“Maimbod na Saksi sa Kalangitan”

AN MGA parasurat nin berso asin awit haloy nang inoomaw an bulan bilang sarong magayon na bagay. Halimbawa, an sarong kanta na ipinasabong nin Dios may sinasambit dapit sa babaeng “magayon na arog kan kabilogan nin bulan.” (Awit ni Salomon 6:10) Asin poetikong inaapod nin sarong salmista an bulan bilang “maimbod na saksi sa kalangitan.” (Salmo 89:37) Ano an kahulogan kan pananaram na ini mapadapit sa bulan?

Daing salto na nakokompleto kan bulan an paglibot kaiyan sa daga kada 27.3 na aldaw. Huli kaini, an kaimbodan kan bulan puedeng nanonongod sa pagkamasasarigan kaiyan. Minsan siring, an salmista tibaad may iniisip na mas hararom na kahulogan. Inapod nia an bulan na “maimbod na saksi” sa sarong makahulang awit manongod sa Kahadean na itinokdo ni Jesus na ipamibi kan saiyang mga parasunod.—Mateo 6:9, 10.

Labing 3,000 na taon na an nakalihis, si Jehova Dios nakipagtipan para sa Kahadean ki Hadeng David kan suanoy na Israel. (2 Samuel 7:12-16) An katuyohan kan tipan na iyan iyo na magtao nin legal na basehan para ki Jesu-Cristo, bilang paramana ni David, na magmana kan trono sagkod lamang. (Isaias 9:7; Lucas 1:32, 33) Sa pagsambit sa trono kan “banhi” ni David, nag-awit an salmista: “Siring kan bulan iyan marigon na magdadanay sagkod sa panahon na daing talaan, asin bilang maimbod na saksi sa kalangitan.”—Salmo 89:36, 37.

An ‘ilaw na nagsasakop sa banggi’—an bulan—angay na nagpapagirumdom kan pagigin permanente kan pamamahala ni Cristo. (Genesis 1:16) May koneksion sa saiyang Kahadean, an Daniel 7:14 nagsasabi: “An saiyang pamamahala daing talaan an pagdadanay na pamamahala na dai malihis, asin an saiyang kahadean saro na dai malalaglag.” An bulan sarong saksi na nagpapagirumdom sa sato dapit sa Kahadean na iyan asin sa mga bendisyon na itatao kaiyan sa katawohan.

[Picture Credit Line sa pahina 32]

Bulan: Retrato kan NASA