Kun Paano Mapagdadanay an Positibong Pagmansay

 1. Anong mga bendisyon hali ki Jehova an makakatabang sa sato na magin maugma?

GUSTO ni Jehova na magin maugma kita, asin abunda niyang itinatao sa sato an dakul na bendisyon na siyertong makakapaugma sa sato. An saro diyan iyo na buhay kita. Huli kaini, puwede tang gamiton an satong buhay sa pag-umaw sa Diyos, huling irinani niya kita sa tunay na pagsamba. (Sal. 144:15; Juan 6:44) Sinisiyerto sa sato ni Jehova na namumutan niya kita asin tinatabangan niya kitang magpadagos sa paglilingkod sa saiya. (Jer. 31:3; 2 Cor. 4:16) Nakakamtan ta an espirituwal na paraiso, na diyan igwa kita nin abundang espirituwal na pagkakan asin mamumuton na kasararuan nin magturugang. Apuwera kaiyan, igwa kita nin mahalagang marhay na paglaom sa puturo.

 2. Sa ano nakikipaglaban an nagkapirang maimbod na lingkod nin Diyos?

² Sa ibong kan mga dahilan na ini na magin maugma, an nagkapirang maimbod na lingkod nin Diyos may linalabanan na negatibong sabuot dapit sa saindang sadiri. Tibaad iniisip ninda na sinda o an saindang paglilingkod ki Jehova bakong gayong mahalaga sa saiya. Para sa mga may pabalik-balik na negatibong sabuot, garo baga imahinasyon sana an ideya na an saro puwedeng magin maugma nin ‘dakul na taon.’ Para sa sainda, an buhay tibaad puro na sana kamunduan.—Par. 11:8.

 3. Ano an posibleng dahilan nin negatibong sabuot?

³ An negatibong sabuot kan siring na mga tugang posibleng huli sa pagkadisganar, hilang, o nagkapirang limitasyon na epekto nin paggurang. (Sal. 71:9; Tal. 13:12; Par. 7:7) Apuwera diyan, kaipuhan na atubangon kan lambang Kristiyano an katunayan na an puso mapandaya asin puwede kitang kondenaron kaiyan minsan ngani yaon sa sato an pag-uyon nin Diyos. (Jer. 17:9; 1 Juan 3:20) Inaakusaran kan Diyablo nin mga kaputikan an mga lingkod nin Diyos. Asin tibaad purbaran kan mga tawong igwa kan kaisipan ni Satanas na impluwensiyahan kita kan pagmansay na ipinahiling kan daing pagtubod na si Elifaz—na mayo kitang halaga sa Diyos. Kun paanong kaputikan iyan kan panahon ni Job, kaputikan man iyan ngunyan.—Job 4:18, 19.

 4. Ano an tutukaron ta sa artikulong ini?

⁴ Sa Kasuratan, siniyerto ni Jehova na siya nasa kaibahan kan mga ‘naglalakaw sa kababan nin grabeng kadikluman.’ (Sal. 23:4, NW) An sarong paagi na siya nasa kaibahan niyato iyo an paagi sa saiyang Tataramon. An Bibliya ‘makapangyarihan sa atubangan nin Diyos sa paggaba’ o pagtumba nin mga bagay na marigunon an pagkagamot. Kaiba diyan an salang mga paghuna asin negatibong mga ideya. (2 Cor. 10:4, 5) Kaya, tukaron ta ngunyan kun paano ta magagamit an Bibliya tanganing matabangan kitang mapatalubo asin mapagdanay an positibong pagmansay. Ika mismo makikinabang digdi asin matatabangan ka man kaini na maparigon an buot kan iba.

