Pahalagahan an Buhay na Regalo nin Diyos

1. Gurano kahalaga para ki Jehova an satong buhay?

IMAHINARON na sarong amigo mo an nagtao saimo nin sarong lumaon na alagad mamahalon na painting—sarong obra maestra. May mga parte iyan na kupas na, may mga digta, saka saradit na gatak. Sa ibong kaiyan, an painting nagkakahalaga nin minilyon na dolyar. Siguradong papahalagahan mo saka iingatan an painting na iyan. Sa kaagid na paagi, si Jehova tinawan kita nin sarong mahalagang marhay na regalo, an regalong buhay. Sa katunayan, ipinahiling ni Jehova an dakulang pagpapahalaga niya sa satong buhay paagi sa pagtao kan saiyang Aki bilang pantubos niyato.—Juan 3:16.

2. Arog kan ipinapahiling sa 2 Corinto 7:1, ano an inaasahan ni Jehova sa sato?

² Si Jehova an Burabod nin buhay. (Sal. 36:9) Kumbinsido diyan si apostol Pablo, asin maririsa ta iyan kan sabihon niya: “Huli sa saiya, igwa kita nin buhay asin naghihiro saka nag-eeksister.” (Gibo 17:25, 28) Kaya angay sanang apudon ta an satong buhay bilang sarong regalo hali sa Diyos. Mamumuton niyang itinatao sa sato an mga kaipuhan ta para magdanay na buhay. (Gibo 14:15-17) Pero dai milagrosong iniingatan ni Jehova an satong buhay. Imbes, inaasahan niya na iingatan ta an satong pisikal asin espirituwal na salud sa abot kan satong makakaya. (Basahon an 2 Corinto 7:1.) Taano ta kaipuhan tang ingatan an satong salud asin buhay, asin paano ta iyan magigibo?

3. Ano an sarong dahilan kaya hinihinguwa tang magdanay na marahay an salud?

³ An sarong dahilan kaya dapat tang hinguwahon na magdanay na marahay an salud iyo na paagi kaiyan makakapaglingkod kita ki Jehova sa abot kan satong makakaya. (Mar. 12:30) Mawot niyato na ipresentar an satong “mga hawak bilang atang na buhay, banal asin akseptable sa Diyos,” kaya linilikayan niyatong gibuhon an mga bagay na aram tang makakaraot sa satong salud. (Roma 12:1) Totoo, dawa gibuhon ta an gabos para magdanay na marahay an satong salud, bako iyan garantiya na dai na kita magkakahilang. Pero ginigibo ta an makakaya ta huling gusto tang ipahiling sa satong Ama sa langit na pinapahalagahan ta an regalong buhay.

4. Ano an gustong gibuhon ni Hading David?

⁴ Ipinaliwanag ni Hading David kun taano ta pinapahalagahan niyang marhay an buhay na regalo nin Diyos kan isurat niya: “Ano an pakinabang kan sakong kagadanan, kan sakong pagbaba sa kalot? Uumawon ka daw kan alpog? Isasaysay daw kaiyan an manungod sa saimong kaimbudan?” (Sal. 30:9) Posibleng isinurat ni David an mga tataramon na iyan kan madali na siyang magadan. Pero determinado siyang magdanay na buhay saka makusog tanganing padagos niyang maumaw si Jehova. Siguradong gabos kita iyan man an determinasyon.

5. Dawa gurang na kita o grabe an satong hilang, ano an puwede tang gibuhon?

⁵ Huli sa hilang asin paggurang, puwedeng dai ta na magibo an dakul na bagay na nagigibo ta kaidto. Huli kaiyan, tibaad madisganar kita asin mamundo. Pero dai nanggad kita magsuko asin pabayaan na an satong salud. Taano? Huling dawa gurang na kita o grabe an satong hilang, puwede ta pa man giraray umawon si Jehova, arog ni Hading David. Nakakaranga nanggad maaraman na pinapahalagahan kitang marhay kan satong Diyos sa ibong kan satong pagkabakong perpekto! (Mat. 10:29-31) Magadan man kita, gustong-gusto niya na buhayon kita. (Job 14:14, 15) Mantang buhay pa kita, gusto tang gibuhon an satong pinakamakakaya na ingatan an satong salud asin buhay.

