An “Templo” Asin an “Namamayo” Ngonyan

“Kun dapit sa namamayo sa tahaw ninda, paglaog ninda, maninigo siang lumaog; asin pagluwas ninda, maninigo siang lumuwas.”—EZEQUIEL 46:10.

1, 2. Anong importanteng marhay na katotoohan an nakatatabang sa sato na ikahayag an dakol sa kahulogan kan bisyon ni Ezequiel kan templo?

AN NAGKAPIRANG rabi kan suanoy dai biyong kontento sa librong Ezequiel. Segun sa Talmud, an nagkapira sa sainda inisip pa nganing haleon an libro sa canon kan Banal na Kasuratan. Sinda partikularmenteng nasakitan sa pag-interpretar kan bisyon sa templo asin sinabi ninda na iyan dai kayang saboton nin tawo. An ibang nag-espesyalisar sa Biblia naribong sa bisyon ni Ezequiel kan templo ni Jehova. Kumusta man kita?

² Poon kan pagbabalik sa dati kan dalisay na pagsamba, binendisyonan ni Jehova an saiyang banwaan nin dakol na silyab nin espirituwal na pakarorop, kaiba an pakamansay sa kun ano an espirituwal na templo nin Dios—an arog-templong areglo ni Jehova para sa dalisay na pagsamba.a An importanteng marhay na katotoohan na ini nakatatabang sa sato na ikahayag an dakol sa kahulogan kan bisyon ni Ezequiel kan templo. Mas maingat niatong estudyaran an apat na elemento kan bisyon na ini—an templo, an kabilogan na grupo nin mga saserdote, an namamayo, asin an daga. Ano an kahulogan kan mga ini ngonyan?

An Templo Asin Kamo

 3. Ano an nanonodan niato sa halangkawon na kisame asin mga inukit sa lanob sa mga entrada pasiring sa templo?

³ Imahinara na kita namamasyar sa templong ini sa bisyon. Kita nagdolok saka nagsakat sa pitong tangga pasiring sa saro kan darakulaon na tata. Sa laog kan entradang ini, kita minatingag na may hararom na paggalang. An kisame kaiyan labing 30 metros an langkaw! Sa siring ipinagigirumdom sa sato na an mga pamantayan sa paglaog sa areglo ni Jehova para sa pagsamba halangkawon. An banaag nin liwanag hale sa mga bintana pinaliliwanagan an mga inukit sa lanob na kahoy nin palma, na ginagamit sa Kasuratan na magladawan sa pagigin tanos. (Salmo 92:12; Ezequiel 40:14, 16, 22) An sagradong lugar na ini para sa mga tanos sa moral asin sa espirituwal. Kaoyon kaiyan, boot niatong magdanay na tanos tangani na akoon ni Jehova an satong pagsamba.—Salmo 11:7.

 4. Sairisay an dai pinalalaog sa templo, asin ano an itinotokdo kaini sa sato?

⁴ Sa lambang lado kan pasilyo, may tolong kuarto para sa mga bantay. Palalaogon daw kita sa templo kan mga bantay? Sinasabi ni Jehova ki Ezequiel na mayo nin taga ibang daga na “bakong turi sa puso” na makalalaog. (Ezequiel 40:10; 44:9) Ano an kahulogan kaiyan? An inaako sana nin Dios na mga nagsasamba iyo an namomoot sa saiyang mga ley asin namumuhay oyon dian. (Jeremias 4:4; Roma 2:29) Inaako nia nin maogma an mga siring na lumaog sa saiyang espirituwal na tolda, an saiyang harong nin pagsamba. (Salmo 15:1-5) Poon kan ibalik sa dati an dalisay na pagsamba kan 1919, an daganon na organisasyon ni Jehova sinorog asin gradwal na lininaw an saiyang moral na mga ley. An mga tuyo na habong kumuyog dai na inaako nin maogma na makiasosyar sa saiyang banwaan. Ngonyan, an basado sa Biblia na pagtitiwalag sa mga paragibo nin sala na habong magsolsol nagserbing papagdanayon na malinig asin dalisay an satong pagsamba.—1 Corinto 5:13.

