Paghusay sa Unibersal na Isyu Sagkod Lamang

“Si Jehova mismo sa saimong too paparasaon an mga hade sa aldaw kan saiyang kaanggotan.”—SALMO 110:5.

1, 2. Kan taon 70 C.E., anong pangyayari an tibaad ibinugtak sa pagduda an pagigin unibersal kan soberaniya ni Jehova Dios, alagad ta kan panahon na idto, kiisay na ibinalyo an saiyang pag-oyon?

AN UNIBERSAL na soberaniya kan Kaglalang sa langit asin daga iyo an pangenot na isyu sa atubangan nin mga tawo asin anghel. Sa dai na mahahaloy, an isyu huhusayon sagkod lamang, alagad ta sa laog nin dakol na siglo inangat kan mga kaiwal ni Jehova an saiyang soberaniya. Tunay nanggad, an pagkalaglag kan 70 C.E. sa siudad nin Jerusalem kaiba an templo kaiyan na dusay ki Jehova tibaad ibinugtak sa pagduda an pagigin unibersal kan soberaniya kan Kaglalang. Minsan siring, may balidong dahelan kun taano ta dai kaidto ginusto ni Jehova na magin guerrerong Dios para sa Israel sa laman.

² Ano an dahelan? Kan panahon na idto ibinalyo ni Jehova Dios an saiyang pag-oyon sa sarong bagong nasyon, espirituwal na Israel, “an Israel nin Dios,” arog kan apod ni apostol Pablo sa kongregasyon ni Jesu-Cristo. (Galacia 6:16) Alagad, sa bilog na inaapod na Kristianong Kapanahonan, si Jehova dai pa nakikilaban para sa espirituwal na Israel bilang guerrerong Dios siring kan saiyang pakikilaban para sa Israel sa laman na sakop kan Mosaikong Tipan nin Pagboot. Tinogotan pa ngani nia an mga soldados na Romano, sa sutsut kan mga Judio, na gadanon si Jesu-Cristo sa sarong hariging pasakitan sa Kalbaryo. Idto 37 taon bago an ikaduwang paglaglag sa Jerusalem kan mga Romano, kan 70 C.E.

3, 4. Poon kan kaaldawan ni Moises sagkod ki Hadeng Ezequias, paano pinatunayan nin Dios na sia guerrero, alagad sa kaso kan espirituwal na mga Israelitas, ano an nagin totoo kun manongod sa saiyang pakikilaban asin sa saindang pakikilaban?

³ Poon kan kaaldawan ni propeta Moises sagkod kan paghade ni Hadeng Ezequias nin Jerusalem, si Jehova Dios milagrosong nakipaglaban para sa nasyon nin Israel, asin an mga Israelitas nakipaglaban sa pangengenot nia paagi sa nakagagadan na mga armas. (Deuteronomio 1:30; 3:22; 20:3, 4; Josue 10:42) Alagad bakong siring sa kaso nin espirituwal na Israel! Poon kan pagkagadan ni Jesu-Cristo sa luwas nin Jerusalem sagkod sa satong Komon na Kapanahonan, an guerrerong Dios na ini dai nakipaglaban sa pisikal na pakikilaban para sa Israel nin Dios. Katimbang kaiyan, dai nia inautorisaran an espirituwal na mga Israelitas na minakompuwesto sa Kristianong kongregasyon na makilaban paagi sa materyal na mga armas sa pakikilaban. An mga Kristiano may laen man na pakikilaban.

⁴ Kaoyon digdi, an saro sa pangenot na mga parapakilaban para sa Kristianong pagtubod nagsurat sa mga kapwa Kristiano sa Corinto, Grecia: “An mga hamo kan samong pakikilaban bakong sa laman, kundi makapangyarihan paagi sa Dios sa pagtumba sa mga bagay na marigonon an pundasyon. Huli ta itinutumba niamo an mga pangangatanosan asin lambang halangkaw na bagay na pinatitindog tumang sa kaaraman nin Dios; asin dinadara niamo an lambang kaisipan sa pagkabihag tanganing iyan magin makinuyog ki Cristo; asin inaandam niamo an samong sadiri na magtao nin padusa sa lambang pakisuway, pakatapos tolos na an saindong pagkuyog lubos nang naotob.” (2 Corinto 10:4-6) Bago pa kaini sa iyo man sanang surat, si Pablo nagtaram manongod sa “mga hamo nin katanosan sa toong kamot asin sa wala.”—2 Corinto 6:7; helingon man an Efeso 6:11-18.

