Mapano nin Kagayagayahan

“An mga disipulo padagos na mapano nin kagayagayahan asin banal na espiritu.”—GIBO 13:52.

 1. (a) Anong klase nin bunga an kagayagayahan? (b) Huli sa anong magayagayang probisyon maninigong pamurawayon an Dios?

KAGAYAGAYAHAN! An Kristianong kuwalidad na ini ilinistang ikaduwa sana sa pagkamoot sa pagladawan ni Pablo kan bunga nin espiritu. (Galacia 5:22-25) Asin huli sa ano an kagayagayahan na iyan? Iyan an maogmang bareta na ipinahayag kan anghel nin Dios sa mapakumbabang mga pastor labi nang 1,900 na taon an nakaagi: “Uya! Ipinahahayag ko sa saindo an maogmang bareta nin dakulang kaogmahan na kakamtan nin gabos na tawo, huli ta namundag sa saindo ngonyan an sarong Paraligtas, na iyo si Cristo na Kagurangnan, sa siudad ni David.” Dangan an anghelikong hukbo nagtunga asin nakiiba sa anghel sa magayagayang pag-omaw sa Dios asin nagsabi: “Kamurawayan sa Dios sa kaitaasan, asin sa daga katoninongan sa mga tawo na igwa kan marahay na boot.”—Lucas 2:10-14.

2, 3. (a) Taano ta angay na isugo nin Dios an saiyang panganay na Aki na magin Paratubos kan katawohan? (b) Sa anong ibang paagi naglingkod si Jesus sa mga katuyohan nin Dios mantang yaon sa daga?

² An marahay na boot ni Jehova sa mga tawo ipinahayag sa pagtatao nin kaligtasan paagi ki Cristo na Kagurangnan. An panganay na Aki nin Dios na ini an personipikasyon nin tunay na kadonongan asin ilinadawan sa pagsabi manongod sa saiyang Ama sa panahon kan paglalang: “Dangan yaon ako sa kataed nia bilang marigon asin seguradong trabahador; dangan ako napano nin kaogmahan aroaldaw, na naggagayagaya sa atubang nia sa lambang okasyon; na naggagayagaya sa saiyang mabungang daga, iyo an lubos na sakong kinaoogmahan iyaon sa mga aki nin mga tawo.”—Talinhaga 8:30, 31, Rotherham.

³ Kaya, angay nanggad na isinugo ni Jehova an Aking ini, na nagkaigwa nin siring na kaogmahan sa mga aki nin mga tawo, na magin an Paratubos sa katawohan. Asin paano ini magpapamuraway sa Dios? Iyan an magbubukas kan dalan para saiya sa pag-otob kan saiyang mamuraway na katuyohan na panoon an daga nin matanos asin mamomoton sa katoninongan na mga tawo. (Genesis 1:28) Saro pa, mantang anion sa daga, an Aking ini, si Jesus, magpapaheling sa irarom nin pinakamakuring pagbalo na an sangkap na tawo maimbod na makakukuyog ki Jehova bilang Soberanong Kagurangnan, sa siring lubos na ibinibindikar an katanosan kan saiyang Ama sa pamamahala sa Saiyang linalang. (Hebreo 4:15; 5:8, 9) An pagdadanay sa integridad na gibohon ni Jesus nagwalat man nin padara sa gabos na tunay na Kristiano tanganing sunodon nin estrikto an saiyang mga lakad.—1 Pedro 2:21.

 4. An pakatagal ni Jesus nagresulta sa anong dakulang kaogmahan, asin paano ini maninigong magpakosog sa sato?

⁴ Si Jesus nagkaigwa nin daing kaagid na kagayagayahan sa paggibo kan kabotan kan saiyang Ama, asin sa pag-antisipar nin orog pang kaogmahan, siring kan ipinaheling ni apostol Pablo sa Hebreo 12:1, 2: “Dumalagan kita na may pakatios sa paorumbasan na nasa atubang ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kaogmahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios.” Ano an kaogmahan na ini? Iyan an kagayagayahan ni Jesus, bako sanang sa pagpakangbanal sa ngaran kan saiyang Ama asin sa pagtubos sa katawohan hale sa kagadanan kundi siring man sa pamamahala bilang Hade asin Halangkaw na Saserdote mantang ibinabalik nia an makinuyog na mga tawo sa buhay na daing katapusan sa paraisong daga.—Mateo 6:9; 20:28; Hebreo 7:23-26.

