An Kapangahasan Nagbubunga nin Kadaihan nin Onra

“Nag-abot daw an kapangahasan? Kun siring maabot man an kadaihan nin onra; alagad an kadonongan yaon sa mga hababa an boot.”—TALINHAGA 11:2.

1, 2. Ano an kapangahasan, asin sa anong mga paagi na iyan nagbunga nin grabeng kapahamakan?

PINANGENOTAN nin sarong maurihon na Levita an pagsururog na rebelde tumang sa mga autoridad na nombrado ni Jehova. Nag-imbento nin tusong pakana an sarong ambisyosong prinsipe tanganing maagaw an trono kan saiyang ama. Dai inintindi nin sarong hadeng daing pasensia an malinaw na instruksion kan propeta nin Dios. May pararehong ugale an tolong Israelitang ini: an kapangahasan.

² An kapangahasan karakteristiko kan puso na nagtatao nin grabeng peligro sa gabos. (Salmo 19:13) An tawong pangahas pusoan na pinagbobotan an mga bagay na mayo man nin autorisasyon na gibohon iyan. Parate na ini nagbubunga nin grabeng kapahamakan. Sa katunayan, an kapangahasan nakapabagsak nin mga hade asin mga imperyo. (Jeremias 50:29, 31, 32; Daniel 5:20) Nasiod pa ngani kaiyan an nagkapirang lingkod ni Jehova asin dinara sinda sa kapahamakan.

 3. Paano niato maaaraman an mga peligro nin kapangahasan?

³ May marahay na dahelan na sinasabi kan Biblia: “Nag-abot daw an kapangahasan? Kun siring maabot man an kadaihan nin onra; alagad an kadonongan yaon sa mga hababa an boot.” (Talinhaga 11:2) Tinatawan kita kan Biblia nin mga halimbawa na nagpapatunay sa katotoohan kan talinhagang ini. An pagsiyasat sa nagkapira digdi matabang sa sato na masabotan an peligro nin paglapas sa tamang mga sagkodan. Huli kaini, estudyaran niato kun paano an pagkauri, ambisyon, asin kadaihan nin pasensia nagpangyari sa tolong nasambitan sa kapinonan na magin pangahas, na nagbunga kan pagkawara kan saindang onra.

Si Core—Sarong Maurihon na Rebelde

 4. (a) Siisay si Core, asin sa anong makasaysayan na mga pangyayari sia daing duda na may kabtang? (b) Sa huring mga taon kan saiyang buhay, anong bantog sa karatan na gibo an isinutsut ni Core?

⁴ Si Core sarong Levitang Coatita, primerong pinsan ni Moises asin ni Aaron. Minalataw na sia maimbod ki Jehova sa laog nin mga dekada. Si Core nagkapribilehio na makabilang sa mga milagrosong ilinigtas sa Dagat na Pula, asin posibleng marhay na nakikabtang sia sa pagsagibo kan paghokom ni Jehova tumang sa mga Israelitang nagsasamba sa ogbon na baka duman sa Bukid nin Sinai. (Exodo 32:26) Minsan siring, pag-abot nin panahon, si Core namoon sa sarong rebelyon tumang ki Moises asin Aaron na dian kaiba an mga Rubenita na si Datan, Abiram, asin On, kaiba an 250 namamayong Israelita.a “Igo na an ginigibo nindo,” sabi ninda ki Moises asin Aaron, “huli ta an bilog na katiriponan, sinda gabos, banal asin si Jehova nasa tahaw ninda. Kun siring, taano ta ilalangkaw nindo an saindong sadiri sa kongregasyon ni Jehova?”—Bilang 16:1-3.

5, 6. (a) Taano si Core ta nagrebelde tumang ki Moises asin Aaron? (b) Taano ta masasabi na posibleng marhay na pinagmenos ni Core an saiyang lugar sa areglo nin Dios?

⁵ Pakalihis nin dakol na taon nin pagigin fiel, taano ta nagrebelde si Core? Daing duwa-duwa na bakong mapan-api an pangengenot ni Moises sa Israel, ta sia “an pinakamahoyo sa gabos na tawo na yaon sa ibabaw kan daga.” (Bilang 12:3) Pero, si Core garo baga nauuri ki Moises asin Aaron saka ikinaaanggot an pagkaprominente ninda, asin ini nakamotibar sa saiya na magsabi—na sala man—na sa sadiri sanang kagustohan asin sa kaimotan na saindang ilinangkaw an saindang sadiri sa kongregasyon.—Salmo 106:16.

⁶ Posibleng marhay na an sarong problema ni Core iyo na dai nia mahal an sadiri niang mga pribilehio sa areglo nin Dios. Totoo, an mga Levitang Coatita bakong mga saserdote, alagad sinda mga paratokdo kan Ley nin Dios. Sinda man an nag-aalsa kan mga muebles saka kasangkapan kan tabernakulo kun an mga ini kaipuhan na darahon sa ibang lugar. Idto bakong trabaho na daing halaga, ta an banal na mga kasangkapan makakapotan sana nin mga tawo na malinig sa relihioso saka moral na paagi. (Isaias 52:11) Huli kaini, kan atubangon ni Moises si Core, garo man sana sia naghahapot, An pagheling mo daw sa asignasyon mo ordinaryong marhay kaya kaipuhan mo man na makua an pagkasaserdote? (Bilang 16:9, 10) Dai narealisar ni Core na an pinakadakulang onra iyo an fiel na paglilingkod ki Jehova segun sa saiyang areglo—bakong an pakaabot sa sarong espesyal na kategoriya o posisyon.—Salmo 84:10.

