Pampamilyang Pag-adal na Nagtatao nin Kagayagayahan

“Nin huli sa kaaraman an panlaog na mga kuarto mapapano nin gabos na mahal na marhay asin marahay na mga bagay na mahalaga,” sabi kan Biblia. (Talinhaga 24:4) An mahal na marhay na mga bagay na ini na mahalaga bako sanang materyal na mga kayamanan kundi kabale an tunay na pagkamoot, diosnon na takot, asin makosog na pagtubod. An siring na mga kualidad tunay na nagbubunga nin napaoswag an kualidad na buhay pampamilya. (Talinhaga 15:​16, 17; 1 Pedro 1:7) Pero, tanganing magkaigwa kaiyan, kaipuhan niatong ilaog an kaaraman nin Dios sa satong kairiba sa harong.

AN PAYO kan pamilya iyo an may paninimbagan na idoon an kaaraman na ini sa mga miembro kan pamilya. (Deuteronomio 6:​6, 7; Efeso 5:​25, 26; 6:4) An saro sa pinakamarahay na mga paagi na magibo ini iyo an sarong regular na pampamilyang pag-adal. Kanigoan kawiliwili ini para sa mga partisipante kun kinokonduktahan an pag-adal sa paagi na kapwa nakapagtotokdo asin magayagaya! Kun siring, estudyaran niato an nagkapirang kaipuhan sa pagkondukta nin sarong epektibong pampamilyang pag-adal.a

An pampamilyang pag-adal pinakaepektibo kun iyan regular. Kun pababayaan na patibasang sana o daing kaplanoplano an pagdesisyon, iyan posibleng sa pinakamarahay na kamugtakan magin bihira. Kaya dapat nindong ‘tuboson an panahon’ para sa pag-adal. (Efeso 5:​15-17) An pagpili nin regular na panahon na kombenyente para sa gabos puedeng magin angat. “Nasakitan kaming papagdanayon na regular an samong pampamilyang pag-adal,” an pagtuga nin sarong payo nin pamilya. “Prinobaran niamo an laen-laen na panahon sagkod na sa katapustapusi nakakua kami nin panahon na medyo banggi na na angay sa samo. Ngonyan regular na an samong pampamilyang pag-adal.”

Basta makakua na kamo nin angay na panahon, mag-ingat na dai togotan an mga disturbo na halean nin oras an pag-adal. “Kun may umabot na mga bisita mantang kami nag-aadal,” an nagigirumdoman ni Maria,b na ngonyan 33 anyos na, “inaagda sinda ni Tatay na maghalat sagkod na matapos an pag-adal. Asin kun dapit sa mga apod sa telepono, sinasabihan nia sana an tawo na maapod sia pagkatapos.”

Minsan siring, ini dai nangangahulogan na dai na puedeng magliwat. Puedeng magkaigwa nin mga emerhensia o pagkanorongod, asin tibaad kinakaipuhan na kanselaron o idigson an pag-adal paminsanminsan. (Eclesiastes 9:​11) Alagad mag-ingat na dai togotan an arin man kaini na raoton an saindong pinagkatodan.​—Filipos 3:​16.

Maninigong gurano kalawig an pag-adal? Si Robert, na mapangganang nagpadakula nin sarong aking babae asin sarong aking lalaki, nagsasabi: “An samong mga pag-adal sa parate naglawig nin sarong oras. Kan sadit pa an mga aki, pinagmaigotan niamong padanayon an saindang interes sa laog kan sarong oras paagi sa pagkonsiderar nin manlaenlaen na bagay, siring baga nin nagkapirang parapo sa artikulong pag-aadalan sa An Torrengbantayan, piniling haralipot na kabtang kan Biblia, asin pirang kabtang kan ibang publikasyon.” Nagigirumdoman ni Maria: “Kan an duwa kong tugang na babae asin ako saradit pang marhay, mga 20 minutos an pag-adal mi duwa o tolong beses kada semana. Mantang nagdadakula kami, an semanal na pampamilyang pag-adal niamo naglawig nin mga sarong oras.”

