Magin Maigot Para sa Tunay na Pagsamba

“Kadakol kan aanihon, alagad kadikit an paraani.”—MAT. 9:37.

 1. Paano ilaladawan an pagigin apurado?

IGWA ka nin dokumento na kaipuhan asikasohon nin sarong tawo bago matapos an aldaw. Ano an gigibohon mo? Mamarkahan mo iyan nin “URGENT!” (o “APURADO!”) Pasiring ka sa sarong importanteng olayan, alagad huri ka na. Ano an gigibohon mo? Sasabihon mo sa drayber, “Puede tabing pakirikasi? APURADO kaya ako!” Iyo, kun igwa ka nin gibohon na dapat nang matapos asin nauubos na an oras, natetension asin nahahadit ka. Naggagana na an adrenaline sa hawak mo, kaya naghihidali asin nagmamaigot ka sagkod sa makakaya mo. Arog kaiyan an pagigin apurado!

 2. Ano an pinakaapuradong gibohon para sa tunay na mga Kristiano ngonyan?

² Para sa tunay na mga Kristiano ngonyan, mayo na nin ibang mas apurado pa kisa sa paghuhulit kan maogmang bareta kan Kahadean asin paggibo nin mga disipulo sa mga tawo kan gabos na nasyon. (Mat. 24:14; 28:19, 20) Sa pagkotar ki Jesus, isinurat ni disipulo Marcos na an gibohon na ini dapat matapos “nguna,” an boot sabihon, bago umabot an katapusan. (Mar. 13:10) Siempre, maninigo iyan. Si Jesus nagsabi: “Kadakol kan aanihon, alagad kadikit an paraani.” Dai puedeng maghalat an aanihon; dapat matipon iyan bago matapos an tig-ani.—Mat. 9:37.

 3. Paano naghimate an dakol sa apuradong pangangaipo na maghulit?

³ Huling arog kaiyan kaimportante para sa sato an paghuhulit, maninigo na itao niato dian an pinakadakol tang panahon, kosog, asin atension sagkod sa mapupuede. Angay na tawan nin komendasyon an dakol na naggigibo nanggad kaiyan. Pinasimple nin nagkapira an saindang buhay tanganing lumaog sa bilog na panahon na ministeryo bilang payunir o misyonero o maglingkod sa saro sa mga erokan na Bethel sa bilog na kinaban. Sibot-sibot sinda. Puedeng dakol an isinakripisyo ninda, asin dakol na kadepisilan an napapaatubang sa sainda. Pero, nagsosopay an bendisyon sa sainda ni Jehova. Kita naoogma para sa sainda. (Basahon an Lucas 18:28-30.) An iba, dawa ngani dai kayang magin bilog na panahon na parabalangibog, naggagamit nin pinakadakol na panahon sagkod sa mapupuede para sa nagliligtas-buhay na gibohon na ini, na kaiba an pagtabang sa mga aki ninda na maligtas.—Deut. 6:6, 7.

 4. Taano an nagkapira ta tibaad may tendensiang mawaran kan pakamate nin pagkaapurado?

⁴ Arog kan nasabotan niato, an pakamate nin pagkaapurado parateng konektado sa sarong talaan na panahon, deadline, asin katapusan. Kita nabubuhay na sa panahon kan katapusan, asin dakol na ebidensia—sa Kasuratan sagkod sa kasaysayan—an nagpapatunay kaiyan. (Mat. 24:3, 33; 2 Tim. 3:1-5) Pero, mayo ni sarong tawo an nakakaaram kun noarin eksaktong maabot an katapusan. Kan nagtatao nin mga detalye dapit sa “tanda” na magpapamidbid sa “pagtatapos kan sistema nin mga bagay,” espesipikong sinabi ni Jesus: “Mapadapit sa aldaw asin oras na iyan mayo nin siisay man na nakakaaram, ni an mga anghel sa kalangitan ni an Aki, kundi an Ama sana.” (Mat. 24:36) Huli kaiyan, tibaad madepisilan an nagkapira na papagdanayon taon-taon an pakamate nin pagkaapurado, nangorogna kun haloy na nindang ginigibo iyan. (Tal. 13:12) Kun beses, arog man daw kaiyan an namamatean nindo? Ano an makakatabang sa sato na mapatalubo o mapagdanay an pakamate nin pagkaapurado sa gibohon na gusto ni Jehova Dios asin ni Jesu-Cristo na gibohon niato ngonyan?