 7. (a) Paano inatubang ni Moises si Core asin an saiyang mga tawohan? (b) Paano tinapos sa kapahapahamak na paagi an pagrebelde ni Core?

⁷ Inimbitaran ni Moises si Core asin an saiyang mga tawohan na magtiripon pagkaaga sa tolda nin katiriponan na may darang mga bugtakan nin kalayo asin insenso. Si Core asin an saiyang mga tawohan dai autorisadong magdolot nin insenso, ta sinda bakong mga saserdote. Kun sinda umabot na may darang mga bugtakan nin kalayo asin insenso, ini malinaw na magpaparisa na naghohona pa man giraray an mga tawong ini na sinda may diretsong gumawe bilang mga saserdote—dawa nagkaigwa na nin bilog na banggi na horophoropon giraray an bagay na iyan. Kan umatubang sinda pagkaaga, tama sana na ipinahayag ni Jehova an saiyang grabeng kaanggotan. Kun manongod sa mga Rubenita, “binuka kan daga an ngoso kaiyan asin hinalon sinda.” An iba pa, kaiba si Core, tinumtom nin kalayo hale sa Dios. (Deuteronomio 11:6; Bilang 16:16-35; 26:10) An kapangahasan ni Core nagbunga kan pinakagrabeng kadaihan nin onra—an pagdesaprobar nin Dios!

Paglabanan an “Tendensiang Mauri”

 8. Paano an “tendensiang mauri” puedeng mahayag sa tahaw nin mga Kristiano?

⁸ An salaysay manongod ki Core patanid sa sato. Mantang may “tendensiang mauri” an mga tawong bakong sangkap, iyan puedeng mahayag dawa sa Kristianong kongregasyon. (Santiago 4:5) Halimbawa, tibaad kita mapagrisa sa posisyon. Kapareho ni Core, tibaad mauri kita sa mga igwa kan pribilehio na minamawot niato. O puede kitang magin kapareho kan Kristiano kan enot na siglo na an ngaran Diotrefes. Tatsador siang marhay sa autoridad kan mga apostol, na an malinaw na dahelan gusto nia na sia an namamahala. Sa katunayan, nagsurat si Juan na si Diotrefes “gustong magkamit kan enot na lugar.”—3 Juan 9.

 9. (a) Anong aktitud manongod sa mga paninimbagan sa kongregasyon an kaipuhan na likayan niato? (b) Ano an tamang punto de vista sa satong lugar sa areglo nin Dios?

⁹ Siempre, bakong sala para sa sarong Kristianong lalaki na maghingoang kamtan an mga paninimbagan sa kongregasyon. Inenkaminar pa ngani ni Pablo an siring. (1 Timoteo 3:1) Minsan siring, maninigo na nungka niatong ibilang an mga pribilehio sa paglilingkod na tanda nin merito, na garo baga sa pakaabot dian, kita nakaabante nin sarong tangga sa inaapod na hagdan nin pag-asenso. Girumdoma, sinabi ni Jesus: “An siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo.” (Mateo 20:26, 27) Malinaw nanggad, sala na mauri sa mga mas dakula an paninimbagan, na garo baga an halaga niato sa Dios depende sa satong “ranggo” sa saiyang organisasyon. Sinabi ni Jesus: “Kamo gabos magturugang.” (Mateo 23:8) Iyo, baga man parahayag o payunir, bagong mabautismohan o haloy nang nagdadanay sa integridad—an gabos na bilog na kalag na naglilingkod ki Jehova may mahalagang lugar sa saiyang areglo. (Lucas 10:27; 12:6, 7; Galacia 3:28; Hebreo 6:10) Tunay na sarong bendisyon na magkaabagang maglingkod kaiba nin minilyon na naghihingoang iaplikar an hatol kan Biblia: “Kamo maghagkos nin kababaan nin pag-isip sa lambang saro.”—1 Pedro 5:5.

Si Absalon—Sarong Ambisyosong Oportunista

10. Siisay si Absalon, asin paano nia prinobaran na maglanalana sa mga minadolok sa hade para sa paghokom?

¹⁰ An nagin buhay kan ikatolong aki ni Hadeng David, si Absalon, nagtatao nin praktikal na leksion sa ambisyon. An mapagpakanang oportunistang ini naghingoa na maglanalana sa mga nagduduman sa hade para sa paghokom. Enot iininsinwar nia na si David indiperente sa saindang mga pangangaipo. Dangan dai na sia nagtagotago asin duminiretso na sia sa punto. “O kun nombrahan sana kutana akong hokom sa daga,” an garo kinakantadang sabi ni Absalon, “tangani na makadolok sa sako an lambang tawo na may kaso dapit sa ley o sa paghokom! Kun siring gigibohon ko nanggad sa saiya an hustisya.” Daing limite an tusong pamomolitika ni Absalon. “Kun may tawong minarani sa pagdoko sa saiya,” sabi kan Biblia, “iinuunat nia an saiyang kamot asin kinakapotan sia patin hinahadokan sia. Asin padagos na ginibo ni Absalon an arog kaini sa gabos na Israelita na minadolok sa hade para sa paghokom.” Ano an resulta? “Padagos na hinabon ni Absalon an puso kan mga taga Israel.”—2 Samuel 15:1-6.

