Maglakaw sa Dalan nin Integridad

“Para sa sako, maglalakaw ako sa sakong integridad.”​—SALMO 26:11.

1, 2. (a) Taano ta an integridad nin tawo sarong mahalagang kabtang kan isyu manongod sa soberaniya nin Dios? (b) Paano ikakapaheling kan madonong na mga linalang na kinakampihan ninda an soberaniya ni Jehova?

KAN si Satanas magrebelde sa tatamnan nin Eden, ibinangon nia an unibersal na isyu kun baga makatanosan an soberaniya nin Dios sa gabos Niang linalang. Kan huri, ginibo niang isyu na paglilingkodan sana kan mga tawo an Dios basta an paggibo kaini magtataong bentaha sa sainda. (Job 1:9-11; 2:4) Sa siring, an integridad nin tawo nagin mahalagang kabtang kan isyu nin unibersal na soberaniya ni Jehova.

² Minsan ngani an soberaniya nin Dios dai nakadepende sa integridad kan saiyang mga linalang, puedeng ipaheling kan mga tawo asin espiritung mga aki nin Dios kun kiisay sinda minakampi sa isyung ini. Paano? Paagi sa pagsunod o dai pagsunod sa dalan nin integridad. Kun siring, an integridad nin indibiduwal puedeng magin marigon na basehan sa paghokom sa saiya.

 3. (a) Ano an gustong ipasiyasat asin pahokoman ni Job asin David ki Jehova? (b) Anong mga hapot an minalataw manongod sa integridad?

³ Si Job may kompiansang nagsabi: “Titimbangon [ako ni Jehova] sa eksaktong timbangan asin maaaraman nin Dios an sakuyang integridad.” (Job 31:6) Integridad an hinagad ni Hadeng David kan suanoy na Israel na siyasaton ni Jehova kan sia namibi: “Hokomi ako, O Jehova, huli ta ako mismo naglakaw sa sakong integridad, asin ako nanarig ki Jehova, tanganing dai ako magrupaydupay.” (Salmo 26:1) Mahalagang marhay nanggad na kita man maglakaw sa dalan nin integridad! Alagad ano an integridad, asin ano an kahulogan nin paglakaw sa dalan na iyan? Ano an makakatabang sa sato na magdanay na may integridad?

‘Naglakaw Ako sa Sakong Integridad’

 4. Ano an integridad?

⁴ An integridad nangangahulogan nin pagigin tanos, daing katuyawan, matanos, asin daing sala. Minsan siring, bako sanang paggibo nin tama an kalabot sa integridad. Iyan moral na karahayan o pagigin bilog kan debosyon nin puso sa Dios. Kinuestion ni Satanas an mga motibo ni Job kan sabihon nia sa Dios: “Alagad ta, unata tabi an saimong kamot asin dotdota sagkod an . . . tolang asin an . . . laman [ni Job] patin helinga kun baga dai ka nia sumpaon nin atubangan.” (Job 2:5) Apuera sa tamang paghiro, an integridad naghahagad nin tamang motibasyon nin puso.

 5. Ano an nagpapaheling na an pagdadanay na may integridad dai naghahagad nin pagkasangkap sa kabtang niato?

⁵ Minsan siring, an pagdadanay na may integridad dai naghahagad nin pagkasangkap. Si Hadeng David bakong sangkap asin nakagibo nin nagkapirang magabat na sala kan sia nabubuhay. Pero sinasabi kan Biblia na sia sarong tawo na naglakaw “na may integridad sa puso.” (1 Hade 9:4) Taano? Huli ta namotan ni David si Jehova. An saiyang puso dusay sa Dios. Gikan sa boot niang inadmitir an saiyang mga sala, inako an pagsagwe, asin itinanos an saiyang mga dalan. Tunay nanggad, an integridad ni David naheling sa saiyang bilog na pusong debosyon asin pagkamoot sa saiyang Dios, si Jehova.​—Deuteronomio 6:​5, 6.

6, 7. Ano an kalabot sa paglakaw sa integridad?

⁶ An integridad bakong limitado sa sarong aspekto nin paggawe nin tawo, arog baga nin relihiosong debosyon. Kaiba dian an bilog niatong pamumuhay. Si David “naglakaw” sa saiyang integridad. “An berbong ‘lakaw’ nangangahulogan nin ‘klase nin pamumuhay’ o ‘estilo nin pamumuhay,’” an sabi kan The New Interpreter’s Bible. Nagtataram manongod sa mga “daing sala sa saindang dalan,” an salmista nag-awit: “Maogma an mga nag-ootob sa . . . mga pagirumdom [nin Dios]; sa bilog na puso sia padagos na hinahanap ninda. Tunay nanggad na sinda dai naggibo nin bakong matanos. Sa saiyang mga dalan naglakaw sinda.” (Salmo 119:1-3) An integridad naghahagad nin dayaday na pagsiyasat na gibohon an kabotan nin Dios asin paglakaw sa saiyang dalan.