 5. Sairisay an “mga tugang” ni Jesus, asin sa anong makangangalas na kaogmahan nakikikabtang sinda?

⁵ Iyo, an Aki nin Dios perming nagkaigwa nin kagayagayahan sa paglilingkod sa katawohan. Asin kagayagayahan nia an maglingkod kairiba kan saiyang Ama sa pagpili kan grupo nin nagdadanay sa integridad na mga tawo na inaapod niang “mga tugang” nia asin na sa kagadanan binubuhay pasiring sa langit. An mga ini nagkakaigwa nin pambihirang kagayagayahan kairiba ni Jesus. Sinda inaapod na “maogma asin banal,” asin sinda “magigin mga saserdote nin Dios asin kan Cristo, patin maghahade sinda sa kaibanan nia sa laog nin sangribong taon.”—Hebreo 2:11; Kapahayagan 14:1, 4; 20:6.

 6. (a) Anong magayagayang imbitasyon an ipinaabot kan Hade sa saiyang “ibang karnero”? (b) Anong mga pribilehiyo an nakamtan kan dakol sa mga karnerong ini ngonyan?

⁶ Saro pa, an dakulang kadaklan nin “ibang karnero,” na ibinubulag kan namamahalang Hade sa saiyang toong kamot nin pag-oyon, nag-ako kan saiyang imbitasyon: “Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.” (Juan 10:16; Mateo 25:34) Magayagayang pribilehiyo nanggad! Kabilang sa mga magmamanang ini kan daganon na rona kan Kahadean, an dakol na minsan ngonyan nag-aako na nin responsableng mga paninimbagan kairiba kan linahidan na natatada, siring kan ihinula ni Jehova: “Asin an mga taga ibang banwaan matirindog nanggad asin magpapastor sa mga aripompon nindo, asin an mga taga ibang daga magigin saindong mga paraoma asin saindong mga paraataman sa ubasan. Asin kun dapit sa saindo, aapodon kamong mga saserdote ni Jehova; sasabihon kamong mga ministro kan satong Dios.” An gabos na ini nakikiiba sa propeta nin Dios sa pagsabing: “Siertong gayo na ako maggagayagaya ki Jehova. An sakong kalag mag-oogma sa sakong Dios. Huli ta ginubingan nia ako kan mga gubing nin kaligtasan.”—Isaias 61:5, 6, 10.

 7. Taano an “aldaw” na ini magpoon kan 1914 ta espesyal na gayo?

⁷ Nabubuhay kita ngonyan sa espesyal na gayong panahon. Magpoon kan 1914 an panahon nin pamamahala ni Cristo bilang langitnon na Hade, na ilinadawan sa Salmo 118:24, 25: “Ini an aldaw na ginibo ni Jehova; mag-oogma kita asin maggagayagaya dian. A Jehova, pagligtas ngonyan, tabi! A ngonyan Jehova, magtao nin kapangganahan, tabi!” Ini an aldaw na magkakaigwa nin kulminasyon kun laglagon na ni Jehova an Babilonikong relihiyon asin pagsaroon na an nobya ni Cristo na 144,000 na mga tugang kaiba kan saindang langitnon na Hade. An bilog na banwaan nin Dios “mag-oogma asin maggagayagaya nin labi-labi” huli kaini. Maggagayagaya man sinda mantang an saindang Mesiyanikong Hade nakikilaban sa Armagedon tanganing iligtas an saiyang maimbod na nasyon pasiring sa saiyang matanos na bagong kinaban. (Kapahayagan 19:1-7, 11-16) Nagtatao daw si Jehova nin kapangganahan mantang ibinabalangibog kan saiyang banwaan an magayagayang paglaom na ini? An minasunod na report an magpapaliwanag.

Panglobong Pag-oswag

 8. (a) Paano an kagayagayahan sa banal na espiritu naheheling sa report sa pahina 18 sagkod 21 kan magasin na ini? (b) Ano an nagkapirang tampok na kabtang kan report?

