Dai Ikinaoongis ni Jehova an Laglag na Puso

“An mga atang sa Dios nanluluyang espiritu; an pusong laglag asin nanluluya, O Dios, dai mo ikaoongis.”​—SALMO 51:17.

 1. Ano an pagheling ni Jehova sa mga nagsasamba sa saiya na nagkasala nin magabat pero nagsosolsol?

SI Jehova puwedeng ‘olangon nin panganoron an pagdolok sa saiya, tanganing dai makaagi an pamibi.’ (Lamentacion 3:44) Alagad ta boot nia na an saiyang banwaan makadolok sa saiya. Dawa kun an saro sa mga nagsasamba sa saiya magkasala nin magabat pero nagsosolsol, ginigirumdom kan satong langitnon na Ama an karahayan na ginibo kan tawong iyan. Kaya, nasabi ni apostol Pablo sa mga kapwa nia Kristiano: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”​—Hebreo 6:10.

2, 3. Ano an maninigong konsideraron nin Kristianong kamagurangan sa pagtratar sa nagkasalang mga kapagtubod?

² Maninigo man na konsideraron nin kamagurangan na Kristiano an mga taon nin maimbod na paglilingkod na ginibo sa Dios nin mga kapagtubod. Kaiba digdi an banal na paglilingkod nin mga nagsosolsol na nakaginibo nin sala o nagkasala pa ngani nin magabat. Hinahanap nin Kristianong mga pastor an espirituwal na ikararahay kan gabos na nasa aripompon nin Dios.​—Galacia 6:​1, 2.

³ An nagsolsol na parakasala nagkakaipo kan pagkaherak ni Jehova. Alagad ta bako sana iyan an kaipuhan. Ini liniwanag kan mga tataramon ni David sa Salmo 51:​10-19.

Kaipuhan an Malinig na Puso

 4. Taano ta nag-arang si David nin malinig na puso asin bagong espiritu?

⁴ Kun an sarong nagdusay na Kristiano nasa maraot na kamugtakan sa espirituwal huli sa kasalan, ano an tibaad kaipuhan nia apuwera sa pagkaherak asin kapatawadan ni Jehova? Bueno, si David nakimaherak: “Lalangon mo sa sakuya an malinig na puso, O Dios, asin bugtakan mo ako nin bagong espiritu, sarong marigon.” (Salmo 51:10) Malinaw na ini hinagad ni David ta aram nia na nasa puso pa nia an hilig sa magabat na kasalan. Tibaad dai kita maholog sa mga klase nin kasalan na nakasiod ki David mapadapit ki Bat-seba asin Urias, pero kaipuhan niato an tabang ni Jehova tanganing makalikay na padara sa sugot na gumibo nin gaweng kasalan na marhay. Dugang pa, tibaad personal niatong kaipuhan an banal na tabang na haleon sa satong puso an makasalan na mga ugale na arog nin kaaraan asin pagkaongis​—mga krimen na konektado sa paghabon asin paggadan.​—Colosas 3:​5, 6; 1 Juan 3:15.

 5. (a) Ano an boot sabihon kan pagkaigwa nin malinig na puso? (b) Ano an minawot ni David kan sia humagad nin bagong espiritu?

⁵ Hinahagad ni Jehova na an saiyang mga lingkod magkaigwa nin “malinig na puso,” an boot sabihon, malinig na motibo o intension. Sa pakaaram na sia dai nakapaheling nin siring na kalinigan, si David namibi na logod linigan nin Dios an saiyang puso asin ioyon iyan sa banal na mga pamantayan. Gusto man an salmista nin bago, matanos na espiritu, o kaisipan. Kaipuhan nia an espiritu na matabang saiya na labanan an sugot asin marigon na mangapot sa mga pagboot asin prinsipyo ni Jehova.

