LEKSIYON 56
Pagdanayon an Pagkasararo sa Kongregasyon
Pag kairibanan ta an satong mga kapagtubod, namamatian ta man an arog kan namati ni Hading David: “Abaang rahay asin abaang ugma na an mga magturugang may pagkasararong nag-iirok na magkairiba!” (Salmo 133:1) Dai basta na sana nagkakaigwa nin pagkasararo sa kongregasyon. An kada saro sa sato dapat na may gibuhon para mapagdanay iyan.
1. Ano an maririsa mong kahanga-hanga sa mga lingkod nin Diyos?
Pag nag-atender ka sa sarong kongregasyon sa ibang nasyon, tibaad dai mo maintindihan an lengguwahe, pero dai ka nanggad maninibagong marhay asin mamamati mong welcome ka asin namumutan. Taano? Huling pinag-aadalan ta an Bibliya gamit an parehong mga publikasyon sain man kitang kongregasyon. Asin hinihinguwa tang magpahiling nin pagkamuot sa lambang saro. Sain man kita nakaistar, gabos kita ‘nag-aapod sa pangaran ni Jehova, para magsamba sa saiya na may pagkasararo.’—Sofonias 3:9, nota sa ibaba.
2. Ano an magigibo mo para makakontribwir sa pagkasararo?
“Kamutan nindo nin udok an lambang saro nin gikan sa puso.” (1 Pedro 1:22) Paano ta maisasabuhay iyan? Imbes na pagparahilingon an mga kaluyahan kan iba, magpokus sa marahay na mga kuwalidad ninda. Makipag-amigo bako lang sa mga pareho mo an pinagkakainteresan kundi hinguwahon man na mas mabisto an ibang mga tugang na ibang-iba sa saimo. Hinguwahon ta man na halion sa satong puso an ano man na pagpapalain-lain, o diskriminasyon.—Basahon an 1 Pedro 2:17.a
3. Ano an gigibuhon mo kun igwa kamo nin dai pagkasinabutan kan sarong kapwa Kristiyano?
Maski ngani nagkakasararo kita, bako man giraray kitang perpekto. Kaya kun minsan, napapamundo o nakukulgan ta an buot kan kada saro. Kaya sinasabi sa sato kan Tataramon nin Diyos na “padagos na . . . patawadon an lambang saro,” dangan sinabi pa kaiyan: “Kun paanong lubos kamong pinatawad ni Jehova, iyo man an dapat nindong gibuhon.” (Basahon an Colosas 3:13.) Dakul na beses tang nakukulgan si Jehova, pero pinapatawad niya kita. Kaya inaasahan niya na papatawadon ta an satong mga tugang. Kun marealisar mo na nakulgan mo an buot kan iba, ika na an inot na gumibo nin paagi para makipagkatuninungan.—Basahon an Mateo 5:23, 24.b
ARAMON PA
Aramon kun ano pa an mga puwede mong gibuhon para mapagdanay an pagkasararo asin katuninungan sa laog kan kongregasyon.
Ano an gigibuhon mo para makipagkatuninungan?
4. Hinguwahon na mahali sa puso an pagpalain-lain
Gusto tang kamutan an gabos na tugang. Pero tibaad masakitan kita na akuon an saro na garo ibang-iba sa sato. Ano an makakatabang sa sato? Basahon an Gibo 10:34, 35, dangan pag-ulayan an mga hapot na ini:
Inaako ni Jehova an gabos na klase nin tawo na magin saiyang mga Saksi. Paano mo maaarog si Jehova sa kun ano an dapat na magin paghiling mo sa mga tawo na ibang-iba sa saimo?
Anong pagpapalain-lain an komun sa lugar nindo na gusto mong likayan?
Basahon an 2 Corinto 6:11-13, dangan pag-ulayan an hapot na ini:
Ano an puwede mong gibuhon para lalo mo pang mamutan an gabos na tugang ano man an saindang pinaghalian o kamugtakan sa buhay?