 5. Anong pagsiyasat an makakatabang sa sato na magkaigwa nin positibong pagmansay?

⁵ Sinabi ni apostol Pablo an nagkapirang bagay na makakatabang sa sato na mapatalubo an positibong pagmansay. Sinadol niya an kongregasyon sa Corinto na padagos na siyasaton o ‘baluon an saindang sadiri kun baga sinda nasa pagtubod.’ (2 Cor. 13:5) An “pagtubod” iyo an kabilugan kan Kristiyanong mga tinutubod na ihinayag sa Bibliya. Kun an satong tataramon asin paggawi kauyon kan mga tinutubod na iyan, kun siring, nakapasar kita sa pagbalo asin ipinapahiling ta na kita “nasa pagtubod.” Siyempre, dapat ta man hilingon kun baga kita namumuhay suno sa gabos na Kristiyanong katukduan. Dai ta puwedeng pilion an gusto sana niyatong sunudon.—Sant. 2:10, 11.

 6. Taano ta maninigo niyatong siyasaton an satong sadiri ‘kun baga kita nasa pagtubod’? (Hilingon an ritrato sa kapinunan kan artikulo.)

⁶ Tibaad mag-alangan kang gibuhon an pagsiyasat na iyan, lalo na kun pagmati mo masusudya ka. Minsan siring, an pagmansay ni Jehova sa sato an mas importante kisa sa pagmansay ta sa satong sadiri, asin an saiyang kaisipan mas halangkaw kisa kan sa satong kaisipan. (Isa. 55:8, 9) Sinisiyasat niya an saiyang mga parasamba, bakong para kondenaron sinda, kundi hanapon an marahay nindang mga kuwalidad asin tabangan sinda. Kun ginagamit mo an Tataramon nin Diyos tanganing siyasaton an saimong sadiri ‘kun baga nasa pagtubod ka,’ mas mahihiling mo an sadiri mo siring sa paghiling ni Jehova sa saimo. Makakatabang ini sa saimo na mahali an ano man na kaisipan na mayo kang halaga sa Diyos, asin masasalidahan iyan kan pag-asegurar kan Bibliya: Mahalaga ka sa paghiling ni Jehova. An resulta kaiyan garo pagbukas nin kurtina tanganing lumaog an liwanag kan saldang sa madiklom na kuwarto.

 7. Paano kita makikinabang sa mga halimbawa nin kaimbudan na yaon sa Bibliya?

⁷ An sarong epektibong paagi na magibo an pagsiyasat na ini sa sadiri iyo an paghurop-hurop sa halimbawa kan maimbod na mga tawo na sinambit sa Bibliya. Pagkumpararon an kamugtakan o sabuot ninda asin an sa saimo, asin hilingon kun ano an magigin reaksiyon mo kun ika an nasa sitwasyon ninda. Hilingon ta an tulong halimbawa na nag-iilustrar kun paano mo magagamit an Bibliya tanganing patunayan na “nasa pagtubod” ka, asin sa siring, mapatalubo mo an positibong pagmansay sa sadiri.

8, 9. (a) Ano an kamugtakan kan dukhang babaying balo? (b) Ano an tibaad nagin negatibong sabuot kan babaying balo?

⁸ Sa templo sa Jerusalem, naobserbaran ni Jesus an dukhang babaying balo. An halimbawa niya makakatabang sa sato na mapagdanay an positibong pagmansay sa ibong kan satong mga limitasyon. (Basahon an Lucas 21:1-4.) Pag-isipan an kamugtakan kan babaying balo. Kaipuhan niyang tagalan bako sana an kamunduan sa pagkagadan kan agom niya kundi an kamugtakan man sa relihiyon na dominado nin mga lider na imbes na tumabang sa mga daing kalaban-laban, sinda ‘nagsasamsam sa mga harong nin babaying balo.’ (Luc. 20:47) Pobrehon an babaying balo kaya an naikokontribwir niya sana sa templo tibaad katumbas nin pirang minutong suweldo nin sarong trabahador.

⁹ Imahinara kun ano an namatian kan babaying balo mantang palaog sa patyo kan templo na dara-dara an saiyang duwang sadit na sinsilyo. Iniisip daw niya kun gurano kadikit an maikokontribwir niya kun ikukumparar sa tibaad itinatao niya kan buhay pa an agom niya? Nasupog daw siya kan mahiling an darakulang donasyon kan mga nainot sa saiya, na tibaad iniisip kun baga talagang may halaga an dulot niya? Dawa ngani tibaad iyan an nagin sabuot niya, ginibo niya pa man giraray an makakaya niya para sa tunay na pagsamba.

