadaya. An totoo an ikinokomunikar ni Jehova sa saiyang espiritung mga aki. Iyan an ginibo nia huli ta namomotan nia sinda asin huli ta interesado siang marhay sa ikararahay ninda. Iyan man an kamugtakan kaidto sa daga. Linalang ni Jehova an enot na lalaki asin babae, asin paagi sa ninombrahan niang pinakapaagihan, pirme siang nagkomunikar sa sainda sa klaro, deretso sa punto, asin makatotoohan na paagi. Sierto nanggad na marahayon iyan!

 2. Siisay an nag-introdusir nin kaputikan, asin taano?

² Minsan siring, pag-abot nin panahon an sarong espiritung aki nin Dios daing supog na pinonan na gibohon an saiyang sadiri na karibal na dios, na kinokontra si Jehova. An gusto kan espiritung linalang na ini, na namidbid bilang si Satanas na Diablo, sambahon man sia kan iba. Tanganing magibo an saiyang obheto, inintrodusir nia an kaputikan bilang paagi tanganing mapasa kontrol nia an iba. Sa paggibo kaiyan, sia nagin “putikon [sagkod] iyo an ama kan kaputikan.”​—Juan 8:44.

 3. Ano an nagin reaksion ni Adan asin Eva sa mga kaputikan ni Satanas, asin ano an nagin mga resulta?

³ Paagi sa sarong halas, sinabi ni Satanas sa enot na babae, si Eva, na kun iignorohon nia an pagboot nin Dios asin kakakanon an ipinangangalad na bunga, sia dai magagadan. Kaputikan idto. Sinabi pa nia sa babae na paagi sa pagkakan kaiyan sia magigin arog nin Dios, na nakakaaram kan marahay asin maraot. Kaputikan man idto. Minsan ngani dai pa noarin man nin nagputik ki Eva, siertong napag-isip-isip nia na an nadangog nia sa halas bakong kaoyon kan sinabi nin Dios sa agom nia, si Adan. Pero, pinili niang maniwala ki Satanas, bako ki Jehova. Biyong nadaya, kinua nia an bunga asin kinakan. Kan huri, si Adan nagkakan man kan bunga. (Genesis 3:1-6) Arog ni Eva, si Adan dai pa noarin man nakadangog nin putik, pero dai sia nadaya. (1 Timoteo 2:14) Paagi sa saiyang mga aksion, ipinaheling nia na hinaboan nia an Kaggibo sa saiya. Kapahapahamak an nagin resulta sa katawohan. Dahelan sa pagsuway ni Adan, an kasalan asin kagadanan​—kaiba an karatan asin dai mabilang na kasakitan​—naglakop sa gabos niang aki.​—Roma 5:12.

 4. (a) Anong klaseng mga kaputikan an sinabi sa Eden? (b) Ano an dapat niatong gibohon tanganing dai madaya ni Satanas?

⁴ Naglakop man an kaputikan. Dapat niatong midbidon na an mga kaputikan na idto na sinabi sa tatamnan nin Eden mga pagsalakay tumang sa pagkamakatotoohan ni Jehova mismo. Iininsistir ni Satanas na an Dios may kadayaan na ipinangunguri an sarong bagay na marahay sa enot na tawong mag-agom. Siempre, bakong totoo iyan. Si Adan asin Eva dai nakinabang sa pagsuway ninda. Sinda nagadan, siring kan sabi ni Jehova na sinda magagadan. Minsan siring, an mapagbalobaging pagsalakay ni Satanas ki Jehova nagpadagos, sagkod sa punto na pakalihis nin dakol na siglo si apostol Juan pinasabngan na isurat na “ilinalagalag [ni Satanas] an bilog na ineerokan na daga.” (Kapahayagan 12:9) Tanganing makalikay na dai madaya ni Satanas na Diablo, dapat kitang lubos na magkompiar sa pagigin totoo kan sinasabi ni Jehova asin kan saiyang Tataramon. Paano nindo mapatatalubo asin mapakokosog an saindong pagtitiwala ki Jehova patin mapasasarig an saindong sadiri tumang sa pandadaya saka mga kaputikan na pinalalakop kan saiyang Kaiwal?