Isip-Isipa an Satong Arogan, si Jesus

 5. Sa anong mga paagi ipinaheling ni Jesus an pakamate nin pagkaapurado may koneksion sa ministeryo?

⁵ Sa gabos na nagpaheling nin pagkaapurado sa paglilingkod sa Dios, si Jesu-Cristo an siertong pinakanangongorog na halimbawa. An sarong dahelan kan pagkaapurado nia iyo na kadakol siang dapat gibohon sa laog nin tolo may kabangang taon sana. Minsan siring, mas dakol an nahaman ni Jesus kun dapit sa tunay na pagsamba kisa sa siisay pa man. Ipinamidbid nia an ngaran kan saiyang Ama asin ibinalangibog an katuyohan Nia, ibinuyagyag an pagsaginsagin saka falsong katokdoan kan mga lider sa relihion, patin sinuportaran an soberaniya ni Jehova dawa sagkod sa kagadanan. Ginamit nia an saiyang panahon asin kosog sa paglibot sa daga—na nagtotokdo, nagtatabang, asin nagpapaomay sa mga tawo. (Mat. 9:35) Mayo nin siisay man na siring kadakol an nahaman sa siring kahalipot na panahon. Si Jesus nagmaigot sagkod sa makakaya nia.—Juan 18:37.

 6. Sa ano si Jesus nagkonsentrar?

⁶ Ano an nagpahiro ki Jesus na magmaigot na marhay sa saiyang bilog na ministeryo? Sa hula ni Daniel, posibleng naaraman ni Jesus kun saen na sia may koneksion sa iskedyul ni Jehova. (Dan. 9:27) Sa siring, arog kan nakasurat, matatapos an saiyang ministeryo sa daga “sa kabangaan kan semana,” o pagkatapos nin tolo may kabangang taon. Dai nahaloy, pagkatapos kan mapanggana niang paglaog sa Jerusalem kan tigsoli nin 33 C.E., si Jesus nagsabi: “Nag-abot na an oras na pamurawayon an Aki nin tawo.” (Juan 12:23) Minsan ngani aram ni Jesus na madali na siang magadan, dai sia nagkonsentrar dian, na ginibo iyan na pangenot na dahelan sa pagmamaigot. Imbes, sia nagkonsentrar sa paggamit kan lambang oportunidad na magibo an kabotan kan saiyang Ama asin ikapaheling an pagkamoot sa saiyang kapwa. An pagkamoot na iyan an nagpahiro sa saiya na magtipon asin magsanay nin mga disipulo tanganing sugoon na maghulit. Ginibo nia iyan tanganing ikapadagos ninda an gibohon na pinonan nia asin orog pa an magibo kisa sa saiya.—Basahon an Juan 14:12.

7, 8. Ano an nagin reaksion kan mga disipulo sa paglinig ni Jesus sa templo, asin taano ta ginibo nia iyan?

⁷ Mapuersang ipinaheling nin sarong pangyayari sa buhay ni Jesus kun gurano sia kaigot. Enot na kabtang kaidto kan saiyang ministeryo, kan panahon nin Paskua kan 30 C.E. Si Jesus asin an mga disipulo nia nagduman sa Jerusalem asin naheling ninda sa templo “an mga nagpapabakal nin mga baka asin karnero patin salampati saka an mga nangongomisyon sa kuarta sa saindang mga tukawan.” Ano an nagin reaksion ni Jesus, asin ano an nagin impresyon dian kan mga disipulo nia?—Basahon an Juan 2:13-17.