Si Jehova Makikipaglaban sa Armagedon

 5. Sa hardin nin Getsemani, ano an nagin paninindogan ni Jesus manongod sa paggamit nin materyal na mga armas sa pagdepensa sa sadiri, asin ano an ginigibo kan saiyang mga disipulo?

⁵ Si Jesu-Cristo, kan nasa daga, noarin man dai naggamit nin nakagagadan na mga armas sa pagdepensa sa sadiri. Kan banggi na sia pasaloiban sa hardin nin Getsemani, an debotado niang disipulo na si Simon Pedro luminapnot nin minasbad asin tinigbas an talinga kan oripon kan Judiong halangkaw na saserdote. Alagad ta milagrosong ibinalik ni Jesus an talinga asin nagsabi: “An gabos na minabingat nin minasbad sa minasbad man magagadan. O naghohona ka na dai ako makakapakimaherak sa sakong Ama na tawan ako ngonyan nin labi sa kagduwang hukbo nin mga anghel? Kaya, paanong maootob an Kasuratan na siring an kaipuhan na mangyari?” (Mateo 26:52-54) Sa atubang kan gabos na ini, an tunay na mga paraarog sa mapagsakripisyong Aki nin Dios nagdadanay sa saindang neutralidad, kapwa sa direkta asin bakong direktang paagi, pag-abot sa kinabanon na pakikiguerra.—Juan 17:16; 18:36.

 6. Sa ralaban kan dakulang aldaw nin Dios na Makakamhan sa gabos sa Armagedon, ano an magigin paninindogan kan mga Saksi ni Jehova?

⁶ Kaya, digdi pinaiisi an mga nasyon na sa “ralaban kan dakulang aldaw nin Dios na Makakamhan sa gabos” sa “lugar na sa Hebreo inaapod Har–Magedon,” an mga Saksi ni Jehova dai makikikabtang sa pakikilaban. Ipababaya ninda iyan sa guerrerong Dios, “si Jehova nin mga hukbo,” kaiba an minilyon niang anghel sa pangengenot ni Jesu-Cristo.—Kapahayagan 16:14-16; 19:11-21; Salmo 84:12.

Madali Nang Ipagpadagos ni Jehova an Saiyang mga Aktibidad Militar

 7. Bilang guerrerong Dios, anong titulo an iinapod ki Jehova, asin iyan pa daw giraray an saiyang kamugtakan?

⁷ An Dios kan suanoy na Israel namidbid asin inapod na Jehova tseva·’ohthʹ, o Jehova nin mga hukbo. (1 Samuel 1:3, 11) Sa Roma 9:29 (King James Version) an Kristianong apostol na si Pablo nasasambitan an Isaias 1:9 asin nagsurat: “Kun an Kagurangnan nin Sabaoth (mga hukbo) dai kita winalatan nin banhi, nagin siring kutana kita kan Sodoma, asin nakaarog kan Gomorra.” Siring man, an Kristianong disipulong si Santiago nagsurat: “An mga kinurahaw kan mga nag-ani nakaabot sa mga talinga kan Kagurangnan nin sabaoth (mga hukbo).” (Santiago 5:4, KJ; American Standard Version) Kaya inapod ni Pablo asin Santiago an Dios bilang si Jehova nin mga hukbo kaidtong enot na siglo kan satong Komon na Kapanahonan. Sa suminunod na 18 siglo, an Dios dai nakipaglaban sa laman para sa espirituwal na Israel, an Israel nin Dios, arog kan ginibo nia para sa suanoy na Israel, pero sia pa man giraray si Jehova nin mga hukbo.

8-10. (a) Siisay an nag-autorisar sa ralaban sa langit, asin taano ta si Miguel an pinakakuwalipikadong makilaban? (b) Ano an resulta kan ralaban sa langit, asin guranong panahon an natatada bago an ralaban kan dakulang aldaw ni Jehova?

⁸ Kan mamundag an Mesiyanikong Kahadean kan 1914 sa katapusan kan “mga panahon nin mga Hentil,” puminutok an ralaban sa langitnon na sakop ni Jehova Dios. (Lucas 21:24, KJ) Siisay an nag-autorisar sa ralaban na idto? Si Jehova Dios mismo. Isinugo nia an saiyang natutukaw sa tronong Aki sa langtad nin ralaban sa irarom kan ngaran na Miguel huli ta an Sarong ini pinakakuwalipikado na sumimbag sa hapot na yaon sa ngaran na iyan, arin na baga, “Siisay an Kabaing nin Dios?” Si Miguel listong naghiro bilang an nakikipaglaban na representante ni Jehova nin mga hukbo.