11. Paano prinobaran na agawon ni Absalon an trono ni David?

¹¹ Determinado si Absalon na agawon an paghade kan saiyang ama. Limang taon bago kaini, ipinagadan nia an matuang aki ni David, si Amnon, garo baga bilang balos sa paglugos sa tugang ni Absalon na si Tamar. (2 Samuel 13:28, 29) Minsan siring, tibaad dawa kaidto minamawot na ni Absalon an trono, na ibinilang an paggadan ki Amnon na kombenyenteng paagi na mahale an sarong karibal.b Ano man an kamugtakan, kan napapanahon na, guminibo nin aksion si Absalon. Ipinadeklarar nia an saiyang pagkahade sa bilog na nasyon.—2 Samuel 15:10.

12. Ipaliwanag kun paano an kapangahasan ni Absalon nagbunga nin kadaihan nin onra.

¹² Sa kadikit na panahon, nagin mapanggana si Absalon, ta “an pagkasapakat nagpapadagos na kumosog, asin padagos na nagdadakol an tawo na kaiba ni Absalon.” Pag-abot nin panahon, si Hadeng David napiritan na dumulag tanganing iligtas an saiyang buhay. (2 Samuel 15:12-17) Pero, dai nahaloy, naputol an karera ni Absalon kan sia gadanon ni Joab, itapok sa sarong kalot, asin tahoban nin mga gapo. Isip-isipa—an ambisyosong tawong ini na gustong magin hade dai ngani tinawan nin disenteng lobong kan sia magadan!c An kapangahasan tunay na nagbunga kan pagkawara kan onra ni Absalon.—2 Samuel 18:9-17.

Rayoan an Maimot na Ambisyon

13. Paano puedeng magkagamot sa puso nin sarong Kristiano an ambisyosong espiritu?

¹³ Nagseserbing leksion sa sato an pag-asenso ni Absalon sa kapangyarihan asin an suminunod na pagbagsak nia. Sa daing prinsipyong kinaban na ini, uso para sa mga tawo na maglabidlabid sa saindang mga among, na hinihingoang suyoon sinda tangani sanang makatao nin marahay na impresyon o tibaad magkamit nin sarong klase nin pribilehio o pag-asenso sa ranggo. Pero, tibaad managsag man sinda sa saindang mga sakop, na naglalaom na makua an saindang pabor asin suporta. Kun dai kita magmamaan, puedeng magkagamot sa satong puso an siring na ambisyosong espiritu. Minalataw na nangyari ini sa nagkapira kaidtong enot na siglo, kaya kinaipuhan na an mga apostol tumao nin mapuersang mga patanid tumang sa mga siring.—Galacia 4:17; 3 Juan 9, 10.

14. Taano ta maninigo niatong likayan an ambisyoso, ilinalangkaw an sadiring espiritu?

¹⁴ Si Jehova mayo nin lugar sa saiyang organisasyon para sa pinapadakula an saindang papel na mga nagpapakana na naghihingoang ‘hanapon an sadiri nindang kamurawayan.’ (Talinhaga 25:27) Sa katunayan, nagpapatanid an Biblia: “Puputolon ni Jehova an gabos na mahalnas na ngabil, an dila na nagtataram nin darakulang bagay.” (Salmo 12:3) Si Absalon mahalnas an mga ngabil. Nagtaram sia nin mapaabaw-abaw na mga bagay sa mga tawong an pabor kaipuhan nia—na gabos sa katuyohan na makua an sarong minamawot na katongdan. Sa kabaliktaran, maogma nanggad kita na mapabilang sa kasararoan nin magturugang na nagkukuyog sa hatol ni Pablo: “Dai [maggibo] nin ano man huli sa iriwal o huli sa egotismo, kundi sa kababaan nin pag-isip [ibilang] an iba na mas halangkaw kisa saindo.”—Filipos 2:3.

Si Saul—Sarong Hadeng Daing Pasensia

15. Paano na si Saul dati hababa an boot?

¹⁵ Dati si Saul, na kan huri nagin hade kan Israel, hababa an boot. Halimbawa, estudyare an nangyari kan sia hoben pa. Kan an propeta nin Dios na si Samuel magtaram nin paborable manongod sa saiya, si Saul mapakumbabang nagsimbag: “Bakong ako Benjaminita na gikan sa kasaditsaditi sa mga tribo nin Israel, asin an sakong pamilya iyo an pinakadaing halaga sa gabos na pamilya kan tribo ni Benjamin? Kaya taano ta nagsabi ka sa sako nin arog kaining bagay?”—1 Samuel 9:21.

16. Sa anong paagi na si Saul nagpaheling nin pagigin daing pasensia?

¹⁶ Minsan siring, paghaloyhaloy nawara an kababaan nin boot ni Saul. Kan nakikiguerra sa mga Filisteo, nagsibog sia pa Gilgal, na duman inaasahan na halaton nia na si Samuel umabot asin magngayongayo sa Dios paagi sa mga atang. Kan si Samuel dai umabot sa itinalaan na oras, may kapangahasan na idinolot na mismo ni Saul an atang na tinotong. Tamang-tama pagkatapos nia, uminabot si Samuel. “Anong ginibo mo?” an hapot ni Samuel. Nagsimbag si Saul: “Naheling ko na an banwaan nagkakasuruwaysuway na sa sako, asin ika—dai ka nag-abot sa itinalaan na mga aldaw . . . Kaya pinirit ko an sakong sadiri asin idinolot ko an atang na tinotong.”—1 Samuel 13:8-12.

17. (a) Sa primero, taano an ginibo ni Saul ta tibaad garo baga makatanosan? (b) Taano ta kinondenar si Saul ni Jehova huli sa saiyang aktong daing pasensia?

