“Umawon si Jah!”—Taano?

1-3. (a) Kasuarin minalataw na isinurat an Salmo 147? (b) Ano an manunudan ta sa pag-adal sa Salmo 147?

KUN mahusay na nagibo nin saro an asignasyon sa saiya o kun nagpahiling siya nin magayunon na Kristiyanong kuwalidad, angay sanang umawon siya. Kun totoo iyan sa mga tawo, mas lalo nang totoo iyan sa Diyos na Jehova. Dakulon nanggad kitang dahilan para umawon siya! Inuumaw ta siya dahil sa saiyang dakulang kapangyarihan, arog kan mahihiling sa makangangalas niyang mga linalang, o dahil sa hararom na pagkamuot niya sa katawuhan, na ipinahiling niya paagi sa pagtao kan saiya mismong Aki bilang atang na pantubos.

² An kagsurat kan ika-147 Salmo napahiro na umawon si Jehova. Dinagka man niya an iba na umiba sa saiya sa pag-umaw sa Diyos.—Basahon an Salmo 147:1, 7, 12.

³ Dai niyato aram kun siisay an nagsurat kan salmong ini, pero minalataw na an salmista nabuhay kaidtong panahon na ibinalik na ni Jehova an mga Israelita sa Jerusalem hali sa pagkadistiyero sa Babilonya. (Sal. 147:2) Inumaw kan salmista si Jehova huling an Saiyang banwaan makakasamba na giraray sa sadiri nindang lugar. Dangan, nagsambit siya nin iba pang mga dahilan para umawon si Jehova. Ano iyan? Ano an mga dahilan mo para magsabi ka man nin “Hallelujah!”?—Sal. 147:1, nota sa ibaba kan NW.

 4. Kan patalingkason ni Hading Ciro an bihag na mga Israelita, ano an siguradong namatian ninda, asin taano?

⁴ Isip-isipa an siguradong namatian kan mga Israelita kan bihag sinda sa Babilonya. Kinakantiyawan sinda kan mga nambihag sa sainda: ‘Awitan nindo kami nin saro kan mga awit nin Sion!’ Kan panahon na iyan, gaba an Jerusalem, an pinakadakulang dahilan ninda na mag-ugma huli ki Jehova. (Sal. 137:1-3, 6, BPVa) Magabat sa buot ninda na kumanta. Mamundo an puso ninda, asin kaipuhan ninda nin karangahan asin pampakusog. Pero, arog kan ihinula sa Tataramon nin Diyos, tinabangan sinda ni Jehova. Nadaog ni Hading Ciro kan Persia an Babilonya asin sinabi kaini: ‘Tinugon ako ni Jehova na ipatindog ko siya nin harong sa Jerusalem. Siisay sa saindo sa bilog niyang banwaan an taga duman, ibanan lugod siya ni Jehova na saiyang Diyos, asin tumukad siya.’ (2 Cron. 36:23) Nakakaranga nanggad ini para sa mga Israelitang nasa Babilonya!

 5. Ano an sinabi kan salmista dapit sa kapangyarihan ni Jehova na magpaumay?

⁵ Rinanga ni Jehova bako sana an bilog na nasyon nin Israel kundi pati man an lambang Israelita. Arog man kaiyan ngunyan. An salmista nagsurat dapit sa Diyos: ‘Binubulong niya an mga [nalugadan an] puso asin binubugkos an saindang mga lugad.’ (Sal. 147:3) Iyo, nagmamalasakit si Jehova sa mga nag-aagi nin problema—sa pisikal man o sa emosyon. Andam man si Jehova ngunyan na rangahon kita asin bawasan an namamatian niyatong kulog sa satong puso. (Sal. 34:18; Isa. 57:15) Tinatawan niya kita nin kadunungan asin kusog tanganing makayanan niyato an ano man na problemang puwedeng mag-abot.—Sant. 1:5.

 6. Ano an itinutukdo sa sato kan mga sinabi kan salmista sa Salmo 147:4? (Hilingon an ritrato sa kapinunan kan artikulo.)

