Gibohon na Saindong Kasarigan an Daing Katapusan na Takyag ni Jehova

“An Dios na daing sagkod iyo an saimong erokan, asin sa irarom an daing katapusan na mga takyag.”—DEUTERONOMIO 33:27, American Standard Version.

1, 2. Taano an banwaan ni Jehova ta makakalaom sa saiyang takyag?

SI Jehova nagmamakolog sa saiyang banwaan. Tara, sa bilog na panahon kan kasakitan kan mga Israelitas, “sia nasakitan man”! Huli sa pagkamoot asin pagkaherak, “inalsa nia sinda asin kinarga sinda.” (Isaias 63:7-9) Kaya kun kita maimbod sa Dios, malalaoman niato an saiyang tabang.

² Si propeta Moises nagsabi: “Pailihan an Dios kan suanoy na panahon, asin nasa irarom an daing katapusan na mga takyag.” (Deuteronomio 33:27) Sabi nin saro pang traduksion: “An Dios na daing sagkod iyo an saimong erokan, asin sa irarom an daing katapusan na mga takyag.” (American Standard Version) Alagad ta paano an mga takyag nin Dios nagtabang sa saiyang mga lingkod?

Taano ta Kadakol na Kasakitan?

 3. Noarin lubos na kakamtan kan makinuyog na katawohan an “mamuraway na katalingkasan kan mga aki nin Dios”?

³ An paglilingkod ki Jehova dai nagseserbing kalasag sato sa mga kasakitan na uso sa mga tawong bakong sangkap. An lingkod nin Dios na si Job nagsabi: “An tawo, na namundag sa babae, halipot an buhay asin pano nin kasakitan.” (Job 14:1) Kun manongod sa ‘mga aldaw nin satong mga taon,’ an salmista nagsabi: “An saindang pagdadanay nasa kasakitan asin makolog na mga bagay.” (Salmo 90:10) An buhay siring sagkod na ‘an linalang butasan na hale sa kaoripnan nin kalapaan asin magkaigwa kan mamuraway na katalingkasan kan mga aki nin Dios.’ (Roma 8:19-22) Iyan mangyayari sa Sangribong Taon na Paghade ni Cristo. Basado sa pantubos na atang ni Jesus, an mga tawong sakop kan Kahadean makakalda na sa kasalan asin kagadanan. Sa katapusan kan Milenyo, natabangan na ni Cristo asin kan kairiba niang hade-saserdote an makinuyog na katawohan na makaabot sa pagkasangkap, asin an mga maimbod sa Dios sa ultimong pagbalo ni Satanas asin kan saiyang mga demonyo isusurat nin permanente an ngaran sa “libro nin buhay.” (Kapahayagan 20:12-15) Dangan lubos nindang kakamtan an mamuraway na katalingkasan kan mga aki nin Dios.

 4. Imbes na magreklamo sa kamugtakan niato sa buhay, ano an maninigo niatong gibohon?

⁴ Mientras tanto, imbes na magreklamo manongod sa kamugtakan niato sa buhay, manarig kita ki Jehova. (1 Samuel 12:22; Judas 16) Pasalamatan man niato an satong Halangkaw na Saserdote, si Jesus, na paagi sa saiya kita makakadolok sa Dios “tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.” (Hebreo 4:14-16) Nungka na kita umarog ki Adan. Garo man sana pinagsahotan nia si Jehova na tinawan sia nin maraot na agom, na sinasabi: “An babae na itinao mo tanganing makaibanan ko, sia an nagtao sa sako nin bunga gikan sa kahoy kaya kuminakan ako.” (Genesis 3:12) An Dios nagtatao nin marahay na mga bagay asin dai nagtatao sato nin mga kasakitan. (Mateo 5:45; Santiago 1:17) An mga kasakitan sa parate bunga kan kakulangan niato nin kadonongan o kan mga sala nin iba. Tibaad iyan umabot man sato huli ta kita makasalan asin nabubuhay sa kinaban na nasa kapangyarihan ni Satanas. (Talinhaga 19:3; 1 Juan 5:19) Pero, an daing katapusan na mga takyag ni Jehova perming nagtatabang sa saiyang maimbod na mga lingkod na mapagngayongayong nagsasarig sa saiya asin personal na nag-aaplikar kan hatol kan saiyang Tataramon.—Salmo 37:5; 119:105.