¹⁷ Sa primero, tibaad garo baga makatanosan an ginibo ni Saul. Total, an banwaan nin Dios “nasa masakit na kamugtakan,” “nagigipit na gayo,” asin nagtatakig huli sa saindang desesperadong situwasyon. (1 Samuel 13:6, 7) Tunay nanggad, bakong sala na magsadiring kabotan kun hinahagad iyan kan mga kamugtakan.d Pero, girumdomon na nababasa ni Jehova an puso asin naaaraman an kalaoglaoging mga motibo niato. (1 Samuel 16:7) Huli kaini, seguradong may naheling siang mga bagay manongod ki Saul na dai deretsong sinasabi sa salaysay kan Biblia. Halimbawa, tibaad naheling ni Jehova na an kadaihan nin pasensia ni Saul pinukaw nin kapalangkawan. Tibaad nasumong marhay si Saul na sia—an hade kan bilog na Israel—kaipuhan na maghalat sa saro na sa pagheling nia gurang na, atrasadong propeta! Ano man an kamugtakan, sa paghona ni Saul an pagkahuri ni Samuel nagtao sa saiya kan diretso na sia na mismo an humiro asin dai na pag-intindihon an malinaw na instruksion na itinao sa saiya. An resulta? Dai inomaw ni Samuel an inisyatiba ni Saul. Al kontraryo, sinagwe nia nin estrikto si Saul, na sinasabi: “An saimong kahadean dai magdadanay . . . huli ta ika dai nagkuyog sa ipinagboot ni Jehova sa saimo.” (1 Samuel 13:13, 14) Sa giraray, an kapangahasan nagbunga nin kadaihan nin onra.

Magmaan sa Kadaihan nin Pasensia

18, 19. (a) Iladawan kun paano an kadaihan nin pasensia puedeng magpangyari sa sarong lingkod nin Dios sa presenteng aldaw na magin pangahas. (b) Ano an maninigong girumdomon niato manongod sa pagpunsionar kan Kristianong kongregasyon?

¹⁸ An salaysay manongod sa pangahas na akto ni Saul isinurat sa Tataramon nin Dios para sa satong kapakinabangan. (1 Corinto 10:11) Pasil na marhay na kita mauyam sa mga pagkabakong sangkap kan satong mga tugang. Kapareho ni Saul, tibaad kita mawaran nin pasensia, na iniisip na tangani na maasikaso nin tama an mga bagay, dapat na kita mismo an gumibo kaiyan. Ipamugtak, halimbawa, na an sarong tugang na lalaki nakalalabi sa iba sa nagkapirang abilidad sa pag-organisar. Sia nasa oras, aram an pinakabagong impormasyon sa mga prosedimiento sa kongregasyon, asin may abilidad sa pagtaram saka pagtotokdo. Pero, naririsa nia na an iba dai nakaaabot sa saiyang sobra kasuripot na mga pamantayan, asin bako man lamang sindang episiente na arog kan gusto nia. Ini daw nagtatao sa saiya nin diretso na magpahayag nin kadaihan nin pasensia? Maninigo daw niang tatsaran an saiyang mga tugang, na tibaad ipinasesentido na kun bakong huli sa saiyang mga paghihingoa mayo nin mahahaman asin mabagsak an kongregasyon? Ini magigin pangahas!

¹⁹ An totoo, ano an nakabobogkos sa sarong kongregasyon nin mga Kristiano? Abilidad sa pagdirehir? pagigin episiente? rarom nin kaaraman? Totoo, an mga bagay na ini may bentaha sa aregladong pagpunsionar nin sarong kongregasyon. (1 Corinto 14:40; Filipos 3:16; 2 Pedro 3:18) Minsan siring, sinabi ni Jesus na an saiyang mga parasunod sa pangenot mamimidbid sa saindang pagkamoot. (Juan 13:35) Iyan an dahelan na an may pagmakolog na kamagurangan, minsan ngani may katultolan, nakaaaram na an kongregasyon bakong sarong negosyo na nagkakaipo nin estriktong pagdirehir; imbes, iyan kompuesto nin sarong aripompon na nagkakaipo nin mapagpadangat na pangataman. (Isaias 32:1, 2; 40:11) An pangahas na dai pag-intindi sa siring na mga prinsipyo parateng nagbubunga nin diriskutiran. Sa kabaliktaran, an diosnon na katultolan nagbubunga nin katoninongan.—1 Corinto 14:33; Galacia 6:16.

20. Ano an pag-oolayan sa kasunod na artikulo?

²⁰ An salaysay kan Biblia manongod ki Core, Absalon, asin Saul malinaw na nagpapaheling na an kapangahasan nagbubunga nin kadaihan nin onra, arog kan sinasabi sa Talinhaga 11:2. Minsan siring, idinudugang kan bersikulo man sanang iyan sa Biblia: “An kadonongan yaon sa mga hababa an boot.” Ano an kababaan nin boot? Anong mga halimbawa sa Biblia an makatatabang na matawan nin liwanag an kualidad na ini, asin paano kita makapaheheling nin kababaan nin boot ngonyan? An mga hapot na ini pag-oolayan sa kasunod na artikulo.

[Mga Nota sa Ibaba]

An Kadonongan Yaon sa mga Hababa an Boot”

“Anong balos an hinahagad sa saimo ni Jehova kundi na . . . magin hababa an boot sa paglakaw sa kaibahan kan saimong Dios?”—MIQUEAS 6:8.

1, 2. Ano an kababaan nin boot, asin paano iyan napapalaen sa kapangahasan?