⁶ Dangan, naghiling sa langit an salmista asin nagsabi na si Jehova ‘nakakabilang kan kabilangan nin mga bituon’ asin ‘an gabos na iyan inaapod niya sa saindang mga ngaran.’ (Sal. 147:4) Taano ta garo nag-iba na nin tema an salmista? Mga bagay na sa kalangitan an iniistorya niya. Pag-isipan ini: Nahihiling kan salmista an mga bituon, pero mayo siyang ideya kun gurano iyan kadakul. Sa paglihis nin mga taon, nagdakul na marhay an bilang kan mga bituon na puwede tang mahiling. Sinasabi kan mga siyentista na may binilyon na bituon sa galaksiya pa sana niyatong Milky Way. Asin posibleng may trinilyon na galaksiya sa uniberso! Dai talaga niyato mabibilang an mga bituon! Pero gabos iyan tinawan kan satong Kaglalang nin pangaran o apod. Buot sabihon, aram ni Jehova an pagkakaiba kan kada bituon. (1 Cor. 15:41) Kumusta pag-abot sa mga linalang niyang tawo sa daga? Aram nin Diyos kun yaon sain an lambang bituon sa ano man na oras, kaya siguradong aram man niya an dapit sa saimo bilang indibidwal—kun hain ka, kun ano an mismong namamatian mo, pati an espesipikong kaipuhan mo sa ano man na pagkakataon!

7, 8. (a) Ano an isinasaisip ni Jehova pag tinatabangan niya an saiyang mga lingkod na makabangon sa saindang mga pagbalo? (b) Magtao nin halimbawa na nagpapahiling kun gurano kamapagmalasakit ni Jehova sa bakong perpektong mga tawo.

⁷ Apuwera sa interesado sa sato si Jehova bilang indibidwal, may kapangyarihan man siya asin empatiya tanganing tabangan kita sa mga problema ta. (Basahon an Salmo 147:5.) Tibaad mamatian mong masakiton an sitwasyon mo asin garo dai mo na iyan makaya. Nasasabutan nin Diyos an mga limitasyon mo asin ‘ginigirumdom niya na ika kabo-kabo.’ (Sal. 103:14) Huling bako kitang perpekto, pauruutro tang nagigibo an mga salang nagibo ta na dati. Pinagbabasulan ta nanggad pag nakakasabi kita nin mga bagay na dai ta tinutuyo, pag nagkakaigwa kita nin salang mga pagmawot sa pana-panahon, o pag nakakamati kita nin pagkauri sa iba! Mayo nin ano man na kaluyahan si Jehova, pero nasasabutan niya kita nin lubos.—Isa. 40:28.

⁸ Tibaad naeksperyensiyahan mo na kun paano ka tinabangan kan makapangyarihan na kamot ni Jehova na makabangon sa partikular na pagbalo. (Isa. 41:10, 13) Halimbawa, an sarong payunir na sister na si Kyoko nadisganar na marhay kan magbalyo na siya sa bago niyang asignasyon. Paano ipinahiling ni Jehova na nasasabutan niya an mga problema ni Kyoko? Sa bago niyang kongregasyon, namatian ni Kyoko na napapalibutan siya nin mga tawong nasasabutan an namamatian niya. Pagmati niya sinasabi sa saiya ni Jehova: “Padaba taka bako sana ta payunir ka, kundi huli ta aki taka asin maimbod ka sako. Gusto kong magin maugma ka bilang saro sa mga Saksi ko!” Ika, paano man ipinahiling sa saimo kan Makakamhan sa Gabos na dai nanggad masusukol an saiyang pakasabot?

9, 10. Ano an pinakamahalagang tabang na itinatao ni Jehova? Magtao nin halimbawa.

⁹ Kaipuhan man niyato gabos an mga bagay na arog kan kakanon, bado, asin harong. Halimbawa, kun minsan puwedeng mahadit ka na tibaad kulangon an saindong kakanon. Pero, linalang ni Jehova an daga na may kakayahan na makaprodusir nin kakanon para sa gabos, dawa para sa mga siwo nin uwak na naghahagad kaiyan! (Basahon an Salmo 147:8, 9.) Kun an mga uwak ngani padagos niyang pinapakakan, makakapagtiwala ka na itatao man ni Jehova an materyal na mga pangangaipo mo.—Sal. 37:25.

