Talaga daw na Paghabon Iyan?

SI Abiodun namamayong serbidor sa sarong dakulang hotel sa Nigeria. Mientras na sinisirrahan an kakanan sarong banggi, nakakua sia nin sarong bag na kuwarta na an katimbang $1,827, E.U. Daing pag-atrasong iinintrega nia an kuwarta, na dai nahaloy kinua kan kagsadiri kaiyan, sarong bisita sa hotel. Prinemyohan si Abiodun kan namamahala sa hotel nin dobleng promosyon asin itinao saiya an premyong “pinakamarahay na trabahador kan taon.” An kagsadiri kan kuwarta prinemyohan man sia.

An Quality, lokal na magasin nin mga bareta, itinampok an estorya, na inaapod si Abiodun na “Marahay na Samaritano.” Kan hapoton kan Quality kun nasugotan siang itago an kuwarta para saiya, nagsabi si Abiodun: ‘Saro ako sa mga Saksi ni Jehova. Kaya kun nakakukua ako nin ano man na bakong sakuya, iinuuli ko iyan sa kagsadiri.’

Dakol sa komunidad an nagngalas sa ipinaheling ni Abiodun na pagkasadiosan. An kapwa mga Saksi ni Abiodun naogma sa nangyari, pero dai sinda nagngalas. Sa bilog na daga an mga Saksi ni Jehova midbid sa saindang halangkaw na mga prinsipyo. Sa tahaw ninda an pagkasadiosan bakong pambihirang pangyayari; iyan kaugalean, mahalagang kabtang nin tunay na Kristianismo.

Alagad, paminsanminsan, an mga kamugtakan tibaad garo baga ginigibong masakit na paglaenon an pagkasadiosan asin an bako. Konsiderara an situwasyon na ini. Si Festus, na nag-aasikaso kan mga kontribusyon asin kuwenta sa sarong kongregasyon kan mga Saksi ni Jehova sa Solnopan na Aprika, nangangaipong gayo nin kuwarta.a An saiyang agom kinakaipuhan an seryosong operasyon na sinabi kan mga doktor kan babae na maninigong dai maatraso. Huminagad an ospital nin antisipong kabanga kan kuwarta.

Mayong kuwarta si Festus. Kan dumolok sia sa pirang tawo tanganing mangutang, sinayumahan sia. Dangan nagirumdoman nia an kuwarta na kinakapotan nia asin nangatanosan, ‘Tama daw para sa sako na isapeligrong magadan an sakong agom mantang may magigibo ako tanganing maolang iyan? Taano ta dai ko “utangon” an kuwarta kan kongregasyon? Ikauuli ko iyan kun mabayadan na ako kan mga may utang sako.’

Ginamit ni Festus an kuwartang idto na bako niang sadiri sa pagbayad sa ospital. Tama daw an saiyang pangangatanosan? An saiya daw na ginibo makatanosan huli sa emerhensiang inaatubang nia?

Kiisay na Kuwarta Iyan?

Sa pag-analisar sa mga hapot na ini, repasohon niato sa halipot an pirang punto manongod sa pinaghalean asin katuyohan kan kuwarta siring kan kinua ni Festus. An mga pondo naghahale sa boluntaryong mga kontribusyon kan mga miembro kan kongregasyon na boot na mapalakop an dalisay na pagsamba ki Jehova. (2 Corinto 9:7) Iyan dai ginagamit sa pagbayad nin mga suweldo, mantang mayo ni saro na binabayadan sa saindang ginigibo sa kongregasyon. Al kontraryo, an ikinontribuwir na kuwarta sa pangenot ginagamit sa pagkua asin pag-ataman sa lugar nin pagtiripon, sa parate Kingdom Hall. Nagtatao ini nin kombenyente asin komportableng lokasyon kun saen an mga tawo​—hoben asin gurang, mayaman asin pobre—​puwedeng magtiripon para sa pagtotokdo sa Biblia.

Kiisay na kuwarta iyan? Sadiri iyan kan kongregasyon sa kabilogan. Mayo nin indibiduwal na miembro na nagdedeterminar kun paano gagamiton an kuwarta. Mantang an grupo nin mga magurang an nagdidirehir sa pagbayad sa regular na mga gasto kan kongregasyon, kun may bakong ordinaryong babayadan, iinaatubang kan mga magurang an bagay sa bilog na kongregasyon para sa pag-aprobar.

Pag-utang o Paghabon?

Huli sa saiyang plano na salidahan an kuwarta sa pinakamadali na mapupuwede, minansay ni Festus an saiyang ginibo na pag-utang. Minsan siring, an Webster’s New Dictionary of Synonyms ginagamit an ibang termino manongod sa “pagkua asin pagdara kan rogaring nin iba na sa parate patago o sa dai nia pakaaram asin perming dai nia itinogot.” An mga termino “paghabon” asin “parahabon.” Mayong pagtogot o autorisasyon, kinua ni Festus an kuwarta na sadiri kan kongregasyon. Kun siring, iyo, nagkasala sia nin paghabon. Sia parahabon.

Siyempre, igwa nin mga grado nin pagkakulpable sa motibasyon na nasa likod nin paghabon. Maheheling niato iyan sa halimbawa ni Judas Iscariote, na pinaniwalaan na asikasohon an kuwarta na sadiri ni Jesus asin kan maimbod na mga apostol. Nagsasabi an Biblia: “[Si Judas] parahabon asin yaon sa saiya an kahon nin kuwarta patin kinukua nia an pirak na ilinalaog dian.” (Juan 12:6) Minotibar nin maraot na puso asin biyong kapasloan, si Judas orog na ruminaot. Sa katapustapusi suminagkod sia sa pagpasaloib sa Aki nin Dios​—sa kantidad na 30 pidasong pirak.​—Mateo 26:​14-16.