⁸ Huli sa ginibo asin sinabi ni Jesus kan panahon na iyan, nagirumdoman nanggad kan mga disipulo an makahulang mga tataramon nin sarong salmo ni David: “Napano ako nin biyong kaigotan para sa saimong harong.” (Sal. 69:9) Taano? Huli ta peligroso nanggad an ginibo ni Jesus. Total, an mga autoridad sa templo—mga saserdote, eskriba, asin iba pa—an nasa likod kan iskandalosong mga negosyo duman. Huling ibinuyagyag asin inolang ni Jesus an pakana kan mga lider sa relihion kaidto, sia nagin kaiwal ninda. Arog kan tamang pakasabot kan mga disipulo sa nangyari, risa nanggad an saiyang ‘kaigotan para sa harong nin Dios,’ o kaigotan para sa tunay na pagsamba. Pero, ano an kaigotan? Laen daw iyan sa pagkaapurado?

An Pagkakalaen kan Kaigotan Asin Pagkaapurado

 9. Paano puedeng iladawan an kaigotan?

⁹ An “kaigotan” tinawan nin kahulogan nin sarong diksionaryo na “pagigin gustong-gusto asin interesadong marhay na gibohon an sarong bagay,” saka nagtao man iyan nin mga termino na kapareho kaiyan an kahulogan arog baga nin pagkagusto, init, interes, patin entusiasmo. Sierto nanggad na an gabos na terminong ini naglaladawan sa ministeryo ni Jesus. Huli kaini, trinadusir kan An Marahay na Bareta Biblia an bersikulong ini na: “An pagkamoot ko sa saimong templo minalaad siring sa kalayo.” Interesante nanggad, sa nagkapirang lenguahe sa Sirangan, an terminong “kaigotan” may duwang kabtang na sa literal nangangahulogan na “pusong mainit,” na garo baga naglalaad an puso. Bakong makangangalas na nagirumdoman kan mga disipulo an mga tataramon ni David kan maheling ninda an ginibo ni Jesus sa templo. Pero, ano an nagpalaad sa puso ni Jesus, sabi ngani, asin nagmotibar o nagpahiro sa saiya na gibohon iyan?

10. Siring kan pagkagamit sa Biblia, ano an kahulogan nin “kaigotan”?

¹⁰ An terminong “kaigotan” sa salmo ni David kinua sa Hebreong tataramon na parateng tinatradusir na “maimon” o “pag-imon” sa ibang kabtang kan Biblia. Sa nagkapirang beses, trinadusir iyan kan New World Translation na ‘paghagad nin eksklusibong debosyon.’ (Basahon an Exodo 20:5; 34:14; Josue 24:19.) An sarong diksionaryo sa Biblia nagsasabi dapit sa terminong ini: “Parate iyan na ginagamit may koneksion sa relasyon nin mag-agom . . . Kun paanong an pag-imon nin agom na lalaki o babae sarong mapuersang pag-insistir kan saiyang eksklusibong deretso na hagadon an kaimbodan kan agom nia, iniinsistir asin pinoprotehiran man nin Dios an Saiyang eksklusibong deretso na hagadon an debosyon kan mga sadiri Nia.” Huli kaini, siring kan pagkagamit sa Biblia, an kaigotan orog pa sa pakamate nin init o entusiasmo para sa sarong aktibidad, arog kan namamatean nin dakol dapit sa paborito nindang isport. An kaigotan ni David positibong pag-imon, an boot sabihon, dai pagtogot na si Jehova magkaigwa nin karibal o katuyawan, asin makosog na pagmawot na protehiran an marahay na ngaran Nia o itanos an nagibong danyos sa Saiya.