 5. (a) Ano an mga pagkakaagid kan bisyon ni Ezequiel saka kan bisyon ni Juan na nasusurat sa Kapahayagan 7:9-15? (b) Sa bisyon ni Ezequiel, sairisay an ilinaladawan kan 12 tribo na nagsasamba sa patyong nasa luwas?

⁵ An pasilyo pasiring sa patyong nasa luwas na duman an banwaan nagsasamba saka nag-oomaw ki Jehova. Ipinagigirumdom kaini sa sato an bisyon ni apostol Juan kan “dakulang kadaklan” na nagsasamba ki Jehova “aldaw asin banggi sa saiyang templo.” An mga kahoy na palma maheheling pareho sa duwang bisyon. Sa bisyon ni Ezequiel an mga iyan samno sa mga lanob kan entrada. Sa bisyon ni Juan an mga nagsasamba may mga sanga nin palma sa saindang kamot, na nagsisimbolo kan saindang kagayagayahan sa pag-omaw ki Jehova asin sa pagsabat ki Jesus bilang saindang Hade. (Kapahayagan 7:9-15) Sa konteksto kan bisyon ni Ezequiel, an 12 tribo nin Israel naglaladawan sa “ibang karnero.” (Juan 10:16; ikomparar an Lucas 22:28-30.) Kamo daw saro man sa nakanonompong nin kagayagayahan sa pag-omaw ki Jehova paagi sa pagbalangibog kan saiyang Kahadean?

 6. Ano an katuyohan kan mga komedor na yaon sa patyong nasa luwas, asin ini puedeng magpagirumdom sa mga kabilang sa ibang karnero kan anong pribilehio?

⁶ Mantang kita namamasyar sa patyong nasa luwas, naheheling niato an 30 komedor na dian kinakakan kan banwaan an saindang gikan sa boot na mga dolot. (Ezequiel 40:17) Ngonyan, an mga kabilang sa ibang karnero dai nagdodolot nin mga atang na hayop, alagad dai sinda minaduman sa espirituwal na templo na daing dara. (Ikomparar an Exodo 23:15.) Isinurat ni apostol Pablo: “Paagi [ki Jesus] danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran. Dugang pa, dai nindo paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.” (Hebreo 13:15, 16; Oseas 14:2) Dakulang pribilehio na magdolot ki Jehova nin siring na mga atang.—Talinhaga 3:9, 27.

 7. Ano an sinisierto sa sato kan pagsokol kan templo?

⁷ Nagheheling si Ezequiel mantang sinosokol nin sarong anghel an templong ini sa bisyon. (Ezequiel 40:3) Kaagid kaiyan, sinabihan si apostol Juan: “Tindog asin sokola an santuaryo kan templo nin Dios asin an altar patin an mga nagsasamba dian.” (Kapahayagan 11:1) Ano an kahulogan kan pagsokol na ini? Sa duwang kaso ini minalataw na nagserbing sarong garantiya, sarong tanda na mayo nin makaoolang ki Jehova sa pag-otob kan saiyang mga katuyohan mapadapit sa dalisay na pagsamba. Siring man ngonyan, masisierto niato na mayo nin ano man—maski an maringis na oposisyon nin makapangyarihan na mga gobyerno—na makaoolang sa pagbabalik sa dati kan dalisay na pagsamba.

 8. Sairisay an minalaog sa mga tata pasiring sa patyong nasa laog, asin ano an ipinagigirumdom sa sato kan mga tatang ini?

