Taano ta Dapat Magpabawtismo?

1-2. Sa parati, ano an nangyayari pag may binabawtismuhan, asin ano an pag-uulayan ta sa artikulong ini?

NAKAHILING ka na daw nin sarong grupo nin mga kandidato sa bawtismo? Madadangog mo an kumbiksiyon sa saindang mga boses mantang sinisimbag an duwang hapot bago sinda bawtismuhan. Mahihiling mo an saindang mga kapamilya asin mga amigo na ugmahon na marhay para sa sainda. Pagkatapos na mailubog sa tubig an mga kandidato, madadangog mo an paralakpakan, asin mahihiling mo an kaugmahan sa saindang mga lalawgon. Kun kukuanon an average, rinibo kada semana an naggigibo kan lakdang na iyan, nagdudusay kan saindang buhay ki Jehova, asin nagpapabawtismo bilang saiyang mga Saksi.

² Kumusta man ika? Kun pinag-iisipan mo an pagpabawtismo, espesyal na marhay ka huling sa maraot na kinaban na ini saro ka sa “naghahanap ki Jehova.” (Sal. 14:1, 2) An artikulong ini ginibo para saimo, ika man hoben o may edad na. Alagad para man sa sato na mga bawtisado na, gusto ta man na pakusugon an satong determinasyon na paglingkudan si Jehova sagkod pa man. Kaya pag-ulayan ta an tulo sa kadakul na rason kun taano ta gusto tang maglingkod ki Jehova.

3. Taano ta namumutan kan mga lingkod ni Jehova an katotoohan asin katanusan? (Salmo 119:128, 163)

³ Ipinagbuot ni Jehova sa saiyang banwaan na “kamutan . . . an katotoohan.” (Zac. 8:19) Sinadol ni Jesus an saiyang mga parasunod na hanapon an katanusan. (Mat. 5:6) Nangangahulugan ini na an saro kaipuhan na magkaigwa nin makusog na pagmawot na gibuhon kun ano an tama, marahay, asin malinig sa paghiling nin Diyos. Namumutan mo daw an katotoohan asin katanusan? Sigurado kami na iyo. Ikinakaungis mo an kaputikan asin an gabos na bagay na sala asin maraot. (Basahon an Salmo 119:128, 163.) An pagputik pag-arog ki Satanas, an tagapamahala kan kinaban na ini. (Juan 8:44; 12:31) An saro sa katuyuhan ni Satanas iyo na pakarauton an banal na pangaran kan Diyos na Jehova. Puon pa kan rebelyon sa Eden nagpapalakop na si Satanas nin mga kaputikan manungod sa satong Diyos. Pinapaluwas niya na si Jehova makasadiri asin maraot na tagapamahala na may ipinapanguring marahay na bagay sa mga tawo. (Gen. 3:1, 4, 5) Huli sa mga kaputikan na iyan manungod ki Jehova, padagos na rinaraot ni Satanas an isip asin puso kan mga tawo. Pag pinili kan saro na dai “kamutan . . . an katotoohan,” puwede siyang impluwensiyahan ni Satanas na gumibo nin gabos na klase nin bakong matanos asin maraot na mga gibo.—Roma 1:25-31.

4. Paano pinapatunayan ni Jehova na siya “an Diyos nin katotoohan”? (Hilingon man an ritrato.)

⁴ Si Jehova “an Diyos nin katotoohan” asin bulaos niyang itinutukdo an katotoohan sa mga namumuot sa saiya. (Sal. 31:5) Sa paggibo kaiyan, tinatabangan niya sinda na makatalingkas sa mga kaputikan ni Satanas. Tinutukduan man ni Jehova an saiyang mga lingkod na magin onesto asin matanos. Huli kaiyan mas nagkakaigwa sinda nin dignidad asin panglaog na katuninungan. (Tal. 13:5, 6) Arog man daw kaiyan an ginibo niya saimo mantang nag-aadal ka nin Bibliya? Nanudan mo na an dalan ni Jehova iyo an pinakamarahay para sa gabos na tawo asin para sa saimo mismo. (Sal. 77:13) Kaya gusto mong manindugan sa katanusan nin Diyos. (Mat. 6:33) Gusto mong depensahan an katotoohan asin tumabang na pahimutikan an pagpakaraot manungod sa satong Diyos, si Jehova. Paano mo iyan magigibo?

