Kun Paano Mapagdadanay an Kagayagayahan sa Bilog na Panahon na Paglilingkod

AN KAOTOBAN kan hula sa Biblia nagpapaheling nin malinaw na kita nabubuhay na sa huring mga aldaw kan daing Dios na palakaw na ini. Mantang naaaraman ini, an mga lingkod ni Jehova Dios ginagamit an pinakadakol na panahon na rasonableng magagamit ninda sa pagpalakop kan maogmang bareta kan saiyang Kahadean. Labing 600,000 na Saksi ni Jehova an inareglo an saindang buhay tanganing makapartisipar sa bilog na panahon na paglilingkod. An iba sa sainda pambilog na panahon na mga parabalangibog kan Kahadean na an apod payunir. An iba mga boluntaryo sa Bethel sa opisina prinsipal kan Watch Tower Society o sa mga sangang opisina kaiyan. An iba man mga misyonero asin nagbibiaheng paraataman.

Ipinaririsa kan Biblia na sa huring mga aldaw, magkakaigwa nin “delikadong mga panahon na masakit pakibagayan.” (2 Timoteo 3:​1-5) An teksto sa Griegong Biblia ginagamit an pananaram na puedeng tradusiron na “itinalaan na mga panahon na maringis.” Huli kaini, mayo nin siisay man na maninigong maglaom nin buhay na daing problema sa satong kaaldawan. Para sa nagkapirang Kristianong ministro, an mga problema garo magabat na marhay kaya sinda tibaad maghapot sa saindang sadiri, ‘Makapagpapadagos pa daw ako sa pambilog na panahon na paglilingkod, o kaipuhan ko daw na pumondo?’

Anong mga situwasyon an tibaad magin dahelan na an saro turotimbangon liwat an saiyang kamugtakan bilang payunir, boluntaryo sa Bethel, nagbibiaheng paraataman o misyonero? Tibaad may grabeng problema sa salud. Posibleng an gurang na o herelangon na paryente nangangaipo nin danay na pag-ataman. Puedeng an mag-agom nagpopoon na magpamilya. An siisay man na minapondo sa pambilog na panahon na paglilingkod huli sa siring na mga dahelan asin huli sa Makakasuratan na mga paninimbagan dai kaipuhan na masopog na gibohon an siring na pagbabago.

Minsan siring, kumusta kun an saro nagpaplanong pumondo sa pambilog na panahon na paglilingkod huli sa kadaihan nin kagayagayahan? Tibaad an sarong payunir kakadikit na paghimate an naheheling sa saiyang ministeryo asin naghahapot, ‘Taano ta ipagpapadagos ko pa an sakong mapagsakripisyong pamumuhay mantang kadikiton an naghihinanyog?’ Tibaad an sarong boluntaryo sa Bethel bakong gayong maogma sa saiyang asignasyon. O puedeng an nakakokonsumir na maluyang salud, dawa ngani dai man nakaoolang sa paglilingkod bilang payunir, sa katapustapusi hinahale an kaogmahan nin saro. Paano mapagdadanay kan siring na mga indibiduwal an saindang kagayagayahan? Estudyaran niato an sinasabi nin nagkapirang eksperyensiadong ministro.

Pag-atubang sa Pagkadesganar

Si Anny, na hale sa Switzerland, nag-atender sa Paadalan sa Biblia kan Watchtower sa Gilead kan 1950. Linaoman nia an destino bilang misyonera sa ibang kontinente. Kan idestino giraray sa Bethel sa Europa, nadesganar si Anny. Minsan siring, inako nia an asignasyon sa Departamento nin Pagtradusir asin sagkod ngonyan yaon pa sa gibohon na iyan. Paano nia napangganahan an saiyang pagkadesganar? “Kadakol kan kaipuhan na gibohon kaidto asin ngonyan. An sakong pagmate asin mga gusto bakong arog kahalaga kan gibohon,” an paliwanag ni Anny.

Kun kita desganado sa satong asignasyon, tibaad puede niatong pataluboon an aktitud ni Anny. An satong personal na gusto bakong an pangenot na mahalaga. An pinakamahalaga iyo na an gabos na manlaenlaen na paninimbagan katakod kan pagpalakop kan mensahe kan Kahadean maasikasong marhay. An Talinhaga 14:23 nagsasabi sa sato na “paagi sa gabos na klase nin gibo nagkakaigwa nin pakinabang.” Dawa ano pang asignasyon an itinao sa sato, an fiel na paggibo kaiyan nagkokontribwir sa pagkahaman kan gibohon kan Kahadean. Asin puedeng magkaigwa nin dakulang pagkakontento​—iyo, nin kagayagayahan—​sa siring na itinao nin Dios na gibohon.​—Ikomparar an 1 Corinto 12:​18, 27, 28.