⁸ Mantang binabagtas ta an patyong nasa luwas, naheheling niato na may tolong tata na pasiring sa patyong nasa laog; an mga tatang nasa laog kalinya saka kapareho kadakula kan mga tatang nasa luwas. (Ezequiel 40:6, 20, 23, 24, 27) Mga saserdote sana an puedeng maglaog sa patyong nasa laog. An mga tatang nasa laog nagpapagirumdom sa sato na an mga linahidan dapat na makaabot sa mga pamantayan saka ley nin Dios, alagad an iyo man sanang mga pamantayan saka ley naggigiya sa gabos na tunay na Kristiano. Alagad ta ano an trabaho kan mga saserdote, na may anong kahulogan ngonyan?

Sarong Fiel na Kabilogan na Grupo nin mga Saserdote

9, 10. Paano an “makahadeng kabilogan na grupo nin mga saserdote,” na ipinanganino kan grupo nin mga saserdote sa bisyon ni Ezequiel, nagtao nin espirituwal na pagtotokdo?

⁹ Kan mga panahon bago kan mga Kristiano, magabat an trabaho kan mga saserdote sa templo. An pagbuno kan mga hayop na iaatang, pagdolot kaiyan sa altar, asin paglingkod sa mga kapwa saserdote saka sa banwaan trabahong mapagal. Alagad igwa pa sinda nin ibang importanteng trabaho. Si Jehova nagboot mapadapit sa mga saserdote: “An sakuyang banwaan maninigo nindang tokdoan sa kalaenan kan banal na bagay asin bakong banal na bagay; asin maninigong ipaaram ninda sa sainda an kalaenan kan bakong malinig asin kan malinig.”—Ezequiel 44:23; Malaquias 2:7.

¹⁰ Inaapresyar daw nindo an magabat na trabaho asin mapakumbabang paglilingkod na ginibo kan mga linahidan bilang sarong grupo, “sarong makahadeng kabilogan na grupo nin mga saserdote,” para sa dalisay na pagsamba? (1 Pedro 2:9) Arog kan kabilogan na grupo nin mga saserdoteng Levita kan suanoy, sinda nangenot sa pagtao nin espirituwal na pagtotokdo, na tinatabangan an mga tawo na masabotan kun ano an malinig saka makawiwili sa mga mata nin Dios asin kun ano an bako. (Mateo 24:45) An siring na pagtotokdo, na minaabot paagi sa mga publikasyon na basado sa Biblia asin Kristianong mga pagtiripon saka kombension, nakatabang sa minilyon na makiulian sa Dios.—2 Corinto 5:20.

11. (a) Paano idinoon kan bisyon ni Ezequiel an halaga nin kalinigan sa parte kan mga saserdote? (b) Sa huring mga aldaw, paano lininigan sa espirituwal na sentido an mga linahidan?

¹¹ Minsan siring, dapat na labi pa sa pagtotokdo sa iba na magin malinig an gibohon kan mga saserdote; dapat na sinda mismo magin malinig. Sa siring, patienot na naheling ni Ezequiel an pagdalisay sa kabilogan na grupo nin mga saserdote sa Israel. (Ezequiel 44:10-16) Kaagid kaiyan, ipinaheheling nin kasaysayan na kan 1918, si Jehova tuminukaw “bilang paradalisay” sa saiyang espirituwal na templo, na sinisiyasat an linahidan na grupo nin mga saserdote. (Malaquias 3:1-5) An mga ibinilang na malinig sa espirituwal o pinagsolsolan an idolatriya kaidto tinogotan na magpadagos sa pribilehiong maglingkod sa saiyang espirituwal na templo. Pero, kapareho nin gabos na iba pa, an indibiduwal na mga linahidan puedeng magin maati—sa espirituwal asin sa moral. (Ezequiel 44:22, 25-27) Kaipuhan sindang magmaigot na magdanay na “daing digta kan kinaban.”—Santiago 1:27; ikomparar an Marcos 7:20-23.