10. Paano ipinahiling ni Jesus na mahalaga sa Diyos an babaying balo?

¹⁰ Ipinahiling ni Jesus na an babaying balo saka an kontribusyon kaini parehong mahalaga ki Jehova. Sinabi niya na an babaying balo ‘nagbugtak nin labi pa kisa sa gabos na mayaman.’ An donasyon kan babaying balo makakasalak sa donasyon kan iba, pero siya an pinili ni Jesus tanganing umawon. Kan mahiling kan mga nagkakapot kan kaha an duwang sinsilyong idto, tibaad dai ngani lamang ninda naisip kun gurano kahalaga ki Jehova an mga sinsilyo asin an nagdonar kaiyan. An pagmansay pa man giraray nin Diyos an talagang mahalaga, bako an iisipon kan iba, ni an pagmansay kan babaying balo sa sadiri niya. Magagamit mo daw an pagkasaysay na ini tanganing siyasaton kun baga nasa pagtubod ka?

11. Ano an manunudan mo sa pagkasaysay dapit sa babaying balo?

¹¹ An kamugtakan mo puwedeng may direktang epekto sa kun ano an ikakatao mo ki Jehova. Huli sa edad o kamatian, limitadong marhay an oras na nagagamit kan nagkapira sa paghuhulit kan maugmang bareta. Makatanusan daw na pagdudahan ninda kun baga may halaga pang ireport an nagigibo ninda? Dawa bakong limitadong marhay an nagigibo mo, tibaad maisip mong an paghihinguwa mo sadit sanang kabtang kan kabilugan na oras na nagagamit kan mga lingkod nin Diyos sa kada taon sa pagsamba sa saiya. Minsan siring, nanudan ta sa pagkasaysay dapit sa dukhang babaying balo na nahihiling asin pinapahalagahan ni Jehova an lambang ginigibo ta para sa saiya, lalo na kun ginigibo iyan sa ibong nin dipisil na mga sitwasyon. Girumduma an nagibo mo sa pagsamba ki Jehova durante kan nakaaging taon. May pagkakataon daw na kinaipuhan mo an ekstraordinaryong pagsakripisyo sa saro sa mga oras na ginamit mo para sa saiya? Kun iyo, makakasiyerto ka na pinapahalagahan niya an ginibo mo para sa saiya sa oras na idto. Kun, arog kan dukhang babaying balo, ginigibo mo an gabos mong makakaya sa paglilingkod ki Jehova, may masarig kang dahilan na magtiwalang “nasa pagtubod” ka.

12-14. (a) Paano nakaapektar ki Elias an negatibong sabuot? (b) Taano ta arog kaiyan an nagin pagmati ni Elias?

¹² An propetang si Elias maimbod ki Jehova asin may makusog na pagtubod. Pero, sa sarong pagkakataon, nakamati siya nin grabeng kamunduan kaya hinagad niya ki Jehova na magadan na siya, sa pagsabing: ‘Husto na, O Jehova, halia an sakuyang kalag.’ (1 Ha. 19:4) Tibaad sabihon kan mga dai pa nakaeksperyensiya kan siring na kawaran nin paglaom na an pamibi ni Elias pabigla-bigla sanang mga tataramon. (Job 6:3) Minsan siring, totoo an namatian ni Elias. Pero, mangnuhon na imbes na sagwion si Elias sa kagustuhan kaining magadan, tinabangan siya ni Jehova.

¹³ Taano ta nagin arog kaiyan an pagmati ni Elias? Dai nahaloy bago kaini, pinanginutan niya an sarong mahalagang pagbalo sa Israel na nagpatunay na si Jehova iyo an tunay na Diyos, asin nagresulta ini sa paggadan sa 450 propeta ni Baal. (1 Ha. 18:37-40) Posibleng marhay na inasahan ni Elias na an banwaan nin Diyos mabalik na sa dalisay na pagsamba, pero dai iyan nangyari. Ipinadara kan maraot na si Reyna Jezebel an sarong mensahe ki Elias na ipapagadan niya ini. Huli sa takot na magadan, nagdulag si Elias patimog sa kataid na Juda pasiring sa kaawagan, na sarong tagiltil asin mapungaw na lugar.—1 Ha. 19:2-4.