Marahay na Relasyon sa Iba

Kalabot sa pambilog na panahon na paglilingkod an dayupot na pakikiiba sa gabos na klase nin tawo​—sa ministeryo sa langtad, sa Bethel, sa erokan nin mga misyonero, o mantang nagdadalaw sa laen-laen na kongregasyon bilang nagbibiaheng paraataman. Huli kaini, an kagayagayahan sa dakulang kabtang depende sa marahay na relasyon sa iba. Minsan siring, an ihinulang ‘maringis na mga panahon’ sa huring mga aldaw na ini nakadadanyar na marhay sa mga relasyon nin tawo. Paano malilikayan nin sarong ministro na mawaran kan saiyang kagayagayahan, dawa kun may nakakolog sa saiyang boot? Puede gayod kitang makanood ki Wilhelm.

Si Wilhelm nagin miembro nin sarong pamilyang Bethel sa Europa kan 1947. Pakatapos kaiyan, sia nagpayunir asin naglingkod bilang nagbibiaheng paraataman. “Kun kami mag-agom nakaheheling nin mga bagay na sa paghona niamo bakong tama o nagpapahadit sa samo personalmente, sinasabi niamo ki Jehova an samong namamatean dangan ipinababaya niamo sa saiya an pagresolber sa mga bagay,” an paliwanag ni Wilhelm.​—Salmo 37:5.

Tibaad kamo mismo napurisaw na sa gawe-gawe kan sarong kapwa Kristiano na nagtaram sa saindo na daing paggalang o dai iniisip. Girumdomon na gabos kita dakol na beses na nasasala sa satong pagtaram. (Santiago 3:2) Kaya taano ta dai gamiton an situwasyon na ini na orog na rumani sa “Paradangog nin pamibi”? (Salmo 65:2) Sabihon ki Jehova an bagay, dangan ipabaya na iyan sa saiyang mga kamot. Kun gusto nin Dios na gibohon an mga pagbabago, gigibohon nia iyan. Idtong mga nag-iistar sa erokan nin mga misyonero tibaad kaipuhan na isaisip ini kun magkaigwa nin tension sa siring na mga bagay, huli ta ini matabang sa sainda na papagdanayon an saindang kagayagayahan sa paglilingkod ki Jehova.

Kun Maluya an Salud

Pipira sana an may marahay na salud sa gabos na panahon. Dawa idtong mga nasa inaapod na kabagsikan nin buhay puedeng magkaigwa nin makuring kamondoan o helang. An maluyang salud nagpapangyari sa nagkapira na pumondo sa pambilog na panahon na paglilingkod, alagad pakatapos kaiyan marahayon an nagigibo ninda bilang mga parahayag kan Kahadean. Minsan siring, an iba nakapagpapadagos sa pambilog na panahon na paglilingkod sa ibong nin maluyang salud. Halimbawa, horophoropa si Hartmut asin Gislind.

Si Hartmut asin Gislind mag-agom na 30 taon na sa pagpapayunir, pagmimisyonero, asin sa gibohon na pagbibiahe. Sindang duwa pareho nag-agi nin mga pag-atake nin grabeng helang na kun beses nakauubos kan saindang pisikal asin emosyonal na kosog. Minsan siring, marahayon an saindang nagigibo asin nakaparirigon pa sinda sa boot nin iba na nakaeeksperyensia nin kaagid na mga kasakitan. Anong sadol an saindang itinatao? “Magtanaw sa ngapit asin bakong sa nakaagi. Gibohon an pinakamarahay sa lambang situwasyon. An kada aldaw tibaad puedeng magpalataw nin dawa sarong oportunidad na omawon si Jehova. Aprobetsaran an oportunidad na iyan, asin maogma dian.”

Horophoropa an kaso ni Hannelore. Sia napupurisaw kan pabalikbalik na helang sa 30 taon nia bilang payunir, misyonera, sa gibohon na nagbibiahe kaiba kan saiyang agom, asin sa paglilingkod sa Bethel. Si Hannelore nagsasabi: “Nagkokonsentrar ako sa isyu na pinalataw ni Satanas​—na an mga tawo naglilingkod sana ki Jehova kun an paggibo kaiyan pasil para sa sainda. Paagi sa pagtagal sa mga pagbalo, puede akong magkaigwa nin kabtang na patunayan na sala si Satanas.” Ini puedeng magin makosog na motibasyon. Girumdomon na an saindong personal na kaimbodan ki Jehova kun nasa irarom nin pagbalo mahalaga para sa saiya.​—Job 1:​8-​12; Talinhaga 27:11.