12. Taano ta maninigo niatong apresyaron an trabaho kan mga linahidan?

¹² Puedeng ihapot kan lambang saro sa sato, ‘Inaapresyar ko daw an halimbawang itinao kan mga linahidan sa dakol nindang taon nin fiel na paglilingkod? Inaarog ko daw an saindang pagtubod?’ Marahay na girumdomon kan mga kabilang sa dakulang kadaklan na dai ninda pirmeng makakaibanan digdi sa daga an mga linahidan. Manongod sa mga saserdote sa bisyon ni Ezequiel, sinabi ni Jehova: “Dai nindo sinda pagtawan nin rogaring [na daga] sa Israel: ako an rogaring ninda.” (Ezequiel 44:28) Kaagid kaiyan, an mga linahidan mayo nin daing katapusan na lugar digdi sa daga. Sinda may langitnon na pamana, asin an mga kabilang sa dakulang kadaklan ibinibilang na pribilehio an pagsuportar sa sainda asin pagparigon sa saindang boot mantang sinda yaon pa digdi sa daga.—Mateo 25:34-40; 1 Pedro 1:3, 4.

An Namamayo—Siisay Sia?

13, 14. (a) Taano ta segurado na kabilang sa ibang karnero an namamayo? (b) Siisay an ilinaladawan kan namamayo?

¹³ Ngonyan minalataw an sarong hapot na nakapupukaw nin interes. Kun siring, siisay an irinerepresentar kan namamayo? Mantang sia nasasambitan bilang indibiduwal asin bilang sarong grupo, puede niatong ipamugtak na sia nagrerepresentar nin sarong grupo nin kalalakihan. (Ezequiel 44:3; 45:8, 9) Alagad siisay? Seguradong bakong an mga linahidan. Sa bisyon, sia dayupot na nakikipagtabangan sa kabilogan na grupo nin mga saserdote, alagad bako siang kabilang ninda. Bakong arog kan grupo nin mga saserdote, sia tinawan nin pamana sa daga asin sa siring may ngapit digdi sa daga, bakong sa langit. (Ezequiel 48:21) Dugang pa, sinasabi kan Ezequiel 46:10: “Kun dapit sa namamayo sa tahaw ninda, paglaog [sa patyong nasa luwas kan templo] ninda [an mga tribong bakong saserdote], maninigo siang lumaog; asin pagluwas ninda, maninigo siang lumuwas.” Sia dai minalaog sa patyong nasa laog kundi nagsasamba sa patyong nasa luwas, na minalaog saka minaluwas sa templo kaiba kan banwaan. An mga bagay na ini daing duda na ipinamimidbid an namamayo na kabilang kan dakulang kadaklan kan ibang karnero.

¹⁴ Malinaw nanggad, an namamayo may paninimbagan sa tahaw kan banwaan nin Dios. Sa patyong nasa luwas, sia nagtutukaw sa portiko kan Tata sa Sirangan. (Ezequiel 44:2, 3) Ini tanda nin katongdan nin pangangataman, na kaagid kan sa kamagurangan na lalaki sa Israel na nagtutukaw sa tata kan siudad asin naghohokom. (Rut 4:1-12; Talinhaga 22:22) Siisay sa mga ibang karnero an may mga katongdan nin pangangataman ngonyan? An kamagurangan na may daganon na paglaom na ninombrahan kan banal na espiritu. (Gibo 20:28) Kaya an grupong namamayo inaandam ngonyan sa esperansang maglingkod sa huri sa pag-administrar sa bagong kinaban.

15. (a) Paano an bisyon ni Ezequiel nagtatao nin liwanag sa relasyon sa pag-oltanan kan kamagurangan na kabilang kan dakulang kadaklan asin kan linahidan na grupo nin mga saserdote? (b) Anong pangengenot an ginibo kan linahidan na kamagurangan sa daganon na organisasyon nin Dios?

