Ano an Pangenot sa Saindong Buhay?

“Paaraman sa sako an dalan na maninigo kong lakawan.”​—SALMO 143:8.

 1. Ano an ikinonklusyon ni Hadeng Salomon manongod sa mga okupasyon asin nagibo nin tawo?

POSIBLENG aram nindo kapareho nin iba na an buhay pano nin mga aktibidad asin kapurisawan. Kun iisip-isipon nindo, mamimidbid nindo na an nagkapira dian mahalagang marhay. An ibang aktibidad asin kapurisawan bakong gayong mahalaga o daing kamanungdanan pa ngani. An pakarealisar nindo kaini nangangahulogan na kaoyon kamo kan saro sa pinakamadonong na tawo kasuarin man, si Hadeng Salomon. Pakasarosaroa nin lubos sa mga aktibidad sa buhay, sia nagkonklusyon: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.” (Eclesiastes 2:​4-9, 11; 12:13) Ano an kahulogan kaini para sa sato ngonyan?

 2. Anong pundamental na hapot an maninigong ihapot nin mga tawong matatakton sa Dios sa saindang sadiri, na minagiya pasiring sa anong konektadong mga hapot?

² Kun boot nindo na ‘matakot sa tunay na Dios asin otobon an saiyang mga togon,’ ihapot sa saindo man sana an nakapupukaw sa isip na hapot na ini, ‘Ano an pangenot sa sakong buhay?’ Totoo, tibaad dai nindo pinepensar an hapot na iyan aroaldaw, alagad taano ta dai iyan estudyaran ngonyan? An totoo, iyan nagsusuherir nin nagkapirang konektadong hapot, arog kan, ‘Posible daw na ako nagtatao nin sobrang pagdodoon sa sakong trabaho o propesyon o sa materyal na mga bagay? Ano an lugar kan sakong harong, pamilya, asin mga namomotan?’ An sarong hoben puedeng maghapot, ‘Guranong atension asin panahon ko an inuubos kan edukasyon? An totoo, an pangenot daw na pinagkakainteresan ko apisyon, isport, o sarong klase nin pag-aling-aling o teknolohiya?’ Asin ano man an satong edad o kamugtakan, tama sana na ihapot niato, ‘Ano an lugar kan paglilingkod sa Dios sa sakong buhay?’ Posibleng maoyon kamo na kaipuhan na igwa nin mga ipinaoorog. Alagad ta paano asin saen kita makakukua nin tabang na madeterminaran iyan nin madonong?

 3. Ano an kalabot sa pag-establisar kan mga ipinaoorog para sa mga Kristiano?

³ An “pangenot” may pundamental na kahulogan na sarong bagay na naeenot sa gabos na iba pa o kaipuhan na enoton na konsideraron. Baga man kamo saro sa Mga Saksi ni Jehova o kabilang kamo sa minilyon na sinserong nag-aadal kan Tataramon nin Dios na nakiaasosyar sa sainda, pensara an katotoohan na ini: “Para sa gabos na bagay igwa nin itinalaan na panahon, panahon para sa lambang gibo sa sirong kan kalangitan.” (Eclesiastes 3:1) Tama sana, kabale dian an pagpaheling nindo nin mamomoton na pagmakolog sa mga relasyon sa pamilya. (Colosas 3:​18-​21) Kalabot dian an pagtao nin sadiosan na sustento sa saindong kairiba sa harong paagi sa sekular na trabaho. (2 Tesalonica 3:​10-​12; 1 Timoteo 5:8) Asin tanganing mapaiba man, puede kamong pumondo nguna sa trabaho para sa sarong apisyon o paminsanminsan na pag-aling-aling o dibersion. (Ikomparar an Marcos 6:31.) Pero, kun odok na iisip-isipon, dai daw nindo naheheling na mayo sa mga ini an pangenot sa buhay? Igwa pa nin mas mahalaga.

