“Maglalakaw Ako sa Palibot kan Saimong Altar, O Jehova”

“HAHANAWAN ko an sakong mga kamot sa pagkainosente mismo, asin maglalakaw ako sa palibot kan saimong altar, O Jehova.” (Salmo 26:6) Paagi sa mga tataramon na ini ipinahayag ni Hadeng David kan suanoy an saiyang debosyon ki Jehova. Pero taano ta ‘maglalakaw sia sa palibot’ kan altar ni Jehova, asin sa anong sentido?

Para ki David, an sentro nin pagsamba ki Jehova iyo an tabernakulo patin an tubog sa tanso na altar nin atang kaiyan, na durante kan saiyang paghade yaon sa Gabaon, sa amihanan nin Jerusalem. (1 Hade 3:4) An altar mga 2.2 metro kuadrado sana, mas sadit na marhay kisa dakulaon na altar na itotogdok kaidto sa patyo kan templo ni Salomon.a Pero, ikinaogmang marhay ni David an tabernakulo patin an altar kaiyan, na iyo kaidto an sentro nin dalisay na pagsamba sa Israel.​​—Salmo 26:8.

An mga dolot na tinotong, atang para sa pakikikabtang, asin dolot para sa pagkakasala duman ginibo sa altar, asin an taonan na Aldaw nin Pagtubos igwa nin mga atang na idinolot para sa nasyon. An altar asin an mga atang dian igwa nin kahulogan para sa mga Kristiano ngonyan. Ipinaliwanag ni apostol Pablo na an altar nagrepresentar sa kabotan nin Dios, na sono dian inako Nia an angay na atang para sa pagkabalukat nin katawohan. Si Pablo nagsabi: “Huli kan nasabing ‘kabotan’ kita nasantipikar paagi sa pagdolot kan hawak ni Jesu-Cristo nin sararoan sana.”​—Hebreo 10:​5-10.

Kun malingkod na sa altar, an mga saserdote pinagkatodan nang maghanaw kan saindang mga kamot sa tubig tanganing maglinig kan saindang sadiri. Angay nanggad kun siring, si Hadeng David naghanaw kan saiyang kamot “sa pagkainosente mismo” bago ‘naglakaw sa palibot kan altar.’ Sia naghiro “na may integridad sa puso asin may pagkatanos.” (1 Hade 9:4) Kun dai sia naghanaw kan saiyang kamot sa paaging ini, an saiyang pagsamba​—an saiyang ‘paglakaw sa palibot kan altar’​—dai kutana inako. Siempre, si David bakong Levita asin mayo kan pribilehio na gumibo kan paglilingkod nin saserdote sa altar. Minsan ngani sarong hade, sia dai ngani tinogotan na lumaog sa patyo kan tabernakulo. Pero, bilang fiel na Israelita, kinuyog nia an Ley ni Moises asin regular na nagdara kan saiyang mga dolot tangani na ipresentar sa altar. Sia naglakaw sa palibot kan altar sa sentido na isentro nia an saiyang buhay sa dalisay na pagsamba.

Puede daw niatong arogon ngonyan an halimbawa ni David? Iyo. Puede man kitang maghanaw kan satong mga kamot sa pagkainosente asin maglakaw sa palibot kan altar nin Dios kun kita naggigibo nin pagtubod sa atang ni Jesus asin, ‘inosente sa kamot asin malinig sa puso,’ bilog na pusong naglilingkod ki Jehova.​—Salmo 24:4.

[Nota sa Ibaba]

[Ritrato sa pahina 23]

Ilinadawan kan altar an kabotan ni Jehova, na paagi kaiyan inaako nia an tamang atang para sa pagbalukat kan katawohan