Ano an Maninigo Niatong Pag-adalan?

An pag-estudyar sa hapot na ini kun gabos yaon para sa pag-adal magbubunga nin pagkadiskontento asin pagkawara nin mahalagang panahon sa pag-adal. Kun arog kaiyan an kamugtakan, an mga aki mayong espesipikong bagay na lalaoman sa maabot asin dai mahahaloy mawawaran nin interes. Kaya patienot na pumili nin saro sa mga publikasyon kan Sosyedad na eestudyaran.

“An fiel asin maimbod na oripon” nagtagama nin kadakol na publikasyon na mapagpipilian. (Mateo 24:​45-47) Tibaad puede nindong gamiton an sarong libro na dai pa napag-adalan kan pamilya. Asin kanigoan kawiliwiling konsideraron an piling mga kabtang kan Insight on the Scriptures kun an mga tomong ini makukua sa saindong lenguahe! Halimbawa, puede nindong repasohon an artikulo manongod sa Pamanggihan nin Kagurangnan durante kan mga semana bago an Memorial. An dakol na pamilya naoogmang andamon an Pag-adal sa An Torrengbantayan para sa semana. Alagad an sekondaryong mga artikulo sa An Torrengbantayan nagtatao man nin marahayon na materyal para sa pag-adal. An payo kan pamilya, na nakaaaram kan espirituwal na mga pangangaipo kan pamilya, nasa pinakamarahay na kamugtakan na magdesisyon kun arin na mga publikasyon an maninigong pag-adalan.

“Permi niamong pinag-adalan an publikasyon na pinili nin patienot,” an nagigirumdoman ni Maria. “Alagad kun magkaigwa nin hapot o lumataw an sarong situwasyon sa eskuelahan, dangan minabalyo kami sa aplikableng impormasyon.” An nangongorog na mga pinaghahaditan, siring baga kan mga problemang inaatubang nin mga hoben sa eskuelahan, pagdi-date, ekstrakurikular na mga aktibidad, asin iba pang kaagid kaiyan, minalataw. Kun mangyari ini, pumili nin mga artikulo o publikasyon na nagtataong atension sa mga problemang yaon. Kun maheling nindo an impormasyon sa pinakabagong luwas kan An Torrengbantayan o Awake! na mawot nindong kobrehan tolos kaiba kan pamilya, dai mag-alangan na iareglo iyan. Siempre, mamawoton nindong ipaaram nin patienot sa mga miembro kan pamilya an pagbabago. Alagad siertohon na bumalik sa nakaiskedyul na materyal kun naasikaso na an pangangaipo.

Papagdanayon na Trangkilo an Palibot

Nakakamtan nanggad an pakanood sa matoninong na mga kamugtakan. (Santiago 3:18) Kaya kultibaron an pamugtak, pero magalang, na palibot. An sarong payo nin pamilya sa Estados Unidos nagsasabi: “Baga man kami mag-adal sa sala o sa beranda, pinagmamaigotan niamo na tumukaw na medyo harani sa lambang saro imbes na tumukaw na magkararayo sa sarong dakulang kuarto. Para sa samo, ini nagbubunga nin nagpapaogmang pagmate.” Asin nagigirumdoman ni Maria na may dakulang kapadangatan: “Tinotogotan kaming magturugang na babae na pumili kun saen na parte kan harong mi gigibohon an pag-adal sa semanang iyan. Pinagin komportable kaini an samong pagmate.” Tandaan na an tamang liwanag, marahay na pagkaareglar sa mga tukawan, asin maaliwalas saka aregladong palibot gabos nagkokontribwir sa katrangkilohan. An pagkaigwa nin meryenda para sa pamilya pakatapos kan pag-adal nakatatabang man na magin magayagaya an banggi.

