Minamawot daw Nindong Maglingkod nin Mas Lubos?

“ANGGOT ako kaidto ki Jehova,” sabi ni Laura. “Nagparapamibi ako na tabangan nia kaming resolberan an samong mga problema sa pinansial tanganing makapadagos ako sa pagpapayunir​—alagad daing nangyari. Sa katapustapusi kinaipuhan kong pumondo sa pagpapayunir. Dapat ko man na admitiron na nauri ako sa mga nakapapadagos.”

Horophoropa man an nangyari ki Michael, na ministeryal na lingkod sa sarong kongregasyon kan Mga Saksi ni Jehova. Hinihingoa niang maabot an katongdan nin paraataman. (1 Timoteo 3:1) Kan an saiyang pagmawot dai naotob sa laog nin nagkapirang taon, naghinanakit siang marhay kaya habo na niang konsideraron sia para sa pribilehio. “Dai ko na kaya an kolog nin pagkadesganar liwat,” an sabi nia.

Namatean na man daw nindo iyan? Kinaipuhan na daw nindong butasan an sarong namomotan na teokratikong pribilehio? Halimbawa, kinaipuhan daw kamong pumondo sa paglilingkod bilang payunir, sarong bilog na panahon na parabalangibog kan Kahadean? O minamawot daw nindong kamtan an pirang paninimbagan sa kongregasyon na ipinaniwala sa iba? Tibaad ngani makosog an pagmawot nindong maglingkod sa Bethel o bilang misyonero, alagad dai iyan itinotogot kan saindong mga kamugtakan.

“An paghalat na naglalawig kasakitan sa puso,” an inaadmitir kan libro nin Talinhaga. (Talinhaga 13:12) Tibaad nangorognang totoo ini kun iba an mag-ako kan mismong mga pribilehio na linalaoman nindo. Nagtatao daw an Tataramon nin Dios nin pakarorop, karangahan, asin paglaom sa siisay man na nakamamate nin siring na mga pagkadesganar? Iyo. Sa katunayan, an ika-84 Salmo nagpapahayag kan mga saboot nin sarong lingkod ni Jehova na nagkaigwa nin kaagid na dai naotob na mga kamawotan mapadapit sa paglilingkod ki Jehova.

An Pag-apresyar nin Sarong Levita

An mga kompositor kan ika-84 Salmo iyo an mga aking lalaki ni Core, mga Levita na naglingkod sa templo ni Jehova asin halangkaw an pagpahalaga sa saindang mga pribilehio nin paglilingkod. “Kanigoan kagayon kan saimong tabernakulong grande, O Jehova nin mga hukbo!” an ikinagsing kan saro sa sainda. “An sakong kalag naghidaw asin nagmawot man para sa mga patyo ni Jehova. An sako mismong puso asin an sako mismong laman magayagayang nagkukurahaw sa buhay na Dios.”​—Salmo 84:​1, 2.

Kanigoan an pagmawot kan Levitang ini na maglingkod sa templo ni Jehova kaya minsan an ordinaryong tanawon sa dalan pasiring sa Jerusalem nakaaakit para sa saiya. “Sa pag-agi sa hababang kaplanodohan kan mga palongpong na baca,” sabi nia, “ginibo ninda iyan na burabod mismo.” (Salmo 84:6) Iyo, an alang na lugar garo matubig na rehion.

Huling an salmista Levita na bakong makasaserdote, makapaglilingkod sia sa templo nin saro sanang semana kada anom na bulan. (1 Cronica 24:​1-19; 2 Cronica 23:8; Lucas 1:5, 8, 9) Sa ibang panahon nia yaon sia sa harong sa saro kan mga siudad nin mga Levita. Kun siring uminawit sia: “Maski an gamgam mismo nakakua nin harong, asin an balinsiawan nin salagan para sa saiya man sana, na duman nia ibinugtak an saiyang mga siwo​—an saimong altar na grande, O Jehova nin mga hukbo, sakuyang Hade asin sakuyang Dios!” (Salmo 84:3) Kanigoan kutana kaogma kan Levita kun arog sia kan mga gamgam na igwa nin mas permanenteng erokan sa templo!

Madali kutanang maghinanakit an Levita huli ta dai sia nakapaglilingkod sa templo nin mas parate. Minsan siring, naogma siang maglingkod sagkod na mahihimo nia, asin siertong narealisar nia na bawi an paghihingoa sa bilog na pusong debosyon ki Jehova. Ano an nakatabang sa fiel na Levitang ini na magdanay na kontento sa saiyang mga pribilehio nin paglilingkod?

Makanood na Magin Kontento

“An sarong aldaw sa saimong mga patyo orog na marahay kisa sa sarong ribo sa ibang lugar,” sabi kan Levita. “Pinili kong tumindog sa tata kan harong kan sakuyang Dios kisa sa maglibotlibot sa mga tolda nin karatan.” (Salmo 84:10) Nasabotan nia na minsan sarong aldaw sa harong ni Jehova sarong pribilehio na dai masokol. Asin an Levita igwa nin labi nanggad sa sarong aldaw tanganing maglingkod sa templo. Huli sa saiyang pagkakontento sa saiyang mga pribilehio napaawit sia sa kagayagayahan.