⁷ An paglakaw sa integridad naghahagad nin maimbod na debosyon sa Dios, dawa sa bakong marahay na mga kamugtakan. Kun tinatagalan ta an mga pagbalo, nagdadanay kita na marigon sa ibong nin mga kasakitan, o linalabanan ta an mga sugot hale sa maraot na kinaban, nagigin risang-risa an satong integridad. ‘Pinapagayagaya niato an puso ni Jehova’ huli ta may ikakasimbag sia sa saro na nagduduhagi sa saiya. (Talinhaga 27:11) Kun siring, may marahay na dahelan, puede kitang magdesisyon nin arog ni Job: “Sagkod na ako magadan dai ko hahaleon sa sakuyang sadiri an sakuyang integridad!” (Job 27:5) Ipinapaheling kan ika-26 na Salmo kun ano an makakatabang sa sato na maglakaw sa integridad.

“Dalisaya an Sakong mga Bato Asin an Sakong Puso”

 8. Ano an nanonodan nindo sa pakiolay ni David na siyasaton ni Jehova an saiyang mga bato asin an saiyang puso?

⁸ Si David namibi: “Siyasata ako, O Jehova, asin baloa ako; dalisaya an sakong mga bato asin an sakong puso.” (Salmo 26:2) An mga bato nasa kalaoglaogi kan hawak. Sa piguratibong pagtaram, an mga bato nagrerepresentar sa kalaoglaoging mga kaisipan asin emosyon. Asin an piguratibong puso iyo an bilog na panlaog na persona​—an saiyang motibasyon, mga saboot, asin intelihensia. Kan makiolay si David na siyasaton sia ni Jehova, ipinamibi nia na pakasiyasaton an saiyang kalaoglaoging mga kaisipan asin saboot.

 9. Sa anong paagi dinadalisay ni Jehova an satong piguratibong mga bato asin puso?

⁹ Nakiolay si David na dalisayon an saiyang mga bato asin an saiyang puso. Paano dinadalisay ni Jehova an satong panlaog na pagkatawo? Si David nag-awit: “Oomawon ko si Jehova, na nagtao sa sako nin hatol. Sa katotoohan, sa mga banggi itinatanos ako kan sakong mga bato.” (Salmo 16:7) Ano an kahulogan kaiyan? Nangangahulogan iyan na an konseho nin Dios nakataros sa kalaoglaoging pagkatawo ni David asin nagdanay duman, na itinatanos an saiyang kalaoglaoging mga kaisipan asin emosyon. Puede man iyan na mangyari sa sato kun may pag-apresyar niatong hohorophoropon an konseho na inaako niato paagi sa Tataramon nin Dios, sa saiyang mga representante, asin sa saiyang organisasyon asin tinotogotan iyan na magdanay sa kalaoglaogi niato. An regular na pamimibi ki Jehova na dalisayon kita sa paaging ini makakatabang sa sato na maglakaw sa integridad.

‘An Saimong Mamomoton na Kabootan Nasa Atubangan Ko’

10. Ano an nakatabang ki David na maglakaw sa katotoohan nin Dios?

¹⁰ “An saimong mamomoton na kabootan nasa atubangan kan sakuyang mga mata,” an sabi pa ni David, “asin ako naglakaw sa saimong katotoohan.” (Salmo 26:3) Aram na aram ni David an mga gibo nin mamomoton na kabootan nin Dios, asin may pag-apresyar niang hinorophorop iyan. “Omawa si Jehova, O kalag ko,” an inawit nia, “asin dai mo paglingawan an gabos na saiyang ginibo.” Ginigirumdom an saro sa mga “ginibo” nin Dios, nagpadagos si David: “Si Jehova naggigibo nin mga akto nin katanosan asin nin hudisyal na mga desisyon para sa gabos na tinitikas. Ipinamidbid nia an saiyang mga dalan ki Moises, an saiyang mga gibo pati sa mga aki ni Israel.” (Salmo 103:​2, 6, 7) Iniisip gayod ni David an paninikas sa mga Israelita kan mga Egipcio kan kaaldawan ni Moises. Kun siring kaiyan, an paghorophorop kun paano ihinayag ni Jehova ki Moises an saiyang mga paagi nin pagliligtas siertong nakapahiro sa puso ni David asin nakapakosog sa saiyang determinasyon na maglakaw sa katotoohan nin Dios.