Aram ni Jehova an Totoo

5, 6. (a) Anong kaaraman igwa si Jehova? (b) Paano ikakokomparar an kaaraman nin tawo sa kaaraman ni Jehova?

⁵ Daing liwat-liwat an Biblia sa pagpamidbid ki Jehova bilang an “naglalang kan gabos na bagay.” (Efeso 3:9) Sia “an Saro na guminibo kan langit asin daga asin dagat patin kan gabos na bagay na yaon dian.” (Gibo 4:24) Huling si Jehova an Kaglalang, aram nia an totoo manongod sa gabos na bagay. Sa pag-ilustrar: Horophoropa an sarong tawo na nagdisenyo dangan nagtogdok kan saiyang sadiring harong, na sia sanang solo an naggigibo. Sia an magigin lubos na may aram kan harong na iyan asin magkakaigwa nin orog na pakasabot kaiyan kisa siisay man na nagmamasid. Aram na marhay nin mga tawo an mga bagay na sinda an nagdisenyo asin naggibo. Kaagid kaiyan, aram kan Kaglalang an gabos na detalye manongod sa linalang nia.

⁶ Magayonon an pagkapahayag ni propeta Isaias sa hiwas kan kaaraman ni Jehova. Mababasa niato: “Siisay an suminokol sa katubigan sa saiya sanang kamaoo, asin suminokol sa kalangitan mismo paagi sana sa dangaw asin tuminakad sa kabokabo kan daga, o tuminimbang sa pisaran kan kabukidan, asin kan mga bulod sa timbangan? Siisay an suminokol sa espiritu ni Jehova, asin siisay an bilang saiyang parahatol makakapagtokdo sa saiya? Sa kiisay sia nakihumapot tanganing pasaboton sia, o siisay an nagtotokdo saiya sa dalan nin hustisya, o nagtotokdo saiya nin kaaraman, o nagpapaaram saiya kan mismong dana nin tunay na pakasabot?” (Isaias 40:12-14) Tunay nanggad, si Jehova “Dios nin kaaraman” asin “sangkap an kaaraman.” (1 Samuel 2:3; Job 36:4; 37:16) Kadikiton nanggad an aram niato kun ikokomparar! Apisar kan nakagugulat na kaaraman na nakua nin katawohan, an satong pakasabot dapit sa pisikal na mga linalang dai ngani lamang nakakaabot sa ‘mga gilid kan mga dalan nin Dios.’ Iyan siring sa “hinghing” kun ikokomparar sa “makosog na dagoldol.”​—Job 26:14.

 7. Ano an aram ni David manongod sa kaaraman ni Jehova, asin sa siring ano an dapat niatong midbidon?

⁷ Mantang si Jehova an naglalang sa sato, nangangahulogan iyan na midbid nia kitang marhay. Aram ini ni Hadeng David. Sia nagsurat: “O Jehova, siniyasat mo ako, asin midbid mo ako. Ika mismo nakaaram kan sakong pagtukaw asin kan sakong pagtindog. Inestudyaran mo an sakong pag-isip hale sa harayo. An sakong pagbiahe asin an sakong paghigda saimong sinokol, asin tatao ka minsan sa gabos kong dalan. Huli ta mayo ni sarong tataramon sa sakong dila, alagad, uya! O Jehova, iyan aram mo na gabos.” (Salmo 139:1-4) Siempre, aram ni David na an mga tawo naggagamit nin libreng kabotan​—tinawan kita nin Dios nin kapasidad na magsalang kumuyog o makisuway sa saiya. (Deuteronomio 30:​19, 20; Josue 24:15) Minsan siring, mas midbid kita ni Jehova kisa pakamidbid niato sa satong sadiri. An pinakamarahay para sa sato an gusto nia, asin nasa kamugtakan sia na giyahan an satong mga lakad. (Jeremias 10:23) Tunay nanggad, mayo nin paratokdo, mayo nin eksperto, mayo nin parakonseho na mas may kakayahan na magtokdo sa sato kan katotoohan asin magpadonong saka magpaogma sa sato.

