“Kun Paano sa Langit, Siring Man sa Daga”

“An Katolikong pagtubod nagtotokdo nin Apat na Pangultimong Bagay: Kagadanan, Paghokom, Impierno, Langit.”​—Catholicism, na an editor iyo si George Brantl.

MANGNOHON na sa listang ini nin mga posibilidad para sa katawohan, dai kaiba an daga. Bako nanggad na makangangalas iyan huling an Iglesia Katolika, arog nin dakol na ibang relihion, naniniwala na pag-abot nin aldaw an daga lalaglagon. Linilinaw ini kan Dictionnaire de Théologie Catholique sa irarom kan puntong “Katapusan kan Kinaban”: “An Iglesia Katolika naniniwala asin nagtotokdo na an presenteng kinaban, na linalang nin Dios asin nag-eeksister, dai magdadanay sagkod lamang.” An dai pa sana nahahaloy na Katolikong katesismo nag-aatubang man kan ideyang ini: “An satong kinaban . . . nakatalagang mawara.” Alagad kun an satong planeta mawawara, paano na an mga panuga kan Biblia manongod sa daganon na paraiso?

An Biblia malinaw na nagtataram manongod sa sarong paraiso sa daga sa ngapit. Halimbawa, ilinadawan kan propetang si Isaias an daga asin an mga nag-eerok dian nin arog kaini: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.” (Isaias 65:21, 22) An mga Judio, na pinanugaan kaini nin Dios, nakakasierto na an saindang daga—sa katunayan, an bilog na daga—sa maabot na aldaw magigin paraiso para sa daing katapusan na pakinabang kan katawohan.

Kinokompirmar kan Salmo 37 an paglaom na ini. “An mga mahoyo mismo makakasadiri kan daga.” (Salmo 37:11) An bersikulong ini dai nagtataram manongod sa temporaryo sanang pagbabalik kan nasyon nin Israel sa Dagang Panuga. An iyo man sanang salmo nagsasabi nin malinaw: “An mga matanos mismo makakasadiri kan daga, asin sinda mag-eerok dian sagkod lamang.” (Salmo 37:29) Mangnohon na sinasabi kan salmong ini na an buhay na daing katapusan sa daga magigin balos sa “mga mahoyo.” Sa sarong Bibliang Pranses, an sarong komento sa bersikulong ini nagsasabi na an terminong “mahoyo” “igwa nin mas mahiwas nanggad na kahulogan kisa sa minalataw sa mga traduksion; kaiba dian an mga kaherakherak, an mga nagsasakit nin makuri o pinepersegir huli ki Yahweh, an mga may mapakumbabang puso na nagpapasakop sa Dios.”

Sa Daga o sa Langit?

Sa Sermon sa Bukid, si Jesus nagtao nin panuga na nagpapagirumdom sa sato kan teksto na kinotar sa enotan: “Maogma an mga mahoyo, huli ta mamanahon ninda an daga.” (Mateo 5:5, Revised Standard Version) Sa giraray, an daga magigin nagdadanay na balos para sa mga maimbod. Minsan siring, malinaw na sinabi ni Jesus sa saiyang mga apostol na maandam sia nin lugar para sa sainda “sa harong kan [saiyang] Ama” asin na sinda makakaibanan nia sa langit. (Juan 14:1, 2; Lucas 12:32; 1 Pedro 1:3, 4) Kun siring, paano niato maninigong saboton an mga panuga manongod sa daganon na mga bendisyon? May halaga pa daw iyan ngonyan, asin kiisay iyan minaaplikar?

An manlaenlaen na intelektuwal sa Biblia nagsasabi na simboliko sana “an daga” na nasambitan sa Sermon sa Bukid ni Jesus asin pati an sa Salmo 37. Sa saiyang mga komento sa Bible de Glaire, an nasabotan ni F. Vigouroux sa mga bersikulong ini “sarong simbolo nin langit asin kan Iglesia.” Para ki M. Lagrange, sarong Pranses na parasiyasat sa Biblia, an bendisyon na ini “bakong panuga na sasadirihon kan mga mahoyo an daga na ineerokan ninda, bakong sa irarom kan presenteng sistema ni sa irarom nin mas sangkap na areglo, kundi an lugar, saen man iyan, na iyo an kahadean kan kalangitan.” Para sa saro pa, iyan “simbolikong paggamit sa may halagang mga bagay na daganon na nanonongod sa langit.” Para sa iba pa, “an dagang ipinanuga, an Canaan, sinasabot sa espirituwal na sentido asin nagrerepresentar sa pinaghalean na lugar sa itaas, an kahadean nin Dios, na an pakasadiri kaiyan garantisado para sa mga mahoyo. Iyan man an kahulogan kan pagkaladawan na ini sa Salmo 37 asin sa iba pang kabtang.” Alagad maninigo daw na tolos niatong ipuera sa mga panuga nin Dios an pisikal na daga?