11. Ano an makakatabang sa sato na maglakaw sa dalan nin integridad?

¹¹ An regular na pag-adal kan Tataramon nin Dios asin paghorophorop kan satong nanonodan dian makakatabang man sa sato na maglakaw sa dalan nin integridad. Halimbawa, an paggirumdom na dinulagan ni Jose an inmoral na mga pan-aakit kan agom ni Potifar siertong maparigon sa satong boot na dulagan an kaagid na mga pan-aakit sa satong pinagtatrabawohan, sa eskuelahan, o sa iba pang lugar. (Genesis 39:7-12) Kumusta man kun kita nasusugotan kan mga oportunidad na magkaigwa nin materyal na prosperidad o pagkaprominente asin kapangyarihan sa sekular na kinaban? Igwa kita kan halimbawa ni Moises, na hinaboan an kamurawayan kan Egipto. (Hebreo 11:24-26) An paggirumdom sa pakatagal ni Job daing duda na makakatabang sa sato na pakosogon an satong desisyon na magdanay na maimbod ki Jehova sa ibong nin mga helang asin remalaso. (Santiago 5:11) Kumusta man kun kita magin biktima nin paglamag? Tara, an paggirumdom sa eksperyensia ni Daniel sa lungib nin mga leon makakatao sa sato nin kosog nin boot!​—Daniel 6:16-22.

“Dai Ako Nagtukaw sa Kaibanan nin mga Tawong Putikon”

12, 13. Anong klaseng pag-iriba an maninigo niatong likayan?

¹² Nagtataram manongod sa saro pang bagay na nakapakosog sa saiyang integridad, si David nagsabi: “Dai ako nagtukaw sa kaibanan nin mga tawong putikon; asin dai man ako naglaog sa kaibanan kan mga nagtatago kan saindang tunay na pagkatawo. Ikinaongis ko an kongregasyon nin mga maraot, asin dai ako minatukaw sa kaibanan nin mga tampalasan.” (Salmo 26:​4, 5) Si David dai talaga matukaw sa kaibanan nin mga maraot. Ikinaongis nia an maraot na pag-iriba.

¹³ Kumusta man kita? Nagsasayuma daw kitang tumukaw sa kaibanan nin mga tawong putikon paagi sa mga programa sa telebisyon, video, pelikula, Internet site, o iba pang paagi? Minarayo daw kita sa mga nagtatago kan saindang tunay na pagkatawo? An nagkapira sa eskuelahan o sa satong pinagtatrabawohan tibaad magsagin na katood niato huli sa tusong mga katuyohan. Gusto daw talaga niatong makipagdayupot sa mga dai naglalakaw sa katotoohan nin Dios? Minsan ngani naghihingako na sinda sinsero, tibaad itago man kan mga apostata an saindang motibo na irayo kita sa paglilingkod ki Jehova. Kumusta kun may nagkapira sa Kristianong kongregasyon na igwa nin duwang klaseng buhay? Itinatago man ninda an saindang tunay na pagkatawo. Si Jayson, na naglilingkod ngonyan bilang ministeryal na lingkod, nagkaigwa nin siring kaiyan na mga katood kan sia hoben pa. Manongod sa sainda, sia nagsabi: “Sarong aldaw an saro sa sainda nagsabi sako: ‘Bakong mahalaga kun ano an ginigibo niato ngonyan huli ta pagdatong kan bagong sistema, magagadan man sana kita. Dai na niato maaaraman kun ano an nalipasan niato.’ An mga tataramon na iyan nagserbing pampagimata sako. Habo kong magadan pag-abot kan bagong sistema.” Madonong na pinutol ni Jayson an saiyang pakikiiba sa siring na mga indibiduwal. “Dai kamo palagalag,” an patanid ni apostol Pablo. “An maraot na pag-iriba nakakaraot sa marahay na mga ugale.” (1 Corinto 15:33) Mahalagang marhay nanggad na likayan niato an maraot na pag-iriba!

‘Ipapahayag Ko an Gabos Mong Makangangalas na mga Gibo’

14, 15. Paano kita ‘makakalakaw sa palibot kan altar ni Jehova’?

¹⁴ “Hahanawan ko an sakong mga kamot sa pagkainosente mismo, asin maglalakaw ako sa palibot kan saimong altar, O Jehova,” an sabi pa ni David. Taano? “Tanganing ikapadangog nin makosog an pagpasalamat, asin tanganing ipahayag an gabos mong makangangalas na mga gibo.” (Salmo 26:​6, 7) Gusto ni David na magdanay na malinig sa moral tanganing masamba nia si Jehova asin ipahayag an saiyang debosyon sa Dios.