Pero si Festus namotibar kan paghadit sa saiyang naghehelang na agom. Nangangahulogan daw ini na mayo siang sala? Dai nanggad. Horophoropa an sinasabi kan Biblia dapit sa paghabon sa saro pang garo baga emerhensiang situwasyon: “Dai ikinaoongis nin mga tawo an parahabon huli sana ta nagkasala sia nin paghabon tanganing pakakanon an saiyang kalag kun sia nagugutom. Alagad, kun madakop, babayadan nia iyan nin pitong doble kan halaga kaiyan; an gabos na bagay sa saiyang harong itatao nia.” (Talinhaga 6:​30, 31) Sa ibang pagtaram, kun madakop, kaipuhan na atubangon kan parahabon an biyong penalidad kan pagboot. Sono sa Mosaikong Pagboot, an parahabon maninigong magbayad para sa saiyang krimen. Kaya imbes na dagkahon o patawadon an paghabon, nagpapatanid an Biblia na dawa sa emerhensiang mga situwasyon, an paghabon puwedeng magresulta sa pagkawara nin mga rogaring, pagduhagi, asin pinakaseryoso, an pagkawara kan pag-oyon nin Dios.

Bilang mga Saksi ni Jehova, an gabos na tunay na Kristiano, nangorogna an mga pinaniwalaan nin mga paninimbagan sa laog kan kongregasyon, kaipuhan na magin halimbawa, “dai nin kanawayan.” (1 Timoteo 3:10) Dai naresibi ni Festus an linalaoman niang kuwarta, asin kun siring dai nia nasalidahan an kuwarta na kinua nia. Naaraman an saiyang ginibo. Ano an nangyari saiya? Kun nagin siang parahabon na daing pagsolsol, natiwalag kutana sia sa malinig na Kristianong kongregasyon. (1 Pedro 4:15) Pero nagbasol siang marhay asin nagsolsol. Kun siring, makapagdadanay sia sa kongregasyon, minsan ngani nawara nia an saiyang mga pribilehiyo nin paglilingkod.

Pagsarig sa Dios

Nagpatanid si apostol Pablo na an paghabon nin sarong tawo na nagsasabing naglilingkod ki Jehova puwedeng magdara nin langhad sa ngaran nin Dios asin sa banwaan na nagdadara kan Saiyang ngaran. Nagsurat si Pablo: “Ika daw na nagtotokdo sa iba, dai nagtotokdo sa saimong sadiri? Ika, na naghuhulit na ‘Dai maghabon,’ naghahabon ka? Huli ta ‘an ngaran nin Dios pinaglalanghadan huli sa saindo banwaan.’”​—Roma 2:​21, 24.

Si Agur, madonong na tawo kan suanoy na mga panahon, nagsabi man nin kaparehong punto. Sa saiyang pamibi hinagad nia na sia logod ‘dai magin dukha asin aktuwal na maghabon asin atakihon an ngaran kan saiyang Dios.’ (Talinhaga 30:9) Mangnoha na an madonong na tawo minidbid na an kadukhaan puwedeng magbunga nin mga kamugtakan na tibaad makasugot minsan sa sarong matanos na tawo na maghabon. Iyo, an masakit na mga panahon puwedeng makabalo sa pagtubod nin sarong Kristiano sa abilidad ni Jehova na asikasohon an mga pangangaipo kan saiyang banwaan.

Minsan siring, an maimbod na mga Saksi ni Jehova, kabale na an mga dukha, nagtutubod na an Dios “an parabalos sa mga maigot na naghahanap sa saiya.” (Hebreo 11:6) Aram ninda na binabalosan ni Jehova an saiyang mga maimbod paagi sa pagtabang sainda na asikasohon an saindang mga pangangaipo. Liniwanag iyan ni Jesus sa saiyang Sermon sa Bukid, na nagsasabing: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ . . . Huli ta an saindong langitnon na Ama nakakaaram na kaipuhan nindo an gabos na bagay na ini. Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:​31-33.

Paano tinatawan nin Dios an mga nangangaipo sa Kristianong kongregasyon? Sa dakol na paagi. An saro paagi sa mga kapagtubod. An banwaan nin Dios nagpapaheling nin tunay na pagkamoot para sa lambang saro. Isinasapuso ninda an sadol sa Biblia: “Siisay man na igwa nin kaya sa buhay asin naheheling an saiyang tugang na nasa pangangaipo alagad minapinto kan saiyang pagkaherak sa saiya, paano an pag-erok kan pagkamoot nin Dios sa saiya? Saradit na aki, mamoot kita, bakong sa tataramon ni sa dila, kundi sa gibo asin katotoohan.”​—1 Juan 3:​17, 18.

Sa bilog na kinaban, sa labing 73,000 na kongregasyon, labing apat may kabangang milyon na Saksi ni Jehova an mahigos na nagmamaigot na maglingkod sa Dios sono sa saiyang matanos na mga prinsipyo. Aram ninda na nungkang pababayaan nin Dios an saiyang mga maimbod. An mga naglingkod ki Jehova sa laog nin dakol na taon ilinalangkaw an saindang tingog sa pag-oyon ki Hadeng David, na nagsurat: “Ako nagin hoben man, asin naggurang man, alagad dai ako noarin man nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.”​—Salmo 37:25.

Mas marahay nanggad na magtubod sa Dios na nagpasabong kan mga tataramon na iyan, imbes na togotan an sadiri na masugotan na maghabon asin posibleng mawara an pag-oyon nin Dios sagkod lamang!​—1 Corinto 6:​9, 10.

[Nota sa Ibaba]