6. Ano an inaasahan sato ni Jehova kun manungod sa satong kaugalian sa pagkakan saka pag-inom?

⁶ Dawa ngani an Bibliya bako man na libro manungod sa pag-ataman sa salud o sarong giya sa tamang nutrisyon, ihinahayag kaiyan an kaisipan ni Jehova manungod sa mga bagay na ini. Halimbawa, sinasadol niya kita na ‘parayuon sa satong hawak an mga bagay na nakakadanyar’ na puwedeng makaraot diyan. (Ecl. 11:10) An pagpagutid asin pagburat, na parehong nagsasapeligro nin buhay, kinokondenar kan Bibliya. (Tal. 23:20) Inaasahan ni Jehova na mapahiling kita nin pagpupugol sa sadiri pag nagdedesisyon kun ano asin kun gurano kadakul an satong kakakanon saka iinumon.—1 Cor. 6:12; 9:25.

7. Paano nakakatabang sato an sadol sa Talinhaga 2:11 na makagibo nin marahay na mga desisyon manungod sa satong salud?

⁷ Puwede kitang gumibo nin mga desisyon na nagpapahiling kan satong hararom na pagpapahalaga sa buhay na regalo nin Diyos paagi sa paggamit kan satong kakayahan na mag-isip. (Sal. 119:99, 100; basahon an Talinhaga 2:11.) Halimbawa, nagpapahiling kita nin marahay na paghusgar sa kun ano an kinakakan ta. Kun gusto ta an sarong kakanon pero aram ta man na nakakaraot iyan sato, siyempre lilikayan tang magkakan kaiyan. Ipinapahiling ta man na may marahay kitang paghusgar kun nagtuturog kita nin supisyente, regular na nag-eehersisyo, pinapagdanay an marahay na rutina sa personal na kalinigan, asin pinapagdanay na malinig an satong harong.

8. Ano an sinasabi kan Bibliya manungod sa kun gurano kaimportante ki Jehova an satong kaligtasan?

⁸ Kaiba sa Katugunan ni Jehova sa nasyon nin Israel an mga giya na makakatabang para malikayan an seryosong mga aksidente sa harong saka sa trabaho. (Exo. 21:28, 29; Deu. 22:8) Kun an sarong tawo aksidenteng nakagadan, may magabat na mga konsekwensiya iyan saiya maski dai niya iyan tinuyo. (Deu. 19:4, 5) Hinahagad kan Katugunan na padusahan maski an mga dai tuyong nakadanyar sa dai pa namumundag na umboy. (Exo. 21:22, 23) Malinaw na ipinapahiling kan Kasuratan na gusto ni Jehova na pirmi tang isaisip an kaligtasan.

9. Anong mga pag-iingat an puwede tang gibuhon para makalikay sa aksidente? (Hilingon man an mga ritrato.)

⁹ Ipinapahiling niyato na pinapahalagahan ta an buhay na regalo nin Diyos paagi sa pagigin maingat sa harong saka sa trabaho. Halimbawa, iinaapon ta sa tamang paagi an matarom na mga bagay, mga kemikal, o mga bulong, asin sinisigurado na dai iyan makukua nin mga aki. Nag-iingat kita pag naggagamit nin kalayo, mainit na mga likido, saka mga power tools, asin dai iyan binabayaan na mayong nagbabantay. Dai kita nagmamaneho mantang an satong paghusgar apektado nin bulong, inumon na de-alkohol, o kakulangan nin turog, asin dai ta tinutugutan na mawara an pokus ta huli sa paggamit nin gadyet mantang nagmamaneho.