¹⁵ An gabos na bagay na konektado sa tunay na pagsamba sa tabernakulo asin kan huri sa templo “sarong tipikong representasyon asin anino kan langitnon na mga bagay.” (Hebreo 8:5; 9:23) An altar naglaladawan sa kabotan ni Jehova sa pag-ako kan atang ni Jesu-Cristo para sa pagbalukat sa katawohan. (Hebreo 10:5-10) Hinahanawan niato an satong mga kamot sa pagkainosente asin ‘naglalakaw sa palibot kan altar ni Jehova’ paagi sa pagtubod niato sa atang na iyan.​—Juan 3:16-18.

16. Paano kita nakikinabang sa pagpahayag sa iba kan makangangalas na mga gibo nin Dios?

¹⁶ Kun iniisip niato an manongod sa gabos na nagin posible huli sa atang, bako daw na an satong puso napapano nin pagpasalamat ki Jehova asin sa saiyang bugtong na Aki? Kun siring, may pagpasalamat sa satong puso, ipahayag niato sa iba an makangangalas na mga gibo nin Dios​—poon sa paglalang kan tawo sa tatamnan nin Eden sagkod sa lubos na pagbabalik sa dati kan gabos na bagay sa bagong kinaban nin Dios. (Genesis 2:7; Gibo 3:21) Asin espirituwal na proteksion nanggad an paghuhulit kan Kahadean asin paggibo nin disipulo! (Mateo 24:14; 28:​19, 20) An pagigin sibot dian nakakatabang sa sato na papagdanayon na maliwanag an satong paglaom sa ngapit, makosog an satong pagtubod sa mga panuga nin Dios, asin buhay an satong pagkamoot ki Jehova asin sa mga kapwa tawo.

“Namotan Ko an Erokan sa Saimong Harong”

17, 18. Ano an maninigong magin aktitud niato sa Kristianong mga pagtiripon?

¹⁷ An tabernakulo, kaiba an altar kaiyan para sa mga atang, iyo an sentro nin pagsamba ki Jehova sa Israel. Ipinapahayag an saiyang dakulang kaogmahan sa lugar na iyan, si David namibi: “Jehova, namotan ko an erokan sa saimong harong asin an lugar na namumugtakan kan saimong kamurawayan.”​—Salmo 26:8.

¹⁸ Namomotan daw niato na magtiripon sa lugar na dian kita nakakanood manongod ki Jehova? An lambang Kingdom Hall kaiba an regular na programa kaiyan sa espirituwal na pagtotokdo nagseserbing sentro kan tunay na pagsamba sa komunidad. Dugang pa, igwa kita nin taonan na mga kombension, mga pansirkitong asamblea, asin mga aldaw nin espesyal na asamblea. An “mga pagirumdom” ni Jehova tinotokar sa mga pagtiripon na iyan. Kun manonodan ta na ‘kamotan iyan nin labi-labi,’ gugustohon tang marhay na atenderan an mga pagtiripon asin kita mag-aatento mantang yaon dian. (Salmo 119:167) Nakakarepresko nanggad na makaibanan an mga kapagtubod na interesado sa satong personal na ikakarahay asin nagtatabang sa sato na danay na maglakaw sa integridad!​—Hebreo 10:​24, 25.

‘Dai Mo Pagkuanon an Sakong Buhay’

19. Sa anong mga kasalan habo ni David na makua siang may sala?

¹⁹ Huling aram na marhay an mga resulta nin pagsuki hale sa katotoohan nin Dios, si David nakimaherak: “Dai mo pagkuanon an sakong kalag sa kaibanan nin mga parakasala, ni an sakong buhay sa kaibanan nin mga tawong may pagkakasala sa dugo, na sa saindang mga kamot igwa nin malaswang gawe, asin an toong kamot pano nin soborno.” (Salmo 26:​9, 10) Habo ni David na mapabilang sa maraot na mga tawo na nagkasala nin malaswang gawe o pagsoborno.

20, 21. Ano an puedeng gumiya sato na lumakaw sa dalan nin mga maraot?

