Ano an Sinasabi kan Bibliya Manungod sa Natural na mga Kalamidad?
An simbag kan Bibliya
Bako an Diyos an dahilan kan natural na mga kalamidad na nangyayari ngunyan, imbes nagmamakulog siya sa mga tawo na naapektaran kaiyan. Hahalion kan Kahadian nin Diyos an gabos na dahilan nin pagsakit, kaiba na an natural na mga kalamidad. Sa ngunyan, igwa an Diyos nin itinataong pampakusog nin buot sa mga naapektaran kan natural na kalamidad.—2 Corinto 1:3.
Taano ta nakakasigurado kita na bakong padusa hali sa Diyos an natural na mga kalamidad?
Tanda daw kan huring mga aldaw an nangyayaring mga kalamidad?
Paano tinatabangan nin Diyos an mga biktima nin natural na mga kalamidad?
Matatabangan daw kita kan Bibliya na magin andam sa natural na mga kalamidad?
Mga bersikulo sa Bibliya na makakaranga sa mga biktima nin natural na mga kalamidad
Taano ta nakakasigurado kita na bakong padusa hali sa Diyos an natural na mga kalamidad?
An paggamit kaidto nin Diyos sa mga puwersa kan naturalesa iba man kan sa mga nangyayaring natural na mga kalamidad, arog kan mababasa sa Bibliya.
Mayong pinipili an natural na mga kalamidad. Sa kabaliktaran, kan gamiton nin Diyos an mga puwersa nin naturalesa tanganing hukuman an mga maraot, sinigurado niya na mga maraot sana an nagsapo. Halimbawa, kan puhuon nin Diyos an suanoy na mga siyudad nin Sodoma asin Gomora, ilinigtas niya an marahay na tawong si Lot asin an duwa kaining aking babayi. (Genesis 19:29, 30) Nabasa nin Diyos an puso kan mga tawo kan panahon na idto asin an mga maraot sana an saiyang ginadan.—Genesis 18:23-32; 1 Samuel 16:7.
Biglaan o mayong patanid pag minaabot an natural na mga kalamidad. Sa ibong na kampi, nagtatao nin patanid an Diyos sa mga maraot bago niya gamiton an mga puwersa nin naturalesa tumang sainda. An mga tawo na nagdangog sa mga patanid nagkaigwa nin oportunidad na makadulag sa kapahamakan.—Genesis 7:1-5; Mateo 24:38, 39.
Kun minsan, an mga tawo an kawsa kan natural na mga kalamidad. Paano? Paagi sa pagraot ninda sa kapalibutan asin pagtugdok sa mga lugar na delikado sa linog, baha, asin bagyo. (Kapahayagan 11:18) Bako an Diyos an dapat basulon sa epekto kan arog kaiyan na mga kagigibuhan nin tawo.—Talinhaga 19:3.
Tanda daw kan huring mga aldaw an nangyayaring mga kalamidad?
Iyo, ihinula kan Bibliya na magkakaigwa nin mga kalamidad sa “pagtatapos kan sistema nin mga bagay,” o “huring mga aldaw.” (Mateo 24:3; 2 Timoteo 3:1) Halimbawa, mapadapit sa panahon ta, sinabi ni Jesus: “Magkakaigwa nin sunod-sunod na grabeng gutom saka linog sa manlain-lain na lugar.” (Mateo 24:7) Dai mahahaloy, hahalion na nin Diyos sa kinaban an gabos na nagkakawsa nin kulog asin kasakitan, kaiba na an natural na mga kalamidad.—Kapahayagan 21:3, 4.
Paano tinatabangan nin Diyos an mga biktima nin natural na mga kalamidad?
Rinaranga nin Diyos an mga biktima paagi kan saiyang Tataramon, an Bibliya. Sinisiyerto sa sato kan Bibliya na nagmamakulog sa sato an Diyos asin na namamati niya an mga kasakitan na inaagihan ta. (Isaias 63:9; 1 Pedro 5:6, 7) Mahihiling man digdi an saiyang panuga na pag-abot nin panahon mawawara na an natural na mga kalamidad.—Hilingon an “Mga bersikulo sa Bibliya na makakaranga sa mga biktima nin natural na mga kalamidad.”
Ginagamit nin Diyos an saiyang mga parasamba tanganing tabangan an mga biktima. Inaarog kan mga nagsasamba sa Diyos an itinaong halimbawa ni Jesus. Arog kan nasa hula, rarangahon ni Jesus an ‘mga nasasakitan an puso’ asin an ‘gabos na nagtatangis.’ (Isaias 61:1, 2) Naghihinguwa man an mga parasamba nin Diyos na magibo iyan.—Juan 13:15.
Ginagamit man nin Diyos an saiyang mga parasamba tanganing magtao nin praktikal na tabang sa mga biktima nin natural na mga kalamidad.—Gibo 11:28-30; Galacia 6:10.
Mga Saksi ni Jehova na nagtatao nin praktikal na tabang sa mga biktima nin bagyo sa Puerto Rico
Matatabangan daw kita kan Bibliya na magin andam sa natural na mga kalamidad?
Iyo. Dawa ngani an Bibliya bakong manwal tanganing iandam kita sa natural na mga kalamidad, igwa ini nin mga prinsipyo na makakatabang sa sato. Halimbawa:
Patiinot na magplano sa posibleng mangyaring kalamidad. Sinasabi kan Bibliya: “An saro na alisto an isip nahihiling an peligro asin minatago.” (Talinhaga 22:3, NWT) Sarong kadunungan kun may patiinot na kitang plano para sa emerhensiya. Kaiba digdi an pagkaigwa nin emergency kit na talagang magagamit pag igwa nin emerhensiya asin pagpraktis sa pamilya kun sain mahirilingan pag igwa nin kalamidad.
Pahalagahan an buhay kisa sa mga pagsadiri. Sinasabi kan Bibliya: “Mayo kita nin ano man na dinara digdi sa kinaban, asin mayo man kita nin mailuluwas hali digdi.” (1 Timoteo 6:7, 8) Dapat na andam kitang bayaan an satong harong asin mga pagsadiri tanganing makadulag sa peligro. Kaipuhan tang tandaan na mas mahalaga an satong buhay kisa sa ano man na materyal na mga bagay.—Mateo 6:25.