Inaataman sa Panahon nin Helang

 5. Anong pampakosog an manonompongan nin mga may helang sa Salmo 41:1-3?

⁵ An helang nagtatao sa kadaklan sa sato nin kasakitan kun minsan. Pero, si David nagsabi: “Maogma an siisay man na minahirong may konsiderasyon sa dukha; sa aldaw nin kapahamakan si Jehova magtatao sa saiya nin dudulagan. Si Jehova an magbabantay sa saiya asin magliligtas sa saiya. Sia ipahahayag na maogma sa daga; asin dai mo sia ikatatao sa kalag kan saiyang mga kaiwal. Si Jehova mismo magpapakosog sa saiya sa ibabaw nin sopa nin kahelangan; an gabos niang higdaan sasalidahan mo sa panahon kan saiyang paghelang.”—Salmo 41:1-3.

6, 7. Paano tinabangan nin Dios si David kan sia naghehelang, asin paano ini makapakokosog sa mga lingkod ni Jehova ngonyan?

⁶ An tawong makonsiderasyon nagtatabang sa nangangaipo. An “aldaw nin kapahamakan” puwedeng ano man na kapahapahamak na okasyon o haloy na kasakitan na nagpapaluya sa saro. Sia nagsasarig sa Dios na babantayan sia sa panahon nin helang, asin an iba ‘ipinahahayag siang maogma sa daga’ paagi sa pagpalakop kan bareta manongod sa maheherakon na mga ginibo ni Jehova sa saiya. Pinakosog nin Dios si David “sa ibabaw nin sopa nin kahelangan,” tibaad kaidtong nakahahadit na panahon na pinag-aaagaw kan aki ni David na si Absalom an trono sa Israel.—2 Samuel 15:1-6.

⁷ Mantang si David nagpaheling nin konsiderasyon sa dukha, sa paghona nia aatamanon sia nin Dios mantang sia daing maginibo sa higdaan. (Salmo 18:24-26) Minsan ngani grabe an helang, sia nagsarig na an Dios ‘sasalidahan an saiyang higdaan,’ bakong paagi sa milagrosong paghale sa helang, kundi sa pagpakosog sa saiya paagi sa nakararangang mga kaisipan. Garo baga liniliwat ni Jehova an saiyang higdaan hale sa higdaan nin helang na magin higdaan nin pagkaomay. Siring man, kun kita naghelang bilang mga lingkod nin Dios, aatamanon kita kan daing katapusan na mga takyag ni Jehova.

Ranga sa May Depresyon

 8. Paano ipinaheling nin sarong may helang na Kristiano an saiyang pagsarig sa Dios?

⁸ An helang puwedeng gikanan nin mental depresyon. An sarong Kristianong may magabat na helang, na kun beses dai nang kosog pati sa pagbasa, nagsasaysay: “Ini nagpapamate sako nin depresyon, pakamate na ako dai nang halaga, asin napapahibi pa ngani ako.” Sa pakaaram na gusto ni Satanas na ronoton sia paagi sa panluluya mismo kan saiyang boot, sia nakikilaban, sa pakaaram na sa tabang ni Jehova dai sia masusudya. (Santiago 4:7) An tawong ini nakapakokosog sa iba na nakaaaram na sia nagsasarig sa Dios. (Salmo 29:11) Dawa nasa ospital, inaapodan nia sa telepono an mga may helang asin iba pa sa pagpakosog sa sainda sa espirituwal. Sia mismo napakokosog kan pagdangog sa mga rekording nin mga awit na pan-Kahadean asin nin mga artikulo sa magasin na ini saka sa kapadis na magasin kaiyan na Magmata! asin pakikiasosyar sa mga kapwa Kristiano. An tugang na ini nagsasabi: “Ako regular na nakikipag-olay ki Jehova sa pamibi, na inaarang sa saiya na tawan ako nin kosog, paggiya, ranga, asin tabang na makatagal.” Kun kamo Kristiano na may magabat na mga problema sa salud, perming manarig ki Jehova asin gibohon na kasarigan nindo an saiyang daing katapusan na mga takyag.

