Ano an Sinasabi kan Bibliya Manungod sa Pagtao?

An simbag kan Bibliya

Dinadagka kita kan Bibliya na magtao nin gikan sa buot asin nin may tamang motibo. Nakikinabang sa siring na pagtao bako lang an nag-aako kundi pati man an nagtatao. (Talinhaga 11:25; Lucas 6:38) Sinabi ni Jesus: “Igwang urog na kaugmahan sa pagtao kisa sa pag-ako.”—Gibo 20:35.

Nuarin kapaki-pakinabang an pagtao?

Kapaki-pakinabang an pagtao pag iyan ginigibo nin gikan sa buot. Sinasabi kan Bibliya: “Gibuhon kan lambang saro an uyon sa napagdesisyunan niya sa saiyang puso, na dai nag-aalangan o napipiritan, huli ta namumutan nin Diyos an maugmang nagtatao.”—2 Corinto 9:7, nota sa ibaba.

An gikan sa pusong pagtao kabtang kan “pagsamba” na inuuyunan nin Diyos. (Santiago 1:27) An tawong bukas-palad na nagtatabang sa mga nangangaipo nakikipagtabangan sa Diyos, na ibinibilang iyan na pagpautang sa Saiya. (Talinhaga 19:17) Sinasabi kan Bibliya na an Diyos mismo an mabalos sa nagtatao.—Lucas 14:12-14.

Nuarin nagigin sala an pagtao?

Kun iyan ginigibo huli sa makasadiring motibo. Halimbawa:

Para pahangaon an iba.—Mateo 6:2.
Para mag-ako nin karibay.—Lucas 14:12-14.
Para bakalon an kaligtasan.—Salmo 49:6, 7.

Kun sinusuportaran kaiyan an mga bagay na dai inuuyunan nin Diyos. Halimbawa, bakong tama na tawan mo an saro nin kuwarta na gagamiton niya sa pagsugal, pagdroga, o pagburat. (1 Corinto 6:9, 10; 2 Corinto 7:1) Bako man tama na magtao sa saro na kayang magtrabaho pero habong magtrabaho.—2 Tesalonica 3:10.

Kun nakakaulang na iyan sa mga paninimbagan na itinao nin Diyos. Itinutukdo kan Bibliya na dapat sustentuhan kan payo nin pamilya an saiyang pamilya. (1 Timoteo 5:8) Bako nang tama kun an sarong payo nin pamilya sigeng tao sa iba pero napapabayaan na niya an saiyang pamilya. Kinokondenar man ni Jesus an mga habong magsustento sa saindang may edad nang mga magurang, na idinadahilan na an gabos nindang pagsadiri “sarong dulot na idinusay sa Diyos.”—Marcos 7:9-13.

Mga teksto manungod sa pagtao

Talinhaga 11:25, NWT: “An tawong bukas-palad mag-uuswag, asin an siisay man na nagpapaginhawa sa iba, papaginhawahon man siya.”

Kahulugan: Nakikinabang sa pagtao bako lang an nag-aako kundi pati man an nagtatao.

Talinhaga 19:17, NWT: “An saro na nagpapahiling nin kabuutan sa tawong hamak nagpapautang ki Jehova, asin babayadan Niya siya sa mga ginibo niya.”

Kahulugan: Para sa Diyos may utang siya sa mga bukas-palad na nagtatabang sa mga nangangaipo, asin nanunuga siya na babayadan niya iyan.

Mateo 6:2: “Kun nagtatao ka nin tabang sa mga pobre bilang pagpahiling nin pagkahirak, dai ka magpatanog nin trumpeta sa inutan mo, arog kan ginigibo kan mga parasagin-sagin . . . tanganing umawon sinda nin mga tawo.”

Kahulugan: “Dai kita nagtatao para lang pahangaon an iba.”

Gibo 20:35: “Igwang urog na kaugmahan sa pagtao kisa sa pag-ako.”

Kahulugan: Nagtatao nin kaugmahan an gikan sa pusong pagtao.

2 Corinto 9:7: “Gibuhon kan lambang saro an uyon sa napagdesisyunan niya sa saiyang puso, na bakong magabat an buot o napipiritan, huli ta namumutan nin Diyos an maugmang nagtatao.”

Kahulugan: An gikan sa buot na pagtao nakakapaugma sa Diyos.