 4. Paano konektado an Filipos 1:​9, 10 sa pagdeterminar niato sa mga ipaoorog?

⁴ Posible na minimidbid nindo na an naggigiyang mga prinsipyo sa Biblia mahalagang mga tabang sa pagdeterminar nin mga ipaoorog asin sa paggibo nin madonong na mga desisyon. Halimbawa, sa Filipos 1:​9, 10, an mga Kristiano sinasadol na “mag-oswag nin orog sa tamang kaaraman asin lubos na pagmansay.” Sa anong katuyohan? Idinugang ni apostol Pablo: “Tangani na kamo makasierto sa orog na mahalagang mga bagay.” Bako daw na makatanosan iyan? Basado sa tamang kaaraman, an mapagmansay na Kristiano makadedeterminar kun ano an maninigong enot na pagmakolgan​—pangenot—​sa buhay.

Sarong Modelo sa Kun Ano an Pangenot

 5. Sa paglaladawan kan modelo na iwinalat sa mga Kristiano, paano ipinaheheling kan Kasuratan kun ano an pangenot sa buhay ni Jesus?

⁵ May manonompongan kitang mahalagang marhay na kabtang nin kaaraman sa mga tataramon ni apostol Pablo: “Sa dalan na ini kamo inapod, huli ta minsan si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Iyo, para sa mga giya sa kun ano an pangenot sa buhay, masisiyasat niato an kaisipan dian ni Jesu-Cristo. An Salmo 40:​8 makahulang nagsabi manongod sa saiya: “An paggibo kan boot mo, O Dios ko, iyo an naoogmahan ko, asin an saimong ley nasa kairaroman kan sakong sadiri.” Ini an pagkasabi nia kan iyo man sanang kaisipan: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.”​—Juan 4:34; Hebreo 12:​2.

 6. Paano niato makakamtan an mga resulta na kapareho kan nakamtan ni Jesus sa pag-enot sa kabotan nin Dios?

⁶ Mangnoha an nagdedeterminar na bagay na iyan​—an paggibo kan kabotan nin Dios. An halimbawa ni Jesus nagdodoon kun ano an tama sanang gibohon na pangenot sa saindang buhay kan saiyang mga disipulo, huli ta sinabi nia na “an gabos na natokdoan sa sangkap na paagi makaaarog sa saiyang paratokdo.” (Lucas 6:40) Asin mantang si Jesus naglalakaw sa dalan na katuyohan kan saiyang Ama, ipinaheling nia na may “pag-ogma na may satispaksion” sa pagpapadanay kan kabotan nin Dios na pangenot. (Salmo 16:11; Gibo 2:​28) Nasasabotan daw nindo kun ano an ipinaririsa kaiyan? Mantang pinipili kan mga parasunod ni Jesus an paggibo kan kabotan nin Dios bilang an pangenot na bagay sa saindang buhay, sinda magkakamit nin “pag-ogma na may satispaksion” asin tunay na buhay. (1 Timoteo 6:19) Kaya bako sanang saro an dahelan sa pagigin pangenot sa satong buhay kan paggibo kan kabotan nin Dios.

7, 8. Anong mga pagbalo an inatubang ni Jesus, asin ano an manonodan niato digdi?

⁷ Pakatapos tolos na masimbolisaran ni Jesus an pagpresentar kan saiyang sadiri na gibohon an kabotan nin Dios, pinagmaigotan kan Diablo na isiko sia. Paano? Paagi sa sugot sa tolong bagay. Sa kada saro si Jesus suminimbag sa Makakasuratan, dai mapagdududahan na pananaram. (Mateo 4:​1-10) Alagad ta may iba pang pagbalo na naghahalat sa saiya​—paglamag, pag-olog-olog, pagpasaloib ni Judas, putik na mga akusasyon, dangan kagadanan sa hariging pasakitan. Pero, mayo sa mga pagbalong ini na nakapasiko sa maimbod na Aki nin Dios sa saiyang dalan. Sa sarong kritikal na panahon, si Jesus namibi: “Bakong an boot ko, kundi an boot mo. . . . Mangyari logod an saimong kabotan.” (Mateo 26:​39, 42) Bako daw na an lambang saro sa sato maninigong mapahirong marhay kan aspektong ini kan modelo na iwinalat para sa sato, na pinapangyayari kita na ‘magmaigot sa pamibi’?​—Roma 12:12.