Si Jehova Makatotoohan

 8. Paano niato naaaraman na si Jehova makatotoohan?

⁸ Madali sana an pag-aram kan totoo, pero iba nang orolay an pirmeng pagsabi kan totoo, na magin makatotoohan. Halimbawa, pinili kan Diablo na dai ‘magdanay sa katotoohan.’ (Juan 8:44) Sa kabaliktaran, si Jehova “abunda sa . . . katotoohan.” (Exodo 34:6) An Kasuratan pirmeng nagpapatotoo sa pagigin makatotoohan ni Jehova. Si apostol Pablo nagsabi na “dai mangyayaring magputik an Dios,” asin na an Dios “dai makakapagputik.” (Hebreo 6:18; Tito 1:2) An pagkamakatotoohan sarong mahalagang kabtang kan personalidad nin Dios. Makasasarig asin makapagtitiwala kita ki Jehova huli ta sia makatotoohan; dai nia noarin man dinadaya an mga maimbod sa saiya.

 9. Paano konektado sa katotoohan an ngaran ni Jehova?

⁹ An mismong ngaran ni Jehova nagpapatotoo sa saiyang pagigin makatotoohan. An ngaran nin Dios nangangahulogan “Saiyang Pinapangyayaring Magin.” Ipinamimidbid kaini si Jehova bilang an saro na gradwal na nagigin Paraotob kan gabos niang ipinanuga. Mayo nang ibang may siring kaiyan na kakayahan. Huling si Jehova an Supremo, mayo nin makaoolang sa pagkaotob kan saiyang mga katuyohan. Si Jehova bako sanang makatotoohan kundi sia sana an may kapangyarihan asin kadonongan na otobon an gabos niang sinasabi.

10. (a) Paano naheling mismo ni Josue an pagigin makatotoohan ni Jehova? (b) Anong mga panuga ni Jehova an naheling mo nang naotob?

¹⁰ Si Josue saro sa dakol na nakaheling mismo kan pambihirang mga pangyayari na nagpapatotoo sa pagigin makatotoohan ni Jehova. Nasa Egipto si Josue kan ipaabot ni Jehova sa nasyon na iyan an sampulong damat, na kada saro sinasabi na nia antes pa. Kabilang sa iba pang bagay, naeksperyensiahan ni Josue an kaotoban kan mga panuga ni Jehova na kaldahon an mga Israelita sa Egipto asin darahon sinda sa Dagang Panuga, na dinadaog an mapuersang mga hukbong Cananeo na luminaban sa sainda. Sa paghinanapos kan saiyang buhay, sinabihan ni Josue an kamagurangan na lalaki sa nasyon nin Israel: “Aram nindong gayo sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.” (Josue 23:14) Minsan ngani dai mo mismo naheling an mga milagro na naheling ni Josue, naeksperyensiahan mo na daw an pagigin totoo kan mga panuga nin Dios sa panahon na ika nabubuhay?

Ihinahayag ni Jehova an Katotoohan

11. Ano an nagpapaheling na boot ni Jehova na ikomunikar an katotoohan sa katawohan?

¹¹ Imahinara an sarong magurang na kadakol kan aram alagad bihirang makipag-olay sa saiyang mga aki. Dai daw kamo nagpapasalamat na si Jehova bakong arog kaiyan? Si Jehova mamomoton na nagkokomunikar sa katawohan, asin ginigibo nia iyan pirme. An Kasuratan inaapod siang “Kaharohalangkaweng Paratokdo.” (Isaias 30:20) Huli sa saiyang mamomoton na kabootan, nagkokomunikar sia dawa sa mga habong maghinanyog sa saiya. Halimbawa, si Ezequiel inasignaran na hulitan an mga tawo na aram ni Jehova na dai maghihimate. Sinabi ni Jehova: “Aki nin tawo, lakaw, lumaog ka sa tahaw kan harong ni Israel, asin kaipuhan na magtaram ka kan sakong mga tataramon sa sainda.” Dangan nagpatanid sia: “Dai ninda gugustohon na maghinanyog sa saimo, huli ta dai ninda gustong maghinanyog sa sako; huli ta an gabos na yaon sa kamag-anakan nin Israel matagas an payo asin matagas an puso.” Masakit na asignasyon idto, alagad fiel na ginibo iyan ni Ezequiel, asin sa paggibo kaiyan, ipinabanaag nia an pagkaludok ni Jehova. Kun kamo nasa masakit na asignasyon nin paghuhulit asin nagsasarig kamo sa Dios, makakokompiar kamo na pakokosogon nia kamo siring kan ginibo nia sa saiyang propetang si Ezequiel.​—Ezequiel 3:​4, 7-9.