¹⁴ Mantang solong naghuhurop-hurop, inisip ni Elias na garo daing kamanungdanan an saiyang gibuhon bilang propeta. Sinabi niya ki Jehova: ‘Bako akong urog karahay ki kan sakuyang mga [apuon].’ An buot sabihon niya iyo na pagmati niya mayo siyang pakinabang arog kan kabo-kabo asin tulang kan saiyang gadan nang mga apuon. Garo man sana siniyasat niya an sadiri niya basado sa sadiri niyang mga pamantayan saka inisip niya na dai siya nagin mapanggana asin daing halaga ki Jehova o sa kiisay pa man.

15. Paano inasegurar nin Diyos si Elias na mahalaga pa man giraray siya sa Saiya?

¹⁵ Pero iba nanggad an pagmansay ki Elias kan Makakamhan sa Gabos. Nagdanay na mahalaga si Elias sa paghiling nin Diyos, asin may ginibo si Jehova tanganing aseguraron si Elias na totoo iyan. Nagsugo an Diyos nin anghel tanganing pakusugon si Elias. Sinusteniran man ni Jehova si Elias nin kakanon asin tubig para sa 40 aldaw na pagbaklay kaini patimog sa Bukid nin Horeb. Dugang pa, mabuot na ikinorehir nin Diyos an salang paghuna ni Elias na mayo nang ibang Israelita na nagdanay na maimbod ki Jehova. Mahalaga man na mangnuhon na tinawan nin Diyos si Elias nin bagong asignasyon, asin inako iyan ni Elias. Nakinabang si Elias sa tabang ni Jehova, asin nagbalik siya sa gibuhon niya bilang propeta na may panibagong kusog.—1 Ha. 19:5-8, 15-19.

16. Ano an nagkapirang paagi na posibleng sinusteniran ka nin Diyos?

¹⁶ An eksperyensiya ni Elias makakatabang sa saimo na mapatunayan na nasa pagtubod ka asin puwedeng magpahiro sa saimo na magkaigwa nin positibong pagmansay. Inot, isipon an mga paagi na sinusteniran ka ni Jehova. May pagkakataon daw na saro sa mga lingkod niya, tibaad sarong elder o iba pang maygurang na Kristiyano, an nagtabang sa saimo kan mangaipo ka? (Gal. 6:2) Napakusog daw an saimong espirituwalidad paagi sa Bibliya, sa satong Kristiyanong mga publikasyon, asin sa mga pagtiripon kan kongregasyon? Sa sunod na makinabang ka sa saro sa mga paaging ini, isipon an tunay na Gikanan kan tabang na inako mo asin magpasalamat sa Saiya paagi sa pamibi.—Sal. 121:1, 2.

17. Ano an pinapahalagahan ni Jehova sa mga lingkod niya?

¹⁷ Ikaduwa, admitiron na an negatibong pagmansay puwedeng magin mapandaya. An pag-ebalwar nin Diyos sa sato an mahalaga. (Basahon an Roma 14:4.) Pinapahalagahan ni Jehova an satong debosyon asin kaimbudan sa saiya; dai niya kita ineebalwar paagi sa mga nagibo niyato. Asin siring kan nagin totoo ki Elias, tibaad ngani mas dakul pa an nagibo mo para ki Jehova kisa kan iniisip mo. Posibleng nagkaigwa ka nin marahay na epekto sa nagkapirang tugang sa kongregasyon, saka sa mga tawo sa teritoryo na nakaaram kan katotoohan paagi sa paghihinguwa mo.