⁸ Iyo, kun dinedeterminaran niato an satong mga ipaoorog sa buhay, partikularmenteng nakatatabang an paggiya nin Dios, nangorogna kun napaaatubang kita sa mga enemigo kan katotoohan asin mga kontra sa kabotan nin Dios. Girumdoma an pagngayongayo kan fiel na si Hadeng David para sa paggiya kan maeksperyensiahan nia an oposisyon nin mga enemigo. Masasabotan niato ini mantang ineestudyaran niato an sarong kabtang kan Salmo 143. Ini maninigong makatabang sa sato na mamansayan kun paano kita makapakokosog kan satong personal na relasyon ki Jehova asin mapasasarig na padagos na gibohon na enot sa satong buhay an paggibo kan kabotan nin Dios.

Dinadangog Asin Sinisimbag ni Jehova an Satong mga Pamibi

 9. (a) Minsan ngani parakasala si David, ano an ihinahayag kan saiyang mga tataramon asin gawe-gawe? (b) Taano ta dai kita maninigong pumondo sa paggibo kan tama?

⁹ Minsan ngani makasalan na tawo, si David may pagtubod na dadangogon ni Jehova an saiyang pagngayongayo. Sia mapakumbabang nakimaherak: “O Jehova, dangoga an sakong pamibi; hinanyoga an sakong pagngayongayo. Sa saimong pagkafiel simbaga ako sa saimong katanosan. Asin dai ka lumaog sa paghokom sa saimong lingkod; huli ta sa atubangan mo mayo nin nabubuhay na puedeng magin matanos.” (Salmo 143:​1, 2) Aram ni David na sia bakong sangkap, pero an saiyang puso bulaos sa Dios. Sa siring, kompiado sia na maako sia nin simbag sa katanosan. Dai daw ini nakaparirigon sa satong boot? Dawa kun kita magkulang sa katanosan nin Dios, makapagkokompiar kita na dinadangog nia kita kun an satong puso bulaos sa saiya. (Eclesiastes 7:​20; 1 Juan 5:14) Mantang nagmamaigot sa pamibi, kaipuhan na desidido kita na “daogon an karatan nin karahayan” sa maraot na mga aldaw na ini.​—Roma 12:​20, 21; Santiago 4:7.

10. Taano si David ta nagkaigwa nin mga panahon na hadit?

¹⁰ Si David kaidto nagkaigwa nin mga enemigo, arog niato. Baga man bilang dulag ki Saul, na napiritan na pumaili sa mapungaw, masakit maabot na mga lugar, o bilang hade na riniribok nin mga enemigo, si David nagkaigwa nin mga panahon na hadit. Ilinadawan nia kun paano ini nakaapektar sa saiya: “Linapag kan enemigo an sakong kalag . . . Pinapangyari nia na ako mag-erok sa madiklom na mga lugar . . . Asin an sakong espiritu pinanluluya sa laog ko; sa tahaw ko an sakong puso namamagol.” (Salmo 143:​3, 4) Nagkaigwa daw kamo nin dahelan na makamate man nin arog kaiyan?

11. Anong nakahahadit na mga panahon an inatubang nin mga lingkod nin Dios sa presenteng aldaw?

¹¹ An sakit na tao nin mga enemigo, an mga pagbalo huli sa grabeng sakit sa pagbuhay, grabeng helang, o iba pang nakahahadit na problema nagpamate sa iba sa banwaan nin Dios na masuko na an saindang espiritu. Kun beses garo baga namagol naman an saindang puso. Garo baga indibiduwalmente sinda nag-agrangay: “Huli ta ipinaheling mo sa sako an dakol na kasakitan asin kalamidad, logod na ibalik mo ako liwat . . . Logod na palibotan asin rangahon mo ako.” (Salmo 71:​20, 21) Paano sinda natabangan?

Kun Paano Aatubangon an mga Paghihingoa nin mga Enemigo

12. Paano inatubang ni Hadeng David an peligro asin mga pagbalo?

¹² Ipinaririsa kan Salmo 143:​5 kun ano an ginibo ni David kan palibot an peligro asin darakulang pagbalo: “Ginirumdom ko an mga aldaw kaidtong suanoy; naghorophorop ako sa gabos mong gibo; gikan sa boot na dayaday akong nagtao nin atension sa gibo kan saimong mga kamot.” Ginirumdom ni David an mga tratamiento nin Dios sa Saiyang mga lingkod asin kun paano sia mismo nakaeksperyensia nin pagliligtas. Hinorophorop nia an ginibo ni Jehova para sa Saiyang dakulang ngaran. Iyo, si David nagtao nin atension sa mga gibo nin Dios.