NAGSAYUMA an sarong prominenteng apostol na mag-apod nin atension sa saiyang sadiri. Inapod nin sarong makosog an boot na hokom na Israelita an saiyang sadiri na kasaditsaditi sa kamag-anakan kan saiyang ama. Inadmitir kan pinakadakulang tawo na nabuhay kasuarin man na sia mayo nin autoridad na daing sagkod. An lambang saro sa mga tawong ini nagpaheling nin kababaan nin boot.

² An kababaan nin boot iyo an kabaliktaran nin kapangahasan. An tawong hababa an boot tama sana an pagheling sa saiyang mga abilidad saka halaga asin mayo nin kahambogan o banidad. Imbes na magin mapalangkaw, hambogon, o ambisyoso, an tawong hababa an boot pirmeng nakakarealisar kan saiyang mga limitasyon. Huli kaini, saiyang iginagalang asin tinatawan nin igong konsiderasyon an mga saboot saka punto de vista nin iba.

 3. Sa anong paagi na an kadonongan “yaon sa mga hababa an boot”?

³ May marahay na dahelan na sinasabi kan Biblia: “An kadonongan yaon sa mga hababa an boot.” (Talinhaga 11:2) An tawong hababa an boot madonong ta sia nagsusunod sa dalan na aprobado nin Dios, asin linilikayan nia an pangahas na espiritu na nagbubunga nin kadaihan nin onra. (Talinhaga 8:13; 1 Pedro 5:5) An kadonongan nin pagigin hababa an boot pinatutunayan kan nagin buhay nin dakol na lingkod nin Dios. Estudyaran niato an tolong halimbawa na sinitar sa enot na parapo.

Si Pablo—Sarong “Sakop” Asin “Pinaniniwalaan”

 4. Anong daing kaagid na mga pribilehio an nakamtan ni Pablo?

⁴ Si Pablo prominenteng tawo sa tahaw kan enot na mga Kristiano, asin natural sana. Sa saiyang ministeryo, nagbiahe sia nin rinibong kilometro sa dagat saka daga, asin nakapatindog sia nin balakid na kongregasyon. Dugang pa, binendisyonan si Pablo ni Jehova nin mga bisyon asin kan balaog na pakataram sa ibang mga lenguahe. (1 Corinto 14:18; 2 Corinto 12:1-5) Pinasabngan man nia si Pablo na sumurat nin 14 surat na ngonyan kabtang kan Kristianong Griegong Kasuratan. Malinaw nanggad, masasabi na an mga pagpapagal ni Pablo labi sa pagpapagal kan gabos na ibang apostol.—1 Corinto 15:10.

 5. Paano ipinaheling ni Pablo na sia may hababang boot na pagheling sa saiyang sadiri?

⁵ Mantang si Pablo nangengenot sa Kristianong aktibidad, tibaad asahan nin nagkapira na sia naoogmang marhay sa pagigin sikat, na ineeksibir pa ngani an saiyang autoridad. Alagad ta bakong siring, huli ta si Pablo hababa an boot. Inapod nia an saiyang sadiri na “an pinakahababa sa mga apostol,” na idinudugang: “Dai ako angay na apodon apostol, huli ta pinaglamag ko an kongregasyon nin Dios.” (1 Corinto 15:9) Bilang dating paralamag sa mga Kristiano, nungka na nalingawan ni Pablo na huli sana sa dai na kutana maninigong kabootan kaya sia nagkaigwa nin relasyon sa Dios, lalo na an magkamit nin espesyal na mga pribilehio sa paglilingkod. (Juan 6:44; Efeso 2:8) Huli kaini, dai hinona ni Pablo na ginibo siang nakalalabi sa iba kan saiyang ekstraordinaryong mga nagibo sa ministeryo.—1 Corinto 9:16.

 6. Paano si Pablo nagpaheling nin kababaan nin boot sa saiyang relasyon sa mga taga Corinto?

⁶ An kababaan nin boot ni Pablo partikularmenteng risang-risa sa saiyang relasyon sa mga taga Corinto. Minalataw na an nagkapira sa sainda gulat sa mga hinohona nindang prominenteng mga paraataman, kaiba si Apolos, si Cefas, asin si Pablo mismo. (1 Corinto 1:11-15) Alagad dai hinagad ni Pablo an pag-omaw kan mga taga Corinto ni inaprobetsaran an saindang paghanga. Kun nagsosongko sa sainda, dai nia iinatubang an saiyang sadiri na may “sobrang pananaram o kadonongan.” Imbes, sinabi ni Pablo mapadapit sa saiya man sana asin sa saiyang kairiba: “Pabayaan na tasaran kita nin tawo bilang mga sakop ni Cristo asin mga pinaniniwalaan kan sagradong mga hilom nin Dios.”a—1 Corinto 2:1-5; 4:1.

 7. Paano si Pablo nagpaheling nin kababaan nin boot dawa kun nagtatao nin hatol?

⁷ Nagpaheling pa ngani si Pablo nin kababaan nin boot kan sia kaipuhan na tumao nin mapuersang hatol asin pagdirehir. Nakimaherak sia sa saiyang mga kapwa Kristiano “huli sa mga pagkamadinamayon nin Dios” asin “basado sa pagkamoot” imbes na huli sa gabat kan saiyang autoridad bilang apostol. (Roma 12:1, 2; Filemon 8, 9) Taano ta ginibo ini ni Pablo? Huli ta an talagang pagheling nia sa saiyang sadiri “kapwa trabahador” kan saiyang mga tugang, bakong ‘kagurangnan kan saindang pagtubod.’ (2 Corinto 1:24) Mayong duda na an kababaan nin boot ni Pablo an nakatabang na sia mahalon na marhay kan Kristianong mga kongregasyon kan enot na siglo.—Gibo 20:36-38.

