An Lubos na Pagtitiwala ki Jehova Nagtatao nin Kompiansa

“Si Jehova mismo madangog kun ako mag-apod sa saiya.”—SAL. 4:3.

1, 2. (a) Anong peligrosong situwasyon an inatubang ni David? (b) Arin na mga salmo an pag-oolayan niato?

MEDYO haloy nang namamahala sa Israel si Hadeng David, alagad napapaatubang sia ngonyan sa peligrosong situwasyon. An nagpapakanang aki nia na si Absalom idineklarar an sadiri bilang hade, asin napiritan si David na humale sa Jerusalem. Trinaydor man sia nin dayupot na amigo, asin ngonyan, kaiba nin nagkapirang maimbod sa saiya, sia nagpaparahibi asin nakabitis na naglalakaw sa Bukid nin mga Olibo. Apuera dian, si Simei, na miembro nin sarong pamilya sa kamag-anakan ni Hadeng Saul, dinadaklag si David nin mga gapo asin alpog mantang isinusumpa ini.—2 Sam. 15:30, 31; 16:5-14.

² Huli sa sakit na ini, magagadan daw si David na may kamondoan asin kasusupgan? Dai, huling nagtitiwala sia ki Jehova. Risang-risa ini sa ikatolong Salmo na ginibo ni David mapadapit sa pagdulag nia. Isinurat man nia an ikaapat na Salmo. Sa duwang komposisyon na ini, ipinapahayag an marigon na pagtubod na dinadangog asin sinisimbag nin Dios an mga pamibi. (Sal. 3:4; 4:3) Sinisierto sa sato kan mga salmong ini na si Jehova yaon sa maimbod niang mga lingkod aldaw asin banggi, na sinusuportaran sinda asin tinatawan nin katoninongan saka katiwasayan. (Sal. 3:5; 4:8) Kun siring, pag-olayan niato an mga salmong ini asin helingon niato kun paano an mga ini nagtatao nin kompiansa asin nagpapakosog sa sato na magtiwala sa Dios.

Kun ‘Dakol an Minabangon Tumang sa Sato’

 3. Arog kan ipinapaheling sa Salmo 3:1, 2, ano an situwasyon ni David?

³ “An puso kan mga lalaki nin Israel nagsusunod na ki Absalom,” an sabi nin sarong mensahero. (2 Sam. 15:13) Huling nangalas kun paano nagkaigwa si Absalom kan siring na suporta, si David naghapot: “O Jehova, taano ta nagdadakol an sakong mga kaiwal? Taano ta dakol an minatumang sa sako? Dakol an nagsasabi dapit sa sakong kalag: ‘Mayo siang kaligtasan hale sa Dios.’” (Sal. 3:1, 2) Dakol na Israelita an nag-iisip na si David dai ililigtas ni Jehova sa kapahamakan sa kamot ni Absalom asin kan mga kasurog kaini.

4, 5. (a) Sa ano segurado si David? (b) Ano an kahulogan kan mga tataramon na “an Saro na nagtatanos kan sakong payo”?

⁴ Alagad kompiado si David huling lubos siang nagtitiwala sa Dios. Sia nag-awit: “Alagad ika, O Jehova, sarong kalasag sa palibot ko, an sakong kamurawayan asin an Saro na nagtatanos kan sakong payo.” (Sal. 3:3) Segurado si David na poprotehiran sia ni Jehova kun paanong pinoprotehiran nin kalasag an sarong soldados. Iyo, an gurang nang hade nagdudulag na nakasuklob asin nakaduko huli sa kasusupgan. Alagad gigibohon kan Kaharohalangkawe na magin mamuraway an kamugtakan ni David. Tatabangan sia ni Jehova na makatindog nin tanos asin ikaitaas giraray an saiyang payo. Si David nag-aapod sa Dios na kompiadong sisimbagon sia. Arog man daw kaiyan an pagtitiwala nindo ki Jehova?