⁹ Kaya, mababasa niato sa Kapahayagan 12:7-10: “Asin puminotok an ralaban sa langit: si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia. Asin nadangog ko an makosog na tingog sa langit na nagsabi: ‘Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo, huli ta ihinolog na an parasumbong sa satong mga tugang.’”

¹⁰ Ngonyan, pakalihis nin labing 70 taon poon kan ralaban na idto sa kalangitan, ‘halipot na sanang panahon’ an natatada bago pumutok an ralaban kan dakulang aldaw ni Jehova asin buhay na ipaheling nin Dios an saiyang sadiri bilang si Jehova nin mga hukbo sa presenteng kapag-arakian nin katawohan.—Kapahayagan 12:12; Zacarias 14:3.

An Parapakilaban Para sa Pagbindikar ki Jehova

11. Anong itinalaan na panahon an hinahalat kan natatada sa sadangoton na aripompon asin kan dakulang kadaklan, asin ano an magayagaya nindang uupakan sa panahon na iyan?

¹¹ Sa irarom nin pasabong, an madonong na si Hadeng Salomon kan suanoy na Israel nagsurat: “Sa gabos na bagay igwa nin itinalaan na panahon, panahon para sa lambang gibo sa irarom kan kalangitan: . . . panahon para sa ralaban asin panahon para sa katoninongan.” (Eclesiastes 3:1-8) Digdi sa daga an mga disipulo kan natutukaw nang Hade na “labi pa ki Salomon” naghahalat sa panahon asin okasyon na Saiyang pangenotan an mapangganang langitnon na mga anghel sa ralaban sa Har–Magedon. (Mateo 12:42; Kapahayagan 19:11-16) Duman “sia magpapastor [sa mga nasyon] paagi sa sogkod na batbat,” na rinoronot sinda paagi sa “setrong batbat.” (Kapahayagan 19:15; Salmo 2:9) Uupakan nin makosog kan saiyang matoninong, protehidong mga disipulo an saiyang kahangahangang pagliligtas sa sainda! Kaiba digdi kapwa an natatada sa “sadangoton na aripompon” kan saiyang mga kaibang paramana sa Kahadean asin an “dakulang kadaklan” kan saiyang “ibang karnero” na may paglaom na manahon an Paraisong daga sakop kan saiyang nagpapatoninong na paghade sa laog nin sangribong taon. (Lucas 12:32; Kapahayagan 7:9-17; Juan 10:16) Naggagayagaya, “sa mismong limpoy kan Makakamhan sa gabos na Saro,” uupakan ninda an dai mapagdududahan na kapangganahan kan Pastor-Hade, si Jesu-Cristo, na nagbibindikar sa unibersal na soberaniya ni Jehova Dios.—Salmo 91:1.

12. An ralaban napapaatubang sa mga nasyon gikan saen, asin may anong resulta sono sa Salmo 68:1, 2?

¹² Daing pagpasobra, puwede nang sabihon ngonyan na an ralaban hale sa lugar na dai kayang aboton nin tawo asin gagamitan nin mga armas na eksakto sa punteriya na mas makosog sa saiyang mga bomba nuklear napapaatubang sa gabos na daganon na nasyon, baga man sa laog o luwas kan organisasyon nin Naciones Unidas. Hinanyoga: “Tumindog logod an Dios, magkawararak logod an saiyang mga kaiwal, asin magdurulag logod an mga naoongis sa saiya nin makuri huli sa saiya. Siring na pinahahale an aso, pahaleon mo man logod sinda; siring na natutunaw an taro sa atubangan nin kalayo, mapara logod an mga maraot sa atubangan nin Dios.”—Salmo 68:1, 2.

13. Mantang nangyayari an mga pag-andam para sa ralaban, kiisay ipinanonongod ngonyan an mga tataramon kan Salmo 45:1-6 sa napapanahon nanggad na paagi?