May Hababang Boot na Pagheling sa Satong mga Pribilehio

8, 9. (a) Taano ta maninigo na kita magkaigwa nin may hababang boot na pagheling sa satong sadiri? (b) Paano makapaheheling nin kababaan nin boot an mga may paninimbagan?

⁸ Nagtao si Pablo nin marahay na halimbawa sa mga Kristiano ngonyan. Ano man na mga paninimbagan an ipinagkatiwala sa sato, mayo sa sato na maninigong magsaboot na kita nakalalabi sa iba. “Kun an siisay man nag-iisip na sia may halaga mantang sia daing halaga,” an surat ni Pablo, “dinadaya nia an saiyang sadiring isip.” (Galacia 6:3) Taano? Huli ta “an gabos nagkasala asin nagkulang sa kamurawayan nin Dios.” (Roma 3:23; 5:12) Iyo, nungka niatong lingawan na kita gabos nagmana nin kasalan saka kagadanan ki Adan. Dai kita ilinalangkaw sa satong hamak na makasalan na kamugtakan nin espesyal na mga pribilehio. (Eclesiastes 9:2) Arog ki Pablo, huli sana sa dai na kutana maninigong kabootan kaya an mga tawo nagkakaigwa nin relasyon sa Dios, lalo na an maglingkod sa saiya sa pribilehiadong katongdan.—Roma 3:12, 24.

⁹ Sa pakaaram kaini, an tawong hababa an boot dai ikinaoogma na may pag-orgolyo an saiyang mga pribilehio ni ipinaghahambog an saiyang mga nagibo. (1 Corinto 4:7) Kun nagtatao nin hatol o pagdirehir, ginigibo nia iyan bilang kapwa trabahador—bakong bilang kagurangnan. Tunay nanggad na sala para sa saro na nakalalabi sa iba an abilidad sa nagkapirang trabaho na maghagad nin pag-omaw sa o aprobetsaran an paghanga nin mga kapagtubod. (Talinhaga 25:27; Mateo 6:2-4) An solamenteng pag-omaw na may halaga hale sa iba—asin iyan maninigong dai hinahagad. Kun iyan itao, dai niato maninigong itogot na iyan magpangyari sa sato na mag-isip dapit sa satong sadiri nin orog kisa maninigo.—Talinhaga 27:2; Roma 12:3.

10. Ipaliwanag kun paano an nagkapira na tibaad garo baga hamak tibaad sa katotoohan “mayaman sa pagtubod.”

¹⁰ Kun may ipinagkakatiwala sa satong paninimbagan, an kababaan nin boot matabang sa sato na likayan na tawan nin sobrang importansia an satong sadiri, na itinatao an impresyon na an kongregasyon nag-ooswag huli sana sa satong mga paghihingoa asin abilidad. Halimbawa, tibaad kita may espesyal na abilidad sa pagtotokdo. (Efeso 4:11, 12) Minsan siring, kun hababa an boot niato, dapat na midbidon niato na an nagkapira sa pinakaimportanteng leksion na nanonodan sa pagtiripon kan kongregasyon dai itinatao sa plataporma. Halimbawa, dai daw naparirigon an saindong boot kun naheheling nindo an nagsosolong magurang na regular na nag-aatender sa Kingdom Hall dara an mga aki? O an nagmomondo nin makuri na fiel na nag-aatender sa mga pagtiripon sa ibong nin daing ontok na pakamate nin kadaihan nin kamanungdanan? O an hoben na dagos-dagos an pag-oswag sa espirituwal sa ibong nin maraot na mga impluwensia sa eskuelahan asin sa iba pa? (Salmo 84:10) An mga tawong ini tibaad bakong sikat. An mga pagbalo sa integridad na inaatubang ninda sa kadaklan dai naririsa nin iba. Pero, tibaad sinda “mayaman sa pagtubod” kapareho kan mga mas prominente. (Santiago 2:5) Total, sa katapustapusi an pagigin fiel an nagkakamit kan pabor ni Jehova.—Mateo 10:22; 1 Corinto 4:2.

Si Gedeon—“An Kasaditsaditi” sa Kamag-anakan kan Saiyang Ama

11. Sa anong paagi na si Gedeon nagpaheling nin kababaan nin boot sa pakikipag-olay sa anghel nin Dios?

¹¹ Si Gedeon, sarong pusog na hoben na lalaki hale sa tribo ni Manases, nabuhay sa panahon nin karibokan sa kasaysayan nin Israel. Sa laog nin pitong taon, an banwaan nin Dios nagdusa sa pan-aapi nin mga Midianita. Minsan siring, nag-abot na an panahon na iligtas ni Jehova an saiyang banwaan. Huli kaini, may sarong anghel na nagpaheling ki Gedeon asin nagsabi: “Si Jehova nasa saimo, ikang pusoan, poderosong lalaki.” Si Gedeon hababa an boot, kaya dai nia ipinag-orgolyo an dai linalaoman na pag-omaw na ini. Imbes, sia magalang na nagsabi sa anghel: “Dispensara tabi ako, kagurangnan ko, alagad kun si Jehova nasa samo, taano kun siring ta nangyari sa samo an gabos na ini?” Lininaw kan anghel an mga bagay asin sinabihan si Gedeon: “Tunay na ililigtas mo an Israel sa palad kan Midian.” Ano an reaksion ni Gedeon? Imbes na galagang takmaon an asignasyon bilang oportunidad na sia magin eroe kan nasyon, si Gedeon nagsimbag: “Dispensara tabi ako, Jehova. Paano ko ililigtas an Israel? Uya! An sangribo ko iyo an pinakahababa sa Manases, asin ako an kasaditsaditi sa kamag-anakan kan sakong ama.” Abaang kababaan nin boot!—Hokom 6:11-15.