⁵ Sa pagsabing “an Saro na nagtatanos kan sakong payo,” aram ni David na tatabangan sia ni Jehova. An Marahay na Bareta Biblia nagsabi: “Alagad ika, KAGURANGNAN, an sakong kalasag; sakuyang kamurawayan asin kagtao nin kosog.” Mapadapit sa pananaram na “an Saro na nagtatanos kan sakong payo,” an sarong reperensia nagsabi: ‘Kun itinatanos nin Dios an “payo” nin saro, pinapano Nia sia nin paglaom asin kompiansa.’ Huling napiritan na maghale sa trono sa Israel, may dahelan si David na mangluyang marhay an boot. Minsan siring, paagi sa ‘pagtanos kan saiyang payo,’ magkakaigwa sia nin bagong kosog nin boot, kompiansa, asin lubos na pagtitiwala sa Dios.

‘Masimbag si Jehova!’

 6. Taano ta sinabi ni David na an saiyang pamibi sisimbagon hale sa banal na bukid ni Jehova?

⁶ Si David, na nagtitiwala ki Jehova asin pano nin kompiansa, nagsabi pa: “Paagi sa sakong tingog maapod ako ki Jehova mismo, asin sisimbagon nia ako hale sa saiyang banal na bukid.” (Sal. 3:4) Huli sa pagboot ni David, an kaban kan tipan, na nagsisimbolisar sa presensia nin Dios, dinara sa Bukid nin Sion. (Basahon an 2 Samuel 15:23-25.) Kun siring, angay sanang sabihon ni David na an saiyang pamibi sisimbagon hale sa banal na bukid ni Jehova.

 7. Taano ta dai nakamate nin grabeng takot si David?

⁷ Huling segurado si David na dai mababaliwala an pamibi sa Dios, dai sia nakamate nin grabeng takot. Imbes, sia nag-awit: “Kun para sa sako, mahigda ako tanganing makatorog ako; mamata nanggad ako, huli ta padagos akong inaalalayan ni Jehova mismo.” (Sal. 3:5) Dawa kun banggi, na pinakadakula an peligro na may biglang magsalakay, si David dai takot na magtorog. Segurado sia na sia mamata huling an mga eksperyensia nia nagtao sa saiya nin lubos na kompiansa na makakapagtiwala sia na seguradong susuportaran sia nin Dios. Makakapagtiwala man kita kun susunodon niato “an mga dalan ni Jehova” asin pirmeng magdadanay sa saiya.—Basahon an 2 Samuel 22:21, 22.

 8. Paano ipinapaheling kan Salmo 27:1-4 na nagtiwala si David sa Dios?

⁸ An kompiansa asin lubos na pagtitiwala ni David sa Dios risang-risa sa saro pa sa saiyang mga salmo, na dian mababasa an ipinasabong na mga tataramon na ini: “Si Jehova an sakong ilaw asin an sakong kaligtasan. Siisay an katatakotan ko? Si Jehova an kuta kan sakong buhay. Siisay an katatakotan ko? . . . Minsan may magpatindog nin kampamento tumang sa sakuya, dai matatakot an sakuyang puso. . . . Sarong bagay an hinagad ko ki Jehova—iyan an sakong hahalaton, na ako makapag-erok sa harong ni Jehova sa gabos na aldaw kan sakong buhay, tanganing maheling an pagigin nakakagayagaya ni Jehova asin tanganing masdan na may pagpahalaga an saiyang templo.” (Sal. 27:1-4) Kun arog man kaiyan an saboot nindo asin kun puede sa saindong kamugtakan, regular kamong makikipagtipon sa mga kapwa parasamba ki Jehova.—Heb. 10:23-25.

9, 10. Apisar kan sinasabi sa Salmo 3:6, 7, taano ta masasabi nindong bakong mapamalos si David?

⁹ Minsan ngani si David trinaydor ni Absalom asin dai nagin maimbod sa saiya an dakol na iba pa, sia nag-awit: “Dai ako matatakot sa sampulong rinibo na tawo na nagpupuesto sa palibot tumang sa sako. Buhat, O Jehova! Iligtas mo ako, O Dios ko! Huling papatamaan mo sa panga an gabos kong kaiwal. An mga ngipon kan mga maraot roronoton mo.”—Sal. 3:6, 7.