⁸ An modernong panahon na mga Saksi ni Jehova “nagsosopay sa paglaom paagi sa kapangyarihan kan banal na espiritu.” (Roma 15:13) Maheheling ini sa tsart sa pahina 18 sagkod 21 kan magasin na ini, kun saen an panglobong report kan paglilingkod sa Kahadean para sa 1990 detalyadong ipinaheling. Kanigoan an paggayagaya niato na maheling an bagong peak na 4,017,213 aktibong mga ministro sa langtad! Nagpapaheling ini nin pag-oswag na 77 porsiento sa nakaaging sampulong taon, mantang an pagtitipon kan mga karnero marikas na nagpapadagos sa 212 kadagaan sa palibot kan kinaban. Pakalihis nin 15 taon, an bilang nin nabautismohan nakaabot liwat sa pinakahalangkaw na peak—301,518! Nagkaigwa nin nagkapirang pambihirang haralangkaw na bilang nin nabautismohan sa dakol na kombension, partikularmente an inatenderan nin mga Saksi hale sa Sirangan nin Europa. Kabilang sa mga ini an dakol na hobenes, na nagpapatunay na putik an sosyalistikong paghihingako na an relihiyon magagadan kairiba kan mga gurang na.

 9. (a) An amay na pagpatood nin magurang nagtatao nin anong magayagayang resulta? (b) Anong lokal asin ibang eksperyensia an nagpapatunay kaini?

⁹ An kadaklan na hobenes nag-aako kan imbitasyon sa Salmo 32:11: “Mag-ogma ki Jehova asin maggayagaya, kamong mga matanos; asin magkurahaw na may kagayagayahan, kamo gabos na may matanos na puso.” Maheheling na mas dakol na magurang an nag-aaplikar kan sadol na patoodon an saindang saradit na aki “poon sa pagkaomboy.” (2 Timoteo 3:15) Marahay an paggamit sa mga literatura asin mga cassette tape na inandam para sa mga hobenes. Sa pag-eskuwela kan mga hobenes na ini, tolos sindang nagtatao nin marahay na patotoo, siring kan halimbawa nin walong taon an edad na aking babaeng Hapones na nagbareta: “Pakatapos kan bakasyon sa tig-init, dinolok ko an sakong maestra asin hinapot sia: ‘Dinalaw daw nindo an lolobngan kan saindong ama kan bakasyon?’ Nagsimbag sia: ‘Iyo, an sakong ama mabooton na gayo, asin dinadalaw ko an saiyang lolobngan taon-taon.’ Sinabi ko saiya: ‘Kun mag-aadal kamo nin Biblia asin susunudon an mga katokdoan nin Dios, maheheling nindo an saindong mamomoton na ama sa sarong daganon na paraiso.’ Dangan tinawan ko sia nin My Book of Bible Stories. Ngonyan an sakong maestra nagbabasa nin sarong kapitulo sa librong ini sa bilog na klase durante kan pahingalo kun odto serosemana.”

10. Sa anong marahay na katuyohan nagin epektibo an librong Young People Ask, asin ano an pirang halimbawa?

¹⁰ An mga tin-edyer naggamit nin mahusay kan librong Questions Young People Ask—Answers That Work, kapwa sa pribadong pag-adal asin sa pagpatotoo sa ibang hobenes. Inapresyar man kan mga magurang an librong ini. Sarong tugang na babae sa Switzerland, na nagpatala bilang auxiliary payunir, an nagdesisyon na songkoon an mga magurang kan mga kaklase kan saiyang aki. Nagbukas ini nin marahay na pag-orolay sa mga magurang, asin 20 libro (kadaklan Young People Ask) asin 27 magasin an naipasakamot sainda. Kan an sarong nag-eeskuwelang aki sa Trinidad nakawaras kan librong ini sa saiyang maestra sa eskuwelahan, sinundan ini kan saiyang ina, na nakadistribuwir nin 25 kopya sa mga maestra na 36 an bilang. Nagpadagos sia kan sumunod na bulan na an espesyal na atension sa mga magurang na midbid nia personalmente, na nakadistribuwir nin 92 na libro pa asin nakapoon nin mga pag-adal sa Biblia. Sa Korea sarong maestro sa high school an naggamit kan librong Young People Ask sa pagtao nin haralipot na sermon sa mga temang siring kan “Paano Ko Mapaooswag an Sakong mga Grado?” asin “Kun Paano Ko Makakaoyon an Sakong Maestro” dangan iinalok an libro. Pakatapos na mag-ako nin 39 kopya an mga estudyante, an nagkapirang magurang nagreklamo. Alagad siniyasat kan prinsipal an sarong kopya, asin nagpahayag na ini “pambihira,” asin nagpedido nin saro para sa saiyang sadiring aking babae.

An Pinakamarahay na Edukasyon

11, 12. Ano an nagkapirang patotoo sa katunayan na an mga publikasyon kan Watch Tower Society nagtao nin pinakamarahay na edukasyon?