13. Kun kita napapaatubang sa mga pagbalo, paano an pagpensar niato sa mga halimbawa nin fiel na mga lingkod kan suanoy asin sa presente makatatabang sa sato na makatagal?

¹³ Bako daw na parate niatong ginigirumdom an mga tratamiento nin Dios sa saiyang banwaan? Iyo nanggad! Kaiba digdi an rekord na ginibo kan “dakulang panganoron nin mga saksi” kaidtong mga panahon bago kan mga Kristiano. (Hebreo 11:​32-38; 12:1) An linahidan na mga Kristiano kan enot na siglo pinarigon man an boot na ‘padagos na girumdomon an enot na mga aldaw’ asin an saindang tinagalan. (Hebreo 10:​32-34) Kumusta man an mga eksperyensia kan mga lingkod nin Dios sa presenteng mga panahon, arog kan isinasaysay sa Jehovah’s Witnesses​—Proclaimers of God’s Kingdom?a An mga kasaysayan dian asin sa iba pa na may dokumentadong ebidensia nagpapangyari sa sato na girumdomon kun paano tinabangan ni Jehova an saiyang banwaan na tagalan an mga pagprohibir, pagkabilanggo, pagsururog, asin mga kampo de konsentrasyon saka kampo nin patrabaho sa mga oripon. Nagkaigwa nin mga pagbalo sa kadagaan na nagkakabaranga huli sa guerra, arog kan Burundi, Liberia, Rwanda, asin kan dating Yugoslavia. Kan lumataw an oposisyon, an mga lingkod nin Dios nagtagal huli sa pagpapadanay sa makosog na relasyon ki Jehova. Sinuportaran kan saiyang kamot an mga ginibong pangenot sa saindang buhay an paggibo kan saiyang kabotan.

14. (a) Ano an sarong halimbawa kan pagsuportar nin Dios sa sarong tawo sa situwasyon na tibaad nakaaagid kan sa sato? (b) Ano an saindong nanonodan sa halimbawang iyan?

¹⁴ Minsan siring, tibaad an reaksion nindo dai pa kamo nakaeksperyensia nin siring kabangis na pagmaltrato, asin tibaad iniisip nindo na harayo sa posibilidad na iyan maeksperyensiahan nindo. Pero an pagsuportar nin Dios sa saiyang banwaan bako na perming sa tibaad ibilang nin nagkapira na dramatikong mga kamugtakan. Sinuportaran nia an dakol na “ordinaryong” tawo sa “normal” na mga kamugtakan. Uya an saro sana sa dakol na halimbawa: Namimidbid daw nindo an retrato na nasa itaas, asin tinatabangan daw kamo kaiyan na magirumdoman an mga tratamiento nin Dios sa saiyang banwaan? Iyan nagluwas sa An Torrengbantayan kan Disyembre 1, 1996. Nabasa daw nindo an pagkasaysay ni Penelope Makris? Kanigoan karahay na halimbawa nin Kristianong integridad! Nagigirumdoman daw nindo kun ano an tinagalan nia sa mga pagtaraed, kun paano nia linabanan an grabeng mga kamatean, asin kun anong mga paghihingoa an ginibo nia tanganing makapagdanay sa bilog na panahon na ministeryo? Kumusta an nakakokontento niang eksperyensia sa Mytilene? An punto, ibinibilang daw nindo an siring na mga halimbawa na mga pantabang para sa sato gabos sa pagdeterminar kan mga ipaoorog, na ineenot sa satong buhay an paggibo kan kabotan nin Dios?