12. Paano si Gedeon nagpaheling nin marahay na paghusgar sa pag-otob sa asignasyon sa saiya?

¹² Bago isugo sa ralaban si Gedeon, binalo sia ni Jehova. Paano? Sinabihan si Gedeon na laglagon an altar ki Baal kan saiyang ama asin palodon an sagradong palo na nasa kataed kaiyan. Mangangaipo nin kosog nin boot an asignasyon na ini, alagad si Gedeon nagpaheling man nin kababaan nin boot asin marahay na paghusgar sa paagi nin pag-otob nia dian. Imbes na gibohon iyan nin hayag, ginibo iyan ni Gedeon sa banggi na pinakaposibleng marhay na dai sia maririsa. Apuera kaini, ginibo ni Gedeon an asignasyon sa saiya na may igong pagmamaan. Ipinag-iba nia an sampulong oripon—tibaad tangani na an nagkapira magbantay mantang an iba pa tumabang sa saiya sa paglaglag kan altar asin sagradong palo.b Ano man an kamugtakan, sa bendisyon ni Jehova, naotob ni Gedeon an asignasyon sa saiya, asin pag-abot nin panahon ginamit sia nin Dios na patalingkason an Israel sa mga Midianita.—Hokom 6:25-27.

Pagpaheling nin Kababaan nin Boot Asin Marahay na Paghusgar

13, 14. (a) Paano kita makapaheheling nin kababaan nin boot kun tinatawan kita nin sarong pribilehio sa paglilingkod? (b) Paano si Tugang na A. H. Macmillan nagtao nin marahay na halimbawa sa pagpaheling nin kababaan nin boot?

¹³ Dakol an manonodan niato sa kababaan nin boot ni Gedeon. Halimbawa, ano an reaksion niato kun tinatawan kita nin sarong pribilehio sa paglilingkod? An enot daw niatong naiisip an ibubungang pagkaprominente o prestihio? O satuya daw na pinepensar na may kababaan nin boot asin pagngayongayo kun baga kaya niatong otobon an mga hinahagad kan asignasyon? Si Tugang na A. H. Macmillan, na natapos an daganon na buhay kan 1966, nagtao nin marahay na halimbawa sa bagay na ini. Sarong beses hinagad ni C. T. Russell, an enot na presidente kan Watch Tower Society, an opinyon ni Tugang na Macmillan sa kun siisay daw an puedeng mamahala sa trabaho kun mayo sia. Sa nangyaring orolay, ni sarong beses dai irinekomendar ni Tugang na Macmillan an saiyang sadiri, minsan ngani biyo kutana idtong kombenyente na gibohon nia. Sa katapusan, inagda ni Tugang na Russell si Tugang na Macmillan na pensaron an pag-ako sa asignasyon. “Namungnan ako,” an isinurat ni Tugang na Macmillan pakalihis nin dakol na taon. “Talagang pinag-isipan ko idto, nin seryosong marhay, asin ipinamibi iyan nin harohalawig na panahon bago ko sinabi sa saiya sa katapustapusi na maoogma akong gibohon an bilog kong makakaya na tabangan sia.”

¹⁴ Dai nahaloy, nagadan si Tugang na Russell, na nabayaan na bakante an katongdan na pagkapresidente kan Watch Tower Society. Mantang si Tugang na Macmillan an namamahala kaidtong ultimong biahe sa paghuhulit ni Tugang na Russell, may sarong tugang na nagsabi sa saiya: “Mac, makosog an oportunidad mo na iyong magin presidente. Ika an espesyal na representante ni Tugang na Russell kan sia mayo, asin sinabihan nia kami gabos na kuyogon an sasabihon mo. Bueno, naghale sia asin dai na nagbalik. Garo ika na an magpapadagos.” Nagsimbag si Tugang na Macmillan: “Tugang, bakong arog kaiyan an dapat na magin punto de vista sa bagay na ini. Gibohon ini kan Kagurangnan asin an solamenteng katongdan na makukua mo sa organisasyon kan Kagurangnan kun ano an pagmarahayon kan Kagurangnan na itao sa saimo; asin nasisierto ko na bako ako an para sa trabahong iyan.” Dangan iba an irinekomendar ni Tugang na Macmillan para sa katongdan na iyan. Kapareho ni Gedeon, sia may hababang boot na pagheling sa saiyang sadiri—pagheling na marahay na arogon niato.