²⁰ An kinaban ngonyan sanop nin inmoral na mga gibo. Ineenkaminar nin telebisyon, mga magasin, asin pelikula an malaswang gawe​—“pagigin sobra kainmoral; karigsokan; daing supog na gawe.” (Galacia 5:​19, nota sa ibaba) An nagkapira napaoripon sa pornograpiya, na sa parate nagbubunga nin inmoral na gawe-gawe. An mga hoben nangorognang madaling mabiktima kan siring na mga impluwensia. Sa nagkapirang kadagaan, nakaugalean na an pakiki-date, asin an mga tinedyer naiimpluwensiahan na maniwala na kaipuhan nindang makipag-date. Dakol na hoben an nagkakaginustohan, minsan ngani hoben pa sindang marhay tanganing mag-agom. Tanganing panigoan an saindang seksuwal na mga horot na namamatean nindang orog na nagkokosog, dai nahahaloy napapalabot sinda sa inmoral na gawe-gawe sagkod na makakomiter nin pakikisaro.

²¹ An mga nasa edad na bakong libre sa maraot na mga impluwensia. An madayang mga gibo sa negosyo asin an tendensiang magdesisyon basado sa paslong mga motibo nagpaparisa nin kadaihan nin integridad. An paglakaw sa mga dalan kan kinaban irarayo sana kita ki Jehova. “Kaongisan [ta] an maraot, asin kamotan [ta] an marahay” asin padagos na maglakaw sa dalan nin integridad.​—Amos 5:15.

“O Tubosa Ako Asin Pahelingi Ako nin Pabor”

22-24. (a) Anong pamparigon sa boot an manonompongan nindo sa pantapos na mga tataramon sa Salmo 26? (b) Anong siod an totokaron sa sunod na artikulo?

²² Tinapos ni David an saiyang kapahayagan sa Dios, na nagsasabi: “Para sa sako, maglalakaw ako sa sakong integridad. O tubosa ako asin pahelingi ako nin pabor. An sakuyang bitis matindog nanggad sa sarong patag na lugar; sa tahaw kan nagkakasararong mga kadaklan oomawon ko si Jehova.” (Salmo 26:​11, 12) An determinasyon ni David na papagdanayon an saiyang integridad sinabayan kan saiyang pakimaherak na sia tuboson. Kanigoan kanakakaparigon kaiyan! Sa ibong kan satong makasalan na kamugtakan, tatabangan kita ni Jehova kun kita determinadong maglakaw sa dalan nin integridad.

²³ An sato logod na paagi nin pamumuhay magpaheling na iginagalang asin pinapahalagahan niato an soberaniya nin Dios sa gabos na aspekto kan satong buhay. An lambang saro sato puedeng mapagngayongayong hagadon ki Jehova na siyasaton asin dalisayon an satong kalaoglaoging mga kaisipan asin saboot. Puede niatong papagdanayon na nasa atubangon niato an saiyang katotoohan paagi sa mahigos na pag-adal kan saiyang Tataramon. Kun siring, likayan nanggad niato an maraot na pag-iriba alagad omawon si Jehova sa tahaw kan nagkakasararong mga kadaklan. Kita logod maigot na makikabtang sa paghuhulit kan Kahadean asin paggibo nin mga disipulo, na dai noarin man tinotogotan an kinaban na isapeligro an satong mahal na marhay na relasyon sa Dios. Mantang ginigibo niato an satong pinakamakakaya sa paglakaw sa dalan nin integridad, puede kitang magin kompiado na papahelingan kita nin pabor ni Jehova.

²⁴ Huling kalabot sa integridad an gabos na aspekto nin buhay, kaipuhan tang maaraman an sarong nakakagadan na siod​—an pag-abuso sa inomon na de alkohol. Totokaron ini sa sunod na artikulo.

Nagigirumdoman daw Nindo?

• Taano ta an intelihenteng mga linalang puedeng tama sanang hokoman basado sa saindang integridad?

• Ano an integridad, asin ano an kalabot sa paglakaw sa dalan na iyan?

• Ano an makakatabang sa sato na maglakaw sa dalan nin integridad?

• Tanganing magdanay na may integridad, anong mga peligro an dapat na maaraman asin likayan ta?

[Ritrato sa pahina 14]

Regular daw nindong hinahagad ki Jehova na siyasaton an saindong kalaoglaoging mga kaisipan?

[Ritrato sa pahina 14]

Pinapagdanay daw nindo an mga gibo nin mamomoton na kabootan ni Jehova sa atubangan kan saindong mga mata?

[Mga Ritrato sa pahina 15]

An satong pagdadanay na may integridad sa ibong nin mga pagbalo nagpapagayagaya sa puso ni Jehova

[Mga Ritrato sa pahina 17]

Inaaprobetsaran daw nindo an mga probisyon ni Jehova tanganing tabangan kamo na maglakaw sa dalan nin integridad?