5. Lubos na magpatawad asin makipagkatuninungan
Lubos kitang pinapatawad ni Jehova dawa ngani dai niya nuarin man kakaipuhanon an pagpapatawad ta. Basahon an Salmo 86:5, dangan pag-ulayan an mga hapot na ini:
Gurano kadakula kan pagpapatawad ni Jehova?
Taano ta nagpapasalamat ka sa pagpapatawad niya?
Sa anong mga sitwasyon puwede kitang masakitan na makasundo an iba?
Paano ta maaarog si Jehova tanganing padagos kitang magin dayupot sa satong mga tugang? Basahon an Talinhaga 19:11, dangan pag-ulayan an hapot na ini:
Kun may sarong tugang na nakakulog kan buot mo, ano an magigibo mo para magrahay an sitwasyon?
Kun minsan nakukulgan ta an buot kan iba. Pag nangyari iyan, ano an dapat tang gibuhon? I-play an VIDEO, dangan pag-ulayan an hapot.
Sa video, ano an ginibo kan sister para makipagkatuninungan?
6. Hilingon an marahay na mga kuwalidad kan mga tugang
Pag nagigin mas harani kita sa satong mga tugang, mas naaaraman ta an saindang marahay na mga kuwalidad pati na an saindang mga kaluyahan. Ano an magigibo ta tanganing sa marahay na mga kuwalidad ninda kita magpokus? I-play an VIDEO, dangan pag-ulayan an hapot.
Ano an makakatabang sa saimo para mahiling an positibong mga kuwalidad kan mga tugang?
Nagpopokus si Jehova sa satong marahay na mga kuwalidad. Basahon an 2 Cronica 16:9a, dangan pag-ulayan an hapot na ini:
Ano an namamatian mo na si Jehova nagpopokus sa marahay mong mga kuwalidad?
May mga depekto dawa an sarong magayunon na diyamante, pero mahalagang hiyas pa man giraray iyan. Bako man perpekto an gabos tang tugang, pero mahalagang marhay sinda ki Jehova
MAY MGA NAGSASABI: “Bago ako magpatawad nin sarong tawo, dapat may gibuhon nguna siya para mapatawad ko siya.”
Taano ta dapat na magin handa kita pirmi na magpatawad?
SUMARYO
Makakatabang ka na mapagdanay an pagkasararo sa laog kan kongregasyon paagi sa pagigin mapagpatawad asin pagpahiling nin pagkamuot sa gabos na tugang.
Rebyu
Paano mo mahahali sa saimong puso an pagpalain-lain?
Ano an gigibuhon mo kun igwa kamo nin dai pagkasinabutan kan sarong kapwa Kristiyano?
Taano ta gusto mong arugon an halimbawa ni Jehova sa pagpapatawad?
HILINGON MAN
Aramon kun paano makakatabang sa sato an saro sa mga ilustrasyon ni Jesus tanganing malikayan tang husgaran an iba.
Kaipuhan ta daw maghagad nin dispensa dawa pa kun pagmati ta mayo man kitang nagibong ano man na sala?
Aramon kun paano nanudan kan nagkapira na trataron an iba nin daing pagpapalain-lain.
Aramon an nagkapirang paagi kun paano mareresolberan an mga dai pagkasinabutan bago pa iyan makaapektar sa katuninungan kan kongregasyon.
“Husayon sa Mamumuton na Paagi an mga Dai Pagkakauyon” (An Torrengbantayan, Mayo 2016)
a Ipinapaliwanag sa Dagdag na Impormasyon 6 kun paano an pagkamuot nagpapahiro sa mga Kristiyano na igwa nin hilang na mag-ingat para dai makaulakit sa iba.
b Mahihiling sa Dagdag na Impormasyon 7 kun paano huhusayon an mga problema manungod sa negosyo asin mga isyung legal.