Makanuod sa mga Gamgam

LABING 3,000 na taon na an nakaagi, sinabi kan suanoy na patriyarkang si Job na dakul nin maitutukdo sa sato an mga gamgam dapit sa mga ginibo nin Diyos. Pero an karakteristiko ninda marahayon man na gamiton na ilustrasyon asin halimbawa. Sa Bibliya, an kadaklan na pagkasambit sa mga gamgam nagtutukdo sa sato nin importanteng mga leksiyon dapit sa buhay asin sa satong relasyon sa Diyos. Maghiling kita nin pirang halimbawa.

Pamilyar kaidto an mga taga Jerusalem sa mga balinsayawan. Sa parati naggigibo iyan nin salagan sa irarom kan barisbisan nin mga edipisyo. Igwa man kaiyan sa templo ni Solomon. Posibleng nahiling kan mga balinsayawan na nagsasalag sa templo taon-taon na ligtas sinda duman mantang pinapadakula an saindang mga siyo.

Narisa an mga salagan na iyan sa templo kan kompositor kan Salmo 84—saro sa mga aki ni Kora na naglilingkod duman sarong semana kada ikaanom na bulan. Gusto niya na magin arog sa balinsayawan na may permanenteng istaran sa harong ni Jehova. Sinabi niya: ‘Magayunon an saimong irukan, O KAGURANGNAN nin mga hukbo! An sakong kalag napupungaw asin naghihidaw sa mga patyo nin KAGURANGNAN. Maski an dignos nakakakua nin harong, asin an balinsayawan nakakakua nin sadiring salagan para sa saiyang mga siwo, diyan sa harani kan saimong altar. O KAGURANGNAN nin mga hukbo, sakong Hadi asin sakong Diyos.’ (Salmo 84:1-3, BPVa) Kita daw, pati an satong mga aki, igwa man nin arog kaiyan na pagmawot asin pagpapahalaga na regular na makaibanan an kongregasyon kan mga lingkod nin Diyos?—Salmo 26:8, 12.

‘An kagang sa langit tatao kan saiyang panahon,’ an sabi ni propeta Jeremias. Siguradong pamilyar siya sa mga nagbabalyong kagang sa Dagang Panuga. Pag tigsuli, mga labing 300,000 na puting kagang an minabalyo hali sa Aprika pasiring sa Norteng Europa na minaagi sa Kababan nin Jordan. An saindang biolohikal na orasan an nagsesenyal sa sainda na bumalik sa saindang lugar kun sain sinda nagsasalag. Arog kan ibang mga gamgam na nagbabalyo sa ibang lugar, ‘sinusunod ninda an panahon kan saindang pagbalik.’—Jeremias 8:7.

“An talagang makangangalas sa pagburubalyo kan mga gamgam iyo an paghiro kauyon sa naturalesa ninda (instinct),” an sabi kan Collins Atlas of Bird Migration. Iyo, tinawan nin Diyos na Jehova nin natural na kadunungan dapit sa panahon an mga gamgam na nagbabalyo sa ibang lugar, mantang an mga tawo tinawan niya nin kakayahan na masabutan an mga panahon asin kapanahunan. (Lucas 12:54-56) Bakong arog kan natural na kadunungan kan kagang, an kaaraman na hali sa Diyos an liyabe para masabutan kan mga tawo an kahulugan kan mga pangyayari sa panahon na kinabubuhayan ta. Buta sa arog kaiyan na mga senyales an mga Israelita kan panahon ni Jeremias. Sinabi nin Diyos kun taano: ‘Isinikwal ninda an mga tataramon ko; anong kadunungan an yaon pa sa sainda ngunyan?’—Jeremias 8:9, BPV.

Ngunyan, kadakul kita nin mga ebidensiya na nabubuhay na kita sa inaapod kan Bibliya na ‘huring mga aldaw.’ (2 Timoteo 3:1-5) Aarugon mo daw an kagang na nagtatao nin atensiyon sa “panahon”?