11. Ano an nagpahiro ki Jesus na magmaigot na marhay?

¹¹ Dai nasala an mga disipulo ni Jesus kan ikonektar ninda an mga tataramon ni David sa naheling nindang ginibo ni Jesus sa templo. Si Jesus naghingoang marhay bako sanang huli ta sia may deadline kundi huli ta sia maigot—o maimon—para sa ngaran kan saiyang Ama asin sa dalisay na pagsamba. Kan maheling nia an pagtuyaw asin paglanghad sa ngaran nin Dios, sia tama sanang magin maigot, o maimon, asin humiro tanganing itanos an situwasyon. Kan maheling ni Jesus na an mga hamak inaapi asin inaaprobetsaran kan mga lider sa relihion, an saiyang kaigotan nagpahiro sa saiya na paginhawahon an mga tawo saka mapuersang kondenaron an mapang-aping mga lider sa relihion.—Mat. 9:36; 23:2, 4, 27, 28, 33.

Magin Maigot Para sa Tunay na Pagsamba

12, 13. Ano an ginigibo kan mga lider sa relihion nin Kakristianohan ngonyan mapadapit sa (a) ngaran nin Dios? (b) Kahadean nin Dios?

¹² An kamugtakan sa mga relihion ngonyan kaagid—kun bako man mas grabe pa—kan sa panahon ni Jesus. Halimbawa, girumdoma na an enot na bagay na itinokdo ni Jesus na ipamibi kan mga parasunod nia iyo an may koneksion sa ngaran nin Dios: “Pakangbanalon logod an ngaran mo.” (Mat. 6:9) Naheheling daw niato an mga lider sa relihion, nangorogna an klero nin Kakristianohan, na nagtotokdo sa mga tawo na mamidbid an Dios sa ngaran asin pakangbanalon, o tawan nin onra an ngaran na iyan? Sa kabaliktaran, minisrepresentar ninda an Dios paagi sa falsong katokdoan arog kan Trinidad, imortalidad kan kalag nin tawo, asin nagkakalayong impierno, na huli kaiyan an Dios garo baga misteryoso, masakit saboton, maringis, sadista pa ngani. Nagtao man sinda nin katuyawan sa Dios paagi sa mga iskandalo asin pagsaginsagin ninda. (Basahon an Roma 2:21-24.) Apuera kaini, ginibo ninda an gabos na paagi na itago an personal na ngaran nin Dios, na hinahale pa ngani iyan sa mga traduksion ninda kan Biblia. Huli kaini, inoolang ninda an mga tawo na magin harani sa Dios asin magpatalubo nin personal na relasyon sa saiya.—Sant. 4:7, 8.

¹³ Tinokdoan man ni Jesus an mga parasunod nia na ipamibi an Kahadean nin Dios: “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mat. 6:10) Minsan ngani an pamibing iyan parateng inoorootro kan mga lider sa relihion nin Kakristianohan, dinadagka ninda an mga tawo na suportaran an politikal asin iba pang institusyon nin tawo. Dugang pa, minemenos ninda an mga naghihingoang maghulit asin magpatotoo dapit sa Kahadean na ini. Bilang resulta, an Kahadean nin Dios dai na pinag-oolayan, ni tinutubod man, kan mga naghihingakong Kristiano.

14. Paano ibinababa kan klero nin Kakristianohan an Tataramon nin Dios?

¹⁴ Kan si Jesus mamibi sa Dios, malinaw niang sinabi: “An saimong tataramon katotoohan.” (Juan 17:17) Asin bago sia maghale sa daga, ipinarisa ni Jesus na nonombrahan nia “an maimbod asin mapagmansay na oripon” tanganing magtao nin espirituwal na kakanon sa banwaan nia. (Mat. 24:45) Dawa ngani daing pag-alangan na naghihingako na sinda an pinagkatiwalaan kan Tataramon nin Dios, nagin maimbod daw an klero nin Kakristianohan sa ipinagkatiwala kan Kagurangnan? Dai. Sinasabi ninda na eroestorya sana an laog kan Biblia. Imbes na pakakanon sa espirituwal an aripompon ninda tanganing maranga asin maliwanagan, pinapagirok kan mga klero an talinga kan mga miembro ninda paagi sa pilosopiya nin tawo. Dugang pa, ibinababa ninda an mga pamantayan nin Dios dapit sa moral tanganing ioyon sa bagong moralidad daa.—2 Tim. 4:3, 4.