Kumusta man kita? Pinahahalagahan ta daw an mga bendisyon sa sato, o may tendensia kitang lingawan an nakamtan ta na sa paglilingkod ki Jehova? Huli sa saindang debosyon sa saiya, pinaniwalaan ni Jehova an saiyang banwaan nin dakol na klase nin pribilehio asin katongdan. Kabale digdi an mas magabat na mga paninimbagan nin pangangataman, pagpapastor, pagtotokdo, asin laen-laen na kabtang kan bilog na panahon na paglilingkod. Alagad kaiba man dian an iba pang mahalagang marhay na mga bagay na may koneksion sa pagsamba ki Jehova.

Halimbawa, horophoropa an Kristianong ministeryo. An satong pribilehio na paghuhulit kan maogmang bareta iinaagid ni apostol Pablo sa pagkaigwa niato nin ‘kayamanan sa mga lalagan na laboy.’ (2 Corinto 4:7) Minamansay daw nindo an siring na paglilingkod bilang kayamanan na daing kaagid sa halaga? Si Jesu-Cristo, na nangenot sa aktibidad na paghuhulit kan Kahadean, siring kaiyan an pagmansay, na nagtatao nin arogan. (Mateo 4:17) “Mantang igwa kami kan ministeryong ini . . . , dai kami minasuko,” sabi ni Pablo.​—2 Corinto 4:1.

An Kristianong mga pagtiripon sagrado man na probisyon na dai dapat menuson. Sa satong mga pagtiripon, nag-aako kita nin mahalagang marhay na pagtotokdo asin nagkakamit nin kinakaipuhan na pakikiiba. Sa mga pagtiripon ikapahahayag ta man sa publiko an satong pagtubod asin paglaom paagi sa pagkomento nin regular asin paagi sa pakikikabtang sa programa sa iba pang mga paagi. (Hebreo 10:​23-25) An satong mga pagtiripon tunay na sarong probisyon na dapat pakamahalon!

Si Michael, na sinambit kasubago, pinahalagahan na marhay an mga bendisyon na ini asin odok na inapresyar iyan. Alagad an saiyang pagkadesganar huli sa dai pakapaglingkod bilang magurang sa kongregasyon temporaryong nagpaluya sa saiyang apresasyon. Paagi sa pagkonsentrar giraray dian, nagin timbang liwat sia asin mapasensiang naghalat ki Jehova.

Imbes na madiskontento huli ta dai nakakamtan an sarong pribilehio, marahay na siyasaton ta giraray an mga paagi na binebendisyonan kita ni Jehova, siring sa ginibo kan salmista.a Kun mayo kitang dakol na maheling, kaipuhan na kita humeling giraray, na hinahagad ki Jehova na buksan an satong mga mata tanganing maheling an satong mga pribilehio asin an mga paagi na binebendisyonan nia kita patin ginagamit kita para sa saiyang kaomawan.​—Talinhaga 10:22.

Mahalaga man na marealisar na an espesyal na mga pribilehio, arog baga kan katongdan nin paraataman, naghahagad nin espesipikong mga kualipikasyon. (1 Timoteo 3:​1-7; Tito 1:​5-9) Kaya kaipuhan na siyasaton ta an satong sadiri, na hinahanap an mga kabtang na nangangaipo nin pag-oswag dangan gumibo nin odok na mga paghihingoa na umoswag.​—1 Timoteo 4:​12-15.

Dai Manluya an Boot

Kun dai niato naaako an sarong pribilehio nin paglilingkod, dai kita dapat na magkonklusyon na si Jehova orog na namomoot duman sa mga nagkakamit kaiyan o na pinag-iimotan nia kita. Sierto nanggad, maninigo na dai niato isipon na may pagkaara na an ibang ini bakong angay na nagkamit kan saindang mga pribilehio paagi sa paboritismo nin tawo imbes na sa teokratikong pagnombra. An pagparapensar kan siring na mga ideya puedeng magbunga nin pag-imon, pagdaraogan, asin biyo nganing pagkawara kan paglaom niato.​—1 Corinto 3:3; Santiago 3:​14-16.

Si Laura, na sinambit sa enotan, dai nawaran nin paglaom. Sa kahurihurihi napaglabanan nia an saiyang mga pakamate nin kaanggotan asin pag-imon. Si Laura paorootrong namibi sa Dios na logod tabangan siang daogon an saiyang negatibong reaksion sa dai nia pakapagpayunir. Nagpatabang man sia sa kualipikadong mga lalaki sa kongregasyon asin napasarig an boot sa pagkamoot nin Dios. “Tinawan ako ni Jehova nin katoninongan nin isip,” an sabi nia. “Minsan ngani kami mag-agom dai makapagpayunir ngonyan, pinakamamahal mi an panahon na kami nakapagpayunir asin napakokosog kami kan mga nagin eksperyensia niamo. Tinatabangan mi man an samong dakula nang aking lalaki sa saiyang pagpapayunir.” Huling kontento, nahihimo ngonyan ni Laura na “makigayagaya sa mga tawong naggagayagaya” sa saindang paglilingkod bilang payunir.​—Roma 12:15.