Kaipuhan an Banal na Espiritu

 6. Taano ta nakimaherak si David na dai paghaleon ni Jehova an banal na espiritu sa saiya?

⁶ Kun nadidesesperar huli sa satong mga sala o kasalan, tibaad mamatean niato na madali na kitang isikwal nin Dios asin haleon sa sato an saiyang banal na espiritu, o puwersa aktiba. Iyan an pagmate ni David, ta sia nakimaherak ki Jehova: “Dai mo ako isikwal sa atubangan kan saimong lalauogon; asin an saimong banal na espiritu O dai mo paghaleon sa sakuya.” (Salmo 51:11) An nagbabasol asin mapakumbabang si David naghona na huli sa saiyang mga kasalan sia bako nang angay na maglingkod ki Jehova. An pagsikwal sa saro sa atubangan kan lalauogon nin Dios mangangahulogan nin pagkawara sa saiya kan pabor, pagranga, asin bendisyon nin Dios. Tanganing makabalik sa espirituwal si David, kaipuhan nia an banal na espiritu ni Jehova. Kun iyan nasa saiya, an hade puwedeng mapagngayongayong humagad nin banal na paggiya tanganing makapaogma ki Jehova, makalilikay sa kasalan, asin makapaghahade na may kadonongan. Mantang aram an saiyang mga kasalan tumang sa Kagtao kan banal na espiritu, tama sana na si David nakimaherak na iyan dai pagkuanon sa saiya ni Jehova.

 7. Taano ta maninigo niatong arangon an banal na espiritu asin likayan na iyan mapamondo?

⁷ Kumusta man kita? Maninigo niatong arangon an banal na espiritu asin dapat tang likayan na iyan mapamondo paagi sa dai pagsunod sa paggiya kaiyan. (Lucas 11:​13; Efeso 4:30) Ta kun dai, puwedeng mawara sato an espiritu asin dai na makapaheling kan itinao nin Dios na mga bunga kaiyan na pagkamoot, kagayagayahan, katoninongan, pakatios, kabootan, karahayan, pagtubod, kabootan, asin pagpopogol sa sadiri. Nangorognang hahaleon ni Jehova Dios an saiyang banal na espiritu sa sato kun kita daing pagsolsol na nagpapadagos na magkasala tumang sa saiya.

Kaogmahan sa Pagliligtas

 8. Kun kita magkasala alagad gustong magkaigwa kan kagayagayahan sa kaligtasan, ano an kaipuhan na nasa sato?

⁸ An nagsolsol na parakasala na nakabalik na sa espirituwal puwede na naman na maggayagaya sa probisyon ni Jehova na kaligtasan. Sa paghimuyawot kaini, si David nakimaherak sa Dios: “Ibalik mo sa sakuya an kaogmahan sa saimong pagliligtas, asin tabangan mo logod ako paagi sa boluntad na espiritu.” (Salmo 51:12) Kanigoan karahay na mag-ogma sa seguradong paglaom sa pagliligtas ni Jehova Dios! (Salmo 3:8) Pakapagkasala tumang sa Dios, si David naghingoang makabalik an kagayagayahan sa Saiyang pagliligtas. Sa nahuring mga panahon, si Jehova nagtagama para sa kaligtasan paagi sa pantubos na atang kan saiyang Aki, si Jesu-Cristo. Kun kita bilang nagdusay na mga lingkod nin Dios magkasala nin magabat pero gustong ikabalik sato an kagayagayahan sa kaligtasan, kaipuhan na kita magkaigwa nin nagsosolsol na kaisipan tanganing malikayan an pagkakasala tumang sa banal na espiritu.​—Mateo 12:​31, 32; Hebreo 6:​4-6.

 9. Ano an hinahagad ni David kan hagadon nia sa Dios na tabangan sia “paagi sa boluntad na espiritu”?

⁹ Hinagad ni David na tabangan logod sia ni Jehova “paagi sa boluntad na espiritu.” Malinaw na ini nanonongod, bakong sa pagigin boot nin Dios na tumabang o sa saiyang banal na espiritu, kundi sa nagpapahirong hilig sa isip ni David. Boot ni David na tabangan sia nin Dios paagi sa pagtatao sa saiya nin espiritu nin pagkaandam na gumibo kan tama asin dai maholog liwat sa kasalan. Padagos na tinatabangan ni Jehova Dios an saiyang mga lingkod asin pinatitindog an mga nakadoko huli sa laen-laen na pagbalo. (Salmo 145:14) Nakararanga nanggad na maaraman ini, nangorogna kun kita nagkasala pero nagbabasol asin boot na orog pang maimbod na maglingkod ki Jehova!