15. Ano an nagkapira sa mga gibo ni Jehova na maninigo niatong horophoropon?

¹⁵ Nakapakokosog sa sato an paghorophorop sa mga aktibidad ni Jehova, arog kan ginibo ni David. Sa pag-otob sa saiyang katuyohan, si Jehova naggibo nin probisyon para sa kaligtasan paagi sa kagadanan, pagkabuhay liwat, asin pagkapamuraway kan saiyang Aki. (1 Timoteo 3:16) Saiyang inestablisar an saiyang langitnon na Kahadean, lininig sa kalangitan si Satanas asin an mga demonyo kaini, asin ibinalik an tunay na pagsamba digdi sa daga. (Kapahayagan 12:​7-​12) Itinogdok nia an espirituwal na paraiso asin binendisyonan nin pag-oswag an saiyang banwaan. (Isaias 35:​1-​10; 60:22) An saiyang banwaan nagtatao ngonyan nin pangultimong patotoo bago kan biglang pag-abot kan dakulang kahorasaan. (Kapahayagan 14:​6, 7) Iyo, dakol an puede niatong horophoropon.

16. Pinaririgon an satong boot na tawan nin atension an ano, asin ano an itinutudok kaini sa satong isip?

¹⁶ An danay niatong pagtao nin atension sa gibo kan mga kamot nin Dios imbes na magin preokupado sa mga paghihingoa nin tawo itinutudok sa satong isip an bagay na an iinaplikar na kapangyarihan ni Jehova dai malalabanan. Pero, an mga gibong iyan bako sanang an makangangalas na pisikal na mga paglalang sa kalangitan asin digdi sa ibabaw kan daga. (Job 37:​14; Salmo 19:​1; 104:24) An saiyang makangangalas na mga gibo kaiba an mga pagliligtas sa saiyang banwaan sa enemigong mga nan-aapi, arog kan ipinaheling sa mga eksperyensia kan saiyang piniling banwaan kan suanoy.​—Exodo 14:​31; 15:6.

Pakaaram kan Dalan na Dapat Lakawan

17. Gurano katunay ni Jehova para ki David, asin paano mapakokosog kaini an satong boot?

¹⁷ Si David nag-arang nin tabang ta tibaad mamara an alumaad kan saiyang buhay: “Binuka ko an sakuyang mga kamot sa saimo; an sakuyang kalag siring sa napapahang daga sa saimo. Paghumare, simbaga ako, O Jehova. Nakaabot na sa katapusan an sakong espiritu. Dai pagtagoa an saimong lalauogon sa sako, ta makaaagid ako sa mga minahilig sa kotkot.” (Salmo 143:​6, 7) Si David, na sarong parakasala, nakaaaram na aram nin Dios an saiyang situwasyon. (Salmo 31:7) Kun beses tibaad makamate man kita na an satong espirituwalidad maluya. Alagad ta bako man na dai nang esperansa an situwasyon. Si Jehova, na nagdadangog sa satong mga pamibi, tibaad parikason an satong pagbabalik paagi sa pagpaginhawa sa sato sa tabang nin mamomoton na kamagurangan, mga artikulo sa An Torrengbantayan, o mga kabtang sa pagtiripon na garo baga sinadya para sa sato.​—Isaias 32:​1, 2.

18, 19. (a) Ano an maninigo na odok niatong ipagngayongayo ki Jehova? (b) Sa ano kita makasisierto?

¹⁸ An tiwala niato ki Jehova nagpapahiro sa sato na magngayongayo sa saiya: “Padangogan sa sako an saimong mamomoton na kabootan, huli ta sa saimo ibinugtak ko an sakong pagtitiwala. Paaraman sa sako an dalan na maninigo kong lakawan.” (Salmo 143:8) Nasudya daw an paglaom sa saiya ni Tugang na Makris, na nagsosolo sa sarong isla sa Grecia? Kaya masusudya daw an paglaom nindo sa saiya mantang ginigibo nindong pangenot sa saindong buhay an paggibo kan saiyang kabotan? Boot kan Diablo asin kan saiyang mga ahente na olangon o biyong papondohon an satong gibohon na pagbalangibog kan Kahadean nin Dios. Baga man kita naglilingkod sa kadagaan na sa pankagabsan togot an tunay na pagsamba o kita naglilingkod sa lugar na iyan inoolang, an sararo niatong pamibi kaoyon kan kahagadan ni David: “Ligtasan ako sa sakong mga enemigo, O Jehova. Nagpaili ako sa saimo.” (Salmo 143:9) An katiwasayan niato tumang sa espirituwal na kalamidad depende sa pag-erok sa hilom na lugar kan Kaharohalangkawe.​—Salmo 91:1.

