Pag-agom—Sarong Regalo Hali sa Diyos

1, 2. (a) Ano an mga inaasahan kan mga bago pa sanang kasalon? (b) Anong mga hapot an pag-uulayan niyato sa kapitulong ini?

ISIPON an ugmahon na nobya asin nobyo sa aldaw kan saindang kasal. Excited sinda sa magigin buhay ninda saka dakul sindang plano asin pangarap sa buhay. Inaasahan ninda na habangbuhay sindang maugmang mag-iibanan.

² Pero dakul na mag-agom an sa puon sana marahay an pag-ibanan. An mga mag-agom kaipuhan na magpagiya sa Diyos tanganing magin maugma asin panghabangbuhay an pag-ibanan ninda. Kaya pag-ulayan niyato an simbag kan Bibliya sa mga hapot na ini: Ano an mga bentaha nin pag-agom? Kun maagom ka, ano an makakatabang sa saimo para makapili nin marahay na maaagom? Paano ka magigin marahay na agom? Asin ano an makakatabang para magtagal an pag-ibanan nindo?—Basahon an Talinhaga 3:5, 6.

 3. Sa hiling mo, kaipuhan daw na mag-agom tanganing magin maugma? Ipaliwanag.

³ May mga nag-iisip na magigin maugma sana an sarong tawo kun may agom siya. Pero bako iyan totoo. Sinabi ni Jesus na an pagigin daing agom puwedeng magin sarong regalo. (Mateo 19:11, 12) Asin sinabi ni apostol Pablo na igwa nin mga bentaha an pagigin daing agom. (1 Corinto 7:32-38) Nasa saimo kun maagom ka. Dai ka dapat mag-agom dahil sana ta pinipirit ka kan saimong mga amigo o mga kapamilya, o dahil iyan an nakatudan sa saindong kultura.

 4. Ano an mga bentaha kun marahay an pag-ibanan kan mag-agom?

⁴ Sinasabi kan Bibliya na an pag-agom saro man na regalo hali sa Diyos asin may mga bentaha iyan. Sinabi ni Jehova manungod sa inot na lalaking si Adan: “Bakong marahay para sa lalaki na padagos na magsolo-solo. Magibo ako para sa saiya nin sarong katuwang, bilang saiyang kaiba-iba.” (Genesis 2:18, NW) Linalang ni Jehova si Eva para magin agom ni Adan, asin sinda an nagin inot na pamilya nin tawo. Pag an mag-agom may mga aki, an saindang marahay na pag-ibanan makakatabang para mapadakula ninda sa marahay na paagi an saindang mga aki. Pero bako sanang pagkaigwa nin aki an katuyuhan nin pag-agom.—Salmo 127:3; Efeso 6:1-4.

5, 6. Paano magigin arog sa “lubid na tinulo-tulo” an pag-ibanan kan mag-agom?

⁵ Si Hading Solomon nagsurat: “Mas marahay an duwa kisa sa saro huling igwa sinda nin marahay na balos sa saindang pagpapagal. Huli ta kun an saro matumba, matatabangan siya kan kaibanan niya na bumangon. Pero ano an mangyayari sa saro na natumba kun mayo nin siisay man na matabang sa saiya na bumangon? . . . Asin an lubid na tinulo-tulo dai tulos mapapatod.”—Parahulit 4:9-12, NW.

⁶ Pag marahay an pag-ibanan nin mag-agom, nagigin mag-best friend sinda na nagtatabangan, nagpapakusog, asin nagpoprotektar sa kada saro. An pagkamuot makakapakusog sa relasyon nin mag-agom, pero magigin mas makusog iyan kun an mag-agom nagsasamba ki Jehova. Paagi kaiyan, an saindang pag-ibanan magigin arog sa “lubid na tinulo-tulo” na higot an pagkalubid. Mas matibay iyan kisa sa lubid na duwahan sana. Magigin matibay an pag-ibanan nin mag-agom kun kaiba si Jehova.

7, 8. Anong sadol manungod sa pag-agom an itinao ni Pablo?

⁷ Pag ikinasal na an magkailusyon, puwede na nindang mapaniguan an natural na seksuwal na pangangaipo kan lambang saro. (Talinhaga 5:18) Pero kun an saro maagom tangani sanang mapaniguan an pagmawot na ini, posibleng marhay na mapasala siya sa pagpili nin maaagom. Iyan an dahilan kaya sinabi kan Bibliya na an saro dapat na mag-agom kun lampas na siya sa “pagkahoben,” an panahon kun nuarin makusugon an seksuwal na mga pagmawot. (1 Corinto 7:36) Mas marahay na palampason nguna an panahon na iyan bago mag-agom. Paagi kaiyan, mas makakaisip nin malinaw an saro asin makakagibo nin mas marahay na desisyon.—1 Corinto 7:9; Santiago 1:15.