 9. Anong mga halimbawa an nagpapaheling na kun beses an diosnon na mga tawo nagkakaigwa nin mental depresyon?

⁹ An depresyon suanoy nang problema. Kan binabalo, si Job nagtaram siring sa tawo na an pagmate pinabayaan na sia nin Dios. (Job 29:2-5) An kahaditan huli sa gabang kamugtakan nin Jerusalem asin kan mga lanob kaiyan nagpamondo ki Nehemias, asin ipinagmondo nin makuri ni Pedro an pagdehar ki Cristo kaya sia nanangis nin mapait. (Nehemias 2:1-8; Lucas 22:62) Si Epafrodito namondo ta an mga Kristiano sa Filipos nakabareta na sia naghelang. (Filipos 2:25, 26) An kamondoan nandamat sa ibang Kristiano sa Tesalonica, ta sinadol ni Pablo an mga tugang duman na “rangahon an mga kalag na nagmomondo.” (1 Tesalonica 5:14) Kun siring, paano tinatabangan nin Dios an siring na mga indibiduwal?

10. Ano an makatatabang sa paghihingoang maatubang an mental depresyon?

¹⁰ Kaipuhan na gibohon an personal na desisyon manongod sa pagpabolong sa grabeng kamondoan o depresyon.a (Galacia 6:5) Tibaad makatabang an bastanteng pahingalo asin timbang na aktibidad. Imbes na ibilang na sarong dakulang kamugtakan an nagkapirang problema, tibaad marisa nin tawong may depresyon na nakatatabang na pagmaigotan na resolberan iyan nin saro-saro. An nakararangang tabang nin kamagurangan sa kongregasyon tibaad magin kapakipakinabang nanggad, nangorogna kun an emosyonal na problemang ini ginigikanan nin espirituwal na problema. (Santiago 5:13-15) Orog sa gabos, kaipuhan na manarig ki Jehova, ‘na ibinubugtak sa saiya an gabos niatong kahaditan, huli ta sia may pagmakolog sa sato.’ An daing ontok asin odok sa pusong pamibi makatatao sa saro kan ‘katoninongan nin Dios na mag-iingat sa puso asin pag-isip paagi ki Cristo Jesus.’—1 Pedro 5:6-11; Filipos 4:6, 7.

Tinatabangan Kita ni Jehova na Matagalan an Kamondoan Gikan sa Kagadanan

11-13. Ano an makatatabang na mainaan an kamondoan huli sa kagadanan nin sarong namomotan?

¹¹ An saro pang masakit na eksperyensia iyo an kagadanan nin sarong namomotan. Ipinanangis ni Abraham an kagadanan kan saiyang agom, si Sara. (Genesis 23:2) Kan magadan an aki niang si Absalom, makuri an kamondoan ni David. (2 Samuel 18:33) Tara, pati an sangkap na tawong si Jesus “naghibi” huli sa pagkagadan kan saiyang katood na si Lazaro! (Juan 11:35) Kaya may kamondoan kun kinukua nin kagadanan an sarong namomotan. Alagad ano an makatatabang na mainaan an kamondoan na iyan?

¹² Tinatabangan nin Dios an saiyang banwaan na matagalan an makuring kamondoan gikan sa kagadanan. Sinasabi kan saiyang Tataramon na magkakaigwa nin pagkabuhay liwat. Kaya, kita dai ‘nagmomondo siring kan iba na dai nin paglaom.’ (1 Tesalonica 4:13; Gibo 24:15) An espiritu ni Jehova tinatabangan kita na magkaigwa nin katoninongan asin pagtubod asin horophoropon an makangangalas na ngapit na ipinanunuga sa saiyang Tataramon, tangani na kita dai biyong malunod sa mamondong mga kaisipan manongod sa sarong gadan nang namomotan. Nakakamtan man an ranga sa pagbasa kan Kasuratan asin pamimibi sa “Dios nin gabos na karangahan.”—2 Corinto 1:3, 4; Salmo 68:4-6.