¹¹ An edukasyonal na halaga kan satong mga magasin inaapresyar man nin dakol, halimbawa sarong eskuwelahan sa E.U. an nagpedido nin 1,200 na kopya kan Hulyo 22, 1990, Awake! (na naghayag kan adiksion sa crack) tanganing magamit sa mga klase kaiyan. Saro pa, an arogan na paggawe sa eskuwelahan kan mga aki nin mga Saksi ni Jehova nagpapadagos na magkaigwa nin marahay na impresyon. Sa sarong maribok na klase sa Thailand, inapod kan maestra an 11-anyos an edad na si Racha sa atubang kan klase asin tinawan sia nin komendasyon huli sa saiyang paggawe, na sinasabi: “Taano ta dai nindo sia arogon? Mahigos sia sa saiyang pag-adal asin marahay an ugale.” Dangan idinugang nia: “Bueno, aram ko na kaipuhan nindong magin mga Saksi ni Jehova siring ki Racha tanganing mapaoswag an saindong paggawe.”—Ikomparar an Talinhaga 1:8; 23:22, 23.

¹² Sarong hoben na tugang na babae sa Dominican Republic an nagsurat: “Kan apat na taon pa sana an edad ko, magraduwar na kutana ako sa sarong relihiyosong eskuwelahan bago mag-elementarya, kun saen ako nakanood magbasa asin magsurat. Bilang regalo, tinawan ko an madre na maestra ko kan librong Puwede Kamong Mabuhay Sagkod Lamang sa Paraiso Digdi sa Daga na may mensahe: ‘Nagpapasalamat akong gayo na tinokdoan nindo ako na magbasa asin magsurat. Minamawot ko na masabotan man nindo an sakong pagtubod asin magkaigwa kan paglaom ko na mabuhay sagkod lamang sa dagang ini kun gibohon na ining paraiso.’ Huli kaini pinahale ako sa eskuwelahan. Pakatapos nin walong taon naheling ko liwat an maestrang ini. Isinaysay nia kun paano, sa ibong nin grabeng pagtumang kan padi, nabasa nia an libro. Nagbalyo sia sa kabisera, kun saen sia nakipag-adal sa Biblia sa sarong Saksi. Kairiba ko siang binautismohan sa ‘Malinig na Tataramon’ na Pandistritong Kombension.” Siring kan ihinula, an kadonongan puwedeng maghale sa “ngoso nin mga omboy”!—Mateo 21:16; Salmo 8:1, 2.

13. Paano an dakol na tin-edyer naghimate sa sadol ni Salomon, asin paano ini ipinaheling sa panbilog na kinaban na report?

¹³ Nagtao si Salomon nin nakakapakosog na sadol: “Mag-ogma ka, soltero, sa saimong pagkahoben, asin an saimong puso pagiboha nin karahayan sa saimo sa mga aldaw kan saimong pagkabarobata, asin lumakaw ka sa mga dalan kan saimong puso.” (Eclesiastes 11:9) Nakaoogma na maheling an kadakol na aki nin mga Saksi ni Jehova na nag-aaplikar kan mga tataramon na ini, na naggagamit kan saindang pagkahoben sa pag-andam para sa buhay nin pambilog na panahon na paglilingkod ki Jehova asin sa paglaog sa pinakahalangkaw sa gabos na karerang ini pakatapos na maggraduwar sa eskuwela. An bilang nin mga payunir padagos na nag-ooswag nin marikas, na may 821,108 nagreport durante kan taon. Kairiba an 11,092 na mga tugang na lalaki asin babae na naglilingkod sa Bethel, iyan nagrerepresentar sa 21 porsiento kan gabos na parahayag!

14. Ano an itinaong kontribusyon kan satong mga tugang na babae, asin anong komendasyon an angay para sa sainda?

¹⁴ Nakaiinteres na sa dakol na kadagaan, siring sa Estados Unidos, mga 75 porsiento kan gabos na payunir mga tugang na babae, na nagpapatunay sa mga tataramon kan Salmo 68:11: “Si Jehova mismo an nagtatao kan tataramon; an mga babae na nagsasabi kan maogmang bareta dakulang hukbo.” An satong mga tugang na babae dapat tawan nin komendasyon sa saindang paggibo nin mas dakulang kabtang kan gibohon sa langtad. An saindang ekspertong pagtotokdo sa mga pag-adal nin Biblia sa mga harong naggiya sa dakol sa katotoohan, asin an may agom na mga tugang na babae na maimbod na nagsusuportar sa saindang mga agom na may dakol na katongdan sa kongregasyon dapat man na may kaogmahan na omawon.—Talinhaga 31:10-12; Efeso 5:21-25, 33.

