Kun Paano Tatabangan an mga May Hilang sa Isip

Tibaad dai ta aram an gigibuhon pag an sarong amigo ta igwa nin hilang sa isip. Pero maipapahiling niyato na talagang nagmamakulog kita paagi sa pagtabang sa satong amigo na makayanan an saiyang nakakapurisaw na hilang. Paano?

“[Magin] andam tulos na magdangog.”—SANTIAGO 1:19.

An saro sa pinakamarahay na paagi na matatabangan mo an saimong amigo iyo an pagdangog pag may gusto siyang sabihon. Dai mo man kaipuhan na magsimbag sa gabos na sinasabi niya. Ipamati saiya na nagdadangog ka, asin na nagmamalasakit ka sa saiya. Magin mapagsabot sa namamatian niya, asin likayan na magkongklusyon tulos o magin mapaghusgar. Tandaan na tibaad makapagsabi siya nin mga bagay na dai niya man tinutuyo asin na sa huri pagbabasulan niya.—Job 6:2, 3.

“Magtaram na may pagranga.”—1 TESALONICA 5:14.

Tibaad napupurisaw an saimong amigo, o tibaad namamatian niyang mayo na siyang halaga. Paagi sa pag-asigurar sa saiya na nagmamakulog ka, puwede mo siyang maranga asin mapakusog, dawa kun dai mo talaga aram an sasabihon.

“An tunay na amigo nagpapahiling nin pagkamuot sa gabos na panahon.”—TALINHAGA 17:17.

Magtao nin praktikal na tabang. Imbes na isipon na aram mo na man kun paano siya tatabangan, maghapot kun ano an puwede mong gibuhon. Kun nasasakitan an amigo mo na sambiton kun ano talaga an kaipuhan niya, purbaran na magtao nin praktikal na suhestiyon—sarong bagay na magigibo nindong magkaibanan arog nin paglakaw-lakaw. O puwede mo man siyang tabangan sa pagsaod, paglinig, o sa iba pang gibuhon.—Galacia 6:2.

“Magin mapasensiya.”—1 TESALONICA 5:14.

May mga pagkakataon na tibaad bakong handang makipag-ulay an saimong amigo. Asiguraron sa saiya na gustong-gusto mong magdangog saiya pag gusto niyang makipag-ulay. Dahil sa hilang niya, tibaad may mga masabi o magibo siyang makulog sa saimo. Tibaad kanselaron niya an mga plano nindo o kaya magin iritable siya. Magin mapasensiya asin mapagsabot mantang tinatawan mo siya kan tabang na kaipuhan niya.—Talinhaga 18:24.

“Sinisigurado ko na magin saro akong amigang maaasahan kan amiga ko. Dawa ngani dai ko man masosolusyunan an mga problema niya, pirmi kong hinihinguwang magdangog sa mga sasabihon niya. Kun minsan an kaipuhan niya man sana palan saro na madangog sa saiya para maggian an pagmati niya.”—Farrah,a may amigang igwa nin eating and anxiety disorder saka clinical depression.

“May amiga akong mabuuton saka pirming positibo. Inimbitaran niya akong magkakan sa harong ninda. Mamumuton siyang marhay kaya nagin madali sa sako na sabihon an mga namamatian ko. Talagang napakusog ako ka’yan!”—Ha-eun, may clinical depression.

“Mahalagang marhay an pagigin mapasensiya. Pag may ginigibo an agom ko na nakakapauyam sako, ipinapagirumdom ko sa sadiri ko na dahil ’to sa hilang niya asin na bako man talaga siyang arog kaiyan. Nakakatabang ’yan sako na dai maanggot asin na magin mas makonsiderasyon sa saiya.”—Jacob, an agom igwa nin clinical depression.

“Nagin dakulaon na tabang saka pampakusog sako si agom. Pag haros dai ko na makaya an kapurisawan ko, nungka niya akong pigpipirit na gibuhon an ano man na habo kong gibuhon. Dahil kaiyan, minsan dai niya na nagigibo su mga bagay na gusto niya kutang gibuhon. Espesyal siyang marhay sako dahil talagang matinao siya saka bakong makasadiri.”—Enrico, may anxiety disorder.