¹⁵ Pero, ano an relasyon ngonyan sa pag-oltanan kan linahidan na grupo nin mga saserdote asin kan kamagurangan na lalaking iyan na, bilang kabtang kan dakulang kadaklan, naglilingkod sa mga katongdan nin pangangataman? Isinusuherir kan bisyon ni Ezequiel na an kamagurangan na miembro kan dakulang kadaklan may kabtang na nagsusuportar asin mas hababa, mantang an mga linahidan nangengenot sa espirituwal. Taano man? Girumdoma, an mga saserdote sa bisyon tinawan kan paninimbagan na tokdoan an banwaan sa espirituwal na mga bagay. Sinabihan man sinda na magin hokom sa mga kaso dapit sa ley. Saro pa, an mga Levita idinestino sa “mga puesto nin pangangataman” sa mga tata kan templo. (Ezequiel 44:11, 23, 24) Malinaw nanggad, an namamayo kaipuhan na pumasakop sa espirituwal na mga paglilingkod saka pangengenot kan mga saserdote. Kun siring, angay nanggad na sa presenteng panahon an linahidan nangenot sa dalisay na pagsamba. Halimbawa, an mga miembro kan Namamahalang Grupo kan Mga Saksi ni Jehova pinili hale sa sainda. An fiel na linahidan na kamagurangan na iyan dakol nang dekada na sinasanay an nagtatalubong grupong namamayo, na inaandam an may esperansang magin mga miembro kan grupong ini para sa aldaw na ipaniniwala sa sainda an bilog nindang autoridad sa maabot na bagong kinaban nin Dios.

16. Segun sa Isaias 32:1, 2, ano an dapat na igawe nin gabos na kamagurangan?

¹⁶ Anong klaseng paraataman an mga may esperansang magin miembrong ini, na nalilinya sa mga magkakamit nin pinadakulang mga paninimbagan bilang an grupong namamayo? An hula na yaon sa Isaias 32:1, 2 nagsasabi: “Uya! An sarong hade magsasakop para sa katanosan mismo; asin kun manongod sa mga prinsipe, mamamahala sinda bilang mga prinsipe para sa hustisya mismo. Asin an lambang saro kaipuhan na magin siring sa pailihan sa doros asin tagoan sa bagyo, siring sa mga sapa nin tubig sa sarong desierto, siring sa limpoy nin tugdok na kantil sa tagiltil na daga.” An hulang ini naootob ngonyan mantang an Kristianong kamagurangan—linahidan saka ibang karnero—nagmamaigot na protehiran an aripompon sa mga “bagyo” na arog baga kan paglamag saka panluluya kan boot.

17. Ano an maninigong magin pagheling nin Kristianong mga pastor sa saindang sadiri, asin ano an maninigong magin pagheling sa sainda kan aripompon?

¹⁷ An mga terminong “prinsipe” asin “namamayo,” na magkaagid an kahulogan sa Hebreo, dai ginagamit na mga titulo tanganing ilangkaw an mga tawo. Imbes, ilinaladawan kaiyan an paninimbagan na pasan kan kalalakihan na ini sa pag-asikaso sa mga karnero nin Dios. Si Jehova estriktong nagpapatanid: “Tama na iyan, O mga namamayo sa Israel! Halea an kadahasan saka an paghabon, asin giboha an hustisya saka an katanosan mismo.” (Ezequiel 45:9) Marahay na isapuso nin gabos na kamagurangan ngonyan an hatol na iyan. (1 Pedro 5:2, 3) Minimidbid man kan aripompon na itinao ni Jesus an mga pastor bilang “balaog na mga lalaki.” (Efeso 4:8) An saindang mga kualipikasyon sinasabi sa ipinasabong na Tataramon nin Dios. (1 Timoteo 3:1-7; Tito 1:5-9) Kun siring, sinusunod nin mga Kristiano an pangengenot kan kamagurangan.—Hebreo 13:7.