5. Ano an puwede mong gibuhon para manindugan sa katotoohan asin katanusan?

⁵ Puwede mong pilion an paagi nin pamumuhay na garo man sana sinasabi mo: “Isinisikwal ko an mga kaputikan ni Satanas, asin sinusuportaran ko an katotoohan. Gusto kong si Jehova an sakuyang Soberano, asin gusto kong gibuhon kun ano an sinasabi niyang tama.” Paano mo iyan magigibo? Dumulok ki Jehova sa pamibi asin idusay sa saiya an saimong buhay dangan ipahayag sa publiko an saimong pagdusay paagi sa pagpapabawtismo. An pagkamuot sa kun ano an totoo asin tama sarong mapuwersang motibasyon para magdesisyon na magpabawtismo.

6. Anong mga dahilan an itinatao sa saimo kan Salmo 45:4 para mamutan si Jesu-Cristo?

⁶ Taano ta namumutan mo si Jesu-Cristo? Mangnuhon an pira sa nakakapahirong dahilan na mababasa sa Salmo 45:4 (Basahon.) Sinusuportaran ni Jesus an katotoohan, kapakumbabaan, asin katanusan. Kun namumutan mo an katotoohan asin katanusan, natural sana na mamutan mo man si Jesu-Cristo. Pag-isipan kun paano pusuan na dinepensahan ni Jesus kun ano an totoo asin tama. (Juan 18:37) Minsan siring, paano sinuportaran ni Jesus an kapakumbabaan?

7. Ano an nagustuhan mo sa kapakumbabaan ni Jesus?

⁷ Sinusuportaran ni Jesus an kapakumbabaan paagi sa halimbawa niya. Halimbawa, pirmi niyang itinatao an gabos na kamurawayan sa saiyang Ama, nungka sa saiyang sadiri. (Mar. 10:17, 18; Juan 5:19) Ano an namamati mo sa siring na kapakumbabaan? Dai ka daw kaiyan napapahiro na kamutan an aki nin Diyos asin magsunod sa saiya? Siyertong iyo. Taano ta mapakumbaba si Jesus? Huling namumutan asin inaarog niya an saiyang Ama, na mapakumbaba. (Sal. 18:35; Heb. 1:3) Dai ka daw napaparani ki Jesus, na perpektong ipinapahiling an mga kuwalidad ni Jehova?

8. Taano ta namumutan ta si Jesus bilang satong Hadi?

⁸ Namumutan ta si Jesus bilang satong Hadi huling siya an pinakamarahay na Tagapamahala. Si Jehova mismo an nagsanay sa saiyang Aki asin nagnombra para mamahala. (Isa. 50:4, 5) Pag-isipan man an mapagsakripisyong pagkamuot na ipinahiling ni Jesus. (Juan 13:1) Bilang saimong Hadi, maninigo nanggad na kamutan mo si Jesus. Ipinaliwanag niya na an mga tunay na namumuot sa saiya, idtong mga inaapod niyang amigo, ipinapahiling an saindang pagkamuot paagi sa pagsunod sa saiyang pagbuot. (Juan 14:15; 15:14, 15) Dakulang onra nanggad na magin amigo kan aki ni Jehova!

9. Ano an pagkakaagid kan bawtismo kan mga Kristiyano sa bawtismo ni Cristo?

⁹ An saro sa mga pagbuot ni Jesus sa saiyang mga parasunod iyo an magpabawtismo. (Mat. 28:19, 20) Nagpahiling siya nin arugan. Sa nagkapirang paagi, may pagkakalain an bawtismo niya asin an bawtismo kan saiyang mga parasunod. (Hilingon an kahon na “Ano an Pagkakalain kan Bawtismo ki Jesus Asin kan Bawtismo kan Saiyang mga Parasunod?”) Pero sa ibang paagi, may pagkakaagid iyan. Paagi sa pagpabawtismo, iprinesentar ni Jesus an saiyang sadiri para gibuhon an kabutan kan saiyang Ama. (Heb. 10:7) Sa kaparehong paagi, nagpapabawtismo an mga parasunod ni Cristo bilang pagpapahayag sa publiko na idinusay na ninda an saindang sadiri sa Diyos na Jehova. Nakapokus na ngunyan an saindang buhay sa paggibo kan saiyang kabutan, bako kan sadiri nindang kabutan. Kaya sinusunod ninda an halimbawa kan saindang Kagurangnan.

