Marahay na Basehan Para sa Optimismo Ngonyan

AN HISTORYADOR asin sosyologong si H. G. Wells, na namundag kan 1866, nagkaigwa nin mapuersang impluwensia sa kaisipan kan ika-20 siglo. Paagi sa saiyang mga isinurat, ipinaliwanag nia nin detalyado an saiyang kombiksion na an milenyo makakadungan kan padagos na pag-oswag kan siensia. Sa siring, an Collier’s Encyclopedia tinandaan an “daing sagkod na optimismo” ni Wells mantang sia daing ontok na nagtatrabaho tanganing ipadagos an saiyang katuyohan. Alagad sinasabi man kaiyan na an saiyang optimismo nawara kan pumutok an Guerra Mundial II.

Mantang narerealisar ni Wells na “an siensia puedeng gamiton sa maraot patin sa marahay, an saiyang pagtubod nawara, asin nadaog na sia nin pesimismo,” an sabi kan Chambers’s Biographical Dictionary. Taano ta nangyari ini?

An pagtubod asin optimismo ni Wells basado solamente sa mga ginibo nin tawo. Kan marealisar nia na dai kayang kamtan kan katawohan an saiyang lugar na sangkap, mayo na siang madumanan. An pagkadesesperar biglang nagin pesimismo.

Ngonyan, dakol na tawo an nagkaigwa kan iyo man sanang eksperyensia huli sa iyo man sanang dahelan. Sinda nagsusulwak sa optimismo kan sinda hoben pa alagad nagigin mamondo sa pagkapesimista mantang sinda naggugurang. May mga hoben pa nganing minaontok na sa normal daang pamumuhay asin napadara sa pagdodroga, pakikidorog minsan kiisay, asin iba pang nakadadanyar na mga estilo nin pamumuhay. Ano an solusyon? Estudyare an minasunod na mga halimbawa sa mga panahon kan Biblia asin helingon kun ano an basehan para sa optimismo​—kan nakaagi, sa presente, asin sa ngapit.

Binalosan an Pagigin Optimista ni Abraham

Kan taon 1943 B.C.E., si Abraham naghale sa Haran, nagbalyo sa Salog nin Eufrates, asin naglaog sa daga kan Canaan. Si Abraham ilinadawan bilang an “ama kan gabos na igwa nin pagtubod,” asin kanigoan na halimbawa an itinao nia!​—Roma 4:11.

Si Abraham inibanan ni Lot, an nailong aking lalaki kan tugang na lalaki ni Abraham, asin kan pamilya ni Lot. Paghaloyhaloy, kan magkaigwa nin makuring kakulangan nin kakanon sa daga, an duwang pamilya nagbalyo sa Egipto, asin sa katapustapusi nagpuli sinda na magkairibahan. Kan panahon na idto si Abraham asin si Lot pareho na nakatipon nin dakulang kayamanan, saka mga aripompon asin pastoran. Kan magpasuruhay an saindang mga paraataman nin hayop, si Abraham nagsadiring boot asin nagsabi: “Tabi, dai mo pagtogotan na magpadagos an pasuruhay sa pag-oltanan niato asin sa pag-oltanan kan sakong mga paraataman nin hayop asin kan saimong mga paraataman nin hayop, huli ta magtugang kita. Bako daw na an bilog na kadagaan yaon para sa saimo? Tabi, sumiblag ka sa sako. Kun ika magpawala, kun siring ako mapatoo; alagad kun ika magpatoo, kun siring ako mapawala.”​—Genesis 13:​8, 9.

Si Abraham, na mas matua, puede kutanang minaniobra an mga bagay-bagay apabor sa saiya, asin si Lot, huli sa paggalang sa saiyang amaon, puede kutanang ipinahunod an pagpili ki Abraham. Imbes, “itiningkalag ni Lot an saiyang mga mata asin naheling an bilog na Distrito kan Jordan, na iyan gabos matubig na lugar bago linaglag ni Jehova an Sodoma asin Gomorra, arog kan tatamnan ni Jehova, arog kan daga nin Egipto sagkod sa Zoar. Dangan pinili ni Lot para sa saiya an bilog na Distrito kan Jordan.” Huling iyan an pinili, yaon ki Lot an gabos na dahelan na magin optimistiko. Alagad kumusta si Abraham?​—Genesis 13:​10, 11.

Abenturoso daw si Abraham, na isinasapeligro an ikararahay kan saiyang pamilya? Dai. An positibo asin matinaong espiritu ni Abraham nagdara nin mayaman na mga balos. Si Abraham sinabihan ni Jehova: “Tingagan, tabi, an saimong mga mata asin tumanaw ka hale sa saimong namumugtakan, paamihanan asin patimog saka pasirangan asin pasolnopan, huli ta an bilog na daga na natatanaw mo, sa saimo asin sa saimong banhi itatao ko iyan sagkod sa panahon na daing katapusan.”​—Genesis 13:​14, 15.