⁸ Kun nag-iisip ka nang mag-agom, marahay na magin realistiko asin isipon na gabos na nag-aagom nagkakaigwa nin mga kadipisilan. Sinabi ni Pablo na an mga nag-aagom “magkakaigwa nin bagong mga kasakitan sa buhay.” (1 Corinto 7:28) Nagkakaproblema dawa an mag-agom na marahayon an pag-ibanan. Kaya kun magdesisyon kang mag-agom, magin madunong sa pagpili nin magigin agom.

9, 10. Ano an mangyayari kun mag-agom kita nin saro na dai nagsasamba ki Jehova?

⁹ Sa pagpili nin magigin agom, ini an mahalagang prinsipyo sa Bibliya na dapat tandaan: “Dai nindo pagtugutan na masakalan kamo na bakong timbang kaiba nin mga dai nagtutubod.” (2 Corinto 6:14) An ilustrasyon na ini kinua sa pag-uma. An duwang hayop na magkalain na marhay an kadakulaan o kusog dai pag-iibanon kan parauma sa sarong sakal para ipangtrabaho sa uma. Bako iyan marahay para sa duwang hayop ta pareho sindang masasakitan. Arog man kaiyan pag an sarong nagsasamba ki Jehova mag-agom nin saro na dai nagsasamba sa Saiya. Siguradong magkakaigwa sinda nin dakul na problema. Kaya nagtao sa sato an Bibliya nin madunong na sadol na mag-agom sana nin sarong “parasunod kan Kagurangnan.”—1 Corinto 7:39.

¹⁰ Kun minsan, iniisip kan ibang Kristiyano na mas marahay nang mag-agom nin dai nagsasamba ki Jehova kisa magsolo. Pero kun babaliwalaon niyato an konseho kan Bibliya, makukulgan lang kita asin mamumundo. Bilang mga parasamba ni Jehova, an paglilingkod ki Jehova an pinakamahalaga sa buhay ta. Ano daw an mamamati mo kun dai mo kaiba an saimong agom sa pinakamahalagang bagay na iyan sa buhay mo? Dakul an nagdesisyon na dai na lang mag-agom kisa makaagom nin saro na dai namumutan si Jehova saka dai naglilingkod sa saiya.—Basahon an Salmo 32:8.

11. Paano ka makakapili nin sarong marahay na agom?

¹¹ Dai man buot sabihon na miling an saro naglilingkod ki Jehova, magigin marahay na siyang agom. Kun nag-iisip ka nang mag-agom, maghanap ka nin saro na talagang gusto mo asin makakasundo mo. Maghalat sagkod na makahanap ka nin saro na kapareho mo nin mga plano sa buhay asin iniinot an paglilingkod sa Diyos. Magtao nin panahon para basahon asin pag-isipan an nakakatabang na mga giya manungod sa pag-agom na makukua sa satong mga publikasyon hali sa maimbod na uripon.—Basahon an Salmo 119:105.

12. Ano an manunudan niyato sa Bibliya may koneksiyon sa pag-agom na ipinagkasundo kan mga magurang?

¹² Sa ibang kultura, mga magurang an nagpipili nin magigin agom kan saindang aki. Mga magurang daa kaya an nakakaaram kun siisay an pinakamarahay para sa saindang aki. Komun an arog kaiyan na kaugalian kan mga panahon kan Bibliya. Kun an kaugalian na iyan an piniling sunudon kan saindong pamilya, matatabangan kan Bibliya an mga magurang na maaraman kun anong mga karakteristiko an dapat nindang hanapon. Halimbawa, kan si Abraham naghahanap nin magigin agom para sa aki niyang si Isaac, bako an kuwarta o estado sa buhay an pighiling niya, kundi kun namumutan kaini si Jehova.—Genesis 24:3, 67; hilingon an Dagdag na Impormasyon 25.

13-15. (a) Paano makakapag-andam an sarong lalaki para magin sarong marahay na agom? (b) Paano makakapag-andam an sarong babayi para magin sarong marahay na agom?

¹³ Kun nag-iisip ka nang mag-agom, dapat mong siguraduhon na handa ka na. Posibleng iniisip mo na handa ka na, pero aramon niyato kun paano ta masasabi na handa na an saro na mag-agom. Tibaad mabigla ka sa mga maaaraman mo.