¹⁹ An marigon na pagtubod niato sa kun ano an pangenot may marigon na basehan. (Roma 12:​1, 2) Kun siring, labane an mga paghihingoa kan kinaban na ipirit sa saindo an pinaghohona kaiyan na mahalaga sa mga mukna nin tawo. Padagos na ipabanaag kan lambang aspekto kan saindong buhay an aram nindo na pangenot​—an paggibo kan kabotan nin Dios.​—Mateo 6:​10; 7:21.

20. (a) Ano an nanodan niato manongod ki David sa Salmo 143:​1-9? (b) Paano ipinababanaag kan mga Kristiano ngonyan an espiritu ni David?

²⁰ An enot na siyam na bersikulo kan Salmo 143 nagdodoon kan haraning personal na relasyon ni David ki Jehova. Kan napalilibotan nin mga enemigo, sia sueltong nagngayongayo sa Dios para sa paggiya. Biyo niang ipinahayag an nasa laog kan saiyang puso, na naghahagad nin tabang sa tamang dalan na lalakawan. Arog man kaiyan ngonyan an natatada sa mga linahidan nin espiritu digdi sa daga asin an saindang mga kadamaydamay. Ibinibilang nindang mahalagang marhay an saindang relasyon ki Jehova mantang sinda nagngangayongayo sa saiya para sa paggiya. Ineenot ninda an paggibo kan kabotan nin Dios, sa ibong nin mga ipinapapasan na sakit kan Diablo asin kan kinaban.

21. Taano ta mahalaga na kita magtao nin marahay na halimbawa tangani na matokdoan niato an iba kun ano an maninigong magin pangenot sa saindang buhay?

²¹ n minilyon na nag-aadal kan Biblia kaiba kan Mga Saksi ni Jehova kaipuhan na makamidbid na an paggibo kan kabotan nin Dios pangenot. Matatabangan niato sinda na masabotan ini kun pinag-oolayan an kapitulo 13 kan librong Kaaraman na Minagiya Pasiring sa Buhay na Daing Katapusan, na nagdodoon nin mga prinsipyo na kalabot sa pagigin makinuyog sa Tataramon.b Siempre, maninigo na maheling ninda sa sato an itinotokdo niato sa sainda. Pakalihis nin medyo halipot sanang panahon, maaaraman man ninda an dalan na maninigo nindang lakawan. Mantang an minilyon na ini personal na nakasasabot kun ano an maninigong magin pinakamahalaga sa saindang buhay, dakol an mapahihiro na gibohon an pagdusay asin bautismo. Pakatapos kaiyan, matatabangan sinda kan kongregasyon na padagos na maglakaw sa dalan nin buhay.

22. Anong mga hapot an pag-oolayan sa minasunod na artikulo?

²² Dakol an daing pag-alangan na inaadmitir na an kabotan nin Dios maninigo na magin pinakamahalaga sa saindang buhay. Pero paano progresibong tinotokdoan ni Jehova an saiyang mga lingkod na gibohon an saiyang kabotan? Ano an mga pakinabang na itinatao kaini sa sainda? An mga hapot na ini pag-oolayan, kaiba an pag-oolay sa sarong importanteng marhay na bersikulo, an Salmo 143:​10, sa minasunod na artikulo.

[Mga Nota sa Ibaba]

Ano an Saindong Simbag?

◻ Paagi sa pag-aplikar kan Filipos 1:​9, 10, paano niato maeestablisar an mga ipaoorog?

◻ Paano ipinaheling ni Jesus kun ano an pangenot sa saiyang buhay?

◻ Ano an manonodan niato sa mga gawe-gawe ni David kan sia nasa irarom nin pagbalo?

◻ Sa anong paagi na an Salmo 143:​1-9 nakatatabang sa sato ngonyan?

◻ Ano an maninigong magin pangenot sa satong buhay?

[Ritrato sa pahina 10]

An mga gawe-gawe ni David nagpatunay sa pagsarig nia ki Jehova

[Pasasalamat para sa pinagkuanan]

Rineprodusir hale sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s