Kun hinihingoa nindong gumibo nin timbang na desisyon manongod sa saindong salud, horophoropa an duwang kabtang kan hula ni Jesu-Cristo manongod sa pagtatapos kan palakaw nin mga bagay. Ihinula ni Jesus an mga peste sa surunodsunod na lugar. Sinabi nia man: “An maogmang baretang ini kan kahadean ihuhulit sa bilog na ineerokan na daga.” (Mateo 24:​3, 14; Lucas 21:11) Aram ni Jesus na sa huring mga aldaw, an saiyang mga parasunod masasakitan sa helang. Alagad aram nia na an paghuhulit gigibohon bako sanang kan mga tawong may marahay na salud kundi siring man kan mga indibiduwal na may grabeng helang. Kun makakapadagos kita sa pambilog na panahon na paglilingkod sa ibong nin maluyang salud, dai lilingawan ni Jehova an pagkamoot na ipinaheling niato para sa saiyang ngaran.​—Hebreo 6:10.

Pagpapadanay sa Kagayagayahan sa Ibong nin Pagkadaing Labot kan Publiko

An satong aktitud puedeng maapektaran kan reaksion nin mga tawo sa paghuhulit kan Kahadean. “Dawa an mga payunir nasasakitan na buksan an pakikipag-olay sa kagharong,” an sabi nin sarong may kabatidan na ministro. “Kita gabos kaipuhan na makipagtusayan tanganing mapagdanay an satong kagayagayahan.” Iyo, an pagkadaing labot kan publiko puedeng magpaluya kan satong kagayagayahan sa paglilingkod sa langtad. Kaya paano mapagdadanay nin sarong payunir na regular na napaaatubang sa pagkaindiperente an saiyang kagayagayahan? An may kabatidan na mga ministro nagtatao kan minasunod na mga suhestion na naprobaran asin nabalo na.

An pagkadaing labot sarong angat, alagad iyan dai kaipuhan na mangahulogan nin pagkadaog. An lakop na pagkaindiperente mismo bakong dahelan na pumondo sa pambilog na panahon na paglilingkod. Puede niatong papagdanayon an satong kagayagayahan sa atubangan nin pagkadaing labot kun magtatagama kita nin igong panahon para sa maigot na pag-adal kan Kasuratan. ‘Inaandam kita kaiyan para sa lambang marahay na gibo,’ asin kabale dian an pagtaram sa mga nagbibinongog sa maogmang bareta. (2 Timoteo 3:​16, 17) Minsan ngani habong maghinanyog an mga tawo ki propeta Jeremias, sia dai kaiyan napapondo. (Jeremias 7:27) Kun nag-aadal kan Biblia sa tabang kan Kristianong mga publikasyon, kita makikinabang nin dakula kun ririparohon niato an mga ideya na nagpapakosog kan satong pagtubod asin nakatatabang sa sato na atubangon an pagkadaing labot.

Ipamugtak na an pagkadaing labot sarong angat, siyasaton niato an satong aktitud sa mga hinuhulitan niato. Taano sinda ta indiperente? Halimbawa, an sarong dahelan kan lakop na pagkadaing labot sa mga lugar sa Europa iyo an maraot na rekord kan falsong relihion. An mga tawo dai na nakamamate na an relihion may lugar pa sa saindang buhay, ni gusto pa man nindang makilabot dian. Dapat kitang magin madaling makibagay, na nakikipag-olay sa mga tawo manongod sa mga bagay na nakaaapektar sa sainda, siring kan kadaihan nin trabaho, salud, krimen, dai pagpahunod, palibot, asin huma nin guerra.

Sa satong introduksion sa kagharong, puede niatong sambiton an sarong bagay na pinagkakainteresan sa lokal. Iyan an pinagmaigotan na gibohon ni Dietmar kan sia naghuhulit sa sarong baryo na daing gayo sia nagigin mapanggana. An sarong residente nagsabi na an baryo nakaeksperyensia nin sarong mamondong pangyayari kan nakaaging aldaw. Sa kada pinto pakatapos kaiyan, si Dietmar nagpahayag nin sinserong kamondoan sa mamondong pangyayari. “Bigla na sana, an mga tawo nagpoon na magtaram,” an sabi nia. “An mamondong pangyayari nasa isip kan gabos. Nagkaigwa ako nin dakol na marahay na pakikipag-olay kan aldaw na idto huli ta ako nagpaheling nin interes sa saindang buhay.”