¹⁰ An pinakamahalaga, itinatao ni Jehova an satong espirituwal na pangangaipo, kaya nagkakaigwa kita kan “katuninungan nin Diyos na nakakalabi sa gabos na pakasabot.” (Fil. 4:6, 7) Pag-isipan an halimbawa ni Mutsuo asin kan saiyang agom. Namatian ninda an nagsusustenir na kapangyarihan ni Jehova pagkatapos kan tsunami sa Japan kan 2011. Dikit-dikitan pa sindang magadan sa tsunami; marahay na sana ta nakasakat sinda sa atop kan harong ninda. Pero kan aldaw na iyan, nawara an haros gabos na pagsadiri ninda. Nagpalihis sinda nin banggi sa madiklom asin malipot na kuwarto sa ikaduwang iskalon kan haros gaba na nindang harong. Kan aga na, naghanap sinda nin espirituwal na pampakusog. An solamenteng nakua ninda iyo an librong 2006 Taunang Aklat ng mga Saksi ni Jehova. Nahiling tulos ni Mutsuo an subtemang “Mga Tsunami na Pinakamaraming Pinatay.” Manungod iyan sa sarong linog kan 2004 sa Sumatra na iyo an pigpunan kan pinakamapandestrosong mga tsunami na nairekord sa kasaysayan. Naghihibi si Mutsuo asin an saiyang agom mantang binabasa ninda an mga eksperyensiya. Namatian ninda an mamumuton na pag-ataman ni Jehova sa pagtao sa sainda kan espirituwal na pampakusog sa oras na kaipuhan ninda iyan. Mamumuton man na itinao ni Jehova an saindang materyal na mga pangangaipo. Nagtao nin mga kakanon asin bado an saindang mga tugang sa espirituwal. Pero an pinakanakapakusog sa sainda iyo an pagbisita sa saindang kongregasyon kan mga representante kan organisasyon nin Diyos. Sinabi ni Mutsuo: “Namatian ko na si Jehova kaiba kan kada saro sa sato asin na nagmamalasakit siya sato. Nakakaranga talaga iyan!” An inot na itinatao ni Jehova iyo an satong espirituwal na pangangaipo, dangan itinatao man niya an satong materyal na mga pangangaipo.

11. Ano an kaipuhan gibuhon kan mga gustong makinabang sa nagliligtas na kapangyarihan nin Diyos?

¹¹ Si Jehova pirming andam na ‘ilangkaw an mga [mahuyo].’ (Sal. 147:6a) Pero ano an kaipuhan tang gibuhon para makinabang kita sa tabang niya? Kaipuhan tang magkaigwa nin marahay na relasyon sa saiya. Para magkaigwa kaiyan, kaipuhan niyato na magin mahuyo. (Sof. 2:3) An mga tawong mahuyo naghahalat sa Diyos na iyo an magtanos kan ano man na sala asin maghali kan mga epekto kan mga salang nagibo sa sainda. Inuuyunan ni Jehova an arog kaiyan na mga indibidwal.

12, 13. (a) Tanganing makinabang sa tabang nin Diyos, ano an dapat niyatong likayan? (b) Anong klaseng mga tawo an inuuyunan ni Jehova?

¹² Sa ibong na lado, ‘ibinababa nin Diyos an tampalasan sagkod na dumuta sa daga.’ (Sal. 147:6b) Mapuwersa nanggad na mga tataramon ini! Tanganing makinabang sa maimbod na pagkamuot ni Jehova asin tanganing malikayan na mapaanggot siya, dapat niyatong ikaungis an mga ikinakaungis niya. (Sal. 97:10) Halimbawa, dapat niyatong kaungisan an imoralidad. Nangangahulugan iyan na dapat tang likayan an ano man na puwedeng magin dahilan na makagibo kita kaiyan, arog nin pornograpiya. (Sal. 119:37; Mat. 5:28) Bako iyan pasil, pero sulit nanggad an ano man na paghihinguwa niyato huling bendisyon ni Jehova an makakamtan ta.

¹³ Tanganing malabanan an satong salang mga pagmawot, dapat kitang manarig ki Jehova, bako sa sadiri ta. Mauugma daw siya kun hihinguwahon tang labanan iyan paagi sa “kusog kan kabayo,” na nanunungod sa mga sinasarigan kan mga tawo? Dai nanggad! Dai man kita dapat manarig sa “makusog na mga tabay nin tawo,” na garo baga kaya niyato sa sadiri tang kusog o sa tabang kan iba na labanan an satong salang mga pagmawot. (Sal. 147:10, NW) Imbes, dapat kitang dumulok ki Jehova asin makimahirak na tabangan kita. Bakong arog kan mga tawong parakonseho, dai magsasawa si Jehova sa pagdangog sa mga pakimahirak niyato, dawa kun pauruutro kitang naghahagad nin tabang sa saiya. ‘Nauugma si Jehova sa mga natatakot sa saiya, asin sa mga naghahalat kan saiyang pagkahirak.’ (Sal. 147:11) Makakapagtiwala kita na huli sa saiyang maimbod na pagkamuot, dai niya kita pababayaan asin tatabangan niya kitang madaog an satong salang mga pagmawot.