May mga pamilya na iiniiba pa ngani sa saindang pag-adal an ibang mga pamilya paminsanminsan, na nagdadagdag sa pagigin interesante saka sa pagkalaenlaen kan mga komento. Kun iniimbitaran an mga bagohan sa katotoohan na makikabtang sa areglong ini, sinda makikinabang sa pag-obserbar sa may kabatidan na payo nin pamilya na nagkokondukta nin pampamilyang pag-adal.

Gibohon na Buhay an Biblia

Gibohon na nakaaanimar an mga panahon nin pag-adal para sa mga aki, asin galaga nindang hihimuyawoton an mga iyan. Magigibo nindo ini paagi sa pag-enkaminar sa saradit na aki na magdrowing nin mga eksena sa Biblia. Kun angay, ipaakto sa mga aki an mga pangyayari asin drama sa Biblia. Kun may saradit na aki dai kinakaipuhan na sunodon an pormal na hapot-simbagan na paagi. An pagbasa o pag-estorya manongod sa mga personahe sa Biblia magayagayang paagi na idoon an diosnon na mga prinsipyo. Si Robert, na nasambitan kasubago, nakagigirumdom: “Kun minsan binabasa niamo an halipot na mga kabtang kan Biblia, na nagsasarosalida, na binabasa an manlaenlaen na ‘nagtataram’ na personahe na nakaasignar.” Puedeng agdahon an mga aki na pumili kan personahe na gusto nindang iakto sa pagbasa.

Paagi sa paggamit nin mga mapa asin tsart matatabangan an mas matuang mga aki na imahinaron an mga lugar asin nagpapamidbid na mga kabtang kan daga na pinangyarihan kan pinag-oolayan. Malinaw nanggad, ginagamitan nin dikit na imahinasyon, an pampamilyang pag-adal puedeng gibohon na nakaaanimar asin sarisari. Asin an mga aki magkakaigwa nin pagmawot sa Tataramon nin Dios.​—1 Pedro 2:​2, 3.

Tabangan an Gabos na Magpartisipar

Tanganing maogma an mga aki sa pag-adal, dapat na mamatean ninda na sinda kalabot. Minsan siring, an pakadagka sa mga aki na laen-laen an edad na magpartisipar puedeng magin angat. Alagad an sarong prinsipyo sa Biblia nagsasabi: “Sia na nangengenot, gibohon nia iyan nin odok sa boot.” (Roma 12:8) An pagigin entusiastiko nakatatabang, huli ta an entusiasmo nakaoolakit.

Ilinalabot ni Ronald an saiyang limang taon na aking babae, si Dina, paagi sa pagpabasa kaini kan mga subtitulo kan materyal sa pag-adal asin pagpakomento sa mga retrato. Mantang naghaharani an Memorial kan kagadanan ni Cristo kan nakaaging taon, nagkonsentrar sia sa pertinenteng mga ilustrasyon sa librong The Greatest Man Who Ever Lived.c Sabi nia: “Nakatabang ini sa saiya na masabotan an kahulogan kan okasyon.”

Manongod sa saiyang dies anyos na aking babae, si Misha, si Ronald naggigibo nin dugang na lakdang. “Si Misha nag-oswag na sagkod sa punto na bako sanang nasasabotan nia kun ano an mga ilustrasyon kundi an kahulogan na ilinaladawan kaini,” an sabi ni Ronald. “Kaya kan ineestudyaran an librong Revelation​—Its Grand Climax At Hand!,d nagkonsentrar kami sa kahulogan kan mga ilustrasyon, asin nakatabang ini sa saiya.”

Mantang nagtitin-edyer an mga aki, agdahon sinda na iaplikar sa praktikal na paagi an materyal na ineestudyaran. Kun lumataw an mga hapot durante kan pag-adal, mag-asignar nin mga kabtang na sisiyasaton. Ginibo iyan ni Robert kan an saiyang 12 anyos na aki, si Paul, maghapot manongod sa bagong mabilog na klab sa eskuelahan may labot sa kawat na Dungeons and Dragons. Si Paul asin an iba pa sa pamilya naghanap nin impormasyon na ginagamit an Watchtower Publications Index, asin rinepaso ninda iyan sa saindang pampamilyang pag-adal. “Bilang resulta,” an sabi ni Robert, “si Paul tolos na nakasabot na an kawat sala para sa mga Kristiano.”