12, 13. Sa anong mga paagi nagkomunikar an Dios sa mga tawo?

¹² Mawot ni Jehova na “an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Nagtaram sia paagi sa mga propeta, paagi sa mga anghel, asin paagi ngani sa saiyang namomotan na marhay na Aki, si Jesu-Cristo. (Hebreo 1:​1, 2; 2:2) Ki Pilato, si Jesus nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan. An lambang tawo na nasa lado kan katotoohan naghihinanyog sa sakong tingog.” Si Pilato nagkaigwa nin daing kaagid sa halaga na oportunidad na manodan nin direkta gikan sa Aki nin Dios an katotoohan manongod sa probisyon ni Jehova para sa kaligtasan. Minsan siring, si Pilato mayo sa lado kan katotoohan, asin habo niang makanood gikan ki Jesus. Imbes, si Pilato mapagtuyang nagsimbag: “Ano an katotoohan?” (Juan 18:​37, 38) Herak man sa saiya! Pero, dakol an talagang naghinanyog sa katotoohan na ibinalangibog ni Jesus. Nagsabi sia sa saiyang mga disipulo: “Maogma an saindong mga mata huling an mga iyan nakaheheling, asin an saindong mga talinga huling iyan nakadadangog.”​—Mateo 13:16.

¹³ Iningatan ni Jehova an katotoohan paagi sa Biblia asin ipinaabot nia iyan sa mga tawo sa gabos na lugar. Ihinahayag kan Biblia an mga bagay kun ano man nanggad iyan. Sinasabi kaiyan an mga kualidad, katuyohan, asin mga pagboot nin Dios, saka an totoong kamugtakan kan mga agi-agi kan katawohan. Sinabi ni Jesus sa pamibi ki Jehova: “An saimong tataramon katotoohan.” (Juan 17:17) Huli kaini, an Biblia sarong daing kaagid na libro. Iyan sana an isinurat paagi sa pasabong nin Dios na nakakaaram kan gabos na bagay. (2 Timoteo 3:16) Iyan sarong mahal na marhay na regalo sa katawohan, regalo na pinakamamahal kan mga lingkod nin Dios. Madonong na basahon niato iyan aroaldaw.

Pangaptan nin Higot an Katotoohan

14. Ano an nagkapirang bagay na sinasabi ni Jehova na gigibohon nia, asin taano ta maninigo niato siang tubodon?

¹⁴ Maninigo niatong seryosohon an sinasabi sa sato ni Jehova sa saiyang Tataramon. Totoo an sinasabi nia kun ano sia, asin gigibohon nia an sinasabi niang gigibohon nia. Igwa kita nin makosog na dahelan na magtiwala sa Dios. Puede niatong tubodon kun sinasabi ni Jehova na sia ‘mamamalos sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:8) Puede man niatong tubodon si Jehova kun sinasabi nia na namomotan nia an mga nagmamaigot na gibohon an katanosan, kun sinasabi nia na tatawan nia nin buhay na daing katapusan an mga nagtutubod, asin kun sinasabi nia na hahaleon nia an kolog, pagtangis, asin kagadanan pa ngani. Idinoon ni Jehova an pagkamasasarigan kan huring panuga na ini paagi sa pagtao kan instruksion na ini ki apostol Juan: “Isurat mo, huli ta an mga tataramon na ini fiel asin totoo.”​—Kapahayagan 21:​4, 5; Talinhaga 15:9; Juan 3:36.