Sarong Daing Sagkod na Katuyohan Para sa Daga

Sa kapinonan, an daga direktang konektado sa katuyohan nin Dios para sa mga tawo. “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo,” an isinurat kan salmista. (Salmo 115:16) Kun siring, an orihinal na katuyohan nin Dios para sa katawohan konektado sa daga, bakong sa langit. Itinao ni Jehova sa enot na tawong mag-agom an sugo na pahiwason an hardin nin Eden tanganing makalakop sa daga. (Genesis 1:28) An katuyohan na ini bakong temporaryo. Kinompirmar ni Jehova sa saiyang Tataramon na an daga magdadanay sagkod lamang: “May kapag-arakian na minaagi, asin may kapag-arakian na minaabot; tara an daga nagdadanay sagkod sa panahon na daing talaan.”—Eclesiastes 1:4; 1 Cronica 16:30; Isaias 45:18.

An mga panuga nin Dios dai noarin man nalilingawan, huli ta sia an Kaharohalangkawe, asin iginagarantiya nia na maootob an mga iyan. Ginagamit an natural na siklo nin tubig bilang ilustrasyon, ipinapaliwanag kan Biblia na segurado an pagkaotob kan mga panuga nin Dios: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, . . . magigin siring man an sakong tataramon [tataramon nin Dios] na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an ikinakaogma kong marhay, asin iyan siertong magigin mapanggana sa sakuyang sinobolan kaiyan.” (Isaias 55:10, 11) An Dios nanunuga sa mga tawo. Tibaad nagkapirang panahon an lumihis bago maotob an mga panugang iyan, alagad dai iyan nalilingawan. An mga iyan “mabalik” sa saiya na nahaman an gabos na sinabi nia.

‘Ikinaogmang marhay’ nanggad ni Jehova an paglalang kan daga para sa katawohan. Sa katapusan kan ikaanom na aldaw nin paglalang, sinabi nia na an gabos “marahayon.” (Genesis 1:31) An pagkaliwat kan daga na magin nagdadanay na paraiso kabtang kan katuyohan nin Dios na dai pa naootob. Minsan siring, an mga panuga nin Dios ‘dai mabalik sa saiya na mayong nahaman.’ Maootob an gabos na panuga manongod sa sangkap na buhay sa daga, kun saen an mga tawo mabubuhay nin daing sagkod sa katoninongan asin katiwasayan.—Salmo 135:6; Isaias 46:10.

Siertong Maootob an Katuyohan nin Dios

Dahel sa kasalan kan enot niatong mga magurang, si Adan asin Eva, temporaryong napondo an orihinal na katuyohan nin Dios na gibohon an daga na sarong paraiso. Pagkatapos kan kasumbikalan ninda, pinahale sinda sa hardin. Sa siring, nawara ninda an pribilehio na magkaigwa nin kabtang sa kaotoban kan katuyohan nin Dios na magkaigwa nin sangkap na mga tawong maistar sa sarong paraisong daga. Sa ibong kaiyan, an Dios naggibo nin mga areglo tanganing maotob an saiyang katuyohan. Paano?—Genesis 3:17-19, 23.

An situwasyon sa Eden kapareho kan situwasyon nin sarong tawo na nagpoon na magtogdok nin harong sa sarong marahayon na lote. Pagkatapos pa sana niang ibugtak an pundasyon, may saro na uminabot asin rinaot iyan. Imbes na bayaan an saiyang proyekto, guminibo an tawong iyan nin lakdang tanganing seguradohon na matatapos an harong. Dawa kun an dagdag na trabahong ini may kalabot na ekstrang gastos, daing duda na matatapos nanggad an naponan na proyekto.