Tokdoan nin Ano an mga Paralapas?

10, 11. (a) Ano an ikatotokdo ni David sa mga paralapas na Israelita? (b) Si David makatotokdo sana sa mga parakasala pakatapos na magibo nia an ano?

¹⁰ Kun itotogot nin Dios, daing kapasloan na minamawot ni David na gumibo nin bagay na magpapaheling kan saiyang pag-apresyar sa pagkaherak ni Jehova asin makatatabang sa iba. May mapagngayongayong saboot para ki Jehova, an nagsolsol na hade sunod na nagsabi: “Itotokdo ko sa mga paralapas an saimong mga dalan, tanganing an mga parakasala bumalik sa saimo.” (Salmo 51:13) Paano matotokdoan kan makasalan na si David kan Pagboot nin Dios an mga paralapas? Ano daw an masasabi nia sa sainda? Asin anong karahayan an magigibo kaini?

¹¹ Kun ipinaliliwanag sa mga paralapas na Israelita an mga dalan ni Jehova sa paglaom na patalikodon sinda sa maraot na dana, ikatotokdo ni David kun gurano karaot nin kasalan, kun ano an kahulogan nin pagsolsol, asin kun paano aakoon an pagkaherak nin Dios. Mantang namatean na an sakit nin pagkaanggot ni Jehova asin nin nakamamate nin kasalan na konsensia, sierto na si David magigin maheherakon na paratokdo sa nagsosolsol, laglag an pusong mga parakasala. Siyempre, magagamit sana nia an saiyang halimbawa sa pagtokdo sa iba pakatapos na akoon na nia mismo an mga pamantayan ni Jehova asin an Saiyang kapatawadan, ta an mga habong pumasakop sa banal na mga kahagadan daing diretso na ‘sarosaroon an mga togon nin Dios.’​—Salmo 50:​16, 17.

12. Paano nakinabang si David sa pakaaram na ilinigtas sia nin Dios sa pagkakasala sa dugo?

¹² Sa pag-otro kan saiyang mga intension sa ibang paagi, si David nagsabi: “Ligtasan ako sa pagkakasala sa dugo, O Dios na Dios kan sakong kaligtasan, tanganing an sakong dila magayagayang makasaysay manongod sa saimong katanosan.” (Salmo 51:14) An pagkakasala sa dugo may kaibang pagkakondenar sa kagadanan. (Genesis 9:​5, 6) Kaya an pakaaram na ilinigtas sia kan Dios kan saiyang kaligtasan sa pagkakasala sa dugo may koneksion ki Urias matao ki David nin katoninongan sa puso asin isip. Sa siring an saiyang dila puwede nang umawit na may kagayagayahan manongod sa katanosan nin Dios, bakong nia. (Eclesiastes 7:​20; Roma 3:10) Dai mapapara ni David an saiyang inmoralidad o mabubuhay liwat si Urias, kun paanong an sarong tawo sa presente dai ikababalik an kabinian nin tawong saiyang tinentaran na gumibo nin inmoralidad o mabubuhay liwat an saiyang ginadan. Dai daw niato maninigong isip-isipon iyan kun kita nasusugotan? Asin apresyaron nanggad niato an pagkaherak ni Jehova sa sato sa katanosan! An totoo, an pag-apresyar maninigong magpahiro sato na giyahan an iba sa Burabod na ini nin katanosan asin kapatawadan.

13. Solamente sa anong mga kamugtakan na mabubuka nin tama nin sarong parakasala an saiyang mga ngabil sa pag-omaw ki Jehova?