18. Ano an nagkapirang paninimbagan kan may esperansang magin grupong namamayo ngonyan, asin ano an magigin paninimbagan kaiyan sa ngapit?

¹⁸ Kaidtong mga panahon kan Biblia an nagkapirang namamayo dakula an autoridad, an iba mas sadit. Ngonyan, an kamagurangan na kabilang kan dakulang kadaklan laen-laen na marhay an mga paninimbagan. An nagkapira naglilingkod sa sarong kongregasyon; an iba naglilingkod sa dakol na kongregasyon bilang nagbibiaheng mga paraataman; an iba naglilingkod sa bilog na mga nasyon bilang mga miembro kan Komite kan Sanga; an iba direktang nagtatabang sa manlaenlaen na komite kan Namamahalang Grupo. Sa bagong kinaban, si Jesus manombra nin “mga prinsipe sa bilog na daga” tanganing mangenot sa mga nagsasamba ki Jehova digdi sa daga. (Salmo 45:16) Daing duwa-duwa na pipilion nia an dakol kaini sa fiel na kamagurangan ngonyan. Huli ta pinatutunayan kan kalalakihan na ini ngonyan an saindang kakayahan, gugustohon nia na ipagkatiwala sa dakol an mas dakula pang mga pribilehio sa ngapit kun ihayag na nia an katongdan kan grupong namamayo sa bagong kinaban.

An Daga kan Banwaan nin Dios Ngonyan

19. Ano an irinerepresentar kan daga sa bisyon ni Ezequiel?

¹⁹ Ilinaladawan man kan bisyon ni Ezequiel an daga nin Israel na ibinalik sa dati. Ano an irinerepresentar kan aspektong ini kan bisyon? An ibang mga hula sa pagbabalik sa dati nagsabi bago pa na an daga, an Israel, magigin paraiso na arog kan Eden. (Ezequiel 36:34, 35) Ngonyan, kita may “daga” na ibinalik sa dati, asin iyan man, sa sarong sentido, Edeniko. Kaagid kaiyan, kita parateng nagtataram manongod sa satong espirituwal na paraiso. Tinawan nin kahulogan kan An Torrengbantayan an satong “daga” bilang “an rona nin aktibidad” kan piniling banwaan nin Dios.b Saen man an sarong lingkod ni Jehova, sia yaon sa dagang iyan na ibinalik sa dati sagkod na sia naghihingoa na sorogon an tunay na pagsamba paagi sa paglakaw sa gira ni Cristo Jesus.—1 Pedro 2:21.

20. Anong prinsipyo an puede niatong manodan sa “banal na kontribusyon” sa bisyon ni Ezequiel, asin paano niato puedeng iaplikar an prinsipyong ini?

²⁰ Paano man an kabtang kan daga na inaapod na “banal na kontribusyon”? Ini an kontribusyon kan banwaan na suporta sa kabilogan na grupo nin mga saserdote asin sa siudad. Kaagid kaiyan, an “gabos na tawo sa daga” makontribwir nin sarong kabtang nin daga para sa namamayo. Ano an kahulogan kaini ngonyan? Siempre, dai boot sabihon na an banwaan nin Dios pagagabatan nin sinusueldohan na klero. (2 Tesalonica 3:8) Imbes, an suporta na itinatao sa kamagurangan sa pangenot espirituwal. Kabale dian an pagtabang sa gibohon na yaon asin pagpaheling nin may kooperasyon, mapagpasakop na espiritu. Pero, arog kaidtong kaaldawan ni Ezequiel, an kontribusyon na ini itinatao “ki Jehova,” bakong sa siisay man na tawo.—Ezequiel 45:1, 7, 16.

