Nasasamnohan nin Hikaw na Bulawan

POON kan kaenot-enoteng mga panahon, halangkaw nang marhay an pagheling sa bulawan na alahas huli sa halaga asin gayon kaiyan. Kan magin primer ministro sa Egipto, nakaresibi si Jose nin sarong bulawan na kuintas hale ki Faraon. (Genesis 41:42) Si Rebeca tinawan nin sarong bulawan na singsing sa dongo asin duwang bulawan na pulseras, na nagkakantidad ngonyan nin mga $1,400 (E.U.). (Genesis 24:22) Daing duwa-duwa, an mahal na marhay na mga regalong ini inaako kaidto na may pagpasalamat asin isinusulot na may kaogmahan.

An Biblia nagtataram manongod sa piguratibong alahas na labi pa an kantidad kisa kan sa isinulot ni Jose asin Rebeca. An Talinhaga 25:12 nagsasabi: “Sarong hikaw na bulawan, asin sarong alahas na gibo sa pambihirang bulawan, an madonong na parasagwe sa naghihinanyog na talinga.” Kun an sarong parakonseho nagtatao nin sadol basado sa Tataramon nin Dios imbes na sa saiyang sadiring opinyon, sia totoong nagtatao nin sarong mahalagang marhay na regalo. Taano? Huli ta sa katapustapusi an siring na hatol naggigikan ki Jehova mismo. An Biblia nagsasabi sa sato: “An disiplina ni Jehova, O aki ko, dai mo ipagsikwal; asin dai mo ikaongis an saiyang pagsagwe, huli ta an namomotan ni Jehova saiyang sinasagwe, kun paanong an sarong ama nagsasagwe sa aki na saiyang ikinaoogma.” (Talinhaga 3:​11, 12) Kun an naghihinanyog mapakumbabang inaako asin iinaaplikar an hatol, garo man sana nia sinasamnohan an saiyang sadiri nin sarong hikaw na bulawan. Siring iyan sa sinasabi kan ipinasabong na talinhaga sa Biblia: “Maogma an tawo na nakanompong nin kadonongan, asin an tawo na nagkakamit nin pakamansay, huli ta an pagkaigwa kaiyan bilang pakinabang mas marahay kisa pagkaigwa nin pirak bilang pakinabang asin an pagkaigwa kaiyan bilang bunga kisa bulawan mismo.”​—Talinhaga 3:​13, 14.