Si Robert nagtatao man nin asignasyon na sisiyasaton sa ibang mga panahon. An saiyang agom, si Nancy, nakagigirumdom: “Kan siyasaton mi an mga apostol ni Jesus, an kada saro sa samo inaasignaran nin sarong apostol kada semana. Kanigoan kanakapupukaw sa boot na maheling an mga aki na entusiastikong iinaatubang an saindang report sa pampamilyang pag-adal!” An paggibo kan saindang sadiring pagsiyasat asin paghiras kan impormasyon sa pamilya nakatatabang sa mga aki na ‘dumakula kaiba ni Jehova.’​—1 Samuel 2:​20, 21.

An paghapot​—hapot sa punto de vista siring man naggigiyang mga hapot—​saro man na marahay na paagi na ilabot an mga aki. An Pangenot na Paratokdo, si Jesus, naghapot nin mga hapot sa punto de vista, siring kan, “Ano sa paghona mo?” (Mateo 17:25) “Kun an siisay man sa samo may hapot, nungka kaming sinimbag nin direkta kan samong mga magurang,” an nagigirumdoman ni Maria. “Permi sindang naghahapot nin naggigiyang mga hapot, na tinatabangan kami na mangatanosan sa bagay.”

Makikomunikar​—Dai Magin Nakaaanggot!

An kagayagayahan sa pampamilyang pag-adal napaooswag kun an gabos na yaon ikinakokomunikar an saindang mga punto de vista asin pagmate na dai natatakot na tuyaon. Alagad “an marahay na komunikasyon durante kan pampamilyang pag-adal posible sana kun an mga linya nin komunikasyon bukas sa ibang panahon,” an sabi nin sarong ama. “Dai nindo puedeng sagin gibohon iyan para sana sa panahon nin pag-adal.” Likayan nanggad an dai iniisip na mga komento na nakakokolog, siring kan, ‘Iyan sana? Paghona ko importante’; ‘Sa rungaw iyan’; ‘Bueno, ano an linalaoman mo? Sa bagay aki ka sana.’ (Talinhaga 12:18) Magin madinamayon asin maheherakon sa saindong mga aki. (Salmo 103:​13; Malaquias 3:17) Makanompong nin kaogmahan sa sainda, asin suportaran sinda mantang sinda naghihingoang iaplikar an saindang nanonodan.

An kamugtakan kan pampamilyang pag-adal maninigo na magtogot sa isip kan aki na magin andam na umako nin pagtotokdo. “Kun ponan nindong korehiran an mga aki,” an paliwanag nin sarong mapangganang magurang nin apat, “magigin medyo bakong makikatood an nagdadangog sa saindo.” Sa siring na kamugtakan, an impormasyon posibleng dai makatadom. Kaya likayan na gibohon an mga panahon sa pag-adal na mga sesyon para sa pagdisiplina asin pagpadusa. Kun iyan kaipuhan, itao iyan pakatapos asin indibiduwalmente.

Kapakipakinabang an Paghihingoa

An pagtogdok nin sarong pamilya na mayaman sa espirituwal nangangaipo nin panahon asin paghihingoa. Alagad ipinahayag kan salmista: “Uya! An mga aki mana hale ki Jehova; an bunga kan tulak sarong balos.” (Salmo 127:3) Asin an mga magurang pinagkatiwalaan kan paninimbagan na “padakulaon [an mga aki] sa disiplina asin pagtatanos nin isip ni Jehova.” (Efeso 6:4) Kaya paoswagon an mga abilidad sa pagkondukta nin epektibo asin magayagayang pampamilyang pag-adal. Gibohon an bilog nindong makakaya na itao an “daing kasalak na gatas kan tataramon,” tanganing an saindong mga aki ‘magtalubo sa kaligtasan.’​—1 Pedro 2:​2; Juan 17:3.

[Mga Nota sa Ibaba]