21. Ano an manonodan niato sa pagbanga kan daga sa bisyon ni Ezequiel?

²¹ Bako sanang an namamayo asin an kabilogan na grupo nin mga saserdote an may asignadong lugar sa dagang ini na ibinalik sa dati. An pagbanga kan daga nagpapaheling na an lambang saro sa 12 tribo may seguradong pamana. (Ezequiel 47:13, 22, 23) Kaya an mga kabilang sa dakulang kadaklan bako sanang may lugar sa espirituwal na paraiso ngonyan kundi maako man nin asignasyon na daga kun sinda magmana na nin lugar sa daganon na rona kan Kahadean nin Dios.

22. (a) An siudad sa bisyon ni Ezequiel nagrerepresentar nin ano? (b) Ano an puede niatong manodan sa pagkaigwa nin mga tata kan siudad sa gabos na lado?

²² Ultimo, ano an irinerepresentar kan siudad sa bisyon? Iyan bakong langitnon na siudad, ta iyan yaon sa tahaw nin “sekular” (bakong sagrado) na daga. (Ezequiel 48:15-17) Kaya sierto na iyan bagay na daganon. Bueno, ano an siudad? Bako daw na iyan nagtatao kan ideya nin mga tawo na nagtiripon bilang sarong grupo asin nag-organisar nin sarong bagay na areglado saka organisado? Iyo. Huli kaini, an siudad minalataw na naglaladawan sa daganon na administrasyon na nagtatao nin pakinabang sa gabos na makompuesto sa matanos na daganon na sosyedad. Iyan biyong magpupunsionar sa maabot na “bagong daga.” (2 Pedro 3:13) An mga tata kan siudad sa gabos na lado, saro sa lambang tribo, nag-iilustrar na marhay nin pagigin hayag. Ngonyan, an banwaan nin Dios dai sakop nin dai maaraman kun anong mahinilom, sekretong administrasyon. An may paninimbagan na mga tugang na lalaki kaipuhan na madaling dolokon; aram na marhay nin gabos an mga prinsipyong naggigiya sa sainda. An bagay na an mga tawo hale sa gabos na tribo nagkukultibar kan daga na nagsusuportar sa siudad nagpapagirumdom sa sato na an ibang karnero nagsusuportar, dawa sa materyal na paagi, sa mga areglo sa pag-administrar na ginigibo para sa banwaan nin Dios sa bilog na kinaban.—Ezequiel 48:19, 30-34.

23. Ano an eestudyaran niato sa masunod na artikulo?

²³ Pero paano man an salog na nagbobolos hale sa santuaryo kan templo? An irinerepresentar kaiyan ngonyan asin dagos pa sagkod sa ngapit iyo an magigin topiko kan ikatolo saka pangultimong artikulo sa seryeng ini.

[Mga Nota sa Ibaba]

Mga Puntong Dapat Repasohon

◻ Ano an ilinaladawan kan templo sa bisyon ni Ezequiel?

◻ Sairisay an ilinaladawan kan mga saserdoteng naglilingkod sa templo?

◻ Ano an grupong namamayo, asin ano an nagkapira sa mga paninimbagan kaiyan?

◻ Ano an daga sa bisyon ni Ezequiel, asin sa anong sentido na iyan itinao sa 12 tribo?

◻ Ano an ilinaladawan kan siudad?

[Diagrama/Mapa sa pahina 15]

(Para sa aktuwal na format, helingon an publikasyon)

An pagdistribwir kan daga siring sa pagkaladawan sa bisyon ni Ezequiel

AN DOSENG TRIBO

An Dakulang Dagat

Dagat nin Galilea

Salog nin Jordan

Dagat na Asin

DAN

ASER

NEFTALI

MANASES

EFRAIM

RUBEN

JUDA

AN NAMAMAYO

BENJAMIN

SIMEON

ISACAR

ZABULON

GAD

[Diagrama]

PINADAKULANG RETRATO KAN BANAL NA KONTRIBUSYON

A. “Si Jehova Mismo Yaon Dian” (Jehova-Sama); B. an maproduktong daga kan siudad

Kabtang kan mga Levita

Santuaryo ni Jehova

Kabtang kan mga Saserdote

B A B