10. Taano ta an pagkamuot mo ki Jesus makakamotibar sa saimo na magpabawtismo?

¹⁰ Nagtutubod ka na si Jesus an bugtong na Aki ni Jehova asin na siya an Hadi na ninombrahan nin Diyos para mamahala sa sato. Aram mo na si Jesus mapakumbaba asin perpektong inaarog an saiyang Ama. Naaraman mo na pinakakan niya an mga nagugutom, rinanga an mga pinangluluyahan nin buot, asin pinaumayan pa ngani an mga may hilang. (Mat. 14:14-21) Nahihiling mo kun paano niya ginigiyahan ngunyan an saiyang kongregasyon. (Mat. 23:10) Asin aram mo na urog pa diyan an gigibuhon niya sa maabot na panahon bilang Hadi kan Kahadian nin Diyos. Paano mo maipapahiling na namumutan mo siya? Paagi sa pagsunod sa halimbawa niya. (Juan 14:21) Puwede mong punan na gibuhon iyan paagi sa pagdusay kan saimong sadiri ki Jehova asin pagpabawtismo.

11. Ano an masasabi mong pinakaimportanteng dahilan para magpabawtismo, asin taano?

¹¹ Ano an pinakaimportanteng dahilan para magpabawtismo? Ihinayag ni Jesus kun arin na tugon nin Diyos an panginot sa gabos, sa pagsabing: “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip pati sa bilog mong kusog.” (Mar. 12:30) Arog daw kaiyan an pagkamuot mo sa Diyos?

12. Taano ta namumutan mo si Jehova? (Hilingon man an ritrato.)

¹² Kadakul nin dahilan para mamutan si Jehova. Halimbawa, nasabutan mo na siya “an burabod nin buhay” asin na siya an Paratao kan “lambang marahay na balaog asin [kan] lambang perpektong regalo.” (Sal. 36:9; Sant. 1:17) An lambang marahay na bagay na igwa ka, hali sa satong bukas-palad asin mamumuton na Diyos.

13. Taano ta an pantubos sarong marahayon na regalo?

¹³ An pantubos sarong marahayon na regalo na itinao ni Jehova sa sato. Taano ta nasabi ta iyan? Isipa kun gurano kadayupot si Jehova asin an saiyang Aki. Sinabi ni Jesus: “Namumutan ako kan Ama” asin “namumutan ko an Ama.” (Juan 10:17; 14:31) An pagigin dayupot ninda sa lambang saro lalo pang kuminusog sa paglihis nin binilyon na taon na magkaibanan sinda. (Tal. 8: 22, 23, 30) Kaya isipa kun gurano kakulog para sa Diyos na itugot na magsakit asin magadan an saiyang Aki. Namumutan na marhay ni Jehova an mga tawo—kaiba ka—kaya andam siya na itao an namumutan niyang Aki bilang atang tanganing ika asin an iba mabuhay nin daing katapusan. (Juan 3:16; Gal. 2:20) Mayo nang ibang dahilan na maurog pa diyan para mamutan an Diyos.

14. Ano an pinakamagayon na pasuhan sa buhay na mapipili mo?

¹⁴ Mas lalo mong namumutan si Jehova mantang mas nakakanuod ka manungod sa saiya. Siguradong gusto mong magin dayupot sa saiya ngunyan asin sagkod pa man. Asin magigibo mo iyan. Mabuot ka niyang dinadagka na paugmahon an puso niya. (Tal. 23:15, 16) Magigibo mo iyan bako lang paagi sa tataramon kundi paagi man sa gibo. An paagi nin paggamit mo sa saimong buhay magpapahiling na tunay mong namumutan si Jehova. (1 Juan 5:3) Iyan nanggad an pinakamagayon na pasuhan sa buhay na mapipili mo.

15. Paano mo maipapahiling an pagkamuot mo ki Jehova?

¹⁵ Paano mo maipapahiling an pagkamuot mo ki Jehova? Inot, magdulot nin sarong espesyal na pamibi na diyan idinudusay mo an saimong sadiri sa iyo sanang tunay na Diyos. (Sal. 40:8) Dangan, ipahayag sa publiko an pagdusay mong iyan paagi sa pagpabawtismo. Arog kan pinag-ulayan ta sa kapinunan kan artikulong ini, iyan magigin maugma asin mahalagang pangyayari sa saimong buhay. Pupunan mo an sarong bagong buhay, bako para sa saimong sadiri, kundi para ki Jehova. (Roma 14:8; 1 Ped. 4:1, 2) Garo baga sarong dakulaon na desisyon iyan, asin iyo man talaga. Pero binubukasan kaiyan an dalan pasiring sa pinakamarahay na buhay. Paano?

16. Arog kan ipinapahiling kan Salmo 41:12, paano ni Jehova babalusan an mga nagdusay kan saindang buhay para paglingkudan siya?