An Edukasyon sa Biblia Nag-ooswag

15. (a) Paano an nagkapirang nasyon na nakatala sa panbilog na kinaban na report nangongorog sa gibohon na pag-adal nin Biblia sa harong? (b) Anong mga eksperyensia an ikasasaysay nindo, na nagpapaheling kun gurano kabunga an mga pag-adal sa Biblia?

¹⁵ An edukasyonal na gibohon sa Biblia nag-ooswag, mga pag-adal na ikinokondukta sa bilog na kinaban sa promedyong 3,624,091 lugar kada bulan. An katotoohan sa Biblia nagliliwat nin mga personalidad, siring kan ipinaheheling kan report hale sa Australia. Amay kan Enero 1987, sarong lalaki an idineportar sa New Zealand hale sa Australia pakatapos nin 25-bulan na sentensia sa bilanggoan huli sa paghabon asin pagpalsipikar. Adikto sia sa droga asin nagpabakal kaiyan sa labing 17 taon. Kan kasunod na taon an saiyang agom nagpoon na makiadal nin Biblia sa mga Saksi ni Jehova, asin mantang nag-ooswag an saiyang kaaraman, narisa kan lalaki an pambihirang pagbago sa paggawe kan babae. Sia nagin mas marhay na agom na babae asin ina. Sa pagdagka kan agom na babae, nag-atender sia sa pansirkitong asamblea kan Hunyo 1989. Inako nia ngonyan an pag-adal nin Biblia sa harong, asin darakulang pagbago an naheling sa saiyang hitsura asin paagi nin buhay. An gabos sa pitong miembro kan pamilya nagpoon nang mag-atender sa mga pagtiripon. Nabautismohan sia kan Enero 1990 bilang saro na nagsunod sa ekselenteng sadol ni Pablo sa Efeso 4:17-24.

16. (a) Paano an mga report sa 1990 Memorial pinaghalean nin kagayagayahan? (b) Anong pagkasibot an naheheling, asin anong pagmamaigot an maninigo niatong gibohon tanganing makatabang?

¹⁶ Sarong nangongorog na kabtang kan report sa taon iyo an pinakahalangkaw na bilang nin nag-atender sa selebrasyon kan Memorial na 9,950,058, na isinagibo kan Martes, Abril 10, 1990. Labing 70 sa 212 nasyon an nagreport nin nag-atender na labing tolong beses na mas halangkaw kisa saindang peak sa parahayag! Halimbawa, sa ibong nin mga restriksion, pitong Aprikanong nasyon na may pinag-ibang peak na 62,712 parahayag an nagreport nin nag-atender sa Memorial na 204,356. An 1,914 parahayag sa may kariribokan na Liberia naggayagaya na may 7,811 nag-atender kan Memorial. An Haiti, na may peak sa parahayag na 6,427, nagreport nin 36,551. An 886 na parahayag sa wararak na isla nin Micronesia nagkaigwa nin 3,958. An 1,298 parahayag sa Sri Lanka nagreport nin 4,521, asin an Zambia, na may 73,729 parahayag, nagkaigwa nin 326,991 na nag-atender sa Memorial, saro sa kada 25 sa mga taga-Zambia. An panglobong report nagpaheling liwat na may milyon-milyon na sinserong mga tawo na naghahalat na tiponon sa toril. Alagad bakong igo an sinseridad. Madudugangan asin mapaooswag daw niato an kuwalidad kan satong gibohon na pag-adal sa Biblia, na tinatabangan an orog pa sa mga nag-atender sa Memorial na magkaigwa nin makosog na pagtubod? Mawot niato na sinda magin aktibong mga kairiba niato, na nag-oomaw ki Jehova. Iyan nangangahulogan kan sainda mismong buhay!—Salmo 148:12, 13; Juan 17:3; 1 Juan 2:15-17.

An Kalubosan nin Kagayagayahan

17. Anong mga halimbawa kan enot na siglo an maninigong makatabang na magpakosog sa satong determinasyon na mangapot nin marigon sa satong kagayagayahan?