¹³ Mayo nin parakasala na mabubuka nin tama an saiyang mga ngabil sa pag-omaw ki Jehova apuwera sana kun, sabi ngani, may pagkaherak na bukahon iyan nin Dios tanganing magtaram kan Saiyang mga katotoohan. Kaya nag-awit si David: “O Jehova, bukahon mo logod an mga ngabil kong ini, tanganing an sakong ngoso magbalangibog kan saimong kaomawan.” (Salmo 51:15) Mantang nakaginhawa na an saiyang konsensia huli sa kapatawadan nin Dios, si David mapahihirong itokdo sa mga paralapas an mga dalan ni Jehova, asin sia suweltong makaoomaw sa Saiya. An gabos na pinatawad sa saindang mga kasalan arog ni David maninigong mag-apresyar sa dai na kutana maninigong kabootan ni Jehova sa sainda, asin kaipuhan na aprobetsaran ninda an gabos na oportunidad na ipahayag an katotoohan nin Dios asin ‘ibalangibog an saiyang kaomawan.’​—Salmo 43:3.

Inaakong mga Atang sa Dios

14. (a) Anong mga atang an hinagad sono sa tipan nin Pagboot? (b) Taano ta salang isipon na mababayadan niato nin paggibo nin pirang marahay na bagay an padagos na paggibo nin sala?

¹⁴ Si David nagkaigwa nin hararom na pagmansay na nakapahiro sa saiyang magsabi: “Huli ta dai ka [si Jehova] nawiwili sa atang​—ta kun iyo iyan itatao ko; sa bilog na dolot na tinotong dai ka naoogma.” (Salmo 51:16) Hinagad kan tipan nin Pagboot na idolot sa Dios an mga atang na hayop. Alagad ta an mga kasalan ni David na pagsambay asin paggadan, na an padusa kagadanan, dai puwedeng paraon nin siring na mga atang. Ta kun iyo, dai kutana sia natakot na gumastos sa pagdolot ki Jehova nin mga atang na hayop. Kun mayo nin odok sa pusong pagsolsol, an mga atang daing halaga. Kaya salang isipon na mababayadan niato nin paggibo nin pirang marahay na bagay an padagos na paggibo nin sala.

15. Ano an kaisipan nin sarong tawong nagdusay na may nanluluyang espiritu?

¹⁵ Idinugang ni David: “An mga atang sa Dios nanluluyang espiritu; an pusong laglag asin nanluluya, O Dios, dai mo ikaoongis.” (Salmo 51:17) Sa kaso nin nagsosolsol na parakasala, an inaakong “mga atang sa Dios nanluluyang espiritu.” An siring na tawo daing kaisipan na makiiwalon. An puso nin sarong tawong nagdusay na may nanluluyang espiritu nagmomondong marhay huli sa saiyang kasalan, nawaran nin puwersa huli sa pakamate sa pagkaanggot nin Dios, asin andam na gibohon an minsan ano tanganing mabawi an pabor nin Dios. Dai kita nin ikadodolot sa Dios na may halaga sagkod na dai kita nagsosolsol sa satong mga kasalan asin nagtatao kan satong puso sa saiya na may daing kasalak na debosyon.​—Nahum 1:2.

16. Ano an pagheling nin Dios sa tawong laglag an puso huli sa saiyang kasalan?

¹⁶ Dai isinisikwal nin Dios an atang na arog baga nin laglag asin nanluluyang puso. Kun siring, sa ibong nin ano man na kasakitan na inaagihan niato bilang saiyang banwaan, dai kita padara sa kadaihan nin paglaom. Kun nasingkog kita sa mga inaagihan sa buhay sa paaging nagpapahiro sa satong puso na kumurahaw para sa pagkaherak nin Dios, bako man na dai nang paglaom an kamugtakan. Dawa kun kita nagkasala nin grabe pero nagsosolsol kita, dai hahaboan ni Jehova an satong laglag na puso. Patatawadon nia kita basado sa pantubos na atang ni Cristo asin pababalikon kita sa Saiyang pabor. (Isaias 57:​15; Hebreo 4:​16; 1 Juan 2:1) Pero, kapareho ni David, an mga pamibi niato maninigong tanganing makabalik sa pabor nin Dios asin bakong tanganing makadulag sa kinakaipuhan na pagsagwe o pagtatanos. Pinatawad nin Dios si David, pero sia sinagwe man nia.​—2 Samuel 12:​11-14.