15. Ano an saboot mo sa gabos na ginigibo kan klero sa ngaran nin Dios?

¹⁵ Huli sa gabos na ginigibo—sa ngaran daa kan Dios kan Biblia—dakol na sinsero an nadedesganar o biyo nang nawaran nin pagtubod sa Dios asin sa Biblia. Sinda nabiktima ni Satanas asin kan saiyang maraot na sistema nin mga bagay. Kun naheheling asin nababaretaan mo na nangyayari aroaldaw an siring na mga bagay, ano an saboot mo dian? Bilang lingkod ni Jehova, kun naheheling mo an pagtuyaw asin paglanghad sa ngaran nin Dios, dai ka daw namomotibar na gibohon an makakaya mo tanganing itanos iyan? Kun naheheling mo na dinadaya asin inaaprobetsaran an mga sinsero asin sadiosan an puso, dai ka daw napapahiro na rangahon an mga inaapi? Kan maheling ni Jesus an mga tawo kan panahon nia na “naanitan asin nagkaralagalag siring sa mga karnero na mayong pastor,” sia dai sana naherak sa sainda. Sia “nagpoon na magtokdo sa sainda nin dakol na bagay.” (Mat. 9:36; Mar. 6:34) Igwa kita kan gabos na dahelan na magin maigot para sa tunay na pagsamba, arog ki Jesus.

16, 17. (a) Ano an maninigong magmotibar sa sato na maghingoang marhay sa ministeryo? (b) Ano an pag-oolayan niato sa sunod na artikulo?

¹⁶ Kun arog kaiyan an pagmansay niato sa satong ministeryo, magkakaigwa nin mas hararom na kahulogan an sinabi ni Pablo sa 1 Timoteo 2:3, 4. (Basahon.) Kita nagmamaigot sa ministeryo bako sanang huli ta aram niatong kita nabubuhay na sa huring mga aldaw, kundi huli ta nasasabotan niato na iyan kabotan nin Dios. Gusto niang maaraman nin mga tawo an katotoohan, tanganing sinda makanood man na magsamba asin maglingkod sa saiya saka magkamit nin mga bendisyon. Sa pangenot, kita namomotibar na maghingoang marhay sa ministeryo, bakong huli ta nauubos na an panahon, kundi huli ta gusto niatong tawan nin onra an ngaran nin Dios asin tabangan an mga tawo na maaraman an kabotan nia. Kita maigot para sa tunay na pagsamba.—1 Tim. 4:16.

¹⁷ Bilang banwaan ni Jehova, binendisyonan kita na maaraman an katotoohan manongod sa katuyohan nin Dios para sa katawohan asin sa daga. May paagi kita na tabangan an mga tawo na magkaigwa nin kaogmahan asin seguradong paglaom sa ngapit. Puede niatong itokdo sa sainda kun paano makakaligtas kun laglagon na an sistema nin mga bagay ni Satanas. (2 Tes. 1:7-9) Imbes na madesganar o mangluya an boot huli ta garo baga naaatraso an aldaw ni Jehova, maninigo kitang mag-ogma huling may panahon pa kita na magin maigot para sa tunay na pagsamba. (Miq. 7:7; Hab. 2:3) Paano niato mapapatalubo an siring na kaigotan? Pag-oolayan niato ini sa sunod na artikulo.

Ikakapaliwanag daw Nindo?

• Ano an nagpahiro ki Jesus na magmaigot na marhay sa saiyang bilog na ministeryo?

• Siring kan pagkagamit sa Biblia, ano an kahulogan nin “kaigotan”?

• Anong mga bagay na naheheling niato ngonyan an maninigong magpahiro sa sato na magin maigot para sa tunay na pagsamba?

[Ritrato sa pahina 8]

Si Jesus nagkonsentrar sa paggibo kan kabotan kan saiyang Ama asin pagpaheling nin pagkamoot sa saiyang kapwa

[Ritrato sa pahina 10]

Igwa kita kan gabos na dahelan na magin maigot para sa tunay na pagsamba