¹⁷ Ano man an mga pagbalo na napapaatubang sato, magin determinado kitang mamogol nin marigon sa satong kagayagayahan. Tibaad dai kita magkaigwa kan masakit na gayong eksperyensia ni Esteban, alagad an saiyang halimbawa makakapakosog sa sato. Sa irarom nin akusasyon, napagdanay nia an saiyang magayagayang katrangkilohan. Sa saiyang mga kaiwal “naheling ninda na an saiyang lalauogon nakaaagid sa lalauogon nin sarong anghel.” An Dios nagdanay sa saiya durante kan saiyang kasakitan. May kapusoan siang nagpatotoo, na “pano kan banal na espiritu” sagkod sa saiyang kagadanan bilang martir. Mantang si Pablo asin Bernabe naghulit sa mga nasyon, an mga ini man “nag-orogma asin nagpamuraway sa tataramon ni Jehova.” Nangyari liwat an paglamag. Alagad dai ini nagpaluya sa mga nagturubod. “An mga disipulo padagos na mapano nin kagayagayahan asin banal na espiritu.” (Gibo 6:15; 7:55; 13:48-52) Ano man an gibohon kan mga paratumang sa sato, ano man an satong pan-aroaldaw na mga kasakitan sa buhay, dai niato noarin man pagtogotan na manluya an satong kagayagayahan sa banal na espiritu. Nagsadol si Pablo: “Mag-ogma sa paglaom sa ngapit. Magtagal kamo sa kasakitan. Magmaigot kamo sa pamibi.”—Roma 12:12.

18. (a) Ano an Bagong Jerusalem, asin taano an banwaan nin Dios ta maggayagaya sa saiya? (b) Paano an “bagong kalangitan asin sarong bagong daga” magbebendisyon sa katawohan?

¹⁸ Kanigoan kamakangangalas na paglaom iyan! Sa bilog niang banwaan, si Jehova nagpahayag: “Uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso. Alagad ta maggayagaya kamo, kamong banwaan, asin mag-orogma kamo sagkod lamang sa sakong linalalang.” Si Cristo na Kagurangnan kairiba an “Bagong Jerusalem” (na ngonyan iyo an kabiserang siudad kan langitnon na organisasyon nin Dios, an “Jerusalem sa itaas”) asin an panbagong kinaban na sosyedad sa daga magpapangyari nin nagsosopay na kagayagayahan sa katawohan. (Galacia 4:26) An pagbuhay liwat sa mga gadan na tawo, an pagdara sa gabos na makinuyog sa buhay na daing katapusan sa pagkasangkap bilang tawo, an daing katapusan na kapakipakinabang, maogmang pamumuhay sa paraisong daga—kanigoan kamakangangalas na paglaom asin dahelan nin kagayagayahan ini! Mantang si Jehova mismo nakanompong nin ‘kaogmahan sa Jerusalem asin naggagayagaya sa saiyang banwaan,’ kaya an saiyang propeta nagtao nin dugang pang paisi sa banwaan nin Dios: “Pangag-ogma kamo kaiba nin Jerusalem asin maggayagaya kamo kaiba nia, kamo gabos na namomoot sa saiya. Pangag-ogma kamo nin labi-labi kaiba nia.” (Isaias 65:17-19; 66:10; Kapahayagan 14:1; 20:12, 13; 21:2-4) Logod na padagos kitang mapano nin kagayagayahan asin banal na espiritu mantang kinukuyog niato an sadol ni apostol Pablo: “Danay kamong mag-ogma dian sa Kagurangnan. Sa giraray sasabihon ko, Mag-ogma kamo!”—Filipos 4:4.

Sa Pagsumaryo kan Satong Kagayagayahan:

◻ Anong padara sa magayagayang pakatagal an iwinalat ni Jesus sa sato?

◻ An duwang nagdusay na grupo igwa nin anong mga dahelan na maggayagaya?

◻ Paano an mga hoben asin mga gurang ngonyan naggagayagaya sa katotoohan?

◻ Sa pagrepaso kan 1990 report, anong simbag an itinao ngonyan sa pamibing, “Jehova, magtao nin kapangganahan, tabi”?

◻ Noarin asin paano makakamtan an kalubosan nin kagayagayahan?

[Tsart sa pahina 18-21]

REPORT KAN 1990 TAON NIN PAGLILINGKOD KAN MGA SAKSI NI JEHOVA SA BILOG NAN KINABAN

(Hilingon an bound volume)

[Ritrato sa pahina 16]

An anghel ni Jehova nagpahayag kan pagkamundag ni Cristo na Kagurangnan bilang “maogmang bareta nin dakulang kaogmahan”