¹⁰ Si David bakong mapamalos. Kun ‘papatamaan sa panga’ an mga kaiwal nia, an Dios an magibo kaiyan. Nagsurat si David nin personal na kopya kan Ley asin aram nia na dian sinabi ni Jehova: “Sako an pagbalos, asin an pagpadusa.” (Deut. 17:14, 15, 18; 32:35) An Dios man an bahalang ‘magronot kan mga ngipon kan mga maraot.’ An pagronot sa mga ngipon ninda nangangahulogan nin paghale sa saindang kakayahan na gumibo nin maraot. Aram ni Jehova kun sairisay an maraot huling “hineheling nia kun ano an puso.” (1 Sam. 16:7) Nagpapasalamat nanggad kita na an Dios nagtatao sa sato nin pagtubod asin kosog tanganing makapanindogan nin marigon tumang sa pangenot na maraot, si Satanas, na dai mahahaloy iaapon sa bûngaw arog nin nagngangarob alagad mayong ngipon na leon na angay sana sa kalaglagan!—1 Ped. 5:8, 9; Kap. 20:1, 2, 7-10.

“Ki Jehova an Kaligtasan”

11. Taano ta maninigo niatong ipamibi an mga kapagtubod?

¹¹ Narealisar ni David na si Jehova an solamenteng makakatao kan kaligtasan na kaipuhan niang marhay. Alagad bako sanang sadiri nia an iniisip kan salmista. Kumusta man an espesyal na banwaan ni Jehova sa kabilogan? Angay nanggad na tinapos ni David an ipinasabong na komposisyon sa mga tataramon na ini: “Ki Jehova an kaligtasan. An saimong bendisyon yaon sa saimong banwaan.” (Sal. 3:8) Totoo, may magagabat na problema si David, alagad iniisip nia an banwaan ni Jehova sa pangkagabsan asin kompiado siang bebendisyonan sinda nin Dios. Bako daw na maninigo man niatong isipon an satong mga kapagtubod? Girumdomon niato sinda sa satong mga pamibi, na hinahagad ki Jehova na itao sa sainda an saiyang banal na espiritu tanganing magkaigwa sinda nin kosog nin boot asin kompiansa mantang ipinapahayag an maogmang bareta.—Efe. 6:17-20.

12, 13. Ano an nangyari ki Absalom, asin ano an reaksion ni David?

¹² Makasusupog an nagin kagadanan ni Absalom—sarong patanid sa gabos na may tendensiang mang-abuso sa iba, nangorogna sa mga linahidan nin Dios, arog ni David. (Basahon an Talinhaga 3:31-35.) Nagkaigwa nin ralaban, asin nadaog an hukbo ni Absalom. Si Absalom nagdudulag sakay sa mula kan an saiyang mahibog na buhok suminabit sa hababang sanga nin dakulang kahoy. Nakabitay sia duman—buhay alagad mayong maginibo—sagkod na gadanon sia ni Joab paagi sa pagtusok nin tolong budyak sa saiyang puso.—2 Sam. 18:6-17.

¹³ Naggayagaya daw si David kan mabaretaan nia an nangyari sa saiyang aki? Dai. Imbes, sia pabalikbalik sa paglakaw asin nagpaparahibi mantang sinasabi: “Aki kong Absalom, aki ko, aki kong Absalom! Ako na sana kutana an nagadan, ako, imbes na ika, aki kong Absalom, aki ko!” (2 Sam. 18:24-33) Kun bakong huli sa mga tataramon ni Joab, madadaog na kutana si David nin grabeng kamondoan. Makaturotriste nanggad an nagin kagadanan ni Absalom, na huli sa sobrang ambisyon nakilaban sa sadiri niang ama—an linahidan ni Jehova—asin ipinahamak nanggad an saiyang sadiri!—2 Sam. 19:1-8; Tal. 12:21; 24:21, 22.

Ipinahayag Giraray ni David an Pagtitiwala sa Dios

14. Ano an masasabi manongod sa Salmo 4?

¹⁴ Arog kan ikatolong Salmo, an ikaapat sarong odok na pamibi ni David na nagpapatunay kan saiyang lubos na pagtitiwala ki Jehova. (Sal. 3:4; 4:3) Tibaad ginibo ni David an awit na ini tanganing ipahayag an kaginhawahan asin pagpasalamat sa Dios kan dai magin mapanggana an pakana ni Absalom. O tibaad isinurat iyan na nasa isip an mga parakantang Levita. Arin man dian, mapapakosog an satong pagtitiwala ki Jehova kun hohorophoropon niato iyan.