¹³ Mararanga kita kan paglaom sa pagkabuhay liwat arog kan diosnon na si Job, na nagkagsing: “O marahay pang ako tagoon mo [ni Jehova] sa Sheol, na ako tahoban mo sagkod na umontok an saimong kaanggotan, na tawan mo ako nin talaan na panahon asin girumdomon mo ako! Kun an makosog na tawo magadan puwede pa daw siang mabuhay giraray? Sa gabos na aldaw kan sakong obligadong paglilingkod ako maghahalat, sagkod na umabot an sakuyang pagkakalda. Ika maapod, asin ako masimbag sa saimo. Para sa ginibo kan saimong mga kamot ika magkakaigwa nin pagkapungaw.” (Job 14:13-15) Sa parate dai namamatean an grabeng kamondoan kun an sarong namomotan na katood mabiyahe, ta linalaoman niato na maheling sia liwat. Tibaad mainaan nin kadikit an grabeng kamondoan na gikan sa pagkawara nin sarong namomotan kun mamansayon niato sa kaagid na paagi an kagadanan nin sarong maimbod na Kristiano. Kun sia may daganon na paglaom, pupukawon sia sa pagkatorog sa kagadanan digdi sa daga sa Sangribong Taon na Paghade ni Cristo. (Juan 5:28, 29; Kapahayagan 20:11-13) Asin kun kita naglalaom na mabuhay digdi sa daga sagkod lamang, tibaad yaon kita digdi tanganing sabaton an satong binuhay liwat na namomotan.

14. Paano inatubang nin duwang balong Kristiana an kagadanan kan saindang agom?

¹⁴ Pagkagadan kan saiyang agom, aram nin sarong tugang na babae na kaipuhan na ipagpadagos nia an saiyang buhay sa paglilingkod sa Dios. Apuwera sa pagigin sibot na “dakol an gigibohon sa gibohon kan Kagurangnan,” guminibo sia nin tinaragping kobrekama na may 800 na pidaso. (1 Corinto 15:58) “Ini marahay na proyekto,” sabi nia, “ta sa gabos na oras na ako nagtatrabaho nakapagdadangog ako nin pan-Kahadean na mga togtog asin rekording kan Biblia, na nakaokupar sa sakong isip.” May kaogmahan niang nagigirumdoman an pagsongko nin sarong eksperyensiadong magurang asin an saiyang agom. Gikan sa Biblia, ipinaheling kan magurang na an Dios tunay na nagmamakolog sa mga balo. (Santiago 1:27) An saro pang Kristiana dai napadaog sa pagkaherak sa sadiri kan magadan an saiyang agom. Inapresyar nia an tabang nin mga katood asin nagpaheling nin mas dakulang interes sa iba. “Mas parate akong namimibi asin napatalubo ko an mas dayupot na relasyon ki Jehova,” sabi nia. Asin kanigoan na bendisyon nanggad na tabangan kan daing katapusan na mga takyag nin Dios!

Tabang Kun Kita Nagkasala

15. Ano an pinakasustansia kan mga tataramon ni David sa Salmo 19:7-13?

¹⁵ Minsan ngani namomotan niato an pagboot ni Jehova, kun beses kita nagkakasala. Daing duwa-duwa na ini nagpapasakit sa sato, arog ki David, na para sa saiya an mga ley nin Dios, mga pagirumdom, pagboot, asin paghokom orog na kawiliwili kisa bulawan. Sia nagsabi: “An saimong oripon pinatanidan kaiyan; sa pag-otob kaiyan may dakulang balos. Mga sala—siisay an makakamansay? Sa natatagong mga kasalan ipahayag mo akong daing sala. Siring man pogoli an saimong lingkod sa pangahas na mga gibo; dai mo itogot na daogon ako kaiyan. Sa siring ako magigin sangkap, asin magdadanay akong daing sala sa dakulang kalapasan.” (Salmo 19:7-13) Analisaron niato an mga tataramon na ini.