10. Ano an mga puwede tang gibuhon bago asin durante kan sarong peligrosong marhay na kalamidad?

¹⁰ Kun minsan, dai ta malilikayan an peligrosong marhay na mga sitwasyon. Totoong-totoo nanggad ini lalo na sa natural na mga kalamidad, epidemya, asin bayolenteng mga iriwal. Alagad, pag nagkaigwa nin arog kaiyan na mga kalamidad, mababawasan ta an tsansa na mapahamak kita asin mas may tsansa kita na makaligtas sa peligro kun susunudon ta an mga curfew, pagbuot na mag-ebakwar, asin iba pang mga pagbuot kan awtoridad. (Roma 13:1, 5-7) An ibang mga peligro puwedeng maantisipar, kaya marahay na sunudon ta an ano man na susundon na ipinapautob kan lokal na mga awtoridad para tabangan kitang makapag-andam sa kalamidad. Halimbawa, tibaad mahiling ta na kapaki-pakinabang kun masaray kita nin suplay nin tubig asin bakong malalapaon na mga kakanon saka first-aid kit.

11. Pag may naglalakop na nakakaulakit na hilang, ano an dapat tang andam na gibuhon?

¹¹ Ano an dapat tang gibuhon kun may naglalakop na nakakaulakit na hilang sa satong lugar? Dapat tang sunudon an pagbuot kan mga awtoridad arog kan paghanaw nin kamot, social distancing, pagsulot nin mask, asin pagkuwarantina. An pagigin masinunod sa mga bagay na ini nagpapahiling na pinapahalagahan tang marhay an buhay na regalo nin Diyos.

12. Paano kita tinatabangan kan prinsipyo na nasa Talinhaga 14:15 na magin mapamili pag-abot sa naglalakop na mga impormasyon pag may kalamidad?

¹² Sa panahon nin emerhensiya, puwedeng maglakop an bakong tamang mga impormasyon sa satong mga amigo, sa pagtaraid, asin sa mga bareta. Imbes na magtubod sa “lambang tataramon” na nadadangog ta, marahay kun madangog kita sa pinakamapagtitiwalaan na impormasyon na hali sa gobyerno asin mga doktor. (Basahon an Talinhaga 14:15.) Ginigibo kan Namamahalang Grupo asin kan mga sangang opisina an gabos nindang makakaya tanganing makakua nin tamang impormasyon bago magtao nin instruksiyon manungod sa mga pagtiripon sa kongregasyon asin paghuhulit. (Heb. 13:17) Paagi sa pagsunod ta diyan, pinoprotektaran ta an satong sadiri asin an iba. Puwede man kaiyan na mas mapagayon an reputasyon kan kongregasyon sa komunidad.—1 Ped. 2:12.

13. Paano ta ipinapahiling na pinapahalagahan tang marhay an buhay na regalo nin Diyos pag-abot sa mga bagay na kalabot an dugo?

¹³ Midbid an Mga Saksi ni Jehova sa saindang paggalang sa pagigin sagrado nin dugo. Sinusunod ta an pagbuot ni Jehova mapadapit sa dugo paagi sa dai pagpasalin nin dugo, dawa sa panahon nin medikal na emerhensiya. (Gibo 15:28, 29) Minsan siring, dai iyan nangangahulugan na habo ta nang mabuhay. Sa kabaliktaran, pinapahalagahan tang marhay an buhay na regalo nin Diyos. Nagpapatabang kita sa mga doktor na andam na magtao nin de-kalidad na paagi nin pagbulong na daing kalabot na pagsalin nin dugo.

14. Paano ta mababawasan an tsansa na mangaipo nin komplikadong pamamaagi nin pagbulong?

¹⁴ Mababawasan ta an tsansa na mangaipo nin komplikadong pamamaagi nin pagbulong paagi sa pagsunod sa mga suhestiyon sa pag-ataman sa salud na sinambit kasubago sa artikulong ini. Pag mas makusog an satong salud, mas makakayanan kan satong hawak an ano man na kinakaipuhan na operasyon saka mas magigin marikas man an pagrahay ta. Mababawasan ta man an tsansa na mangaipo nin biglaan na operasyon paagi sa paghali sa mga puwedeng magkawsa nin aksidente sa harong asin sa lugar nin trabaho saka paagi sa istriktong pagsunod sa mga ley sa trapiko.