An optimismo ni Abraham may marigon na basehan. Iyan nakabase sa panuga nin Dios na sia magibo nin sarong dakulang nasyon hale ki Abraham kaya “an gabos na pamilya kan daga magbebendisyon nanggad kan saindang sadiri paagi [ki Abraham].” (Genesis 12:​2-4, 7) Kita man may dahelan na magin kompiado, sa pakaaram na “pinapangyayari nin Dios na an gabos niang gibo magtarabangan para sa karahayan kaidtong mga namomoot sa Dios.”​—Roma 8:28.

Duwang Optimistikong Espiya

Pakalihis nin labing 400 na taon, an nasyon nin Israel andam nang lumaog sa Canaan, “daga na nagbobolos nin gatas asin tangguli.” (Exodo 3:8; Deuteronomio 6:3) Si Moises nagsugo nin 12 prinsipe tanganing ‘siyasaton an daga asin magbareta manongod sa dalan na maninigo nindang agihan asin mga siudad na dudumanan ninda.’ (Deuteronomio 1:​22; Bilang 13:2) An 12 espiya gabos nagkaoroyon sa saindang paglaladawan kan prosperidad kan daga, alagad an 10 sa sainda nagtao nin pesimistikong bareta na nagtanom nin takot sa puso kan banwaan.​—Bilang 13:​31-33.

Si Josue asin Caleb, sa ibong na lado, iinatubang sa banwaan an optimistikong mensahe asin ginibo ninda an saindang bilog na makakaya tanganing haleon an saindang pagkatakot. An saindang aktitud asin bareta nagpabanaag nin lubos na kompiansa sa abilidad ni Jehova na otobon an saiyang tataramon na ibabalik sinda sa Dagang Panuga​—alagad daing nangyari. Imbes, “an bilog na kasararoan nag-orolay na daklagon sinda nin mga gapo.”​—Bilang 13:30; 14:​6-​10.

Sinadol ni Moises an banwaan na magtiwala ki Jehova, alagad sinda habong maghinanyog. Huli ta sinda nagpadagos sa saindang pesimistikong aktitud, an bilog na nasyon kinaipuhan na maglagawlagaw nin 40 taon sa kaawagan. Sa 12 espiya, si Josue asin Caleb sana an nakaeksperyensia kan mga balos nin optimismo. Ano an pundamental na problema? Kakulangan nin pagtubod, huling an banwaan naglaom sa saindang sadiring kadonongan.​—Bilang 14:​26-​30; Hebreo 3:​7-​12.

An Pag-urong-sulong ni Jonas

Si Jonas nabuhay kan ikasiyam na siglo B.C.E. Ipinaririsa kan Biblia na sia sarong fiel na propeta ni Jehova sa sampulong tribong kahadean kan Israel, kaidtong mga panahon na namamahala si Jeroboam II. Pero sinayumahan nia an sugo na magduman sa Ninive tanganing magtao nin patanid sa mga tawo. An historyador na si Josefo nagsasabi na si Jonas “nag-isip na mas marahay pang dumulag” asin magduman na sana sa Jope. Duman sia nagsakay sa sarong lantsa pasiring sa Tarsis, posibleng an España sa presenteng panahon. (Jonas 1:​1-3) Ipinaliliwanag sa Jonas 4:2 kun taano si Jonas ta nagkaigwa nin siring na pesimistikong pagmansay sa saiyang asignasyon.

Sa katapustapusi si Jonas nag-oyon na gibohon an saiyang misyon, alagad sia naanggot kan an mga tawo sa Ninive magsolsol. Kaya tinokdoan sia ni Jehova nin sarong marahay na leksion sa pakikidamay paagi sa pagpangyaring maalang asin magadan an barantiong na sinisirongan ni Jonas. (Jonas 4:​1-8) An pakamate nin kamondoan ni Jonas sa pagkagadan kan tinanom maninigo kutanang mas tama na ipaheling sa 120,000 katawo sa Ninive na dai ‘nakaaram kan pagkakalaen kan saindang toong kamot sa saindang wala.’​—Jonas 4:11.

Ano an manonodan niato sa eksperyensia ni Jonas? Daing lugar an pesimismo sa sagradong paglilingkod. Kun namamansayan niato an paggiya ni Jehova asin magpadagos na may bilog na kompiansa, kita magigin mapanggana.​—Talinhaga 3:​5, 6.

Optimismo sa Tahaw nin mga Kasakitan

“Dai ka magpaheling na ika naaanggot sa mga paragibo nin maraot,” an pahayag ni Hadeng David. “Dai ka mauri sa mga naggigibo nin karatan.” (Salmo 37:1) Tunay nanggad, iyan madonong na hatol, huli ta ngonyan an inhustisya asin kabikoan nasa palibot niato.​—Eclesiastes 8:11.