Dakul na beses na nasasambit sa Bibliya an agila, asin an kahanga-hangang itsura kaiyan parating mahihiling sa Dagang Panuga. Mantang yaon sa ampas sa salagan kaiyan, an agila ‘naghahanap kan saiyang kakanon; an saiyang mga mata nagmamasid sa harayo.’ (Job 39:27-29) Kahanga-hanga an mata kaini huling kaya kaining mahiling dawa an sarong kuneho na mga sarong kilometro an rayo.

Arog kan agila na nahihiling dawa an nasa harayuon, kaya ni Jehova na mahiling an mangyayari sa harayuon pang panahon. Kaya sinabi kan Diyos na Jehova: ‘Puon sa kapinunan ipinahayag ko an katapusan; haloy nang panahon na naghula ako kan mangyayari.’ (Isaias 46:10, BPV) Kun susunudon ta an konseho ni Jehova, makikinabang kita sa saiyang daing kapantay na kadunungan asin kakayahan na mahiling an maabot.—Isaias 48:17, 18.

Ikinumparar man kan Bibliya sa agila an mga nagtitiwala sa Diyos: ‘An mga nananarig ki Jehova magkakaigwa nin panibagong kusog. Iiitaas ninda an mga pakpak na garo mga agila.’ (Isaias 40:31) Ginagamit kan agila sa paglayog an mga thermal, o an nag-iitaas na mainit na duros. Pag may nahanap na thermal an agila, ibinubukang maray kaiyan an saiyang mga pakpak asin paitok na nag-iitaas nin nag-iitaas mantang itinutulod kan duros. Dai nagdedepende an agila sa sadiri niyang kusog tanganing makaitaas asin makalayog nin harayo. Sa kaparehong paagi, an mga nagtitiwala ki Jehova makakaasa man sa saiya, na nanunugang matao “nin puwersa na urog kisa sa ordinaryo.”—2 Corinto 4:7, 8, NW.

Kan madali nang gadanon si Jesus, nagpundo siya tanganing hilingon an kabiserang siyudad kan mga Judio. ‘Jerusalem, Jerusalem, na naggagadan kan mga propeta asin naggagapo kan mga sinugo sa saimo!’ an pagkadismaya niya. ‘Makapirang beses binuot kong tiripunon an saimong mga aki, siring kan gunakan na minatipon kan saiyang mga siwo sa irarom kan saiyang mga pakpak. Asin huminabo ka.’—Mateo 23:37.

An saro sa pinakamakusog na natural na tendensiya kan mga gamgam iyo an pagprotektar ninda sa saindang siyo. An ibang klase nin gamgam, arog kan ataman na mga manok, dapat na alertong marhay sa peligro. Pag nakahiling iyan nin kulago (hawk) na naglalayog-layog sa itaas, minakutak iyan nin makusog bilang patanid, dangan minadaralagan man sa irarom kan pakpak niya an mga siyo tanganing magtago. Iyan man an nagigin sirungan kan sadit na mga siyo pag mainit an aldaw o makusog an uran. Gusto man ni Jesus na tawan an mga taga Jerusalem nin espirituwal na sirungan asin proteksiyon. Ngunyan, inaagda man kita ni Jesus na dumulok sa saiya para marepreskuhan asin maprotektaran sa mga pagabat asin kapurisawan sa aroaldaw.—Mateo 11:28, 29.

Dakul talaga kitang manunudan sa mga linalang na ini na may pakpak. Mantang inoobserbaran mo an saindang mga hiro, puwede mong girumdumon an mga ilustrasyon kan Kasuratan dapit sa sainda. Makatabang lugod sa saimo an mga balinsayawan na pahalagahan an harong nin pagsamba ki Jehova. Arog kan agila, lugod na mag-asa ka sa Diyos para sa kusog. Lugod na dumulok ka ki Jesus para sa espirituwal na katotoohan na maingat sa saimo arog kan pagprotektar nin manok sa mga siyo niya. Asin ipagirumdom lugod sa saimo kan kagang na magdanay na alerto sa kahulugan kan mga pangyayari sa kinaban na nagseserbing tanda kan panahon na kinabubuhayan ta.