15. Ano an nagkapirang kaputikan na pinalalakop ni Satanas?

¹⁵ Si Satanas an eksaktong kabaliktaran ni Jehova. Imbes na magtao nin kaliwanagan, sia nandadaya. Tanganing magibo an obheto nia na italikod an mga tawo sa dalisay na pagsamba, si Satanas nagpapalakop nin kadakoldakol na kaputikan. Halimbawa, gusto kitang patubodon ni Satanas na an Dios harayo an boot sa sato asin daing labot sa nangyayaring pagdusa digdi sa daga. Pero, ipinaheheling kan Biblia na si Jehova odok an pagmakolog sa mga linalang nia saka ipinagmomondo an karatan asin pagdusa. (Gibo 17:24-30) Gusto man ni Satanas na papaniwalaon an mga tawo na an espirituwal na mga aktibidad pagsayang sana nin panahon. Al kontraryo, sinisierto sa sato kan Kasuratan na “an Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” Dugang pa, malinaw na sinasabi kaiyan na “sia nagigin an parabalos sa mga maigot na naghahanap sa saiya.”​—Hebreo 6:10; 11:6.

16. Taano an mga Kristiano ta dapat na magdanay na mapagbantay asin mangapot nin higot sa katotoohan?

¹⁶ May labot ki Satanas, si apostol Pablo nagsurat: “Binuta kan dios kan sistemang ini nin mga bagay an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:4) Arog ki Eva, an nagkapira biyong nadaya ni Satanas na Diablo. An iba inaarog an ginibo ni Adan, na dai nadaya alagad tuyong pinipili an dalan nin pakisuway. (Judas 5, 11) Sa siring, mahalagang marhay na an mga Kristiano magdanay na mapagbantay asin mangapot nin higot sa katotoohan.

Si Jehova Naghahagad nin “Pagtubod na Mayo nin Pagsaginsagin”

17. Ano an dapat niatong gibohon tanganing kamtan an pabor ni Jehova?

¹⁷ Huli ta sia makatotoohan sa gabos niang ginigibo, inaasahan ni Jehova na an mga nagsasamba sa saiya makatotoohan man. An salmista nagsurat: “O Jehova, siisay an magigin bisita sa saimong tolda? Siisay an mag-eerok sa saimong banal na bukid? Sia na naglalakaw na daing sala asin naggigibo nin katanosan asin nagtataram nin katotoohan sa saiyang puso.” (Salmo 15:​1, 2) Para sa mga Judio na nag-awit kan mga tataramon na iyan, an pagkasambit sa banal na bukid ni Jehova daing duda na nagpagirumdom kan Bukid nin Sion, na duman dinara ni Hadeng David an kaban kan tipan sa tolda na itinogdok nia duman. (2 Samuel 6:​12, 17) An bukid asin an tolda nagpagirumdom kan lugar na inerokan ni Jehova sa simbolikong paagi. Duman an mga tawo makadodolok sa Dios tanganing arangon an saiyang pabor.

18. (a) Ano an hinahagad kan pakikikatood sa Dios? (b) Ano an totokaron sa sunod na artikulo?

¹⁸ An siisay man na boot na makikatood ki Jehova dapat na magtaram kan katotoohan “sa saiyang puso,” bako sanang paagi sa saiyang mga ngabil. An tunay na mga katood nin Dios dapat na magin onesto sa puso asin dapat na magpaheling nin ebidensia nin “pagtubod na mayo nin pagsaginsagin,” huli ta an mga gibo nin pagkamakatotoohan naggigikan sa puso. (1 Timoteo 1:5; Mateo 12:​34, 35) An katood nin Dios bakong tuso o mapandaya, huli ta “an tawong . . . nandadaya ikinauuyam nin makuri ni Jehova.” (Salmo 5:6) An Mga Saksi ni Jehova sa bilog na daga nagmamaigot na magin makatotoohan bilang pag-arog sa Dios ninda. Sisiyasaton kan sunod na artikulo an temang ini.

Ano an Isisimbag Nindo?

• Taano ta aram ni Jehova an totoo manongod sa gabos na bagay?

• Ano an nagpapaheling na si Jehova makatotoohan?

• Paano ihinayag ni Jehova an katotoohan?

• Mapadapit sa katotoohan, ano an hinahagad sa sato?

[Mga Ritrato sa pahina 10]

Aram kan Dios nin katotoohan an gabos na bagay manongod sa linalang nia

[Mga Ritrato sa pahina 12, 13]

Maootob an mga panuga ni Jehova