16. Taano ta maninigo niatong likayan an kapangahasan?

¹⁶ An pangahas na mga gibo mas magabat na kasalan kisa mga sala. Si Saul isinikwal bilang hade huli sa pangahas na pagdolot nin atang asin dai paggadan sa Amalequitang hade na si Agag saka sa pinakaprimerang mga samsam, minsan ngani ipinagboot nin Dios na laglagon an mga Amalequita. (1 Samuel 13:8-14; 15:8-19) Si Hadeng Uzias nagkalepra huli sa pangahas na pag-agaw sa mga trabaho nin saserdote. (2 Cronica 26:16-21) Kan an kaban kan tipan dinadara sa Jerusalem asin dikit pang matumba huli sa mga baka na nagguguyod kan kariton, ginadan nin Dios si Uza huli sa daing galang na pagkapot sa Kaban tanganing dai iyan maholog. (2 Samuel 6:6, 7) Kaya, kun dai niato aram an satong gigibohon o kun baga kita autorisadong gibohon an sarong bagay, maninigo kitang magpaheling nin hababang boot asin maghapot sa mga may pagmansay. (Talinhaga 11:2; 13:10) Siyempre, kun kita nagin pangahas, maninigo kitang mamibi sa paghagad nin tawad asin arangon sa Dios na tabangan kita na makalikay sa kapangahasan sa ngapit.

17. Paano puwedeng maapektaran nin itinatagong kasalan an sarong tawo, pero paano makakamtan an kapatawadan asin kaginhawahan?

¹⁷ An itinatagong mga kasalan puwedeng gikanan nin pagsakit. Sono sa Salmo 32:1-5, prinobaran ni David na tagoon an saiyang kasalan, alagad ta sia nagsabi: “Kan ako dai naggigirong an sakuyang mga tolang nanluya huli sa sakuyang pag-agrangay sa bilog na aldaw. Huli ta aldaw asin banggi an saimong kamot magabat sa sako. An kalabasan kan sakuyang buhay naribayan nin siring sa pagkaalang nin tig-initan.” An pagprobar na pogolan an konsensiang nariribok nin kasalan nakapagal ki David, asin an kakologan nin boot nagpaluya sa saiya kun paanong an kahoy naaalang kun daing oran o sa init nin tig-initan. Malinaw na sia nagtios nin maraot na mga epekto sa isip asin sa pisikal patin nawaran nin kagayagayahan huli sa dai pakatuga. Solamente an pagtuga sa Dios an makatatao nin kapatawadan asin pakaginhawa. Sabi ni David: “Maogma idtong an pagrebelde pinatawad, na an kasalan tinahoban. . . . Sa katapustapusi itinuga ko an sakuyang kasalan sa saimo, asin dai ko itinago an sakuyang katampalasanan. An sabi ko: ‘Itutuga ko an sakuyang mga kasumbikalan ki Jehova.’ Asin ika mismo nagpatawad kan karatan kan sakuyang mga kasalan.” An mamomoton na tabang nin Kristianong kamagurangan makatatabang sa espirituwal na pagkaomay.—Talinhaga 28:13; Santiago 5:13-20.

18. Ano an ebidensia na an kasalan puwedeng magkaigwa nin haloyan na mga epekto, alagad ta ano an puwedeng gikanan nin karangahan sa siring na mga kamugtakan?