Dapat niatong patotoohan manongod sa Kahadean an mga tawo saen man sinda. An impormal na pagpatotoo tibaad magin mabunga, asin puede niatong patoodon an satong sadiri sa aktibidad na ini paagi sa paggamit kan mga suhestion na itinatao sa mga publikasyon na basado sa Biblia. An kagayagayahan puedeng ibunga kan nagkapirang makikatood na tataramon o kan pagpasakamot nin mga kopya kan mga magasin na Torrengbantayan asin Awake! sa kagharong. Kun kita nagdalaw liwat asin nakapoon na magkondukta nin pag-adal sa Biblia sa sarong interesadong tawo, tibaad makakua kita nin rekomendasyon paagi sa paghapot: “Igwa kamong kamidbid na gustong mag-adal sa Biblia?” Ini puedeng gumiya sa pag-establisar nin saro pang pag-adal sa Biblia. Sa paano man, magin positibo kita, na mapagngayongayong nananarig ki Jehova, na dai tinotogotan na padesganaron kita kan pagkadaing labot.

Pagparigon sa Boot Hale sa Iba

Si Jürgen asin Christiane labi nang 30 taon sa pagpapayunir asin gibohon na nagbibiahe. Nagkaigwa sinda kaidto nin asignasyon na kalabot an paghuhulit sa sarong lugar na an kadaklan na tawo daing labot asin matagas. Kanigoan an paghimuyawot ni Jürgen asin kan saiyang agom nin pagparigon sa boot! Pero, sa dai maaraman na dahelan, an iba sa kongregasyon dai naasikaso an saindang pangangaipo.

Kaya aram ni Jürgen gikan sa eksperyensia na “an nagkapirang payunir nasasakitan. Sinda nangangaipo nin pagparigon sa boot hale sa kamagurangan asin ibang mga parahayag.” Sinabihan nin Dios si Moises na parigonon an boot asin pakosogon si Josue. (Deuteronomio 3:​26-​28) Asin an mga Kristiano maninigong magin gikanan nin pagparigon sa boot sa lambang saro. (Roma 1:​11, 12) An mga parahayag kan Kahadean puedeng parigonon an boot kan mga nasa pambilog na panahon na paglilingkod paagi sa nakaparirigon na mga tataramon asin paagi sa pag-iba sa sainda sa ministeryo sa panapanahon.

An Kagayagayahan ni Jehova—Satong Kuta

An mga Kristiano na ginamit an kadaklan kan saindang buhay bilang mga payunir o misyonero, naglilingkod sa Bethel, o nagdadalaw sa mga kongregasyon sa gibohon na nagbibiahe nakadiskobre na an kadaklan na problema sa halipot sanang panahon, alagad an nagkapira naghahaloy. Dawa an nagkapirang problema na garo baga dai nahahale dai maninigong makahale kan satong kagayagayahan. Si Ramon, na naglingkod sa destino sa ibang nasyon sa laog nin labing 45 taon, nagsusuherir na kun kita pinamomondo nin mga problema, “maninigo niatong isipon an dakol na bendisyon na yaon sa sato asin an rinibo pa na nag-aagi nin mas dakulang mga kasakitan.” Tunay nanggad, an mga kasakitan naeeksperyensiahan kan satong mga kapagtubod sa bilog na kinaban, asin si Jehova talagang nagmamakolog sa sato gabos.​—1 Pedro 5:​6-9.

Kun siring, kun an satong personal na mga kamugtakan nagtotogot sa sato na makikabtang sa pambilog na panahon na paglilingkod asin magdanay dian, padanayon niato an satong kagayagayahan paagi sa pagsarig sa satong langitnon na Ama. Pinakokosog nia an saiyang mga lingkod, asin maninigong girumdomon niato gabos na ‘an kagayagayahan ni Jehova iyo an satong kuta.’​—Nehemias 8:10.

[Retrato sa pahina 21]

“An sakong pagmate asin mga gusto bakong arog kahalaga kan gibohon”

[Retrato sa pahina 22]

‘Sinasabi niamo ki Jehova an samong namamatean dangan ipinababaya niamo sa saiya an mga bagay’

[Mga retrato sa pahina 23]

“Gibohon an pinakamarahay sa lambang situwasyon. An kada aldaw tibaad puedeng magpalataw nin dawa sarong oportunidad na omawon si Jehova”

[Retrato sa pahina 23]

“Paagi sa pagtagal sa mga pagbalo, puede akong magkaigwa nin kabtang na patunayan na sala si Satanas”

[Mga retrato sa pahina 24]

“An nagkapirang payunir nasasakitan. Sinda nangangaipo nin pagparigon sa boot hale sa kamagurangan asin ibang mga parahayag”

[Retrato sa pahina 24]

“Maninigo niatong isipon an dakol na bendisyon na yaon sa sato”