Pagmakolog sa Malinig na Pagsamba

17. Apuwera sa pakimaherak para sa kapatawadan nin Dios, ano an maninigong gibohon nin mga parakasala?

¹⁷ Kun kita nakaginibo nin magabat na kasalan, seguradong ini makariribok na marhay sa satong isip, asin an nagbabasol na puso mapahiro sato na arangon an kapatawadan nin Dios. Pero, ipamibi man niato an iba. Minsan ngani linaoman ni David na makatao giraray sa Dios nin inaakong pagsamba, an saiyang salmo dai man paslong liningawan na sana an iba. Iyan may kaibang arog kaining pakimaherak ki Jehova: “Sa saimong marahay na boot gibohan mo nin marahay an Sion; itogdok mo logod an mga lanob nin Jerusalem.”​—Salmo 51:18.

18. Taano ta ipinamibi kan nagsosolsol na si David an Sion?

¹⁸ Iyo, linaoman ni David na sia makabalik sa banal na pabor. Pero, ipinamibi kan mapakumbabang salmista na ‘sa marahay na boot gibohan nin Dios nin marahay an Sion,’ an kabeserang siudad nin Israel, an Jerusalem, na duman linaoman ni David na itogdok an templo nin Dios. Isinapeligro kan magagabat na kasalan ni David an bilog na nasyon, ta puwede kutanang nagsakit an bilog na banwaan huli sa salang gibo kan hade. (Ikomparar an 2 Samuel, kapitulo 24.) Garo baga pinaluya kan saiyang mga kasalan “an mga lanob nin Jerusalem,” kaya iyan kaipuhan nang itogdok liwat.

19. Kun kita nagkasala pero pinatawad nia, ano an tamang ipamibi?

¹⁹ Kun kita nagkasala nin grabe pero nag-ako na kan kapatawadan nin Dios, tama na ipamibi na remedyohan nia logod an ano man na danyos na ginibo kan satong gawe. Tibaad nagdara kita nin kasopganan sa saiyang banal na ngaran, pinaluya an kongregasyon, asin tibaad nagtao nin kamondoan sa satong pamilya. Kaya kan satong mamomoton na langitnon na Ama na haleon an ano man na langhad sa saiyang ngaran, parigonon an kongregasyon paagi sa saiyang banal na espiritu, asin rangahon an puso kan satong mga namomotan na namomoot asin naglilingkod sa saiya. Siyempre, baga man may kalabot na kasalan o dai, maninigong permi niatong pagmakolgan an pagpakangbanal sa ngaran ni Jehova asin an karahayan kan saiyang banwaan.​—Mateo 6:9.

20. Sa irarom nin anong mga kamugtakan na si Jehova mawiwili sa mga atang asin dolot nin Israel?

²⁰ Kun itogdok liwat ni Jehova an mga lanob nin Jerusalem, ano pa an mangyayari? Si David nag-awit: “Kun siring kaiyan mawiwili ka [si Jehova] sa mga atang nin katanosan, sa dolot na tinotong asin bilog na dolot; kun siring kaiyan idodolot an mga baka sa ibabaw mismo kan saimong altar.” (Salmo 51:19) Minawot na marhay ni David na sia asin an nasyon magkamit kan pabor ni Jehova tanganing masamba Sia sa paaging inaako. Sa siring ikawiwili nin Dios an saindang tinotong na mga atang asin bilog na mga dolot. Ini huli ta an mga ini magigin mga atang nin katanosan na idinolot nin nagdusay, sinsero, asin nagsosolsol na banwaan na igwa kan pabor nin Dios. Huli sa pagtanaw nin utang na boot sa pagkaherak ni Jehova, sa ibabaw kan saiyang altar sinda madolot nin mga baka​—an pinakaprimera asin pinakamamahalon na mga atang. Ngonyan, tinatawan niato nin onra si Jehova paagi sa pagtao saiya kan pinakamarahay na nasa sato. Asin kaiba sa satong mga dolot an “mga ogbon na baka kan [satong] mga ngabil,” mga atang nin pag-omaw sa satong maheherakon na Dios, si Jehova.​—Oseas 14:​2; Hebreo 13:15.