Minsan siring, dawa kun kita dai naaara sa mga bakong matanos, pasil sanang makamate nin pagkadesganar kun kita nakaheheling nin inosenteng mga tawo na nagdudusa sa kamot kan mga maraot o kun kita mismo tinatrato sa bakong makatanosan na paagi. An siring na mga eksperyensia tibaad magcausa pa ngani na kita magkaigwa nin desesperado o pesimistikong aktitud. Kun kita nakamamate kaiyan, ano an maninigo niatong gibohon? Primero, puede niatong girumdomon na dai puedeng basta na sana ipamugtak kan mga maraot na sinda nungkang mapapadusahan. An Salmo 37 sinisierto kita sa bersikulo 2: “Siring sa doot sinda [mga paragibo nin maraot] tolos-tolos na maluluyos, asin siring sa berdeng doot sinda mapapara.”

Dugang pa, puede kitang padagos na gumibo nin tama, magdanay na optimistiko, asin maghalat ki Jehova. “Humarayo ka sa maraot asin gibohon mo an marahay, asin ta mabuhay ka sagkod sa panahon na daing katapusan,” an pagpadagos kan salmista. “Huli ta si Jehova mamomoton sa hustisya, asin dai nia pababayaan an saiyang mga maimbod.”​—Salmo 37:​27, 28.

Mangingibabaw an Tunay na Optimismo!

Kumusta man, kun siring, an satong ngapit? An libro kan Biblia na Kapahayagan nagsasabi sa sato manongod sa “mga bagay na kaipuhan na mangyari sa dai na mahahaloy.” Kaiba dian, an nangangabayo sa sarong mapulang kabayo, na naglaladawan sa guerra, ihinahayag na ‘hahaleon an katoninongan sa daga.’​—Kapahayagan 1:1; 6:4.

An sarong popular​—asin optimistiko—​na opinyon sa Britania durante kan Guerra Mundial I iyo na iyan magigin an huring mayor na guerra. Kan 1916, an estadistang Britano na si David Lloyd George mas realistiko. Sia nagsabi: “An guerrang ini, kapareho kan masunod na guerra, sarong guerra na matapos sa guerra.” (Samo an italiko.) Tama sia. An Guerra Mundial II pinarikas sana an pagprodusir nin mas sa diablong mga paagi nin lagduan na paglaglag. Pakalihis nin labing 50 taon, mayo pang naheheling na paglaom na matatapos an guerra.

Sa libro man sanang iyan kan Kapahayagan, mababasa niato an iba pang mga nangangabayo​—na nagsisimbolo sa gutom, damat, asin kagadanan. (Kapahayagan 6:​5-8) An mga iyan dugang pang mga aspekto kan tanda kan mga panahon.​—Mateo 24:​3-8.

Ini daw mga dahelan na magin pesimistiko? Dai nanggad, huli ta an bisyon may ilinaladawan man na “sarong maputing kabayo; asin an nangangabayo dian igwa nin arko; asin may koronang itinao sa saiya, asin sia nagluwas sa pandaog asin sa pagtapos kan saiyang pandadaog.” (Kapahayagan 6:2) Naheheling ta digdi si Jesu-Cristo bilang langitnon na Hade na hinahale an gabos na karatan, na nangangabayo tanganing establisaron an katoninongan asin armoniya sa bilog na kinaban.a

Bilang Designadong Hade, si Jesu-Cristo kan yaon pa digdi sa daga tinokdoan an saiyang mga disipulo na mamibi para sa Kahadean na iyan. Tibaad kamo man tinokdoan na mamibi kan “Ama Niamo,” o Pamibi kan Kagurangnan. Dian kita namimibi na dumatong logod an Kahadean nin Dios, na gibohon logod an saiyang kabotan digdi sa daga kun paanong sa langit.​—Mateo 6:​9-13.

Imbes na maghingoang remedyohan an presenteng palakaw nin mga bagay, si Jehova, na naghihiro paagi sa saiyang Mesiyanikong Hade, si Cristo Jesus, hahaleon iyan nin biyo. Kasalihid kaiyan, si Jehova nagsasabi, “ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso.” Sa pamamahala kan langitnon na gobyernong Kahadean, an daga magigin sarong matoninong, maogmang istaran para sa katawohan, kun saen an buhay asin gibohon magigin nagdadanay na kagayagayahan. “Maggayagaya kamo sagkod lamang sa sakong linalalang,” an sabi ni Jehova. “An ginibo kan saindang mga kamot lubos na gagamiton kan sakuyang mga pinili.” (Isaias 65:​17-​22) Kun ibabasar nindo an saindong paglaom sa ngapit sa dai nasusudyang panuga na iyan, kamo magkakaigwa kan gabos na dahelan na magin optimistiko​—ngonyan asin sagkod lamang!

[Nota sa ibaba]

[Retrato sa pahina 4]

Si H. G. Wells

[Pasasalamat para sa pinagkuanan]

Corbis-Bettmann