15. Taano ta kompiado kitang makakapamibi ki Jehova paagi sa Aki nia?

¹⁵ Nagpaheling giraray si David nin lubos na pagtitiwala sa Dios asin nin kompiansa sa pagigin epektibo nin pamibi. Sia nag-awit: “Kun mag-apod ako, simbaga ako, O sakong Dios na matanos. Kun nasa kasakitan tawe ako nin kahiwasan. Pahelingi ako nin pabor asin dangoga an sakong pamibi.” (Sal. 4:1) Magkakaigwa man kita kan siring na kompiansa kun isasagibo niato an katanosan. Huling aram niato na binebendisyonan kan ‘matanos na Dios’ na si Jehova an tanos na banwaan nia, kompiado kitang makakapamibi sa saiya paagi sa Aki nia na nagtutubod sa atang na pantubos ni Jesus. (Juan 3:16, 36) Katoninongan nanggad an itinatao kaini sa sato!

16. Taano ta tibaad nangluya an boot ni David?

¹⁶ Kun beses, tibaad napapaatubang kita sa nakakapangluyang situwasyon na nakakahale nin kompiansa. Tibaad may panahon na nangyari ini ki David, huling sia nag-awit: “Kamong mga aki nin mga tawo, sagkod noarin iinsultohon an sakong kamurawayan, mantang padagos nindong namomotan an mga bagay na mayong halaga, mantang padagos kamong naghahanap nin kaputikan?” (Sal. 4:2) An pananaram na “mga aki nin mga tawo” minalataw na nanonongod sa katawohan sa negatibong paagi. An mga kaiwal ni David ‘namoot sa mga bagay na mayong halaga.’ Arog kaini an pagkatradusir kan New International Version: “Sagkod noarin kamo mamomoot sa salang mga paniniwala asin maghahanap nin falsong mga dios?” Dawa kun kita mangluya huli sa mga ginigibo kan iba, padagos kitang mamibi nin odok asin magpaheling nin lubos na pagtitiwala sa solamenteng tunay na Dios.

17. Ipaliwanag kun paano kita puedeng humiro kaoyon kan Salmo 4:3.

¹⁷ An pagtitiwala ni David sa Dios heling-heling sa mga tataramon na ini: “Kaya aramon nindo na siertong ilalaen ni Jehova an saiyang maimbod; si Jehova mismo madangog kun ako mag-apod sa saiya.” (Sal. 4:3) Kaipuhan an kosog nin boot asin lubos na pagtitiwala ki Jehova tanganing magdanay na maimbod sa saiya. Halimbawa, an mga kualidad na ini kaipuhan nin Kristianong pamilya kun matiwalag an sarong dai nagsosolsol na kapamilya. Tinatawan nin onra kan Dios an mga maimbod sa saiya asin sa mga dalan nia. Huli kaiyan, an kaimbodan asin lubos na pagtitiwala ki Jehova nagtatao nin kagayagayahan sa saiyang banwaan.—Sal. 84:11, 12.

18. Kaoyon kan Salmo 4:4, ano an maninigo niatong gibohon kun sinabihan o ginibohan kita nin maraot?

¹⁸ Paano kun makolgan an satong boot huli sa sinabi o ginibo nin saro? Makakapagdanay kitang magayagaya kun gigibohon niato an sinabi ni David: “Maanggot kamo, alagad dai kamo magkasala. Magtaram kamo sa saindong puso, sa saindong higdaan, asin dai kamo maggirong.” (Sal. 4:4) Kun sinabihan o ginibohan kita nin maraot, dai kita magkasala paagi sa pagbalos. (Roma 12:17-19) Puede niatong ipahayag an nasa boot niato mantang nasa higdaan. Kun ipapamibi niato iyan, tibaad mabago an satong pananaw asin mapahiro kita na magpatawad huli sa pagkamoot. (1 Ped. 4:8) Mapadapit digdi, mahalagang mangnohon an konseho ni apostol Pablo na minalataw na basado sa Salmo 4:4: “Maanggot kamo nin grabe, alagad ta dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.”—Efe. 4:26, 27.