15. (a) Taano ta mahalaga na magdara kita pirmi nin up-to-date na DPA card? (Hilingon man an ritrato.) (b) Arog kan ipinahiling sa video, paano kita makakagibo nin pinag-isipan na marhay na desisyon manungod sa medikal na paggamit nin dugo?

¹⁵ Huling pinapahalagahan ta an regalong buhay, nagpi-fill out kita nin durable power of attorney (DPA card) asin pirmi tang dinadara iyan. Paagi sa dokumentong ini, ipinapahayag ta an satong mga desisyon manungod sa pagpasalin nin dugo asin sa nagkapirang pamamaagi nin pagbulong. Up-to-date daw an saimong DPA card? Kun kaipuhan mong mag-fill out nin bago o mag-update kaiyan, dai magpaliman-liman. An malinaw na pagpahayag kan satong mga desisyon paagi sa pagsurat kaiyan makakatabang na malikayan an dai kinakaipuhan na pagkaabala sa pagbulong sa sato. Makakatabang man iyan sa mga doktor asin nars na malikayan na makatao nin bulong o paagi nin pagbulong na puwedeng makaraot sato.b

16. Ano an puwede tang gibuhon kun dai kita sigurado kun paano mag-fill out nin DPA card?

¹⁶ Ano man an satong edad o gurano man kakusog an satong salud, gabos kita puwedeng maaksidente asin magkahilang. (Ecl. 9:11) Kaya, madunong nanggad na mag-fill out kita nin DPA card. Kun dai ka sigurado kun paano mag-fill out kan dokumentong ini, magpatabang sa mga elder nindo. Hinihinguwa nindang magin pamilyar kun paano an pag-fill out kaiyan, pero bako sinda an madesisyon para saimo kun manungod sa pagbulong. Responsabilidad mo iyan. (Gal. 6:4, 5) Pero matatabangan ka ninda na masabutan an mga pagpipilian asin kun paano isusurat an mga desisyon mo.

17. Paano ta maipapahiling na rasonable kita pag-abot sa mga bagay manungod sa salud?

¹⁷ An dakul sa mga desisyon na ginigibo ta manungod sa satong salud asin paagi nin pagbulong ibinabase ta sa satong konsiyensiyang sinanay sa Bibliya. (Gibo 24:16; 1 Tim. 3:9) Pag naggigibo nin mga desisyon asin ipinapakipag-ulay iyan sa iba, marahay na iaplikar ta an prinsipyo na nasa Filipos 4:5: “Mahayag lugod sa gabos na tawo an saindong pagigin rasonable.” Pag rasonable kita, dai kita maparahadit na marhay manungod sa satong salud; dai ta man ipipirit sa iba an satong pagmansay. Namumutan saka iginagalang ta an satong mga tugang, dawa kun an mga desisyon ninda iba kisa kan sa sato.—Roma 14:10-12.

18. Paano ta maipapahiling an satong pasasalamat sa regalong buhay?

¹⁸ Ipinapahiling ta an satong pasasalamat ki Jehova, an Gikanan nin buhay, paagi sa pag-ingat sa satong buhay asin pagtao saiya kan pinakamakakaya ta. (Kap. 4:11) Sa ngunyan, nagkakahilang talaga kita saka nakakaeksperyensiya nin mga kalamidad. Alagad bako iyan an buhay na gusto kan satong Kaglalang para sa sato. Dai na mahahaloy, tatawan niya kita nin buhay na daing katapusan na mayong kulog asin kagadanan. (Kap. 21:4) Mantang dai pa iyan nangyayari, marahayon nanggad sa pagmati na mabuhay asin maglingkod sa satong mamumuton na Ama sa langit, si Jehova!