¹⁶ Si Jehova an pinakabukas-palad na Persona. Ano man an itao mo sa saiya, pirming mas dakul an itatao niya saimo bilang balos. (Mar. 10:29, 30) Itatao niya sa saimo an pinakamarahay, pinakamaugma, asin pinakanakakakontentong buhay na posible, dawa ngunyan sa magagadanon nang lumang kinaban na ini. Asin kapinunan pa sana iyan. Dai dapat matapos an buhay na pupunan mo pag ika mabawtismuhan. Puwede mong padagos na paglingkudan an saimong namumutan na Ama sagkod pa man. An pagkamuot nindo sa lambang saro padagos na magigin makusog, asin arog niya, puwede kang mabuhay sagkod sa panahon na daing katapusan.—Basahon an Salmo 41:12.

17. Ano an puwede mong itao ki Jehova na mayo pa siya?

¹⁷ Pag idinusay mo an saimong buhay sa Diyos asin nagpabawtismo, may pribilehiyo ka na itao an sarong mahalagang marhay na bagay sa saimong Ama. Itinao niya sa saimo an lambang marahay na bagay, an lambang maugmang pangyayari sa saimong buhay na naeksperyensiyahan mo kasuarin man. Bilang balos, puwede mong itao sa Kagsadiri kan kalangitan asin daga an sarong bagay na mayo pa siya—an saimong gikan sa buot asin maimbod na paglilingkod. (Job 1:8; 41:11; Tal. 27:11) May ibang marahay na paagi pa daw na magagamit mo an saimong buhay? Iyo, an pagkamuot mo ki Jehova an pinakamarahay na dahilan para magpabawtismo.

18. Anong mga hapot an puwede mong pag-isipan?

¹⁸ Ano ngunyan an isisimbag mo sa hapot na, Mapabawtismo ka na daw? Ika sana an makakasimbag kaiyan. Pero tibaad makatabang kun ihahapot mo sa saimong sadiri, ‘Ano pa an nakakaulang?’ (Gibo 8:36) Girumduma an tulong dahilan na pinag-ulayan ta. Inot, namumutan mo an katotoohan asin katanusan. Haputon an saimong sadiri, ‘Gusto ko daw mahiling an aldaw na an gabos nagtataram nin katotoohan asin ginigibo kun ano an tama?’ Ikaduwa, namumutan mo si Jesu-Cristo. Haputon an saimong sadiri, ‘Gusto ko daw na an Aki nin Diyos an magin sakuyang Hadi, asin gusto ko daw na sunudon an saiyang halimbawa?’ Ikatulo, urog sa gabos, namumutan mo si Jehova. Haputon an saimong sadiri, ‘Gusto ko daw na paugmahon an puso ni Jehova paagi sa paglilingkod sa saiya bilang sakuyang Diyos?’ Kun iyo an simbag mo sa mga hapot na iyan, taano ta dai pa magpabawtismo? Ano pa an nakakaulang?—Gibo 16:33.

19. Taano ta dai ka dapat mag-alangan na magpabawtismo? Iilustrar. (Juan 4:34)

¹⁹ Kun nag-aalangan kang magpabawtismo, pag-isipan an ilustrasyon na ginamit ni Jesus. (Basahon an Juan 4:34.) Mangnuhon na ikinumparar ni Jesus sa kakanon an paggibo kan kabutan kan saiyang Ama. Taano? Huling an kakanon para sa ikakarahay ta. Aram ni Jesus na an gabos na ipinapagibo sa sato ni Jehova para sa ikakarahay ta. Habo ni Jehova na gumibo kita nin ano man na makakaraot sa sato. Kaiba daw sa kabutan ni Jehova sa saimo an magpabawtismo? Iyo. (Gibo 2:38) Kun siring, makakapagtiwala ka na para sa ikakarahay mo an pagsunod sa pagbuot na magpabawtismo. Kun dai ka ngani nag-aalangan na kakanon an sarong masiramon na kakanon, taano ta mag-aalangan ka na magpabawtismo?

20. Ano an pag-uulayan ta sa sunod na artikulo?

²⁰ Ano pa an nakakaulang? Dakul an tibaad magsimbag, “Dai pa ako handa.” Totoo, an desisyon na idusay mo an saimong sadiri ki Jehova asin magpabawtismo iyo an pinakaimportanteng desisyon na magigibo mo. Kaya kaipuhan mo talagang tawan iyan nin panahon, pag-isipan na marhay, asin pagmaigutan para makuwalipikar. Minsan siring, kun igwa ka nin udok na pagmawot na magpabawtismo, ano an magigibo mo ngunyan para makuwalipikar? Pag-uulayan ta an simbag sa hapot na iyan sa sunod na artikulo.