15. Ano an nagkapirang praktikal na paagi na magagamit niato an pakamansay kun kita naghuhulit sa iba?

¹⁵ Kita maninigo man na magin hababa an boot sa paagi kan pag-otob niato sa asignasyon sa sato. Si Gedeon marahay an paghusgar, asin naghingoa sia na dai mapaanggot an mga kontra sa saiya nin dai man kaipuhan. Kaagid kaiyan, sa satong paghuhulit, maninigo na kita magin hababa an boot asin marahay an paghusgar sa kun paano kita nakikipag-olay sa iba. Totoo, kita nasa espirituwal na pakikilaban tanganing itumba an “mga bagay na marigonon an pundasyon” asin “mga pangangatanosan.” (2 Corinto 10:4, 5) Alagad dai niato maninigong hamakon sa pagtaram an iba o tawan sinda nin ano man na balidong dahelan na magsentir sa satong mensahe. Imbes, maninigo niatong igalang an saindang mga opinyon, idoon an tibaad pinagkakaoyonan niato, dangan magkonsentrar sa positibong mga aspekto kan satong mensahe.—Gibo 22:1-3; 1 Corinto 9:22; Kapahayagan 21:4.

Si Jesus—An Kadarudakulaing Halimbawa nin Kababaan nin Boot

16. Paano ipinaheling ni Jesus na sia may hababang boot na pagheling sa saiyang sadiri?

¹⁶ An pinakamarahay na halimbawa nin kababaan nin boot ki Jesu-Cristo.c Sa ibong kan saiyang dayupot na relasyon sa saiyang Ama, si Jesus dai nag-alangan na admitiron na an nagkapirang bagay dai sakop kan saiyang autoridad. (Juan 1:14) Halimbawa, kan hagadon kan ina ni Santiago saka Juan na an duwa niang aki makataed ni Jesus sa saiyang kahadean, sinabi ni Jesus: “Ining pagtukaw sa sakong too asin sa sakong wala bakong sako an pagtao.” (Mateo 20:20-23) Saro pang beses, daing pag-alangan na inadmitir ni Jesus: “Dai ako makagigibo ni sarong bagay sa sadiri kong boot . . . Pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.”—Juan 5:30; 14:28; Filipos 2:5, 6.

17. Paano si Jesus nagpaheling nin kababaan nin boot sa saiyang relasyon sa iba?

¹⁷ Si Jesus nakalalabi sa mga tawong bakong sangkap sa gabos na bagay, asin sia may daing kaparehong autoridad hale sa saiyang Ama, si Jehova. Alagad ta si Jesus hababa an boot sa saiyang relasyon sa saiyang mga parasunod. Dai nia sinda pinagabatan nin nakagugulat na pag-eksibir nin kaaraman. Nagpaheling sia nin pagigin mapagrisa sa iba saka pakikidamay asin kinonsiderar an saindang mga pangangaipo bilang tawo. (Mateo 15:32; 26:40, 41; Marcos 6:31) Sa siring, minsan ngani sangkap si Jesus, sia dai naghanap nin pagkasangkap. Nungka na hinagadan nia an saiyang mga disipulo nin labi sa ikatatao ninda, asin nungka na pinapasan nia sinda nin labi sa kaya ninda. (Juan 16:12) Bakong makangangalas na para sa dakol sia nakagiginhawa!—Mateo 11:29.

Arogon an Halimbawa ni Jesus na Kababaan nin Boot

18, 19. Paano niato maaarog an kababaan nin boot ni Jesus sa (a) pagheling niato sa satong sadiri, asin (b) pagtratar niato sa iba?

¹⁸ Kun an pinakadakulang tawo na nabuhay kasuarin man nagpaheling nin kababaan nin boot, gurano pa daw kita. An mga tawong bakong sangkap parateng nag-aalangan na admitiron na sinda talagang mayo nin absolutong autoridad. Minsan siring, bilang pag-arog ki Jesus, an mga Kristiano naghihingoang magin hababa an boot. Sinda bakong sobra kamapalangkaw tanganing tawan nin paninimbagan an mga kualipikadong magkamit kaiyan; ni mapaabaw-abaw man sinda asin habong magpadirehir sa mga autorisadong tumao kaiyan. Nagpapaheling nin pakikikooperar, tinotogotan ninda na an gabos na bagay sa kongregasyon mangyari “sa disente asin aregladong paagi.”—1 Corinto 14:40.

¹⁹ An kababaan nin boot mapahiro man sa sato na magin rasonable sa satong mga inaasahan sa iba asin makonsiderasyon sa saindang mga pangangaipo. (Filipos 4:5) Tibaad kita may mga abilidad saka kakosogan na tibaad mayo sa iba. Pero, kun kita hababa an boot, dai niato pirmeng aasahan an iba na gumawe nin arog kan gusto niatong igawe ninda. Sa pakaaram na an lambang tawo may mga limitasyon, may kababaan nin boot na pagpapasensiahan niato an mga pagkukulang nin iba. Isinurat ni Pedro: “Orog sa gabos, magkaigwa nin makosog na pagkamoot sa lambang saro, huli ta an pagkamoot nakatatahob sa dakol na kasalan.”—1 Pedro 4:8.

20. Ano an magigibo niato tanganing mahale an ano man na tendensia sa kalangkawan nin boot?

²⁰ Arog kan nanodan niato, an kadonongan talagang yaon sa mga hababa an boot. Pero, paano kun marisa nindo na kamo may mga tendensia sa kalangkawan nin boot o kapangahasan? Dai manluya an saindong boot. Imbes, arogon an halimbawa ni David, na namibi: “Pogoli an saimong lingkod sa pangahas na mga gibo; dai mo itogot na daogon ako kaiyan.” (Salmo 19:13) Paagi sa pag-arog sa pagtubod nin mga tawong arog ni Pablo, Gedeon, asin—orog sa gabos—Jesu-Cristo, personal niatong maeeksperyensiahan an katotoohan kan mga tataramon na: “An kadonongan yaon sa mga hababa an boot.”—Talinhaga 11:2.

[Mga Nota sa Ibaba]