¹⁴ Ipinapahiling kan Bibliya na bakong pareho an papel kan agom na lalaki asin agom na babayi sa laog nin pamilya. Kaya masasabi ta na bakong pareho an basehan sa pagigin handa nin sarong lalaki o sarong babayi. Kun nag-iisip na an sarong lalaki na mag-agom, dapat haputon niya an saiyang sadiri kun handa na siyang magin payo nin pamilya. Inaasahan ni Jehova na itatao kan agom na lalaki an materyal asin emosyonal na pangangaipo kan saiyang agom asin mga aki. An pinakamahalaga, dapat panginutan kan agom na lalaki an saiyang pamilya sa pagsamba sa Diyos. Sinasabi kan Bibliya na an sarong lalaki na dai inaasikaso an saiyang pamilya “mas maraot pa . . . kisa sa tawong mayong pagtubod.” (1 Timoteo 5:8) Kaya kun ika sarong lalaki na nag-iisip nang mag-agom, pag-isipan kun paano mo masusunod an prinsipyong ini sa Bibliya: ‘Ipreparar mo an saimong trabaho sa luwas, asin andamon mo an gabos sa uma; dangan itugdok mo an saimong harong.’ An buot sabihon, bago ka mag-agom, siguraduhon mo na kaya mo nang magibo an mga inaasahan ni Jehova sa agom na lalaki.—Talinhaga 24:27, NW.

¹⁵ Kun nag-iisip na an sarong babayi na mag-agom, kaipuhan niyang haputon an saiyang sadiri kun baga handa na siya sa mga responsabilidad nin sarong agom na babayi asin nin pagigin ina pa ngani. Sinambit sa Bibliya an pira sa dakul na paagi kun paano inaasikaso nin sarong marahay na agom na babayi an saiyang agom asin mga aki. (Talinhaga 31:10-31) Ngunyan, an iniisip sana kan dakul na lalaki asin babayi iyo an magigibo para sa sainda kan magigin agom ninda. Pero gusto ni Jehova na isipon niyato kun ano an magigibo ta para sa satong magigin agom.

16, 17. Kun nagpaplano ka nang mag-agom, ano an dapat mong pag-isipan?

¹⁶ Bago ka mag-agom, isip-isipon an sinasabi ni Jehova para sa mga agom na lalaki asin babayi. Dai buot sabihon na miling ika an payo nin pamilya puwede ka nang mangulog, sa pisikal man o emosyonal. An sarong marahay na payo nin pamilya inaarog si Jesus, na pirming mapagpadangat saka mabuot sa mga nasa pangangataman niya. (Efeso 5:23) Para man sa babayi, dapat niyang pag-isipan kun ano an buot sabihon nin pagsuportar sa desisyon kan saiyang agom asin nin pakikikooperar sa saiya. (Roma 7:2) Kaipuhan niyang haputon an saiyang sadiri kun baga magigin maugma siyang magpasakop sa sarong bakong perpektong lalaki. Kun sa hiling niya dai niya kaya, tibaad magdesisyon siya na mas marahay kun dai nguna siya mag-agom.

¹⁷ Dapat na mas inuton kan mag-agom an kaugmahan kan saindang agom kisa sa sadiri nindang kaugmahan. (Basahon an Filipos 2:4.) Si Pablo nagsurat: “An lambang saro sa saindo dapat na mamuot sa saiyang agom na babayi siring kan pagkamuot niya sa saiyang sadiri; sa ibong na kampi, an agom na babayi dapat na magkaigwa nin hararom na paggalang sa saiyang agom.” (Efeso 5:21-33) Parehong kaipuhan na mamati kan mag-agom an pagkamuot asin respeto. Pero para magin marahay an pag-ibanan kan mag-agom, mahalaga sa agom na lalaki na mamati niyang iginagalang siya kan saiyang agom, asin mahalaga man para sa agom na babayi na mamati niyang namumutan siya kan saiyang agom.

18. Taano ta kaipuhan na mag-ingat an magkailusyon sa panahon nin pag-ilusyunan?

¹⁸ An pag-ilusyunan dapat na magin maugmang panahon para sa magkailusyon mantang mas binibisto ninda an lambang saro. Iyan man an panahon na kaipuhan nindang magin realistiko asin onesto para makapagdesisyon sinda kun talagang gusto nindang makaibanan an kada saro nin habangbuhay. Sa panahon nin pag-ilusyunan, nanunudan kan lalaki asin kan babayi kun paano makipagkomunikar sa kada saro asin naaaraman ninda kun ano talaga an nasa puso ninda. Mantang nagrararom an saindang relasyon, natural sanang maakit sinda sa kada saro. Pero kaipuhan nindang kontrulon kun paano ninda ipapahiling an saindang pagkamuot bago sinda ikasal tanganing dai sinda makagibo nin imoralidad. An tunay na pagkamuot makakatabang sa sainda na magkaigwa nin pagpupugol sa sadiri asin malikayan na makagibo nin ano man na makakaraot sa relasyon ninda sa kada saro asin ki Jehova.—1 Tesalonica 4:6.

