LEKSIYON 57
Paano Kun Nakagibo Ka nin Magabat na Kasalan?
Dawa ngani namumutan mong marhay si Jehova asin pinagmamaigutan mong likayan na makagibo nin ano man na makakapamundo sa saiya, masasala ka talaga kun minsan. Pero may mga kasalan na mas magabat kisa sa iba. (1 Corinto 6:9, 10) Pero tandaan na pag nakagibo ka nin magabat na kasalan, dai buot sabihon kaiyan na dai ka na namumutan ni Jehova; handa siya na patawadon asin tabangan ka.
1. Ano an dapat tang gibuhon para patawadon kita ni Jehova?
An mga namumuot ki Jehova namumundong marhay pag narealisar ninda na nakagibo sinda nin magabat na kasalan. Pero nararanga sinda kan pangako ni Jehova sa mga lingkod niya: “Dawa pa an mga kasalan nindo kakulor nin iskarlata, papapution iyan na garo niyebe.” (Isaias 1:18) Kun sinsero an satong pagsulsol, lubos na papatawadon kita ni Jehova. Paano ta maipapahiling na nagsusulsol kita? Huling pinagbabasulan tang marhay an nagibo tang kasalan, ipupundo ta na iyan asin makikimahirak kita ki Jehova na patawadon kita. Dangan hihinguwahon tang baguhon an sala tang kaisipan o mga paggawi na nagin dahilan kan nagibo tang kasalan, asin hihinguwahon tang mamuhay kauyon kan banal na mga pamantayan ni Jehova.—Basahon an Isaias 55:6, 7.
2. Paano ginagamit ni Jehova an mga elder para tabangan kita pag nakagibo kita nin kasalan?
Kun nakagibo kita nin sarong magabat na kasalan, sinasabi sa sato ni Jehova na “apudon . . . an kamagurangan kan kongregasyon.” (Basahon an Santiago 5:14, 15.) An nombradong mga lalaking ini namumutan si Jehova saka an saiyang mga karnero. Kuwalipikado sinda na magtabang sa sato para maibalik an satong relasyon ki Jehova.—Galacia 6:1.
Paano kita tinatabangan kan mga elder pag nakagibo kita nin magabat na kasalan? Tatabangan kita kan duwa o tulong elder gamit an Kasuratan para ipahiling sa sato kun taano ta sala an satong ginibo. Matao man sinda nin mga suhestiyon asin giya na makakatabang sa sato para malikayan na magkasala giraray. Para protektaran an kongregasyon sa maraot na mga impluwensiya, hinahali kan mga elder an siisay man na naggigibo nin magabat na kasalan asin dai nagsusulsol.
ARAMON PA
Aramon pa kun paano kita tinatabangan ni Jehova pag nakagibo kita nin magabat na kasalan tanganing lalo pang mapahalagahan ta an itinatao niyang tabang.
3. An pagtuga kan satong kasalan makakatabang para maibalik an satong relasyon ki Jehova
Nakukulgan si Jehova pag nakakagibo kita nin ano man na kasalan, kaya tama sanang magtuga kita sa saiya. Basahon an Salmo 32:1-5, dangan pag-ulayan an hapot na ini:
Imbes na itago an nagibo tang kasalan, taano ta makakarahay sa sato kun itutuga ta iyan ki Jehova?
Apuwera sa pagtuga ki Jehova kan satong mga kasalan, magigin mas magian pa an satong pagmati kun mapatabang kita sa mga elder. I-play an VIDEO, dangan pag-ulayan an hapot.
Sa video, paano tinabangan kan mga elder si Canon na bumalik ki Jehova?
Dapat na mayo kitang itatago sa mga elder saka magin onesto kita sa sainda; yaon sinda para tabangan kita. Basahon an Santiago 5:16, dangan pag-ulayan an hapot na ini:
Taano ta magigin mas madali sa mga elder na tabangan kita kun magigin onesto kita?
Ituga an saimong kasalan, magin onesto sa mga elder, asin akuon an mamumuton na tabang ni Jehova
4. Nagpapahiling si Jehova nin pagkahirak sa mga nagkasala
Kun an nagkasala habong magsunod sa mga pamantayan ni Jehova, hahalion siya sa kongregasyon, asin dai na kita makikiiba-iba sa saiya. Basahon an 1 Corinto 5:6,11, dangan pag-ulayan an hapot na ini:
Kun paanong pinapausbog kan lebadura an masa nin harina, paano man makakaapektar sa kongregasyon an pakikiiba-iba sa dai nagsusulsol na nagkasala?
Bilang pag-arog sa pagkahirak ni Jehova sa bakong perpektong mga nagkasala, hinihinguwa kan mga elder na makontak asin tabangan an mga hinali sa kongregasyon. Dakul an nagbalik sa kongregasyon huling dawa ngani makulog an disiplina, natabangan sinda kaiyan na marealisar na sala an saindang ginibo.—Salmo 141:5.
Paano ipinapahiling kan pagtratar ni Jehova sa mga nagkasala na siya rasonable, mahihirakon, asin mamumuton?
5. Pinapatawad ni Jehova an mga nagsusulsol
Naggamit si Jesus nin sarong ilustrasyon para tabangan kita na masabutan kun ano an namamatian ni Jehova pag an sarong tawo nagsusulsol. Basahon an Lucas 15:1-7, dangan pag-ulayan an hapot na ini:
Ano an itinutukdo kaiyan sa saimo manungod ki Jehova?
Basahon an Ezekiel 33:11, dangan pag-ulayan an hapot na ini:
Anong mahalagang bagay an dapat tang gibuhon para ipahiling na nagsusulsol kita?
Arog nin sarong pastor, nagmamalasakit na marhay si Jehova sa saiyang mga karnero
MAY MGA NAGSASABI: “Natatakot ako na kun sasabihon ko sa mga elder an kasalan ko, hahalion ninda ako sa kongregasyon.”
Ano an sasabihon mo sa saro na arog kaiyan an kaisipan?
SUMARYO
Kun nakagibo kita nin magabat na kasalan pero pinagbabasulan ta talaga iyan asin determinadong ipundo an maraot na gibo, papatawadon kita ni Jehova.
Rebyu
Taano ta para sa ikakarahay niyato kun itutuga ta ki Jehova an satong mga kasalan?
Ano an kaipuhan tang gibuhon para mapatawad an mga kasalan ta?
Pag nakagibo kita nin magabat na kasalan, taano ta dapat kitang magpatabang sa mga elder?
HILINGON MAN
Aramon kun paano ipinahiling ni Jehova sa sarong lalaki an klase nin pagkahirak na arog kan sinasabi sa Isaias 1:18.
Paano hinihinguwa kan mga elder na tabangan an mga nakagibo nin magabat na kasalan?
Aramon kun paano ipinapahiling an pagkamuot asin pagkahirak sa dai nagsusulsol na mga nagkasala.
“Tabang Para sa mga Hinali sa Kongregasyon” (An Torrengbantayan, Agosto 2024)
Sa istorya na “Kaipuhan Kong Bumalik ki Jehova,” aramon kun paano namati nin sarong lalaki na naparayo sa katotoohan na tinabangan siya ni Jehova na makabalik.
“Binago kan Biblia an Saindang Buhay” (An Torrengbantayan, Abril-Hunyo 2012)