14. Ano an nakapakusog sa buot kan salmista?

¹⁴ Tinatawan kita ni Jehova nin basehan tanganing makumbinsir kita na tatabangan niya an saiyang mga lingkod kun nangangaipo sinda. May koneksiyon sa pagtugdok liwat kan Jerusalem, nagkanta an salmista dapit ki Jehova: ‘Pinasarig Niya si mga barat nin saimong mga tatâ, binendisyunan an mga aki mo diyan sa saimo. Ibinubugtak niya diyan sa kasagkuran mo an katuninungan.’ (Sal. 147:13, 14) Napakusog nanggad an buot kan salmista huling aram niya na papasarigon nin Diyos an mga tatâ kan siyudad asin kumbinsido siya na poprotektaran niya an saiyang mga parasamba!

15-17. (a) Ano an tibaad mamatian ta kun minsan dapit sa satong mga problema, pero paano ginagamit ni Jehova an saiyang Tataramon tanganing tabangan kita? (b) Magtao nin halimbawa kun paano ‘madaling minadalagan an tataramon nin Diyos.’

¹⁵ Tibaad may mag-abot na mga problema na puwedeng makapahadit sa saimo. Pero kaya kang tawan ni Jehova nin kadunungan tanganing makayanan iyan. Sinabi kan salmista dapit sa saiyang Diyos: ‘Ipinapadara niya an saiyang tataramon sa daga; [marikas na] minadalagan an saiyang tataramon.’ Dangan sinambit niya na si Jehova ‘nagtatao nin niyebe, nagwawarak nin mga ambon, asin nagpapauran nin mga yelo,’ dangan naghapot an salmista: ‘Siisay an makakatagal sa saiyang lipot?’ Idinagdag pa niya na si Jehova ‘minatao nin pagbuot asin an yelo natutunaw.’ (Sal. 147:15-18, BPV) An satong Diyos, na pinakamadunong asin pinakamakapangyarihan sa gabos saka nagkokontrol sa graniso asin niyebe, kaya kang tabangan na maatubang an ano man na magin problema mo.

¹⁶ Sa ngunyan, ginigiyahan kita ni Jehova paagi kan saiyang Tataramon, an Bibliya. Asin ‘madaling minadalagan an saiyang tataramon.’ Buot sabihon, yaon tulos an espirituwal na paggiya niya sa panahon na kaipuhan ta iyan. Isipa kun gurano ka nakikinabang sa pagbasa kan Bibliya, pag-adal kan mga publikasyon hali sa “maimbod asin mapagmansay na uripon,” paghiling sa JW Broadcasting, pagbukas kan jw.org, pakikipag-ulay sa mga elder, asin pakikiasosyar sa mga kapwa Kristiyano. (Mat. 24:45) Naeksperyensiyahan mo na daw kun gurano karikas na nagtao si Jehova nin paggiya sa saimo?

¹⁷ Naeksperyensiyahan ni Simone an kapangyarihan kan Tataramon nin Diyos. Hababaon kaidto an paghiling niya sa sadiri, nagduda pa ngani siya kun baga talagang maninigo siya sa pag-uyon nin Diyos. Pero, sa mga panahon na pinangluluyahan siya nin buot, nagmatiyaga siya sa pagpamibi, na hinahagad an tabang ni Jehova. Padagos man niyang pinag-adalan an Bibliya. Sinabi niya, “Mayo akong maisip na sitwasyon na diyan dai ko namatian an kusog asin paggiya ni Jehova.” Nakatabang iyan sa saiya na hinguwahon na magdanay na positibo sagkod na posible.

18. Taano ta masasabi mong biniyayaan ka nin Diyos, asin ano an mga dahilan mo tanganing “Umawon si Jah!”?

¹⁸ Aram kan salmista na espesyal para sa Diyos an saiyang suanoy na banwaan. Sa sainda sana itinao an “tataramon” nin Diyos pati an mga ‘katugunan asin paghukom’ Niya. (Basahon an Salmo 147:19, 20.) Sa ngunyan, dakulang onra niyato na kita sana sa daga an inaapod sa ngaran nin Diyos. Nagpapasalamat nanggad kita na midbid ta siya, na ginigiyahan kita kan saiyang Tataramon, asin na puwede kitang magkaigwa nin haraning relasyon sa saiya. Arog kan kagsurat kan Salmo 147, bako daw na dakulon kang dahilan tanganing “Umawon si Jah!” asin dagkahon man an iba na gibuhon iyan?