19, 20. Ano an paghiling nin mga Kristiyano sa relasyon nin mag-agom?

¹⁹ Dakul na istorya sa libro asin pelikula an nagtatapos sa enggrande asin maugmang kasal. Pero sa totoong buhay, an kasal kapinunan pa sana. Katuyuhan ni Jehova na magin panghabangbuhay an pag-ibanan nin mag-agom.—Genesis 2:24.

²⁰ Sa ngunyan, ibinibilang nin dakul na temporaryo sana an relasyon nin mag-agom. Madali sanang magpakasal asin madali man na magsuwayan. Pag nagpuon nang magkaproblema, iniisip kan iba na panahon na iyan para bayaan an agom ninda asin tapuson na an saindang relasyon. Pero girumdumon su ilustrasyon sa Bibliya na sarong matibay na lubid na tinulo-tulo. Dai iyan mapapatod dawa butungon nin makusog. Kun an mag-agom mapatabang ki Jehova, magigin panghabangbuhay an pag-ibanan ninda. Sinabi ni Jesus: “An pinagsaro nin Diyos dai pagsuwayon nin siisay man na tawo.”—Mateo 19:6.

21. Ano an makakatabang sa mag-agom na mamutan an lambang saro?

²¹ Gabos kita may mga kakusugan asin kaluyahan. Madalion sana na mahiling an mga kaluyahan kan iba, lalo na an kaluyahan kan satong agom. Kaso dai man kita magigin maugma kun gigibuhon ta iyan. Pero kun an magagayon na kuwalidad kan satong agom an hihilingon ta, magigin maugma kita. Posible daw iyan dawa bakong perpekto an satong agom? Iyo! Aram ni Jehova na bako kitang perpekto, pero an magagayon tang kuwalidad an pighihiling niya. Pa’no na lang kun an mga kaluyahan ta an pigpaparahiling niya. Sinabi kan salmista: “O Jah, kun an mga sala an saimong binabantayan, siisay, O Jehova, an makakatindog sa saimong atubangan?” (Salmo 130:3, NW) Maaarog si Jehova kan mga agom na lalaki asin babayi kun hihilingon ninda an magagayon na mga kuwalidad kan saindang agom asin kun magigin handa sindang magpatawad.—Basahon an Colosas 3:13.

22, 23. Anong marahay na mga halimbawa an ipinahiling ni Abraham asin Sara sa mga mag-agom?

²² Sa pag-agi nin mga taon, puwedeng lalo pang magkusog an relasyon nin mag-agom. Nagin maugma an halawig na pag-ibanan ni Abraham asin Sara bilang mag-agom. Kan sabihon ni Jehova ki Abraham na maghali sa harong ninda sa siyudad nin Ur, posibleng labing 60 anyos na kaidto si Sara. Isipa na sana kun gurano kadipisil para saiya na bayaan an komportable nindang harong tapos mag-istar sa tolda. Pero nagin marahay na amiga asin agom si Sara, saka talagang irinespeto niya si Abraham. Sinuportaran niya an mga desisyon ni Abraham asin nakikooperar siya para magibo iyan.—Genesis 18:12; 1 Pedro 3:6.

²³ Siyempre, dai man buot sabihon na pag marahay an pag-ibanan nindong mag-agom, magigin magkasundo na kamo sa gabos na bagay. Sarong beses, kan dai uyon si Abraham ki Sara, sinabi sa saiya ni Jehova: ‘Dangugon mo siya.’ Ginibo iyan ni Abraham, asin magayon an nagin resulta. (Genesis 21:9-13) Kaya kun may mga pagkakataon na dai kamo nagkakasundo, dai madisganar. Dawa dai kamo nagkakasundo kun minsan, an mahalaga namumutan asin irinerespeto pa man giraray nindo an kada saro.

24. Paano an pag-agom makakatao nin onra ki Jehova?

²⁴ Sa laog kan Kristiyanong kongregasyon, makakahiling ka nin kadakul na mag-agom na maugma sa saindang pag-ibanan. Kun gusto mong mag-agom, tandaan na an pagpili nin magigin agom an saro sa pinakaimportanteng desisyon na gigibuhon mo. May epekto iyan sa bilog mong buhay, kaya magpagiya ki Jehova. Paagi kaiyan, makakapili ka nin mahusay na agom, makakapag-andam ka, saka magkakaigwa kamo nin makusog asin maugmang relasyon na magtatao nin onra ki Jehova.