Magbugtak nin Maaabot na mga Pasohan

An satong pagigin kontento sa presenteng mga pribilehio nin paglilingkod dai naghahagad na pumondo na kita sa pagbugtak nin dugang pang teokratikong mga pasohan. Sa pagpaliwanag kan langitnon na pagkabuhay liwat, si Pablo nagtaram dapit sa ‘pagpirit na aboton an mga bagay na nasa enotan.’ Sinabi man nia: “Sagkod sa inabot na kan satong pag-oswag, magpadagos kitang maglakaw na husay sa iyo man sanang pinagkatodan na ini.” (Filipos 3:​13-16) An teokratikong mga pasohan makatatabang sa sato na magpirit na makaabot. Minsan siring, an angat iyo an pagpadanay kaiyan na realistiko.

An realistikong mga pasohan makatanosan asin maaabot. (Filipos 4:5) Dai ini nangangahulogan na bakong realistiko an sarong pasohan na naghahagad nin nagkapirang taon nin mahigos na pagtrabaho. An siring na pasohan na nagkakaipo nin halawig na panahon puedeng luway-luway na aboton paagi sa pagbugtak nin sunod-sunod na pasohan, o aksion na gigibohon, sa pag-oltanan. An mga ini puedeng magserbing senyal nin espirituwal na pag-oswag. An mapangganang pakatapos sa kada aksion na gigibohon magtatao nin pakamate nin satispaksion durante kaiyan imbes na pagkadesganar.

Marahay na Pagkatimbang

Minsan siring, mahalagang maaraman na huli sa satong mga kamugtakan asin limitasyon, may mga pribilehio na tibaad dai akoon. An pagbugtak kaiyan bilang mga pasohan magiya sana sa pagkadesganar asin pagkasudya. An siring na mga pasohan maninigong ipagilid nguna, kisuerra sa presente. Bakong masakit an paggibo kaini kun mamimibi kita para sa diosnon na pagkakontento asin gigibohon na pangenot sa sato an paggibo kan kabotan ni Jehova. Kun naghihingoa kitang kamtan an mga pribilehio, an kamurawayan ni Jehova​—bakong an pagmidbid sa satong personal na mga nagibo—​an mahalaga. (Salmo 16:​5, 6; Mateo 6:​33) An Biblia angay na nagsasabi sa sato: “Ipamahala mo ki Jehova an saimong mga gibo asin an saimong mga plano mapaparigon.”​—Talinhaga 16:3.

Sa paghorophorop kan ika-84 Salmo, maheheling ta na ipinaheling kan salmista an siring na kaisipan sa mga pribilehio nin paglilingkod, asin binendisyonan sia nin abunda ni Jehova. Dugang pa, an salmong ini padagos na pinakikinabangan kan banwaan ni Jehova sagkod sa aldaw na ini.

Paagi sa mapagngayongayong pagsarig ki Jehova, magigibo nindong timbang an saindong kamawotan para sa dugang pang mga pribilehio asin an pagkakontento sa mga pribilehio na yaon na sa saindo ngonyan. Nungkang togotan an pagmawot na gumibo nin dakol pa na haleon an saindong pag-apresyar sa yaon na sa saindo ngonyan asin an kagayagayahan sa paglilingkod ki Jehova sagkod lamang. Magtiwala ki Jehova, huli ta ini nagbubunga nin kaogmahan, siring kan ipinaheheling sa mga tataramon kan Levita: “O Jehova nin mga hukbo, maogma an tawo na nagtitiwala sa saimo.”​—Salmo 84:12.

[Nota sa Ibaba]

[Kahon sa pahina 11]

Mga Pasohan na Puede Niatong Ibugtak

Pagbasa kan Biblia aroaldaw.​—Josue 1:8; Mateo 4:4

Pagpaoswag kan satong mga kakayahan nin pagmansay paagi sa Makakasuratan na pagsasanay.​—Hebreo 5:​14

Pagpatalubo nin mas dayupot na relasyon sa Dios.​—Salmo 73:28

Pagkultibar sa kada saro kan mga bunga kan espiritu.​—Galacia 5:​22, 23

Pagpaoswag sa kualidad kan satong mga pamibi.​—Filipos 4:​6, 7

Pagigin orog na epektibo sa paghuhulit asin pagtotokdo.​—1 Timoteo 4:​15, 16

Pagbasa asin paghorophorop sa kada luwas kan mga magasin na An Torrengbantayan asin Awake! —Salmo 49:3

[Mga retrato sa pahina 9]

Sa pagbugtak nin personal na mga pasohan, enoton an paggibo kan kabotan nin Dios