¹⁸ An kasalan puwedeng magkaigwa nin haloyan na epekto. Iyan an nangyari ki David, na nakisambay ki Bat-seba, minaniobra an kagadanan kan agom ni Bat-seba, asin inagom an bados na balo. (2 Samuel 11:1-27) Minsan ngani an Dios nagpaheling nin pagkaherak huli sa tipan sa Kahadean, sa pagsolsol ni David, asin sa saiyang maheherakon na tratamiento sa iba, si David nag-agi nin ‘kalamidad gikan sa sadiri niang pamilya.’ (2 Samuel 12:1-12) An aki sa pagsambay nagadan. An aki ni David na si Amnon linugos an tugang nia sa amang si Tamar asin ginadan sa pagboot kan tugang kaining si Absalom. (2 Samuel 12:15-23; 13:1-33) Sinopog ni Absalom si David paagi sa pagdorog sa mga kasaroan ni David. Prinobaran niang agawon an trono alagad ta nagadan. (2 Samuel 15:1–18:33) An kasalan may bunga. Halimbawa, an sarong natiwalag na parakasala tibaad magsolsol asin makabalik sa kongregasyon, pero tibaad kaipuhanon an dakol na taon tanganing mahale an namantsahan na dangog asin an sakit sa boot na bunga kan kasalan. Mientras tanto, nakararanga nanggad na kamtan an pagpapatawad ni Jehova asin an tabang kan saiyang daing sagkod na mga takyag!

Kinakalda sa mga Nagpapagabat Sato

19. Paano makatatabang an espiritu nin Dios kun kita binabalo nin grabe?

¹⁹ Kun binabalo nin grabe, tibaad kulang kita nin kadonongan asin kosog na makapagdesisyon asin otobon iyan. Sa siring na kaso, an espiritu nin Dios “minasaro na may tabang sa satong kaluyahan; huli ta an problema sa kun ano an maninigo niatong ipamibi siring sa pangangaipo niato dai niato aram, alagad an espiritu mismo nakikimaherak sa sato paagi sa mga pag-agrangay na dai masabi.” (Roma 8:26) Kun papangyarihon ni Jehova an pagkaliwat nin mga kamugtakan, maninigo kitang magpasalamat. Pero, an saiyang takyag tibaad iligtas kita sa ibang paagi. Kun kita maarang nin kadonongan, tibaad iparisa ni Jehova paagi sa saiyang espiritu kun ano an maninigo niatong gibohon asin itao an kosog na kaipuhan tanganing magibo iyan. (Santiago 1:5-8) Sa tabang nia, kita makatatagal kun kita ‘nagmomondo sa manlaenlaen na pagbalo’ asin malilihisan iyan na may nabalo asin napakosog na pagtubod.—1 Pedro 1:6-8.

20. Ano an kakamtan niato kun talagang gigibohon niatong kasarigan an daing katapusan na mga takyag ni Jehova?

²⁰ Nungka na kita mapagal sa pagdolok sa Dios sa pamibi. “An sakuyang mga mata danay na nakatorohok ki Jehova, huli ta sia an mahulbot kan sakuyang mga bitis sa hikot,” sabi ni David. “Linglingan an saimong lalauogon sa sakuya, asin pahelingan mo ako nin marahay na boot; ta ako nagsosolsol asin nasasakitan. An mga kasakitan kan sakuyang puso nagdakol; kaldahon mo ako sa sakuyang mga kasakitan. Helinga an sakuyang kasakitan asin an sakuyang problema, asin patawadan an gabos kong kasalan.” (Salmo 25:15-18) Kapareho ni David, kita magkakamit nin banal na pagliligtas, marahay na boot, asin kapatawadan kun talagang gigibohon niatong kasarigan an daing katapusan na mga takyag ni Jehova.

[Nota sa Ibaba]

Ano an Isisimbag Nindo?

◻ Paano tinatabangan ni Jehova an saiyang mga lingkod na may helang?

◻ Ano an tibaad makatabang kun kita naghihingoang maatubang an mental depresyon?

◻ Ano an makatatabang na mainaan an kamondoan huli sa pagkagadan nin sarong namomotan?

◻ Paano nakagiginhawa an mga itinatago an saindang kasalan?

◻ Ano an tabang na makukua kun an banwaan ni Jehova binabalo nin grabe?

[Ritrato sa pahina 20, 21]

Mararanga kita kan paglaom sa pagkabuhay liwat, arog kan diosnon na si Job