19. Paano an Salmo 4:5 makakatabang sa sato kun dapit sa satong espirituwal na mga atang?

¹⁹ Idinoon ni David na kaipuhan magtiwala sa Dios kan sia mag-awit: “Mag-atang kamo nin mga atang nin katanosan, asin magtiwala ki Jehova.” (Sal. 4:5) An mga atang na idinodolot kan mga Israelita may halaga sana kun tama an motibo ninda. (Isa. 1:11-17) Tanganing akoon nin Dios an satong espirituwal na mga atang, dapat man na tama an satong motibo asin lubos kitang nagtitiwala sa saiya.—Basahon an Talinhaga 3:5, 6; Hebreo 13:15, 16.

20. Ano an kahulogan kan ‘liwanag kan lalawgon ni Jehova’?

²⁰ Si David nagsabi pa: “Dakol an nagsasabi: ‘Siisay an mapaheling sa samo nin marahay?’ Pasiranga sa samo an liwanag kan saimong lalawgon, O Jehova.” (Sal. 4:6) ‘An liwanag kan lalawgon ni Jehova’ nangangahulogan nin pabor nin Dios. (Sal. 89:15) Kaya kan si David mamibi: “Pasiranga sa samo an liwanag kan saimong lalawgon,” an boot niang sabihon ‘pahelingan mo kami nin pabor.’ Huling nagtitiwala kita ki Jehova, kita igwa kan pabor nia asin kan dakulang kagayagayahan mantang kompiado niatong ginigibo an kabotan nia.

21. Sa ano kita segurado kun lubos kitang nakikikabtang sa espirituwal na pag-ani ngonyan?

²¹ Huling inaantisipar an itatao nin Dios na kagayagayahan na labi pa kisa kan sa panahon nin pag-ani, si David nag-awit ki Jehova: “Siertong tatawan mo nin paggayagaya an sakong puso na labi pa kisa kan panahon na abunda an saindang tipasi asin saindang bagong arak.” (Sal. 4:7) Makakasierto kita na maeeksperyensiahan niato an odok sa pusong kagayagayahan kun lubos kitang makikikabtang sa espirituwal na pag-ani ngonyan. (Luc. 10:2) Sa pangengenot kan ‘matawong nasyon’ kan mga linahidan, naggagayagaya kita ngonyan mientras na nagdadakol an “paraani.” (Isa. 9:3) Igwa daw kamo nin nakakakontento nanggad na kabtang sa magayagayang pag-ani na ini?

Kompiadong Magpadagos Mantang Lubos na Nagtitiwala sa Dios

22. Kaoyon kan Salmo 4:8, ano an kamugtakan kan mga Israelita kan inootob ninda an Ley nin Dios?

²² Tinapos ni David an salmong ini paagi sa mga tataramon na ini: “Sa katoninongan ako mahigda asin matorog, huli ta ika sana, O Jehova, an nagpapaerok sa sako sa katiwasayan.” (Sal. 4:8) Kan inootob kan mga Israelita an Ley ni Jehova, sinda may matoninong na relasyon sa saiya asin nakakamate nin katiwasayan. Halimbawa, ‘an Juda asin Israel nag-erok na may seguridad’ durante kan paghade ni Salomon. (1 Ha. 4:25) May katoninongan an mga nagtitiwala sa Dios dawa naoongis sa sainda an nakapalibot na mga nasyon. Arog ni David, nagtotorog kita na may katoninongan huling tiwasay kita sa tabang nin Dios.

23. Ano an maeeksperyensiahan niato kun kita lubos na nagtitiwala sa Dios?

²³ Logod na kita kompiadong magpadagos sa paglilingkod ki Jehova. Mamibi man kita na may pagtubod asin sa siring maeksperyensiahan “an katoninongan nin Dios na nakakalabi sa gabos na kaisipan.” (Fil. 4:6, 7) Dakulang kagayagayahan an itatao kaiyan sa sato! Asin siertong maaatubang niato nin may kompiansa an ngapit kun pirme kitang magtitiwala nin lubos ki Jehova.

Ano an Isisimbag Nindo?

• Anong mga problema an inatubang ni David huli ki Absalom?

• Paano an Salmo 3 nagtatao nin kompiansa?

• Sa anong mga paagi makakapakosog kan satong pagtitiwala ki Jehova an Salmo 4?

• Paano kita makikinabang sa lubos na pagtitiwala sa Dios?

[Ritrato sa pahina 29]

Dawa kan sia nagdudulag huli ki Absalom, si David may kompiansa ki Jehova

[Mga Ritrato sa pahina 32]

Lubos ka daw na nagtitiwala ki Jehova?