¹³ Ginigibo na ngonyan an mga pag-andam para sa ralaban sa gabos na ralaban. Bilang an pangenot na Parapakilaban nin Dios, an Guerrero para sa pagbindikar ki Jehova kinakaolay sa minasunod na mga tataramon na kinompuwesto sa irarom nin pasabong nin sarong miembro kan nasyon nin Israel: “Ika tunay na labi pa kagayon kisa mga aki nin mga tawo. An kagayonan ibinubo sa saimong mga ngabil. Kaya binendisyonan ka nin Dios sagkod sa panahon na daing katapusan. Hagkosan an saimong minasbad sa saimong paa, O makosog na saro, kaibanan kan saimong dignidad asin kan saimong kamurawayan. Asin sa saimong kamurawayan pumasiring ka sa kapangganahan; mangabayo ka para sa katotoohan asin kapakumbabaan patin katanosan, asin an saimong toong kamot magtotokdo sa saimo sa makangingirhat na mga bagay. An saimong mga pana matatarom—sa irarom mo nagkakapurukan an mga banwaan—sa puso kan mga kaiwal kan hade. An Dios an saimong trono sa panahon na daing katapusan, minsan sagkod lamang; an setro kan saimong pagkahade setro nin katanosan.”—Salmo 45:1-6.

An mga Nasyon Nagsororog Tumang ki Jehova

14, 15. Pakaluwas sa pagkabilanggo, anong mga tataramon sa Salmo 2 an kinotar kan mga apostol na naootob, asin ano an hinagad ninda sa Dios?

¹⁴ Dai nahaloy pakaestablisara kan Kristianong kongregasyon kan aldaw nin Pentecostes 33 C.E., namansayan nin linahidan na mga Kristiano an aplikasyon kan Salmo 2:1, 2. An tekstong ini nagsasabi: “Taano ta maribok an mga nasyon asin an mga banwaan mismo nagpaparagumodgumod nin daing halagang bagay? Nanindogan an mga hade kan daga asin an haralangkaw na opisyal mismo nagsororog tumang ki Jehova asin tumang sa saiyang linahidan.” Pakatapos na an mga apostol kan Linahidan ni Jehova mag-agi sa enot na pagkaarestar asin pagmaltrato nin kaiwal na mga Judio, uminiba liwat sinda sa saindang mga kapwa Kristiano dangan kinotar an mga tataramon na ini kan Salmo 2 na kinompuwesto ni Hadeng David. An bagay na iyan ibinabareta kan Gibo 4:23-30, na sinasabi:

¹⁵ “Kan mabutasan sinda nagbalik sa saindang pag-iriba asin ibinareta an mga bagay na isinabi sa sainda kan mga poon na saserdote asin kan kamagurangan na lalaki. Sa pakadangog kaini sinda sararong nagkurahaw sa Dios asin nagsabi: ‘Soberanong Kagurangnan, ika an Saro na guminibo sa langit asin daga asin dagat patin sa gabos na bagay na yaon dian, asin na paagi sa banal na espiritu nagsabi paagi sa ngoso kan samong apoon na si David, an saimong oripon, “Taano an mga nasyon ta naribok asin an mga banwaan naghohorophorop sa mga bagay na daing halaga? An mga hade kan daga nanindogan asin an mga poon nagsororog tumang ki Jehova asin tumang sa saiyang linahidan.” Kaya, si Herodes asin Poncio Pilato kaibanan an mga tawo nin mga nasyon asin mga banwaan nin Israel sa katotoohan nagtiripon sa siudad na ini tumang sa saimong banal na oripon na si Jesus, na saimong linahidan, tanganing gibohon an mga bagay na itinalaga kan saimong kamot asin kahatolan na mangyari. Asin ngonyan, Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon sa bilog na kapusoan, mantang inuunat mo an saimong kamot para sa pagpaomay asin mantang nangyayari an mga tanda asin ngangalasan paagi sa ngaran kan saimong banal na lingkod na si Jesus.’”

16, 17. (a) Sa bilog na kasaysayan nin tawo, may nangyari daw na nakaaagid sa nagpoon na mangyari kan 1914? Ipaliwanag. (b) Ano an padagos na ginigibo kan mga nasyon, sa siring inoobligar si Jehova Dios na garo baga isurat an ano, kun dapit sa ‘libro kan saiyang mga pakikilaban’?

¹⁶ Minsan siring, kun dapit sa maribok na mga nasyon, mga hade na naninindogan bilang saro, politikal na mga namomoon na nagsosororog tumang ki Jehova asin sa saiyang Linahidan, si Jesu-Cristo, ano sa bilog na kasaysayan nin tawo an makababaing sa nagpoon 76 na taon na an nakaagi kan 1914? Idto bako sanang an taon na puminutok an enot na guerra mundial sa bilog na kasaysayan nin tawo kundi partikularmente an taon na natapos an mga panahon kan mga Hentil, “an itinalaan na panahon kan mga nasyon”! (Lucas 21:24) Malinaw na an Salmo 2 nagkaigwa nin mas dakulang kaotoban poon kan taon na idto.