Dinadangog ni Jehova an Satong mga Kurahaw

21, 22. Ano an mga leksion sa Salmo 51 para sa satong kapakinabangan?

²¹ An odok sa pusong pamibi ni David na nasusurat sa Salmo 51 nagpapaheling sato na an maninigong reaksion niato sa satong kasalan espiritung tunay na nagsosolsol. An salmong ini igwa man nin mahahalagang leksion para sa satong kapakinabangan. Halimbawa, kun kita magkasala pero nagsosolsol, makasasarig kita sa pagkaherak nin Dios. Pero, an pangenot niatong pagmakolgan an ano man na langhad na tibaad dinara niato sa ngaran ni Jehova. (Bersikulo 1-4) Kapareho ni David, makahahagad kita nin pagkaherak sa satong langitnon na Ama basado sa satong minanang pagigin makasalan. (Bersikulo 5) Maninigo na kita magin sadiosan, asin kaipuhan na humagad kita nin kadonongan sa Dios. (Bersikulo 6) Kun kita nagkasala, kaipuhan na makimaherak kita ki Jehova para sa paglinig, malinig na puso, asin marigon na espiritu.​—Bersikulo 7-10.

²² Sa Salmo 51 maheheling man niato na dai niato noarin man maninigong pabayaan na kita tumagas sa pagkakasala. Kun iyan gigibohon niato, hahaleon sato ni Jehova an saiyang banal na espiritu, o puwersa aktiba. Pero kun nasa sato an espiritu nin Dios, matotokdoan niato an iba manongod sa saiyang mga dalan. (Bersikulo 11-13) Kun kita magkasala pero magsolsol, totogotan kita ni Jehova na padagos na mag-omaw sa saiya ta nungka niang ikinaoongis an pusong laglag asin nanluluya. (Bersikulo 14-17) Ipinaheheling pa kan salmong ini na an satong mga pamibi dai maninigong nakasentro sana sa satong sadiri. Imbes, maninigo niatong ipamibi an bendisyon asin espirituwal na ikararahay kan gabos na nakikakabtang sa malinig na pagsamba ki Jehova.​—Bersikulo 18, 19.

23. Taano ta maninigong magpahiro sato an Salmo 51 na magin mapuso asin maglaom sa pinakamarahay?

²³ An nakapahihirong salmong ini ni David maninigong magmotibar sato na magin mapuso asin maglaom sa pinakamarahay. Iyan nakatatabang satong marealisar na dai niato kaipuhan na isipon na dai nang paglaom an mga bagay dawa kun kita maholog sa pagkakasala. Taano? Huli ta kun kita nagsosolsol, ikaliligtas kita kan pagkaherak ni Jehova sa kadaihan nin paglaom. Kun kita nagbabasol asin lubos na debotado sa satong mamomoton na langitnon na Ama, dinadangog nia an satong kurahaw para sa pagkaherak. Asin nakararanga nanggad na maaraman na dai ikinaoongis ni Jehova an laglag na puso!

Ano an Isisimbag Nindo?

◻ Taano ta kaipuhan nin mga Kristiano an malinig na puso asin banal na espiritu nin Dios?

◻ Ano an ikatotokdo nin tawong nagsosolsol sa mga paralapas manongod sa pagboot ni Jehova?

◻ Ano an pagheling ni Jehova sa pusong laglag asin nanluluya?

◻ Anong mga leksion an yaon sa Salmo 51?

[Ritrato sa pahina 15]

Kamo daw nag-aarang nin banal na espiritu asin naglilikay na mapamondo iyan?

[Ritrato sa pahina 17]

Ipaheling an pag-apresyar sa dai na kutana maninigong kabootan ni Jehova paagi sa pagpahayag kan saiyang katotoohan