Siring man, an Dios naggibo nin mga areglo tanganing seguradohon na maootob an saiyang katuyohan. Dai nahaloy pagkatapos na magkasala an enot niatong mga magurang, nag-anunsiar sia nin paglaom para sa mga gikan ninda—sarong “banhi” na maremedyo kan danyos na nagibo. Sa pag-otob kan hulang ini, an nagin pangenot na kabtang kan banhi iyo an Aki nin Dios, si Jesus, na nagdigdi sa daga asin itinao an saiyang buhay bilang atang tanganing balukaton an katawohan. (Galacia 3:16; Mateo 20:28) Sa oras na buhayon liwat pasiring sa langit, si Jesus an magigin Hade sa Kahadean. Sa pangenot, sia an mahoyo na magmamana kan daga kaiba kan piniling mga maimbod na binuhay liwat pasiring sa langit tanganing magin kairibang namamahala sa Kahadean na ini. (Salmo 2:6-9) Pag-abot nin panahon, an gobyernong ini an mamamahala sa mga aktibidad sa daga tanganing otobon an orihinal na katuyohan nin Dios asin gibohon an daga na magin sarong paraiso. Dai mabilang na minilyon na mahoyo an ‘magmamana kan daga’ sa sentido na makikinabang sinda sa pamamahala kan Kahadean na ini na sakop ni Jesu-Cristo asin kan saiyang kairibang namamahala.—Genesis 3:15; Daniel 2:44; Gibo 2:32, 33; Kapahayagan 20:5, 6.

“Kun Paano sa Langit, Siring Man sa Daga”

Nasambitan an pagliligtas na ini na may duwang kaaabtan, langitnon asin daganon, sa sarong bisyon na naheling ni apostol Juan. Nakaheling sia nin mga hade sa langitnon na mga trono na pinili sa tahaw kan maimbod na mga disipulo ni Cristo. May espesipikong sinasabi an Biblia mapadapit sa kairibang ini ni Cristo na “sinda mamamahala bilang mga hade sa daga.” (Kapahayagan 5:9, 10) Mangnohon an duwang aspekto sa pag-otob kan katuyohan nin Dios—sarong daga na ibinalik sa dati sa irarom kan paggiya nin sarong langitnon na Kahadean na kompuesto ni Jesu-Cristo asin kan saiyang kairibang paramana. An gabos na areglong ini nin Dios nagpapagin posible kan pangultimong pagbabalik sa dati kan Paraiso sa daga kaoyon kan orihinal na katuyohan nin Dios.

Sa saiyang modelong pamibi, inimbitaran ni Jesus an saiyang mga disipulo na mamibi na logod gibohon an kabotan nin Dios “kun paano sa langit, siring man sa daga.” (Mateo 6:9, 10) May kahulogan daw an mga tataramon na ini kun an daga malalaglag o iyan saro sanang simbolo kan langit? Siring man, rasonable daw kun an gabos na matanos mapalangit? An kabotan nin Dios para sa daga malinaw nanggad na naheheling sa Kasuratan, poon sa pagkasaysay kan paglalang sagkod sa mga bisyon sa libro nin Kapahayagan. An daga magigin kun ano an katuyohan nin Dios para dian—sarong paraiso. Ini an kabotan na ipinanuga nin Dios na ootobon nia. An mga maimbod sa daga namimibi na logod maotob an kabotan na iyan.

An buhay na daing katapusan sa daga iyo an orihinal na katuyohan kan Kaglalang, an Dios na ‘dai nagliliwat.’ (Malaquias 3:6; Juan 17:3; Santiago 1:17) Sa laog nin labi nang sarong siglo, ipinaliwanag kan magasin na ini, An Torrengbantayan, an duwang aspektong ini sa pag-otob kan katuyohan nin Dios. Ini an nagpangyaring masabotan niato an mga panuga manongod sa pagbabalik sa dati kan daga na sinasabi sa Kasuratan. Iniimbitaran mi kamo na siyasaton nin orog pa an bagay na iyan, magsalang paagi sa pakikipag-olay sa mga Saksi ni Jehova o paagi sa pagkontak sa kagpublikar kan magasin na ini.

[Ritrato sa pahina 4]

An Biblia malinaw na nagtataram manongod sa pag-establisar sa ngapit kan Paraiso sa daga

[Ritrato sa pahina 7]

May kahulogan daw an modelong pamibi ni Jesus kun an daga lalaglagon?