¹⁷ Sa katapusan kan panahon nin mga Hentil kan 1914, mayo sa mga nasyon—pati an mga nasyon kan inaapod na Kakristianohan, na an dakol na siudadano ibinibilang an sadiri na espirituwal na mga Israelitas—na gustong akoon an Linahidan ni Jehova, si Jesu-Cristo, sa trono nin paghade sa daga. Asin ngonyan, 71 taon poon kan “an maogmang baretang ini kan kahadean” ponan na ‘ihulit sa bilog na ineerokan na daga para sa pagpatotoo sa gabos na nasyon,’ poon kan 1919, an mga nasyon sa laog asin luwas nin Kakristianohan tunay na dai oomawon an haloy nang ipinaiising Hade ni Jehova asin manunumpa nin kaimbodan sa saiya mantang saindang tinatalikdan an sainda mismong paghade sa daga. (Mateo 24:14) Al kontraryo, sa katapustapusi sinda nakaabot na sa panahon asin situwasyon na inoobligar ninda si Jehova na garo baga isurat an mamuraway na kulminasyon kan “libro kan Mga Pakikilaban ni Jehova.”—Bilang 21:14.

Mamuraway na Kapangganahan kan Guerrerong Dios

18. Sa anong gigibohon ni Jehova na kita oyon, asin siisay an garo baga nasa kataed nia, tanganing maotob an Salmo 110?

¹⁸ Kaya, abante sa pakikilaban, O Jehova nin mga hukbo, na nasa kataed an saimong makahadeng Aki, si Jesu-Cristo! Sa saiya ipinanonongod an makahulang mga tataramon: “Mandaog ka sa tahaw kan saimong mga kaiwal. Si Jehova mismo sa saimong too paparasaon an mga hade sa aldaw kan saiyang kaanggotan. Sia maghohokom sa mga nasyon; papanoon nia iyan nin mga bangkay. Saiya nanggad na roronoton an namamayo sa matawong daga.”—Salmo 110:2, 5, 6.

19. Mapadapit sa nagdadangadang na ralaban kan dakulang aldaw nin Dios na Makakamhan sa gabos, ano an ipinamimibi niato sa saiya para sa dakulang kadaklan kan ibang karnero?

¹⁹ O Jehova nin mga hukbo, an saimo logod na maimbod na mga lingkod sa daga magin an magayagayang mga saksi sa saimong daing kaagid na kapangganahan paagi sa saimong guerrerong Hade, si Jesu-Cristo, sa okasyon kan ralaban kan dakulang aldaw nin Dios na Makakamhan sa gabos sa lugar na inaapod sa Hebreo na Har–Magedon! (Kapahayagan 16:14) Kaiba kan natatada sa tunay na espirituwal na mga Israelitas, an dakulang kadaklan logod kan mga arog-karnero na “hinugasan an saindang mga gubing asin pinaputi iyan sa dugo kan Kordero” may kaogmahan na ‘lumuwas sa dakulang kahorasaan’ tanganing magin saimong daganon na mga saksi sagkod lamang! (Kapahayagan 7:14) Sa irarom kan saimong mamomoton na pangataman, sinda logod makaligtas na dai nagagadan pasiring sa daing guerrang kahadean kan saimong mapangganang Aki, na maghahade sa nalinigan na daga na gigibohon na magayon na paraiso, kaoyon kan saimong orihinal na katuyohan. Itogot mo na sinda magin naheheling na patotoo sa gabos na binuhay liwat na gadan sa pagbindikar sa soberaniya na tama sanang mapasaimo sa bilog na uniberso! Nagpapasalamat kami na sa panahon na iyan nahusay mo na an unibersal na isyu sagkod lamang, iyo, sagkod sa panahon na daing katapusan!

Nagigirumdoman daw Nindo?

◻ Ano an pangenot na isyu sa atubangan nin mga tawo asin anghel?

◻ Ano an pagkakalaen kan pakikipaglaban ni Jehova para sa suanoy na Israel asin para sa espirituwal na Israel?

◻ Sa Armagedon, ano an magigin paninindogan kan mga Saksi ni Jehova, asin taano?

◻ Kasuarin nagkaigwa nin daing kaagid na kaotoban an Salmo 2:1, 2?

◻ Paano mahuhusay sagkod lamang an unibersal na isyu?

[Ritrato sa pahina 20, 21]

Uupakan kan “dakulang kadaklan” an mapangganang Pastor-Hade nin Dios