18. Pruweba nin ano an asignasyon mo hali ki Jehova?

¹⁸ Ultimo, mansayon na an lambang asignasyon na hali ki Jehova pruweba na siya nasa kaibahan mo. (Jer. 20:11) Arog ni Elias, tibaad madisganar ka huling garo baga bakong mabunga an paglilingkod mo o garo baga masakiton maabot an nagkapirang espirituwal na mga pasuhan. Pero, nakikikabtang ka sa nakakalabi sa gabos na pribilehiyo na puwedeng makamtan nin siisay man ngunyan—an paghuhulit kan maugmang bareta asin pagdara kan pangaran nin Diyos. Magdanay na maimbod. Dangan, an mga tataramon sa saro sa mga parabula ni Jesus puwedeng sabihon sa saimo: ‘Lumaog ka sa kaugmahan nin saimong kagurangnan.’—Mat. 25:23.

19. Ano an kamugtakan kan kagsurat kan Salmo 102?

¹⁹ Masakit an kamugtakan kan kagsurat kan Salmo 102. Siya “inaapi,” na nagtitios nin grabeng pisikal asin emosyonal na kasakitan, asin mayo siyang kusog na atubangon an saiyang mga problema. (Sal. 102, NW, superskripsiyon) Maririsa ta sa saiyang mga tataramon na nakapokus siya sa kulog, kapungawan, asin personal na namamatian. (Sal. 102:3, 4, 6, 11) Inisip niya na pinabayaan na siya ni Jehova.—Sal. 102:10.

20. Paano an pamibi makakatabang sa saro na may linalabanan na negatibong mga kaisipan?

²⁰ Pero, puwede pa man giraray gamiton kan salmista an saiyang buhay sa pag-umaw ki Jehova. (Basahon an Salmo 102:19-21.) Arog kan mahihiling ta sa Salmo 102, dawa an mga nasa pagtubod puwedeng nakukulgan asin puwedeng nasasakitan na magpokus sa ibang bagay. Namatian kan salmista na ‘siring siya sa gamgam sa ibabaw nin atop na nagsasaro-saro’ o nagsosolo, na garo baga mayo siyang ibang kaiba kundi mga problema. (Sal. 102:7) Kun makamati ka nin arog kaiyan, biyong ipahayag ki Jehova an nasa puso mo siring kan ginibo kan salmista. An mga pamibi kan inaapi—an mga pamibi mo—makakatabang sa saimo mantang linalabanan mo an negatibong mga kaisipan. Nanuga si Jehova na “hihinanyugon niya an pamibi kan mga dukha; dai niya babaliwalaon an saindang pamibi.” (Sal. 102:17, NW) Magtiwala ka sa panugang iyan.

21. Paano magkakaigwa nin mas positibong pagmansay an saro na may linalabanan na negatibong sabuot?

²¹ Ipinapahiling man kan Salmo 102 kun paano ka magkakaigwa nin mas positibong pagmansay. Ginibo iyan kan salmista paagi sa pagbaling kan saiyang atensiyon sa relasyon niya ki Jehova. (Sal. 102:12, 27) Naranga siya sa pakaaram na si Jehova pirming yaon tanganing suportaran an Saiyang mga lingkod sa panahon nin kasakitan. Kaya kun an negatibong sabuot temporaryong nakakapugol sa saimo na gibuhon an pinakamakakaya mo sa paglilingkod sa Diyos, ipamibi mo iyan. Hagadon sa Diyos na dangugon an pamibi mo bako sanang tanganing makaginhawa ka sa kasakitan kundi tangani man na ‘maumaw an ngaran ni Jehova.’—Sal. 102:20, 21.

22. Paano puwedeng mapaugma kan lambang saro sa sato si Jehova?

²² Iyo, magagamit ta an Bibliya tanganing mapatunayan ta sa satong sadiri na kita nasa pagtubod asin na mahalaga kita ki Jehova. Totoo, sa presenteng sistema nin mga bagay, dai ta mahahali an gabos na negatibong sabuot o pagkadisganar. Pero, an lambang saro sa sato puwedeng mapaugma si Jehova asin maligtas paagi sa maimbod na pagtagal sa paglilingkod sa saiya.—Mat. 24:13.